5
Annania lev Kanow Sapphira
1 Kazanc Ananias twna kawmeipu gaanv khat, kanow Sapphira lev nchamcna kakai tuang laupuk akhat zuanc khwan e. 2 Kamei rui mi laupuk manv tei asaekc laalou lana baihmei guay tei Latdiutatmei nunc khou tiilou the. Mi tei kanow ni thay khwan e. 3 Khoutei Pitar rui kakhou sa the, "Ananias, tabui swna Seitan rui nang lungc khou padikna, nang tuang puat zuanc patmei manv tei asaekc laalou lana, Bumaengh Nthanmei khou saraemh tu cho? 4 Mi puat tei zuanh mak khou nang tuang de; zuanhmei tangv ni zuanc patmei syan tei nang nyng de. Tabui swna mi kumcna nang saraemc ni twna nang ning pat tu cho? Nang maansei khou saraemh tu hamh e; Ravguangc khou saraemh tuang e!" 5 Mi tei chu rappuilev, Ananias tei theicna pun key the, kumna mi chamv tei chumei guay ping the. 6 Khoutei, nggaanv nunc guangna, kapumc tei phey rui kasiatclouna puanc patna mbeihlou kan the.
7 Ganvdak kathumh dou tangv, kanow tei, pat kanmei tei thay makna, gut the. 8 "Nang gaanv nang ney rui lau zuanhmei manv kiu kaguayna mi hei di thah?" twna Pitar rui kakhou thanv the.
"Ngguay, mi hei kaguayna di the," twna kamei rui daw the.
9 Kum tina, Pitar rui kakhou sa the, "Tabui swna nang ney Ravguangc Bumaengc ta nchanv khang nuh nchamc tu cho? Nang gaanv ta mbeih tatmei nggaanv nunc ntaw kaimun daeng khou bam e; nang ta ni puanc pat puni the. 10 Mi dyng khou tei kamei Pitar hu khou theicna pun key the. Nggaanv nunc tei gutna kamei theic bam tii thena, kata tei puanc patna kagaanv daeng khou mbeihlou kan the. 11 Phwamling kapwm khatni mi chamv tei chumei guay ping khwan the.
Sw-nchinmei khatni Charynmei Taanv
12 Sw nchinmei taanv khatni charynmei taanv mpeyna Latdiutatmei nunc rui meicnunc pang khou taanclou khwan e. Lwmmei guay tei Solomon Kaisangc khou guang kariu bam khwan e. 13 Meic baihmei thu kaniw pang khou guang kazauh bauh mak khwan e; meicnunc rui kaniw ta sa kauhna bam khwan e. 14 Poubauhmei khou lwmmei ntumei khatni nggaanvmei meic mpeyna kaniw pang khou guang haplou hay hay bam khwan e. 15 Kum tina, Pitar tat ruan pat pwkhou kalim na rui sini kahilou khang twna nnaumei nunc ta chaengdai chaengdai khou phungc patna kaniw laeng khatni ntingc khou nzilou bam khwan e. 16 Jerusalem daeng khou naimei namvdai guay khou rui nnaumei khatni simei bumaengc gutmei meic mpeyna phungc guang khwan e, kumna kaniw kapwmna ta tigaylou khwan e.
Latdiutatmei nunc ta Rai Thaumei
17 Khoutei Tingkuh khatni kahuammei nunc—twmei thu Sadduki nunc tei Latdiutatmei nunc ta mamavmei rui padik thau the. 18 Kumna kaniw rui Latdiutatmei nunc ta nymna mathiuc kangkai khou bangclou the. 19 Tiki mi nungc zingbangc tei Poubauhmei tuang baanchara rui kangkai kaimun guay laanclouna, kaniw ta kapaengc thangc nduangh patlou the. 20 Kumna, "Nangniw Ravkai thangc tatna mi ringhmei lam khou hei meicnunc khou dinc o," twna kaniw khou sa the. 21 Kaniw mi tei chu lana, tinggaanc pat pwkhou, Ravkai khou gutna nchamlou thau the.
Tingkuh khatni kahuammei nunc rui Israelmei gaanvdaih guay ta kawna Pei ku the, kumna Latdiutatmei nunc ta kaniw hu khou zay guang khang kangkai khou sa the. 22 Tiki rihpy nunc tei guang pwkhou, Latdiutatmei nunc tei kangkai khou tei bam mak khe. Kumna kaniw guang datna, 23 "Aniw kangkai khou tei guang zauc ki, kaikhamv mbangh tiph tiplou bam de, kumna rigaanv guay ni kaimun guay khou bam de; tiki aniw kaikhamv laanc pat pwkhou kaniw gaanv khat na sini bam mak khe," twna poulou the. 24 Amuh daihmei nunc khatni ravkai rigaanv kapypu tei mi tei chu laa khou, Latdiutatmei nunc ta tei tabui sw kan thena cho twna ngak the. 25 Khoutei meic gaanv khat guangna, "Nangniw rui kangkai khou lou kanmei nunc tei Ravkai khou meicnunc ta nchamlou bam the!" twna kaniw khou sa the. 26 Kumna rihpy tei kamei nunc ta nduanghna tat lana Latdiutatmei nunc ta tei nduangh guang the. Tiki kaniw ta meicnunc rui ntauh kwam pungh e twna ping lana, kaniw ta swkasicna thu sw mak e.
27 Kaniw rui Latdiutatmei nunc ta tei nduangh guangna, pei mav khou tei tidinglou the. Khoutei Tingkuh tei rui sa the, 28 "Mi pu zanc khou tei nangniw nchamlou dat nuh mak khe twna aniw rui nangniw khou sa ranvna salou kan the; tiki nangniw rui nchamloumei hei rui Jerusalem padik the, kumna kata swluaimei khuay aniw ruc khou tikeylou khang nangniw sw the!"
29 Pitar khatni baihmei Latdiutatmei guay rui daw the, "Aniw thu maansei lat ta suangc Ravguangc lat piu kan nina di the! 30 Nangniw rui theihchouc khou thaengc luai kanmei Jisu ta tei aniu pupouc nunc Racguangc rui tiringcthaulou kan the. 31 Israelmei lunghlaicna kaniw paapc kuakloumei laa kan khang, Ravguangc rui kata Kapy khatni Guloumeipu swna katuang baanzat thangc zay kulou the. 32 Mi lam khou hei dinc bammei kiu aniw hei the khatni Ravguangc rui kalat piumei guay khang kaipat swna tiiloumei Bumaengh Nthanmei hei the."
33 Kaniw mi tei chu pwkhou, kaniw reic thau the, kumna kaniw ta swluai nii the. 34 Tiki Pharisi, kazanc Gamaliel kawmeipu, meic guayna rui chakhwang sw bammei Riakdanv tadin gaanv khat dingthauna Latdiutatmei nunc ta tei matak khat kapaengc thangc nduangh pat kan o twna sa the. 35 Khoutei kamei rui peimei nunc khou tei sa the, "Israelmeithiu, mi nunc ruc khou nangniw sw nimei hei kakhanh chuyna sw o. 36 Tingkwm asaekc hu thangc, Theoda twna kawmeipu, kamei ni kapy akhat the twna thau khwan e, kumna meic phay padeih dou kathei laylou khwan e. Tiki kata swluai kan pwkhou, kamei guay ntamv ngamna maan kan the. 37 Mi tangv, meic sing phuhpui ganv khou, Galilimei Judas ni thauna meic mpeyna ta kathei tilay khwan e. Tiki kata ni swluai kan the, kumna kathei laymei guay ntamv ngamna maan kan the. 38 Kumna ntaw tuang lam khou ni, ai rui sa niimei thu, kaniw ruc khou ramh sw bam nangh e; kaniw ta mpatlou tii do! Kaniw rui sw bammei hei maansei khou rui e thei, maan kan ni de; 39 tiki mi hei Ravguangc khou rui e thei nangniw kaniw ta swmaan ngam ni tu hamh e. Nangniw Ravguangc ta akhagvmei nunc sw lamc e!"
Kaniw Gamaliel lat tei laa the. 40 Kaniw rui Latdiutatmei nunc ta tei kaw gut dat lana kaniw ta bai the, kumna Jisu zanc khou dinc dat nuh mak khe twna salouna mpatlou the. 41 Jisu zanc khang zakmei khaengv khang biuhmei nunc swna Ravguangc rui kaniw ta ni chaklou dyng the twna neihla neihlana kaniw pei khou tei rui pat dat the. 42 Kumna Ravkai khou khatni kai kai khou Jisu Khrista lam khou nchamloumei khatni chamvdinhmei tingmik pum sw bam khwan e.