4
Pitar lev John ta Pei khou Zay Guangmei
1 Pitar lev John tei lat sa bammei dyng khou, amuh nunc, a ravkai rigaanv nunc tuang kapypu, khatni Sadduki nunc guang the. 2 Jisu ringcthau dat kan the twna kaney rui meicnunc khou dinc bam tikhou, kaniw lungc puamc the. 3 Kaniw rui kaney ta nym lana, nyan ti thena, kangkai khou bangc thaengclou the. 4 Tiki chamv tei chumei meic mpeyna lwm the, kumna nggaanvmei ching panguh tangc khwan e.
5 Nthuanh thauna Jihudimei kapy nunc, gaanvdaih nunc, khatni Riakdanv tadin nunc Jerusalem khou guang kaduai the. 6 Kumna Tingkuh Annas lev Kaiaphas, John, Alekzandar, khatni Tingkuh kaikhwangmei baihmei guay lev kaniw guang kaduai the. 7 Kaniw rui Latdiutatmei nei ta kaniw hu khou tidinglouna, "Tabui pumtan rui hamh e thei tabui zanc khou rui nang ney mi hei taanh tu cho?" twna kaniw rui thanv the.
8 Pitar tei Bumaengh Nthanmei rui padikna, mundawna sa the, "Meic nunc tuang kapy thiu khatni gaanvdaih thiu, 9 mi katan chuanchaymeipu khou taancloumei gaytaanv lam khou hei thanvna, akumhna kata tigaylou tu cho twna sa e thei, 10 nangniw ni, Israelmei guay ni mi hei thaylou o; twmei thu: mi nangniw hu khou ding bammeipu ta hei tigay nthan thiakloumei hei, nangniw rui chouhthaengc kanmei khatni Ravguangc rui tiringcthaulou dat kanmei Nazareth mei Jisu Khrista zanc pumtan khou rui e.
11 'Kai taanhmei nunc rui gancpatloumei tauc tei rui kaikwnpy tauc sw the,'
twna nthanmei latrik khou hyloumei tei Jisu ta the.
12 "Ringhbamv hei thu kapaan na rui laatow nina de; kalam thu aniw ta gulou khang maansei pang khou tiiloumei zanc baihmei kandih nam ruc khou maek e."
13 Pitar khatni John rambau tei how pwkhou, kaney latrik thaymei ni hamh e twmei thay lana, peimei guay tei ngak the. Kaney hei Jisu thei laymei nei the twmei ni kaniw thay the. 14 Ti gayloumeipu tei kaney daeng khou ding bam tina kaniw ramh lat sa ngam mak khe. 15 Kumna kaney ta kapaengc thangc tipat lana, kaniw rana kaphianh the. 16 Kaniw rana sa the, "Mi nei ta hei aniu tabui sw kho cho? Kaney rui mi daihmei sw nchinmei taanv hei taanclou the twmei Jerusalem khou bammei guay thay ngam the; kiu hamh e twna aniw sa dat ngam mak khe. 17 Tiki mi hei meicnunc khou dinc paengv pat mak khang, kaney Jisu zanc khou meic gaanv khat na khou sini sa dat mak khang kadunglou di kho."
18 Kumna kaniw rui kaney ta kaw gut datna kaney Jisu zanc khou lat dinc dat nuh mak khe khatni nchamlou dat nuh mak khe twna kadunglou the. 19 Tiki Pitar lev John rui mundawna sa the, "Ravguangc mikzaw khou, nangniw lat piumei nchumh ny Ravguangc lat piumei nchumh cho, nangniw kakhanh zauc o. 20 Aniw thu aniw rui howlou kanmei khatni chulou kanmei tei sa mak ngam mak e." 21 Kumna Pei rui kaney ta kadung ranv katynlouna mpatlou the. Kaney rui taancloumei khang tei rui meicnunc rui Ravguangc ta thuanc bam tipui zaeng rui, kaney ta rai nuhpui chaeng maek khwan e. 22 Kakhou mi sw nchinmei taanv taanclou kanmeipu tei katingkwm riakdei mbumei di the.
Bauh khang Lwmmei nunc rui Huayneymei
23 Pitar lev John tei kaney ta mpatlou dat rappuilev, kaniw pam nunc bamv khou tei guang datna, amuh daihmei nunc khatni gaanvdaih nunc rui kaney khou kadungna saloumei lat tei dinclou the. 24 Kaniw mi tei chu laa khou, kaniw lungc khat na swna Ravguangc khou mi kumcna huayney the, "He tingpuk, kandih, duipui khatni mi khou naimei guayna damcloumei Kaipouc! 25 Nang rui aniw pupouc, nang bangc David khou Bumaengh Nthanmei paan rui, mi kumna salou the:
'Tabui swna Jentailmei nunc
lunghpuamc bam tu cho;
tabui swna meicnunc hei gaeng makmei,
nsa tuang swkasic nimei raeng raengc bam tu cho?
26 Poubauhmei khatni katuang Messia ta swkasic khang,
kandih guangc nunc chamdaanv the,
khatni dihsinpouc nunc guang kaduai the.'
27 Kalamthu kalingna, nang rui suangloumei Khrista, nang tuang nthanmei bangcpu Jisu ta swkasic khang, guangh Herod lev Pontias Pilat tei Jentailmei nunc khatni Israelmei nunc lev mi kaidai khou hei guang kariu kan the. 28 Kum kan di tho twna nang pumtan khatni nang chwn khou rui dinglou kanmei guay tei taanc pat khang kaniw guang kariu kan the. 29 Kumna, Poubauhmei, ntaw hei kaniw rui aniw ta kadung bammei ta hei zauc keylou o, kumna nang bangc nunc aniw baucna nang lat sa ngam khang tiilou o. 30 Nnaumei ta tigaylou khang pumtan tiilou o, khatni nang tuang nthanmei Bangcpu Jisu zanc khou charynmei khatni sw nchinmei taanv taanh khang tiilou o." 31 Kaniw huayney tangv pwkhou, kaniw bammei bamv tei kanuk the. Kaniw guay tei Bumaengh Nthanmei rui padikna kaniw baucna Ravguangc lat tei sa thau the.
Lwmmei guay Kaniw tuang Puat Piu Nzanhmei
32 Lwmmei guay lunghchamh chwnchamhna lungc bam khwan e. Meic gaanv khat na sini kakhou naimei tei kakhang na de twna sa mak khwan e; kaniw khou naimei guay meic guayna piu nzanh bam khwan e. 33 Latdiutatmei nunc pumtan padikna, Poubauhmei Jisu ringcthaumei lam dinc bam khwan e, kumna kaniw khou Ravguangc zauzian geicna tiilou khwan e. 34 Kaniw pang khou tei tu thuy zangv thuy lakmei gaanv khat na sini nai mak khwan e. Kai pwni, lau pwni naimei nunc rui kakai kalau zuancna, zuanc patmei syan tei, 35 Latdiutatmei nunc khou guang tiilou khwan e. Kumna mi tei kaniw mathiuc khang kage nai naimei thei layna nzanh bam khwan e.