26
Jisu ta Swluai Nimei Raeng
1 Jisu mi lat guay hei sa tangv key lana kamei rui kaziap nunc khou sa the, 2 "Zaeng neih nei tangv Kaanpatpui Ngai guang puni the twmei nangniw thay e, kumna Meic Nac Mpouh ta chouhthaengh khang tii pat puni."
3 Mi tangv amuh daihmei nunc khatni gaanvdaih nunc kazanc Kaiaphas kawmei Tingkuh kai khou guang kaduaina, 4 Jisu ta nkamhna nymna swluai khang kaphianh the. 5 Tiki nngay lungc khou thu mi tei sw ti thei lat geic lat lungc pat pungh di the twna kakhanh the.
Jisu khou Thauh Teyloumei
6 Jisu Bethani khou mphaanhmei gay datmeipu Simon kai khou, 7 nap tu bam khou meic pui gaanv khat alabastar haan khou loumei kamanv kunghmei mwndui thauc sin guangna kapy khou bunlou the. 8 Mi tei how lana ziap nunc tei kaniw lungc puamcna, 9 "Tabui khang mi hei swmaan bam tu cho? Mi hei kamanv mpeyna khang zuanc lana lungcsimei nunc khang tii nuh di ki," twna sa the.
10 Mi tei thay lana Jisu rui kaniw khou sa the, "Tabui swna nangniw mi pui ta hei sw kaguakc bam tu cho? Kamei rui akhang taanv gaymei akhat taanclou the. 11 Lungcsimei nunc thu nangniw lev bam nchamc tanh tan bam puni de, tiki ai thu nangniw lev bam nchamc tanh tan bam ni tu hamh e. 12 Kamei rui apumc khou thauh bunloumei hei ata mbeihlou ni khou swlou nimei tuang tei kamei rui swlou tuang the. 13 Ai rui nangniw khou kaling salou tuang e: Mi gaychamv hei dinc likloumei kandih kapwm khou, kamei rui taancloumei hei racna, kata ningtow bam puni."
Jisu ta Tinym Nimei Raeng
14 Mi tangv ziap ruhna kanei pang khou gaanv khat, kazanc Judas Iskariot kawmeipu rui amuh daihmei nunc daeng thangc tatna, 15 "Ai rui Jisu ta tinymlou e thei nangniw akhang tabui tii diw cho?" twna sa the. Khoutei kaniw rui kakhang daandi paek tamruc phuclou the. 16 Mi tangv rui kata tinym nuh khang kadouchamei phu thau the.
Jisu Kaziap nunc lev Kaanpatpui Ngai Taektw Tumei
17 Khay lou makmei Ngai tuang reymei nungc, Jisu daeng khou kaziap nunc guangna, "Kaanpatpui taektw nang khang tabui khou swloumei ta kahaw cho?" twna thanv the.
18 Jisu rui kaniw ta kaidai khou tei ndiulouna, mi kumhmeipu khou tatna mi hei kumcna sa o twna sa the, " 'Dinhpouc rui katuang ganv guang the, kumna nang kai khou kaziap nunc lev Kaanpatpui taektw tu nchamclou ni twna sa e' twna sa tio."
19 Jisu rui samei kumcna kaniw taanc the, kumna Kaanpatpui taektw tei chamdaanvlou the.
20 Kumna, zingbangc key pwkhou Jisu kaziap ruhna kanei tei lev tu khang dungc key the. 21 Kaniw tu bam khou Jisu rui kaniw khou sa the, "Ai nangniw khou kaling salou tuang e: Nangniw gaanv khat rui ata zuanctu puni."
22 Khoutei kaniw tei lungc kabiu sih the, kumna gaanv khat gaanv khat swna, "Ata hamh e ni, Poubauhmei?" twna thanv thau the.
23 Khoutei mundawna Jisu rui sa the, "Ai lev kamkuak akhat na khou num nchamcmei kamei tei rui ata zuanctu puni. 24 Meic Nac Mpouh hei thu kakhang hyloumei thei layna tat bam tuang de, tiki Meic Nac Mpouh ta hei zuanctupui mei tei mu kasan si e dav! Mi pu tei mu puanclou lamc mak e thei gay ni tuang e!"
25 Khoutei kata zuanctu nimeipu Judas rui mundawna, "Ata ny, Rabbi ?" twna sa the.
Khoutei, "Nang samei tei the," twna Jisu rui kakhou sa the.
Poubauhmei Taektw
(Mark 14.22-26; Luk 22.14-20; 1 Korinth 11.23-25)
26 Kaniw tu bam khou Jisu rui ntyan dwm akhat laana thuanckulou the, kumna mi tei by bakna kaziap nunc khou tiina sa the, "Nangniw laana tu tho; mi hei apumc the."
27 Mi tangv buangh akhat laana thuanckulou the, kumna mi tei kaniw khou tiina sa the, "Nangniw mathiucna mi hei zangv tho; 28 kalam thu mi hei meic guay paap kuaklou khang keyloumei azei the. Mi hei latryan tuang zei the. 29 Ai rui nangniw khou sa tuang e: luairyn thai dui hei ai thu zangv dat ni tu hamh the; tiki aPu Guangcdic khou luairyn dui kathanc nangniw lev zangv nchamc dat puni."
30 Mi tangv kaniw lu akhat suanlou lana Oliv Chyng thangc tat kan the.
Pitar rui Kamei Jisu Mei hamh e Twna Sa Nimei ta Dinc Kasuakcloumei
31 Khoutei Jisu rui kaziap nunc khou sa the, "Aseic zingbangc hei nangniw ata mpatlou puni, kalam thu, 'Ai rui lauziu gaenghmeipu ta bailuai puni, kumna lauziu pang tei pak phak puni,' twna hylou e. 32 Tiki ata tiringcthaulou dat pwkhou ai nangniw suangc Galili thangc tat hu puni."
33 Khoutei Pitar rui mundawna, "Meic guayna nang ta mpatlou pw sini ai thu mpat zat ni tu hamh e," twna sa the.
34 Khoutei, "Ai rui nang khou kaling salou tuang e: aseic zingbangc hei nruay khuangh mak khou, nang amei hamh e twna nang rui sa liang kathumh puni," twna Jisu rui kakhou sa the.
35 Khoutei Pitar rui Jisu khou sa the, "Ai nang lev theic nchamcloumei nganv ai nang mei hamh e twmei sa zat ni tu hamh e." Ziap baihmei guay tei rui ni mi tei kumcna sa the.
Jisu Gethsemani khou Huayneymei
36 Mi tangv Jisu kaniw ta nduanghna Gethsemani kawmei bamv khou guang the. Mi khou tei kamei rui kaniw khou sa the, "Mi thangc tei ai huayney khang tat ni he, nangniw mi khou hei dungc bam khwan o." 37 Kamei Pitar lev Zebedi nac mpouh nei ta nduangh tat the. Lungh ryanramei khatni pingmei kakhou guang the. 38 Khoutei kamei rui kaniw khou sa the, "Lungh ryanramei rui ai theic ni kumc the, nangniw mi khou hei bamna ata rak nduangh bam o."
39 Kumna kamei hu tat kasuakc khath tw gutna nkhum laemv keyna huayneyna, "Apu, nuh e thei mi buangc hei akhou tii guanglou rio; tiki ai rui ningmei hamh e, nang ningmei de" twna sa the.
40 Mi tangv Jisu kaziap nunc daeng khou guang dat pwkhou, kaniw zip bam khwan the. Khoutei kamei rui Pitar khou sa the, "Nangniw ganvdak akhat na sini ai lev rak nchamc ngam mak khe nah cho? 41 Nthiammei khou keylou mak khang nangniw ntak nrakna bam o, kumna huayney o. Bumaengh rui thu kahaw e, tiki pumh rui thu swan the."
42 Jisu tat pat datna huayneyna sa the, "Apu, mi buangc hei ai zangv mak nuh makpui tuang di the tw e thei, nang ningmei sw kan di tho." 43 Kamei pat dat pwkhou kaniw zip bam dat muai khwan the. Kaniw zip niimei rui khaengv ngam mak khe.
44 Jisu kaniw ta ganclouna tat pat datna mi lat kahak tei sa luan thumhmei swna huayney the. 45 Mi tangv kamei kaziap nunc daeng khou guang datna sa the, "Nangniw zipna nthaekc bam di haih? Zauc lo, Meic Nac Mpouh ta paapcmei nunc baanc khou tiilou nipui ganv guang tangc the. 46 Thau tho, tat di kho, ata zuanctu nimeipu guang the."
Jisu ta Nymmei
47 Jisu mi lat hei sa bammei dyng khou, ziap ruhna kanei pang khou kazauhmei Judas tei amuh daihmei nunc khatni gaanvdaih nunc rui ndiuloumei baengsaeng khatni thing dangv sinmei meic kangdai ta nduanghna guang the. 48 Kaniw rui nym nipui mei kiu, kamei rui kaput nimeipu tei the twna kata zuanctu nimeipu tei rui kaniw khou tei salou the.
49 Juda tei Jisu daeng khou nzut phut guangna, "Chuzaenghmei nai diu, Rabbi," twna sana kaput he.
50 Khoutei Jisu rui kakhou, "Champanv, nang taanc nimei kiu katumcna taanc tho,"a twna sa the.
Khoutei kaniw guangna Jisu ta nym the. 51 Khoutei Jisu lev bammei gaanv khat rui katuang baengsaeng sat patna Tingkuh bangcpu ta dow tina kanukuanc akhat siap ganc the. 52 Khoutei Jisu rui kakhou sa the, "Nang tuang baengsaeng tei kabamv khou lou dat kan tho. Baengsaeng sinmei nunc tei baengsaeng hu theic puni. 53 Ai rui nkhavlou khang aPu khou huaycha ti thei kamei rui kauh baanchara tuang rihmei kang ruhna kanei suangc sini geicna kadyng khou ndiu guang nuh de twmei nang thay mak nah cho? 54 Kum khwan e thei akumhna hyloumei tei guang tangc nina cho?"
55 Mi dyng khou tei Jisu rui meic kangdai khou tei sa the, "Kwamtupui mei ta nym ni kumcna baengsaeng khatni thing dangv sinna ata nym khang guang tu cho? Tingmik pum ai Ravkai khou nangniw lev dungcna nchamlou bam tu de; nangniw ata nym mak e. 56 Tiki muhzwng nunc rui hyloumei tei guang tangc khang mi guay hei pat tuang de."
Khoutei ziap guayna tei kata ganclouna pak kan the.
Jisu ta Pei Mav khou Zay Guangmei
57 Jisu ta nymmei nunc tei rui kata Riakdanv tadin nunc khatni gaanvdaih nunc bam kaduai bammei bamv Tingkuh Kaiaphas daeng thangc zay tat the. 58 Pitar tei mpaan hiauh hiauna kathei layna Tingkuh kai tuang kaimav nganv lay guang the. Kamei kaimav lungc khou gutna akumh sih puni cho twmei zauc khang kamei rigaanv pang khou lay dungc kazauh bam khwan e. 59 Amuh daihmei nunc khatni pei kapwm tei Jisu ta swluai nuh khang karuc khou saraemhmei sakhi phungc guang khang phu the. 60 Khoutei saraemhmei sakhi sw khang meic mpeyna guang khwan e, tiki kata swluai biuhmei khuay dinc ngammei kaniw phu tow mak khe. Nkhamh khou gaanv nei guangna 61 " 'Ai Ravguangc tuang Ravkai hei ra key lana zaeng neih thumh khou sw thaulou dat ngam e,' twna mi pu hei rui sa the," twna sa the.
62 Khoutei Tingkuh tei ding thauna, "Mi pu nei hei rui nang ruc khou sa bammei khou hei nang daw pat khang maek khah?" twna sa the. 63 Tiki Jisu lat sa mak e. Khoutei Tingkuh tei rui sa the, "Ringhmei Racguangc zanc khou ai rui nang ta syangdyng tiswpui tuang e: Nang hei Ravguangc Nac Mpouh Khrista kiu cho? Sa o."
64 Jisu rui kakhou sa the, "Nang samei tei the. Tiki ai rui nangniw khou sa tuang e: Ntaw tangv thu Meic Nac Mpouh hei Ngamparimeipu baanzat thangc dungc bammei khatni muangh khou tuangcna keymei ta nangniw how puni."
65 Khoutei Tingkuh tei katuang pheychuanh siatna sa the, "Kamei Ravguangc ta thouhsw thouhsak makpui lat sa the. Tabui baihmei sakhi aniu kage nai dat hena cho? Kamei rui Ravguangc ta thouhsw makna sa kanmei tei ntaw nangniw chu kan the! 66 Nangniw akumhna kakhanh tu cho?" Khoutei, "Kamei theic biuc the," twna kaniw rui daw the.
67 Khoutei kaniw rui kazaw khou nteih nsuklou the khatni bai the. Gaanv saekc rui kata kaphina, 68 "Khrista, nang ta kaphimei hei thow cho, dinc pat o," twna sa the.
Pitar rui Kamei Jisu Mei Hamh e Twna Samei
69 Khoutei Pitar tei kaimav khou dungc bam khwan e. Kumna Tingkuh bangcpui gaanv khat kadaeng khou guangna, "Nang ni Galilimei Jisu thei laymei e" twna sa the.
70 Kamei mi tei meic guayna hu khou nuh makna sa the, "Nang sa bammei hei ai thay mak e." 71 Kamei kaimav raengv mun khou tat pat pwkhou, banghpui baihmei gaanv khat rui how lana, kadaeng khou ding bammei nunc khou, "Mi pu hei Nazareth mei Jisu thei laymei de," twna sa the.
72 Khoutei ni kamei nuh makna, "Mi pu ta kiu ai thay mak e," twna syangdyng swna sa the.
73 Kanakmei tangv, mi khou tei ding bammei nunc Pitar daeng khou guangna, "Nang ni kaniw pang khou kazauhmei changh de, nang lat gwan khou rui thay de," twna sa the.
74 Khoutei, "Ravguangc rui thay kan diu! Ai mi pu ta hei thay mak e," twna sa the.
Mi dyng khou nruay khuangc the.
75 Khoutei, "Nruay khuangh mak khou, nang amei hamh e twna sa liang kathumh puni," twna Jisu rui kakhou saloumei tei Pitar mi dyng khou tei ningtow the. Kamei kapaengc patna kap ranv sihna kap the.