6
Diken Gaanv Chanei Loumei
1 Ziap nunc geic thau pwkhou, Grik lat samei Ibrimei nunc rui tingmik pum syan tamzanhmei khou kaniw tuang maypui nunc ta ntaemvlou e twna, kaibamvmei Ibrimei nunc ruc khou changin thau the. 2 Kum tina Latdiutatmei nunc rui ziap guay ta tei kaw guang kaduaina sa the, "Tu zangvmei siamruai khang aniw Ravguangc lat dinh khang ntaemvloumei hei thu nchumh mak khe. 3 Mi zaeng rui, chana thiu, meicnunc rui ning chuymei khatni Bumaengh khatni ningting padikmei nggaanvmei gaanv chanei nangniw rui kapah pat tho, mi nunc khou kiu mi taanv hei nsinlou puni the. 4 Aniw thu huayneymei khatni lat tamzanhmei khou lungc gut bam kan the."
5 Apostal nunc rui samei khou tei meic guay tei pian the, kumna lwmmei khatni Bumaengh Nthanmei padikmei Stephen, Philip, Prokhoras, Nikanor, Timon, Parmenas, khatni Antiokhmei Jihudi guanhmei Nikolas mi nunc ta hei kapah the. 6 Kaniw rui mi nunc ta hei Latdiutatmei nunc khou nduangh guang tina huayneyna Latdiutatmei nunc rui kaniw ruc khou baanh bouclouna suanglou the.
7 Mi kumna Ravguangc lat zin pat the. Jerusalem khou ziap sing mbu hay hay thau the, kumna amuh mpeyna ni lwm the.
Stephen ta Nymmei
8 Ravguangc zauzian khatni pumtan padikmeipu, Stephen rui charynmei khatni sw nchinmei taanvdaih mpeyna meicnunc pang khou taanclou khwan e. 9 Nyngswmei nunca tuang sinagog twna kawmei sinagog khou bammei Kurenimei khatni Alekzandriamei nunc khatni Kilikiamei lev Asiamei Jihudimei gaanv saekc thauna Stephen ta agi the. 10 Tiki Stephen khou Bumaengh rui tiiloumei ningting ta tei kaniw agi ngam mak khe. 11 Kumna, "Kamei Mousi khatni Ravguangc ta thouhsw makpui lat samei aniw chu the," twna sa khang kaniw rui meic gaanv saekc ta lanv the. 12 Kumna kaniw rui meicnunc, gaanvdaih nunc, khatni Riakdanv tadin nunc rang ntou thaulou the. Kaniw rui Stephen ta nymna pei khou zay guang the. 13 Khoutei kaniw rui ndiuloumei nunc tei rui damcna sa the, "Mi pu hei nthanmei Ravkai khatni Mousi tuang Riakdanv ta nsicna sa bammeipu e. 14 Mi Nazareth mei Jisu hei rui mi Ravkai hei ra ganc puni, kumna Mousi rui tiiloumei riak guay hei tikalaiclou puni twna kamei rui sa bammei aniw chu the." 15 Peimei guay tei rui Stephen ta miktunna zauc pwkhou kazawpaanv tei kauh baanchara zawpaanv kumc khwan e.