25
Tuna Gaanv Ruh Latgiam
1 "Mi khou kiu Tingkauh Guangcdic kiu, tuna gaanv ruh kaniw tuang thauh mairam sinna nowpouc ta riu khang patmei kumc puni. 2 Kaniw pang khou gaanv panguh rui mpangmei e, gaanv panguh rui ningtyngmei e. 3 Mpangmei nunc tei thauh mairam thu sin the tiki thauh phungh mak khe. 4 Tiki ningtyngmei nunc tei thu kaniw tuang thauh mairam khang thauh haan khou thauh sin tat the. 5 Nowpouc tei guang nyan tina kaniw guay tanguih the, kumna zip ri tat kan the.
6 "Mi khou kiu zipchwng 'Nowpouc guang the! Pat riw tho!' twna kauc the. 7 Khoutei tuna guay tei zipthau lana kaniw tuang mairam ntou the. 8 Khoutei mpangmei nunc tei rui, 'Nangniw tuang thauc aniw khang ni tiilou na o, aniw tuang mairam amit puni the,' twna ningtyngmei nunc khou tei sa the. 9 Tiki, 'Tii mak khe. Aniu meic guayna khang thu biuh mak e. Zuanhmei bamv thangc nangniw khang liu tat tho,' twna ningtyngmei nunc tei rui sa the. 10 Kaniw liu khang tat kan khou rui nowpouc tei guang the, kumna chamdaanvmei nunc tei nowpouc thei nowsuanh ngai bamv khou tei gut kan the, kumna kaikhamv mbangh kan the.
11 "Katangv thangc baihmei tuna gaanv panguh tei guangna, 'Kaipouc, kaipouc, aniw khang kaikhamv laanclou o,' twna sa the. 12 Khoutei, 'Ai nangniw ta khat sini thay mak e,' twna kamei rui mundawna sa the.
13 "Mi zaeng rui nangniw nkhwanna bam o, kalam thu nangniw katingmik khatni kaganv tei thay mak e.
Bangh Gaanv Thumh Latgiam
14 "Mi ganv khou tei Tingkauh Guangcdic hei kumc puni. twmei thu, gaanv khatpu rui kamei nggin tat kan ni khou kabangc nunc ta kaw guangna katuang lanv kaniw khou nsinlou the. 15 Kamei rui gaanv khat khou talent panguh, gaanv khat khou kanei, khatni baihmei gaanv khat khou akhat kamei kamei rui ngam nimei thei layna tiilou lana kakai khou rui tat kan the. 16 Talent panguh laameipu tei kaluak kalat lanvguanh tat lana talent panguh tuangc guang the. 17 Mi tei kumc muaina talent kanei laameipu tei ni kanei tuangc muai the. 18 Tiki talent akhat laameipu tei thu tat pat lana kakaipouc tuang syan tei chau phuplou the.
19 "Kaganv tingsaengc sihmei tangv, mi bangc nunc kaipouc tei guang datna kaniw khou tiilou kanmei syanchakh tei chak the. 20 Khoutei talent panguh laamei bangc tei talent ruh phungc guangna, 'Kaipouc, nang rui akhou talent panguh tiilou the, ai rui guanh tuangc patmei panguh lou nkuanna laa guangmei tuang the,' twna sa the. 21 Khoutei kakaipouc tei rui kakhou sa the, 'Taanc chuy the, gaymei khatni lwmnuhmei bangc. Katitna nsinloumei khou lwmnuhmei taanv taanclou the. Nang khou mpeyna nsinlou puni the. Nang kaipouc tuang neihlamei bamv khou gut tho.' 22 Talent kanei laameipu tei ni guangna, 'Kaipouc, nang rui akhou talent kanei tiilou e, ai talent kanei guanh tuangc patna phungc guangmei tuang e,' twna sa the. 23 Kaipouc rui kakhou sa the, 'Taanc chuy the, gaymei khatni lwmnuhmei bangc. Katitna nsinloumei khou lwmnuhmei taanv taanclou the. Nang khou mpeyna nsinlou puni the. Nang kaipouc tuang neihlamei bamv khou gut tho.' 24 Talent akhat laameipu tei ni guangna, 'Kaipouc, nang hei thu nang rui lingclou makmei thay reymei, nang rui phunclou makmei lau taymei, meic ta nzian thay makmei mei e twmei ai thay e. 25 Kumna ai ping thena, nang tuang syan tei kandih khou chau phuplou tuang the. Zauc lo, mi hei nang tuang tei the.' 26 Khoutei kaipouc tei rui kakhou sa the, 'Simei khatni aliauhmei bangc, ai hei ai rui lingclou makmei thay reimeipu khatni ai rui phunclou makmei lau taymeipu e twmei nang thay laa bu dyng the. 27 Kum e thei, nang rui mi syan tei syanthuay khang tiilou e thei, ai guang dat khou kathuay kazauhna laa dat ni tuang e.' 28 Mi zaeng rui, talent akhat tei kakhou rui laa lana talent ruh naimeipu khang tei tii tio. 29 Kalam thu, naipui mei khang tei tiilou nkuan puni, kumna kakhang mbu nlaina nai puni, tiki maekpui mei khou tei rui kakhou katitna naimei tei sini laa tat kan puni. 30 Mi gaeng makmei bangc ta hei nymna kapaengc zinghmei khou phaic pat the. Khoutei puihuayna huh nkay ndyang kariakh riak bam puni.
Nkhamhmei Latzan
31 "Meic Nac Mpouh tei kauh baanchara guay ta nduanghna kahym daicna guang pwkhou, kamei katuang hymdaihmei guanghbamvpaeng khou dungc puni. 32 Kumna zaatc guayna ta kahu khou khuam guang kaduai puni. Mi khou kiu lauziu gaenghmeipu rui kalauziu ta ziuh pang khou rui gaengc langc patmei kumcna kaniw ta tei kakang kanei khang khak langc pat puni. 33 Mi khou kiu lauziu ta katuang baanzat thangc, khatni ziuh ta katuang baandaw thangc lou puni. 34 Mi khou kiu, guangh tei rui katuang baanzat thangc bammei nunc khou tei mi kumcna sa puni, 'Guang tho, apu rui suaihiamloumei thiu, mbaanv damclou rap khou rui nangniw khang chamdaanvloumei guangcdic tei guang laa tho. 35 Kalam thu ai ndaepc khou nangniw rui ata titulou khwan e, ai tari khou nangniw rui ata tizangvlou khwan e, ai gin swna guang khou nangniw rui ata laalou khwan e, 36 ai pumtang bam khou nangniw rui pheybaan tiilou khwan e, ai nnau bam khou nangniw zauclou khwan e, khatni ai kangkai khou bam khou nangniw adaeng khou guang khwan e.'
37 "Khoutei ravchaptatmei tei rui kakhou daw puni, 'Kaipouc, tabui nungc nang ndaepc bammei ta howna aniw titulou kanna cho, khatni nang tari bammei ta howna tizangvlou kanna cho? 38 khatni tabui nungc nang gin swna guangmei ta howna laalou kanna cho khatni nang pumtang bamna pheybaan tiilou kanna cho? 39 Hamh e thei, tabui nungc nang nnau bammei ta khatni kangkai khou bammei ta howna zauclou kanna cho?' 40 Tiki, 'Ai rui nangniw khou kaling salou tuang e: achana pang khou nthyam liangmei gaanv khat khou nangniw rui swloumei tei akhou swlou tu the,' twna guangh tei rui daw puni.
41 "Khoutei katuang baandaw thangc bammei nunc khou tei ni mi sa puni, 'Siangloumei nunc, akhou rui tat pat kan o. Ravsic lev katuang baanchara nunc khang chamdaanvloumei tingsaengzaeng mai thangc tat kan o. 42 Kalam thu ai ndaepc bam khou nangniw ata titulou mak e, ai tari bam khou nangniw ata tizangvlou mak e, 43 ai gin swna guang khou nangniw ata laalou mak e, ai pumtang bam khou akhang phey tiilou mak e, nnau bam khou khatni kangkai khou bam khou ata zauclou mak e.' 44 Khoutei kaniw rui ni mundawna sa puni, 'Kaipouc, tabui nungc nang ndaepc bammei ta, tari bammei ta, gin swna guangmei ta, pumtang bammei ta, nnau bammei ta, khatni kangkai khou bammei ta aniw howna nang ta nkhavlou mak kanmei tuang naina cho?' 45 Khoutei mundawna, 'Ai rui nangniw khou kaling salou tuang e: Mi nthyam liangmei nunc pang khou gaanv khat khou nangniw rui swlou mak kanmei tei akhou swlou kan makmei tuang e,' twna sa puni. 46 Mi nunc hei tingsaengzaeng mat khou tat puni, tiki ravchaptatmei nunc ringcsuangmei khou tat puni."