23
Jisu ta Pilat Daeng khou Zay Guangmei
1 Khoutei, peimei kapwm tei thauna Jisu ta Pilat daeng thangc zay tat the. 2 "Mi pu hei aniw zaat ta zay mbiangh khang swmeipu the. Kaisar khang dihkhav tii rio twna sa the khatni kamei hei guangh sw nimei Khrista the twna kamei rui sa the," twna kakhuay nkhamlouna sa the.
3 Khoutei, "Nang Jihudimei guangc cho?" twna Pilat rui Jisu khou thanv the.
"Ngguay, nang samei tei the," twna Jisu rui mundaw the.
4 "Mi pu tuang khuay hei ai phu tow mak e," twna Pilat rui amuh daihmei nunc khatni meic kangdai khou tei sa the.
5 Tiki, "Kamei rui nchamloumei hei rui Judia kapwm khou meic guay ta karangh kasiclou the. Kamei Galili khou rui thauna, mi khou hei nganv key tangc the," twna sa ranvna sa the.
Jisu ta Herod Daeng Thangc Ndiuloumei
6 Mi tei chu pwkhou, "Kamei Galilimei lana cho?" twna Pilat rui thanv the. 7 Jisu hei Herod rui sin bammei ramv thangc mei de twmei thay laa khou, mi ganv khou tei Herod ni Jerusalem khou bam tina, kadaeng thangc ndiulou the.
8 Herod Jisu ta how pwkhou, mpeyna neihla the. Kalam thu kamei Jisu lam khou chu lana kata ariw niina bammei tingsaengc the. Jisu rui charynmei taanv taanclou pw khang lwmgay bam khwan e. 9 Kamei rui Jisu khou lat mpeyna thanv khwan e; tiki kamei lat khat sini daw mak e. 10 Amuh daihmei nunc khatni Riakdanv tadin nunc mi khou tei dingna, Jisu khuay sa ranvna sa the. 11 Herod khatni katuang ricmei nunc rui Jisu ta sinnui the khatni malana sw the. Kumna guangh pheybaan piulouna Pilat daeng thangc ndiu guang dat the. 12 Mi nungc tei Herod lev Pilat pam sw dat the. Kaney mi hu khou tei thu khat khat ta zauczih bam khwan e.
Jisu ta Swluai khang Latdanv Patmei
13 Khoutei Pilat rui amuh daihmei nunc, kapy nunc khatni meicnunc ta tei kaw kaduai lana, 14 kaniw khou sa the, "Nangniw rui mi pu ta hei meicnunc ta zay mbianghmeipu e twna akhou zay guang the. Zauc lo, ai nangniw hu khou kakhuay phu the; tiki nangniw rui karuc khou nkham guangmei khuay hei thu kakhou ai phu tow mak e. 15 Herod rui ni kakhuay phu tow lamc makna kata aniw khou ndiu guang dat the. Zauc lo, theic biuhmei khuay kamei taanclou tuang maek e. 16 Kum thena, ai rui kata tibai lana mpatlou dat ni the." 17 Kaanpatpui Ngai kathuic Pilat rui kangkai khou bammei gaanv khat ta mpatlou nimei tuang nai khwan e. a 18 Kaniw meic guayna khwan khat na swna, "Mi pu ta hei swluai o! Barabbas ta mpatlou o!" twna kauc the. 19 (Barabbas twmeipu hei mi kaidai khou tei sucpat rihpatmei khou kazauh e khatni meic dow e twna kangkai khou lou bammeipu khwan e.)
20 Jisu ta mpatlou nii lana, Pilat rui kaniw khou sa kaluaih dat e. 21 Tiki, "Kata chouhthaengc o! Kata chouhthaengc o!" twna kaniw kauc bam the.
22 Luan thumhmei swna, Pilat rui kaniw khou sa dat e, "Mi pu hei rui tabui simei taanclou thena cho? Kata swluai biuhmei khuay kakhou ai phu tow mak e. Mi zaeng rui, kata tibai lana mpatlou ni the."
23 Tiki Jisu ta chouhthaengc nina de twna kauc ranv hay hayna kauc the. Kumna kaniw rui kauc ngamlou kan the. 24 Kumna kaniw rui samei tei taanclou khang, Pilat rui ding keylou kan the. 25 Sucpat rihpatmei khou kazauhmei khatni meicdowmei, kaniw rui neymei Barabbas ta kiuc mpatlou kan the. Kumna Jisu ta kaniw rui ningmei thei layna sw khang tii pat kan the.
Jisu ta Chouhthaenghmei
26 Kaniw Jisu ta zay pat khou, namv thangc rui guangmei Kurenimei Simon ta nymna Jisu thei khou theihchouc tei tipuanc the. 27 Meic kangdai kathei lay tat khwan e. Mi pang khou kiu Jisu khang kapna huayna tat bammei ntumei nunc ni nai khwan e. 28 Khoutei Jisu kaniw biak thangc ziangrih patna, "Jerusalemmei aluc nunc le, nangniw akhang kap nangh e; nangniw khang khatni nangniw nac nunc khang kap o. 29 Kalam thu, 'Nakamcpeic nunc tei kaniw sangay e dav! Kanac puanh makmei pui nunc khatni kanac pamc puanc nouh makmei pui nunc tei kaniw sangay e dav!' twna sa nimei ganv guang the. 30 Mi ganv khou kiu, chyng but ta, 'Aniw ta pangv binlou tho!' twna khatni luangh but ta, 'Aniw ta gum binlou tho!' twna sa puni. 31 Kalam thu thing ring bang kumhmei akhou sini kaniw rui mi kumcna swlou e thei, maithing kumhmei kaniw khou thu akumh puni thah?"
32 Khuaydaih nkhuaimei gaanv nei ta ni swluai khang kamei lev zay tat khwan e. 33 Kaniw Pyrou twna kawmei bamv khou guang tangc pwkhou, kaniw rui Jisu ta khatni mi pu nei ta tei chouhthaengc the. Mi pu nei ta tei katuang baanzat baandaw thangc thaengclou khwan e. 34 Khoutei, "Apu le, kaniw ta kuaklou tio, kalam thu kaniw tabui sw bam tu cho twmei kaniw thay lamc makna e," twna Jisu rui sa the. b
Kumna san zaucna kaniw katuang pheybaan nzanh the.
35 Khoutei meicnunc tei dingna zauc bam the. Kumna Jihudimei kapy nunc rui kata sinnuina sa the, "Kamei meic baihmei ta gulou e; kamei hei kapahloumei Ravguangc tuang Khrista kiu e thei, karana kata gu kan di tho."
36 Rihmei nunc rui ni kata sinnui the. Kaniw guangna kakhang zoukhiangc tiina, 37 "Nang Jihudimei guangc e thei, nang rana nang ta kan tho," twna sa the.
38 "Mi hei Jihudimei Guangc e" twna hyna kapy ruc khou ni daanclou khwan e.
39 Mi khou tei thaengclou bammei nkhuaimeipu gaanv khat tei rui Jisu ta nsicna, "Nang Khrista kiu hamh nah cho? Nang rana nang ta ni, aney ta ni kan damc bu cho!" twna sa the.
40 Khoutei nkhuaimei gaanv khat pu tei rui kata luhna sa the, "Nang Ravguangc ta ping mak nah cho? Kakhou kumcna nang khou ni theihmei latzan keylou bammei tuang di the. 41 Anei thu anei taanv khou rui theic biuc tina the; tiki kamei thu nkhuaimei taanv khat sini taanc kan mak e."
42 Khoutei, "He Jisu, nang guangcdic khou guang pwkhou, ata ningtowlou o," twna sa the.
43 "Ai rui nang khou kaling salou tuang e: Nang aseic hei paradais khou anei bam puni the," twna Jisu rui kakhou sa the.
Jisu Theihmei
44 Neih ndyng zaengc khou rui mi kandic kapwm tei zingc khwan e, kumna ganvdak kathumh zingc khwan e. 45 Kalam thu neihmik zingc kan khwan e. Khoutei Jerusalem Ravkai tuang khamvthinghphey tei kachung khou rui siat kaek the. 46 Kumna Jisu kauc ranvna, "Apu, nang baanc khou abumaengc tiilou the," twna kauc the. Mi tei salou lana kabuc tut kan the.
47 Mi kumcna pat kanmei tei how lana, rihpypu tei Ravguangc ta hymthuancna, "Mi pu hei ravchaptatmei changh lana di the!" twna sa the. 48 Mi tei guang zauc bammei meic kangdai tei, mi tei how lana kaniw ngaengv kazwmna hanc dat kan the. 49 Kata thaymei guay, Galili thangc rui kathei lay keymei meicpui nunc tei kazauhna duh thangc dingna mi guay tei zauc bam khwan e.
Jisu ta Mbeihloumei
50 Peidai kumei, meic gaymei khatni ravchaptatmei kazanc Joseph twna kawmeipu gaanv khat nai khwan e. 51 Kamei mi peidai tuang latdyng khatni taanv khou tei nuh makmeipu khwan e. Kamei hei Judia tuang kaidai Arimathaia khou rui guangmei e khatni kamei hei Ravguangc Guangcdic guangmei ta nkhwan bammeipu khwan e. 52 Kamei Pilat daeng thangc tatna, Jisu pumc tei ney the. 53 Kamei rui mi tei laa key lana, pheynuaih phey rui kazihlouna, ntauh khou langcloumei, meic gaanv khat na ta sini mbeihlou zat makmei tarou khou mbeihlou the. 54 Mi tei Sabbath khang chamdaanvmei tingmik khwan e.
55 Galili thangc rui Jisu thei lay nganghmei nunc tei Joseph thei lay tatna tarou tei khatni mi khou tei Jisu ta mbeihlou kanmei tei kaniw how khwan e. 56 Khoutei kaniw tat dat lana, Jisu pumc khou teylou khang namh gaymei maruai khatni thingthauc chamdaanv the. Riakdanv thei layna, Sabbath thu kaniw nthaekc the.