19
1 Jisu Jeriko khou gutna tat ruan pat khwan the. 2 Mi khou tei kazanc Zakkaia twmeipu gaanv khat nai khwan e. Kamei tei dihkhav kakhamei kapy khat khwan e. Kumna kamei lungcgay khwan e. 3 Jisu kiu thow cho twmei kamei zauc khang karamc khwan e, tiki kahyang na lana kamei meic kangdai khou tei rui how ngam mak khwan the. 4 Kumna kamei Jisu pat nimei chaeng khou pak kasuakc patna, kata zauh khang tadut bang khou ku the.
5 Jisu mi bamv khou tei guang tangc pwkhou, zauc thauna, "Zakkaia, key katumc o; aseic ai nang kai khou bangv puni," twna sa the. 6 Khoutei kamei chadi chadana keyna, neihlana Jisu ta kakai khou tibangvlou the.
7 Mi tei how lana meic guayna tei, "Kamei paapcmei kai khou bangv khang gut kan the," twna tanglumna sa the.
8 Zakkaia tei dingthauna sa the, "Poubauhmei, atuang naimei guay tuang kapaek akhat ntaw lungcsimei guay khang tii pat the, khatni ai rui thowkumhmei tuang guatna laaloumei tuang nai khwan e thei, ai kadam padeih mbuna khangclou dat ni the."
9 Khoutei Jisu rui kakhou sa the, "Aseic hei mi kaikhunc ta hei gulou the, kalam thu kamei hei ni Abraham nac mpouh muai de. 10 Meic Nac Mpouh hei maan kanmei ta phu khang khatni gulou khang guang tuang e."
Mina Ruh Latgiam
11 Meic nunc tei mi tei nking bam khou, latgiam akhat salou khwan e. Kalam thu kamei Jerusalem na guang the, kum tina Ravguangc Guangcdic guang puni the twna meicnunc tei ning bam khwan e. 12 Khoutei Jisu rui sa the, "Meicdaihmei kai khou puancloumei nac gaanv khat rui kamei guanghbamv laa lana hanc guang dat khang duhmei kandic akhat thangc tat khwan e. 13 Kamei tat ni khou, kamei rui kabangc gaanv ruh ta kaw guangna mina ruh ruh tiilouna, 'Ai guang dat mak saanv mi hei rui ali bam khwan o,' twna kadylou the.
14 "Tiki meicnunc tei rui kata karaeng e, kumna kaniw rui kathei thangc meickhyn nunc ndiulouna, 'Mi pu ta hei aniw guangh tisw nii mak e,' twna sa the.
15 "Tiki kata guangh tiswlou the, kumna kamei guang dat the. Khoutei kamei rui syan tiilou kanmei bangc gaanv ruh ta tei kawna azuh azuh guanh pat the cho twmei thanv the.
16 "Reymeipu tei guangna, 'Poubauhmei, nang tuang mina tei rui mina ruh tuangc the,' twna sa the.
17 "Khoutei kakaipouc tei rui sa the, 'Gay the, gaymei bangc! Nang ramh katitnamei khou lwm nuhpui zaeng rui, kaidai ruh ta sin tho.'
18 "Kaneimeipu tei guangna, 'Poubauhmei, nang tuang mina tei rui mina panguh tuangc the,' twna sa the.
19 "Khoutei, 'Nang kaidai panguh sin tho,' twna kakaipouc tei rui sa the.
20 "Khoutei baihmei bangc akhat ni guangna, 'Poubauhmei, mi hei nang rui tiiloumei mina tei e. Mi hei pheyzai rui duamna rylou tuang the. 21 Nang thu suailou nuh makmeipu de, kumna ai nang ta pingna the. Nang thu nang tuang hamhmei ta sini laameipu e khatni nang rui lingclou makmei ta taymeipu e!'
22 "Khoutei guangh tei rui sa the, 'He meicsimei bangc, nang mwang khou rui sa pat kanmei lat tei rui, ai rui nang ta latzan sw puni the. Ai hei suailou nuh makmeipu e, ai hei atuang hamhmei ta laameipu e khatni ai rui lingclou makmei ta taymeipu e twmei nang thay the. 23 Ai guang dat khou kathuay kazauhna laa dat khang mi tei syan alipuikai khou lou nuh diki, tabui swna lou mak tu cho?'
24 "Khoutei kamei rui kadaeng khou ding bammei nunc khou tei sa the, 'Katuang mina tei kakhou rui laana, mina ruh sinmeipu khou tei tiilou ti tho.'
25 " 'Poubauhmei, kakhang thu ruh nai bam dyng the cho?' twna kaniw rui sa the.
26 "Kamei rui sa the, 'Ai rui nangniw khou sa tuang e: Naipui mei khou tei tii mbulou puni, maekpui mei khou tei kakhou naimei na tei sini laa tat kan puni. 27 Tiki ata kaniw guangc tisw zihmei, ata zauczihmei nunc ta tei, mi khou hei zay guangna ahu khou dowluai o.' "
Jisu Jerusalem khou Guangh Swna Gutmei
28 Mi guay hei salou tangv lana, Jisu Jerusalem nzwanna ngangh the. 29 Kamei Oliv Chyng twna kawmei bamv khou, Bethphage lev Bethani na guang pwkhou, kamei rui kaziap gaanv nei ta ndiulou huna, kaney khou sa the, 30 "Nang ney hu khou naimei namv khou hei nang ney lat o. Mi khou tei gut pwkhou meic tuangclou makmei kuanniam launa bangclou bammei ta ariw puni. Mi tei ricna mi khou hei laa guang o. 31 'Tabui swna nang ney mi hei ric bam tu cho?' twna thanv pw e thei, 'Kaipouc a khang kage naina e,' twna sa tio."
32 Ndiuloumeipu nei tei tat the, kumna kaney khou saloumei tei kahak ariw the. 33 Kaney kuanniam launa tei ric bam khou, "Nang ney tabui swna mi hei ric bam tu cho?" twna kakaipouc rui thanv the.
34 "Poubauhmei khang kage naina e," twna kaney rui daw the.
35 Kaney rui mi tei zay guang the. Kaniw rui kuanniam ruc khou tei phey nsaplouna Jisu ta tidungclou the. 36 Kamei tuangc guang pwkhou, meicnunc rui kaniw tuang phey chaeng khou bamclou the.
37 Oliv Chyng but khou rui kasou tat key nimei bamv khou kamei guang tangc pwkhou, kaziap meic kangdai, kaniw rui how kanmei charynmei taanv guay khang tei rui Ravguangc ta thuanckuna, kauc ranvna mi kumna kauc the:
38 "Poubauhmei zanc khou guangmei guangc hei sangaymei e!
Tingkauh khou chuzaenghmei nai diu,
khatni kauh liangmei khou hymdaihmei sw diu!"
39 Meic kangdai khou tei rui Pharisi gaanv saekc rui, "Dinhpouc, nang ziap nunc ta luh tio," twna sa the.
40 Khoutei Jisu rui sa the, "Ai rui nangniw khou sa tuang e: kaniw kauc tii mak e thei, ntauh guay rui kauc thau puni de."
Jisu Jerusalem Ruc khou Kaploumei
41 Jisu Jerusalem daeng na guangna mi kaidai ta tei how pwkhou, kamei mi ruc khou tei kaplouna, 42 sa the, "Nang khang chuzaenghmei phungc guang nimei chaeng tei aseic na sini thay khwan e thei mu ni! Tiki mi tei nang how mak khang nang khou rui nkamhlou kan the. 43 Nang ta zauczihmei rui nang ta rilim chau haengvna ding bin nimei ganv guang pw the. 44 Nang ta khatni nang raengc lungc khou bammei mei guay ta sw mut sutlou puni the. Ntauh akhat ruc khou ntauh akhat nsaplou bam dat lak khe. Kalam thu Ravguangc nang ta nkhavlou khang guangmei ta nang thay mak khe."
Jisu Ravkai khou Gutmei
45 Khoutei Jisu Ravkai khou gutna ramh zuanc bammei guay ta tei nthau ganc the. 46 Kumna kamei rui kaniw khou sa the, " 'Akai hei huayneypui kai sw puni,' twna hylou e, tiki nangniw rui kwamtumei nunc kai tiswlou the."