3
Kaphay Chuanchaymeipu ta Tigayloumei
1 Pitar lev John, tingzyn huayneypui ganv ganvdak kathumh khou, Ravkai khou guang khwan e. 2 Mi khou tei Howgaymei Raengcmun twna kawmei bamv khou, kapui bungpuak khou rui kaphay chuanchaymei bam khwan e. Kamei Ravkai khou guangmei guay khou rui ney tu bam kan khang tingmik pum mbamlou bammeipu khwan e. 3 Kamei Pitar lev John ni gutmei ta how lana, kaney khou ni ney the. 4 Pitar lev John kata zauc ndyangna, "Aney ta zauc o!" twna Pitar rui kakhou sa the. 5 Khoutei ramh khat tii pungh the twna kaney ta zauc the. 6 Tiki Pitar rui, "Akhou daandi kachaekc maek e; tiki akhou naimei ai rui nang khang tii tuang e: Nazareth mei Jisu Khrista zanc khou rui tat tho!" twna sa the. 7 Kumna Pitar rui katuang baanzat baanc sinna kata zay thaulou the. Mi dyng khou tei kaphay khatni kaphaytyang rou titanclou the. 8 Kamei ding laeph laep thauna ding the, kumna tat thau the. Kamei Ravguangc ta thuancna kachakna kaney thei Ravkai lungc khou tei lay gut the. 9 Mi pu tei Ravguangc ta thuancna tat bammei tei how pwkhou, 10 kamei hei How gaymei Chaengmun khou dungcna ney tu bammeipu tei e twmei thay lana, kaniw khang tei charynmei khatni ngakmei rui padik the.
Pitar rui Ravkai khou Chamvdinhmei
11 Solomon Kaisangc twna kawmei bamv khou, mi pu tei rui Pitar lev John ta biancna bam khou, meicnunc tei ngak sakna kaniw daeng khou pak guang the. 12 Meic nunc ta tei how lana, Pitar rui kaniw khou sa the, "Israelmeithiu, tabui swna nangniw ngakna aney ta zauc bam tu cho? Aney pumtan rui hamh e thei aney ravning nthukmei paan rui mi pu ta hei titatlou dat tuang e twna nangniw ning nah cho? 13 Abraham, Isaak, khatni Jakob Racguangc, aniu pupouc nunc Racguangc rui kabangcpu Jisu tik hym tidaiclou kan the. Nangniw rui kata kandih kaipouc nunc khou tii pat kan the. Pilat rui kata mpatlou nii khwan sini, nangniw kata laa zihna kata Pilat hu khou ganc pat kan the. 14 Kamei hei Nthanmei khatni Ravchaptatmei e; tiki nangniw rui kata ganc pat lana, meicdowmei ta tiilou khang nangniw rui Pilat khou ney kan the. 15 Ringhmei tiiloumeipu ta nangniw rui swluai kan the; tiki Ravguangc rui tiringcthaulou dat kan the. Mi tei thaymei nunc kiu aniw hei the. 16 Mi kaphay chuanchaymeipu ta hei tigaylou datmei hei mi pu zanc tuang pumtan rui e; nangniw rui how bammei, mi pu ta tigayloumei hei Jisu khou lwmmei paan rui e.
17 "Chana nunc le, nangniw khatni nangniw tuang kapy nunc rui Jisu khou swlou kanmei tei thay lamc makna sw kan tuang e twmei ai thay e. 18 Khrista hei ryanra khaengv puni twna Ravguangc rui muhzwng nunc mwang khou rui dinc kasuakc guang kanmei tuang the. Mi tei kamei rui tiguang nthuihlou kanmei tuang the. 19 Nangniw paap guay thut maanlou khang, nangniw lunghlaicna hanc guang dat o. 20 Kum pwkhou, chaengh tiringclou datpui ganv Poubauhmei khou rui tii guang puni, kumna nangniw khang suangloumei Khrista Jisu ta kamei rui ndiu guang puni. 21 Ravguangc rui reydouc langloumei katuang nthanmei muhzwng nunc mwang khou rui dinc kasuakcloumei kumcna, ramh guayna damc kathanc dat nimei ganv kiu guang mak saanv, kamei tingkauh thangc bam puni. 22 Mousi rui mi kumna salou e: 'Poubauhmei nangniw Racguangc rui nangniw chana pang khou rui ata kumcnaa muhzwng gaanv khat ta nangniw khou ndiu guang puni. Kamei rui samei guay tei nangniw piu nina e. 23 Mi muczwng lat tei piu makpui mei ta tei Ravguangc mei pang khou rui swmaan puni.' 24 Samuel khatni katangv thangc guangmei Ravguangc lat dinhmei muhzwng nunc rui ni ntaw pat bammei lam khou hei dinc kasuakclou the. 25 Ravguangc rui katuang muczwng guay khou rui tiiloumei latryan guay tei nangniw khang e, khatni 'Nang kikta khou rui ai rui kandihmei maansei guay ta suaihiamlou puni,' twna Abraham khou nrianhloumei tei nangniw khang ni e. 26 Mi zaeng rui, nangniw kathuic nangniw tuang simei chaeng khou rui ngalanc guangna suaihiam laa kan khang, Ravguangc kamei rui kadahloumei kabangcpu ta nangniw khou ndiu guang rey tuang the."