22
Juda rui Jisu ta Zuanhmei
1 Kaanpatpui Ngai twna kawmei Khay Loumakpui Ngai na guang khwan the. 2 Khoutei amuh daihmei nunc khatni Riakdanv tadin nunc rui Jisu ta swluai nuhpui chaeng phu bam khwan e. Kalam thu kaniw meicnunc ta ping khwan e. 3 Khoutei ziap ruhna kanei pang khou kazauhmei Iskariot twna kawmei Judas khou Seitan gut the. 4 Khoutei Juda tei amuh daihmei nunc khatni ravkai rigaanv kapy nunc daeng thangc tatna akumhna kamei rui Jisu ta zuanctu nuh puni cho twmei kaphianh the. 5 Khoutei kaniw neihla the, kumna kakhang syan tii khang nuh the. 6 Juda ni mi tei nuh the, kumna meic pang bam makmei ganv zaucna kata tinym khang kadouchamei zauc the.
Nkhamhmei Taektw
7 Khay Loumakpui Ngai tuang Kaanpatmei lauziu khaeng nimei tingmik tei guang the. 8 Khoutei Jisu rui Pitar lev John ta ndiuna, "Kaanpatpui taektw tu khang nang ney tatna aniu khang chamdaanv tho," twna sa the.
9 "Tabui bamv khou chamdaanvlou o twna cho?" twna kaney rui thanv the.
10 Khoutei kaney khou sa the, "Nang ney kaidai khou tei gut pwkhou, duilai puancna tat bammei gaanv khat pu nang ney ta ariw puni. Kathei layna kamei gutmei kai khou tei gut tho. 11 Kumna mi kai kaipouc khou tei, 'Dinhpouc kaziap nunc lev Kaanpatpui taektw tu nimei bamv kiu tabui khou tei cho twna kamei rui sa e,' twna sa tio. 12 Kamei rui nang ney khou kai kauh khou tanvna lou ntanghmei kai daihmei akhat lyanlou puni. Mi khou tei chamdaanv tho."
13 Kaney tat the, kumna Jisu rui kaney khou saloumei kahak tei ariw the. Kumna kaney Kaanpatpui ngai khang tei chamdaanv the.
14 Kaganv tangc pwkhou, Jisu khatni latdiutatmei nunc tu khang dungc key the. 15 Khoutei Jisu rui kaziap nunc khou tei sa the, "Ai ryanramei ariw makmei hu khou mi Kaanpatpui taektw hei nangniw lev tu nchamclou niina bam tuang the. 16 Kalam thu ai rui nangniw khou sa tuang e: nthuihmei Kaanpatpui ngai taektw Ravguangc Guangcdic khou tu mak saanv, mi hei thu ai tu dat ni tu hamh the."
17 Khoutei buangh akhat laana, kamei rui thuanckulouna sa the, "Mi hei laa tho, kumna nangniw meic guayna zangv tho. 18 Kalam thu ai rui nangniw khou sa tuang e: Ravguangc Guangcdic guang mak saanv, luairyn thai dui hei ai thu zangv dat ni tu hamh the."
19 Kamei rui ntyan dwm akhat laana thuanckulouna, by bak the. Kumna mi tei kaniw khang tiina sa the, "Mi hei nangniw khang tiiloumei apumc the; ata ningtow khang nangniw mi hei taanc o."
20 Mi tei kumcna, tu tangv zangv tangv pwkhou, buangh tei laana sa the, "Mi buangc hei nangniw khang bun patloumei, latryan thanh tuang azei the. a 21 Tiki ata zuanctu nimeipu tei ai lev kuakpaeng akhat na khou baanlaan kariu bam e. 22 Meic Nac Mpouh hei thu kakhang damclou tangmei thei layna tat bam tuang de; tiki kata zuanctumeipu tei mu kasan si e dav!" 23 Mi pu kiu thow lana cho twna kaniw pang khou kakhi thau the.
Daic Nimei Lam Kaphianhmei
24 Kaniw pang khou thow ta tei daic liangmei swna laalou puni cho twna ni kaniw pang khou latgeic thau the. 25 Khoutei Jisu rui kaniw khou sa the, "Jentailmei guangc nunc rui kamei nunc ruc khou kaipouc sw e, khatni meicnunc ruc khou ngamv sinmei nunc rui kaniw ta zauzian thaymeipu twna sa e. 26 Tiki nangniw thu mi tei kumc nina hamh e. Nangniw pang khou daic liangmei kamei tei alauc liangmei kumc nina e, khatni kapy swmei kamei tei siamruaimei kumc nina e. 27 Thow tei daihmei cho? Kuakpaeng khou dungc bammei tei ny, siamruai sw bammei tei cho? Kuakpaeng khou dungc bammei kamei tei hamh nah cho? Tiki ai nangniw pang khou siamruai swpui mei kumcna bam tuang e.
28 "Nangniw hei ata nchanvmei ganv khou ata bam nduanghmei nunc the. 29 Apu rui akhang tiiloumei kumcna ai rui ni nangniw khang guanghdic akhat tii the. 30 Kumna atuang guangcdic khou nangniw ni akuakpaeng khou tu nchamc zangv nchamc puni, khatni guanghbamvpaeng khou dungcna Israelmei kaikhwang ruhna kanei ta sin puni.
Pitar rui Kamei Jisu Mei Hamh e Twna Sa Nimei ta Dinc Kasuakcloumei
31 "Simon, Simon, gehu katang kumc nangniw ta katang khang Seitan rui ney pat kan the. 32 Tiki Simon, nang ramlum maan mak khang, ai nang khang huayneylou kan the. Nang akhou hanc guang pwkhou, nang chana nunc ta titanclou o."
33 Khoutei, "Poubauhmei, kangkai khou ni, theihmei khou ni, ai nang thei lay tat khang alung ding the," twna Pitar rui sa the.
34 Tiki Jisu rui sa the, "Ai nang khou sa tuang e: Pitar, nang rui nang hei amei hamh e twna, sa luan kathumh mak saanv aseic hei nruay khuangc ni tu hamh e."
35 Khoutei Jisu rui kaniw khou sa the, "Ai rui nangniw ta syankhau ni, khau ni, phaythuapc ni tiphungh makna ndiu pat khou tei, nangniw khang gaat tuang nai buh cho?"
"Ramh gaat tuang maek e," twna kaniw rui daw the.
36 Jisu rui kaniw khou sa the, "Tiki ntaw thu, syankhau nai e thei phungc tho, khau ni phungc tho; baengsaeng maek e thei nang phey zuancna liu tho. 37 'Kata kariak tat makmei pang khou chaklou the,' twna hylou e. Ai rui nangniw khou samei tuang e: mi hei akhou guang tangclou puni the. Ngguay, alam khou hyloumei guay tei guang tangc nthuih puni the."
38 "Poubauhmei, zauc lo, baengsaeng kanei nai the," twna kaziap nunc rui sa the.
"Mi tei biuc the," b twna Jisu rui sa the.
Jisu Oliv Chyng khou Huayneymei
39 Jisu tat patna, kamei tat raph rap bammei bamv Oliv Chyng thangc tat kan the. Kumna kaziap nunc ni kathei lay tat khwan e. 40 Mi bamv tei guang tangc pwkhou, kamei rui kaziap nunc khou, "Nangniw nthiammei khou bowlou mak khang huayney o," twna sa the. 41 Kamei mi bamv khou tei rui ntauh ndat tangc biuhmei saan thangc tat kasuanh gutna, khuksun keyna huayneyna sa the, 42 "Apu le, nang rui nuh e thei mi buangc hei akhou rui laa ganclou o; tiki ai ningmei hamh e, nang ningmei sw kan diu." 43 Khoutei tingkauh thangc rui kauh baanchara keyna kapumtan titanclou the. c 44 Kamei kalung ryanrana huayney ranvna huayney the, kumna talanv zei zow kumcna kandih khou zow key the.
45 Kamei huayney bammei khou tei rui thau datna, kaziap nunc daeng khou pat dat the. Khoutei kaniw lungc ryanra lakna zip bammei ta ariw the.
46 "Tabui swna nangniw zip bam tu cho? Nangniw nthiammei khou bowlou mak khang thauna huayney o," twna kaniw khou sa the.
Jisu ta Nymmei
47 Jisu rui sa bam khou, ziap ruhna kanei khou kazauhmei Judas twna kawmeipu rui nduanghna meic kangdai guang the. Kamei Jisu daeng khou guangna kata kaput the. 48 Khoutei, "Judas, nang Meic Nac Mpouh ta kaputna zuanctu ni twna cho?" twna Jisu rui kakhou sa the.
49 Kaniw rui sw punimei tei Jisu thei laymei nunc tei thay laa thena, "Poubauhmei, baengsaeng rui dow di kho cho?" twna sa the. 50 Khoutei kaniw pang khou gaanv khat rui Tingkuh bangc gaanv khat ta dow the, kumna kanu siap pat the.
51 Khoutei, "Sw dat ri tho!" twna Jisu rui sana, mi pu nu tei kahilouna tigaylou dat kan the.
52 Khoutei Jisu rui, kata nym khang guangmei amuh daihmei nunc, ravkai rigaanv kapy nunc khatni gaanvdaih nunc khou tei sa the, "Nangniw kwamtupui mei ta nym ni kumcna baengsaeng khatni thing dangv sinna guang tu cho? 53 Tingmik pum ai Ravkai khou nangniw lev bam nchamc bam tuang de; tiki nangniw ata nym mak e. Tiki mi hei nangniw tuang ganv tina the—zinghmei ngamv tuang ganv tina the."
Pitar rui Kamei Jisu Mei Hamh e Twna Samei
54 Kaniw rui Jisu ta nymna zay tat the, kumna Tingkuh kai khou zay guang the. Khoutei Pitar ni tat mpaanna lay guang khwan e. 55 Mi khou tei kaimav khou mai swlouna dungc haengvna bammei nunc pang khou Pitar ni lay dungc bam khwan e. 56 Banghpui gaanv khat rui kata mi khou tei dungc bammei ta mai riw khou rui how lana, kata matingna, "Mi pu hei Jisu thei laymei de," twna sa the.
57 "Ai kata thay mak e," twna kamei rui mi pui khou tei sa the.
58 Kanak datmei tangv, meic baihmei gaanv khat rui kata how lana, "Nang ni kaniw pang khou kazauhmei de," twna sa the.
"Ai kiuc hamh e," twna Pitar rui sa the.
59 Ganvdak akhat dou tangv, meic baihmei gaanv khat rui, "Mi pu hei kathei laymei changh de. Kamei Galilimei de," twna sa the.
60 Khoutei, "Nang sa bammei hei tabui cho, ai thay mak e!" twna Pitar rui daw the. Mi dyng khou tei nruay khuangc the. 61 Khoutei Poubauhmei ziangrih patna, Pitar ta zauc the. "Aseic nruay khuangh makmei hu khou, nang amei hamh e twna sa luan kathumh puni," twna Poubauhmei rui kakhou saloumei tei kamei ningtow the. 62 Khoutei kamei kapaengc patna, kalung kabiuna kap the.
Rihmei nunc rui Jisu ta Sinnuimei
63 Khoutei Jisu ta gaek bammei nunc tei rui, 64 kamik duamlouna bai the, kumna kata sinnuina, "Nang ta baimei hei thow cho dinc pat o," twna sa the. 65 Kumna baih baihmei kata sw zakpui lat mpeyna sa the.
Jisu ta Pei khou Zay Guangmei
66 Tinggaanc pat pwkhou, gaanvdaih nunc pei, amuh daihmei nunc khatni Riakdanv tadin nunc kazauhna guang kaduai the, kumna Jisu ta mi khou tei zay guang the. 67 Khoutei, "Nang Khrista kiu cho? Aniw khou sa o," twna katy the.
"Ai sa tina nangniw ata lwm ni tu hamh e. 68 Ai rui thanv tina nangniw daw ni tu hamh e. 69 Tiki ntaw khou rui thauna, Meic Nac Mpouh hei Ngamparimeipu Ravguangc baanzat thangc dungc puni the," twna Jisu rui daw the.
70 "Kum e thei, nang Ravguangc Nac Mpouh cho?" twna kaniw rui sa the.
Khoutei, "Nangniw rui samei tei kumcna, ai kiuc the," twna Jisu rui mundaw the.
71 Khoutei kaniw rui sa the, "Tabui tuang sakhi aniw kage nai dat hena cho? Kamwang kahak khou rui aniu chu the."