24
Jisu Ringcthaumei
1 Neidak tuang reymei nungc, laukhwan khwanzingh, meicpui nunc tei kaniw rui chamdaanvloumei namh gaymei maruai thauc sinna tarou thangc tei tat the. 2 Khoutei roukham tauc tei luangc patlou bammei ta kaniw how the. 3 Kumna kalungc gut pwkhou, Poubauhmei Jisu pumc tei thu how mak khe. 4 Kaniw ngakna bam khou, kaney pheybaan tii tah tamei gaanv nei kaniw daeng khou ding bam khwan the. 5 Ping langvna kaniw zaw kandih khou sow nkhumlouna bam khou, mi pu nei tei rui kaniw khou sa the, "Tabui swna nangniw theihmei pang khou ringhmei ta phu bam tu cho? [Kamei mi khou hei bamv mak khe; ringcthau kan the!] 6 kamei Galili khou bam khou nangniw khou salou kanmei tei ningtow o-- 7 'Meic Nac Mpouh ta paapcmei nunc baanc khou tii pat puni, chouhthaengc puni, kumna zaeng neih thumh nungc ringcthau dat puni,' twna saloumei tei." 8 Khoutei, kamei rui saloumei guay tei ningtow the.
9 Kaniw tarou khou tei rui guang datna, mi guay hei ziap ruhna akhat khatni baihmei guay khou tei raclou the. 10 Mi hei latdiutatmei nunc khou guang pouloumei nunc kiu thu: Magdalamei Meri, Joanna, Jakob pui Meri, khatni kaniw lev tat nchamcmei baihmei nunc hei e. 11 Tiki kaniw meicpui nunc lat tei lwm mak khe; kaniw lat tei mbamei lat kumc the. 12 [Tiki, Pitar thu thauna tarou thangc pak tat kan the. Kamei nkhum key pwkhou, pheynuaih phey na ganclou bammei ta how the. Kumna tabui sw lana the cho twna kamei ngak sakna tat dat the.]a
Emmaus Chaeng khou
13 Mi nungc kahak tei Jisu ziap gaanv nei, Jerusalem khou rui kilomitar chanei dou duhmei khou naimei Emmaus kawmei namv thangc tat bam khwan e. 14 Kaney tei mi pat kanmei lam guay tei racna tat bam khwan e. 15 Kaney mi lam hei racna khatni kaphianhna tat bam khou, Jisu kamei kahak guangna kaney lev tat nchamc the. 16 Tiki kata kaney thay mak khang kaney mik sw nzeiclou the.
17 "Nang ney tabui lat kaphianh tat bam tu cho?" twna Jisu rui kaney khou sa the.
Khoutei kaney nchwng suic suicna ding the. 18 Kaney khou gaanv khat Kleopas twmeipu rui, "Aseicdou dak khou Jerusalem khou pat kanmei lam khou hei thay makmei gin nang na khuangh di the," twna sa the.
19 "Mi kiu tabui cho?" twna kamei rui thanv the.
Kaney rui kakhou sa the, "Nazareth mei Jisu lam e. Kamei hei Ravguangc hu khou ni, maansei hu khou ni kalat khou khatni kataanv khou pumtan naimei gaanv khat sw bammei muhzwng e. 20 Karuc khou theihmei latzan keylou khang aniu tuang amuh daihmei nunc khatni kapy nunc rui tii pat tina kata chouhthaengc kan the. 21 Kamei hei Israelmei ta thuaklou nimeipu kiu lana khuangh the twna aniw lwmgay bam tuang the! Tiki, mi pat kanmei hei ntaw thu zaeng neih thumh tangc the. 22 Kum bam khou, akailianghmei meicpui nunc gaanv saekc rui aniw ta tii ngak saklou e. Twmei thu, aseic laukhwan khwanzingh kaniw katuang tarou thangc tat the. 23 Khoutei kapumc how mak khe. Kumna kaniw kauh baanchara gaanv nei ta ndawman khou how the. Kumna mi nei tei rui kamei ringcthau kan the twna sa e twmei kaniw rui guang sa the. 24 Khoutei akailianghmei gaanv saekc tarou thangc tei tat the, kumna meicpui nunc tei rui samei kumc rapna how the; tiki kata thu kaniw how kan mak e."
25 Khoutei kamei rui kaney khou sa the, "He mpangmei khatni muhzwng nunc rui saloumei tei lwm khang lungning nkacmei thiu! 26 Khrista hei mi ryanramei guay hei ariw lana katuang hymdaihmei khou gut nina hamh nah cho?" 27 Mousi khou rui thauna muhzwng nunc nganv khou, Nthanmei Latrik khou, kalam khou hyloumei guay tei kamei rui kaney khou dinclou the.
28 Kaniw guanglou nimei namv tei kaniw na guang pwkhou, kamei mi namv tei tat twan kan ni kumc tikhou, 29 "Aniu bam nchamc di kho, tingzyn na di the; zingc kan ni the," twna kaney rui kata khaem the. Kumna kaney lev bam nchamclou khang kamei ni gut the.
30 Kumna kaniw tu khang dungc keypui ganv khou, kamei rui ntyan laana thuanckulouna, by bakna kaney khang tii the. 31 Khoutei kaney mik tirak patlou the, kumna kata thay the; tiki mi khou tei kata how dat mak khe. 32 "Chaeng khou kamei rui anei khou Nthanmei Latrik khou rui raclouna tat bam khou tei anei lungc chuangc thau mak nah cho?" twna kaney khat khat khou sa the.
33 Khoutei kaney kadyng khou thauna Jerusalem thangc hanc guang dat the. Mi khou tei ziap ruhna khat khatni kaniw lev bam nchamcmei nunc tei guang kaduai bammei, 34 "Poubauhmei ringcthau dat changh kan the! Kamei Simon khou lyanlou the!" twna sa bammei nunc ta kaney ariw the. 35 Khoutei chaeng khou pat kanmei khatni kamei rui ntyan by baklou pwkhou kaney kata akumhna thay kan tu cho twmei guay tei kaney rui raclou the.
Jisu Kaziap nunc khou Lyanloumei
36 Kaney mi hei sana bam khou, Jisu kaniw chung khou guang dingna, "Nangniw khou chuzaenghmei nai diu!" twna sa the.b
37 Khoutei kabumaengc lana khuangh the twna kaniw kaluang the khatni ping the. 38 Kamei rui kaniw khou, "Tabui swna nangniw ping bam tu cho? Tabui swna nangniw lwmsi bam tu cho? 39 Aphay abaanc hei zauc tho. Mi hei ai de! Ata kahi zauc o. Mi hei kumcna bumaengh khou thu katei karou maek e," twna sa the.
40 Kamei mi hei sana, kaphay kabaanc kaniw khou lyanlou the.c 41 Kaniw neihlamei lev ngakmei rui lwm khang thay makna bam khou, "Nangniw khou tu khang ramh nai bu cho?" twna Jisu rui thanv the. 42 Khoutei khav minhmei kiak akhat tiilou tina, 43 laana kaniw hu khou mi tei tu the.
44 "Mi hei Mousi tuang Riakdanv, Muhzwng nunc khatni Kalumlu khou alam khou hyloumei guay tei guang tangc puni twna ai rui nangniw lev bam nchamc bam khou salou kanmei tei guang tanghmei tuang the," twna kamei rui kaniw khou sa the.
45 Khoutei kamei rui kaniw lungning laanc patlou tina, kaniw Nthanmei Latrik tei kabah thay the. 46 Jisu rui kaniw khou sa the, "Khrista hei ryanramei ariw puni, kumna neih thumhpui nungc ringcthau dat puni, 47 kumna lunghlaihmei khatni paapc kuakloumei lam khou, Jerusalem khou rui thauna zaatc guayna khou kazanc khou dinc ndauh puni twna hyloumei tei mi hei the. 48 Mi guay lam khou dinc nimei kiu nangniw hei the. 49 Apu rui tii ni twna nrianhloumei tei ai rui nangniw khou ndiu guang puni, kumna kauh thangc rui nangniw khou pumtan tiilou mak saanv mi kaidai khou hei bamv o."
Jisu Tingkauh Ku Kanmei
50 Jisu rui kaniw ta Bethani nganv nduangh patna, kabaanc zay thauna kaniw ta suaihiamlou the. 51 Kamei rui kaniw ta suaihiamlouna bam khou, kamei kaniw khou rui tat pat kan the, kumna tingkauh thangc laa thau kan the.d 52 Khoutei kaniw kata kalumlou duc lana, neihlana Jerusalem thangc hanc guang dat the. 53 Kumna kaniw Ravkai khou bam tanh tanna Ravguangc ta thuancku bam khwan e.