16
Jisu Ringcthaumei
1 Sabbath luai pwkhou, Magdalamei Meri, Jakob pui Meri khatni Salomi tatna Jisu khou teylou khang marai thauc liu the. 2 Kumna neidak tuang reymei nungc, zaic sihna, neih pat khou, tarou khou tei kaniw guang the. 3 Khoutei, "Tarou kaimun tauc tei thow rui aniu khang thui patlou nina cho?" twna kaniw sa bam khwan e. 4 Tiki kaniw zauc pwkhou, mi tei luangc patlou bammei ta kaniw how the. Mi tauc tei daic sih khwan e. 5 Kumna tarou lungc khou tei gut pwkhou chabwan gaanv khat pheychuanh mphwanmei piuna baanzat biak thangc dungc bammei ta kaniw how the. Khoutei kaniw kaluang the.
6 Khoutei kamei rui kaniw khou sa the, "Ping rio, chouhthaengc kanmei Nazareth mei Jisu ta nangniw phu bam tuang e. Kata tiringcthaulou kan the. Kamei mi khou hei bamv mak khe. Kata nziloumei bamv hei zauc tho. 7 Tiki nangniw tat tho, kumna kaziap nunc khatni Pitar khou, 'Kamei Galili thangc nangniw hu tat kasuakc kan the, kamei rui nangniw khou saloumei tei kumcna, nangniw kata mi khou tei how puni the,' twna salou ti tho."
8 Kaniw pingna langvna patna tarou khou tei rui pak kan the. Kaniw gaanv khat na khou sini lat khat na sini salou mak e. Kalam thu kaniw ping the.
Jisu ta Magdalamei Meri khou Lyanloumei
9 Neidak tuang reymei nungc, khwanzingh kamei ringcthau lana, kakhou rui ravsic chanei nthau gancloumei pui Magdalamei Meri khou lyanlou rey the. a 10 Kamei tat lana kapna huay bammei Jisu thei laymei nunc khou dinclou the. 11 Jisu ringc bam de, kumna mi pui tei rui how the twmei kaniw chu the, tiki kaniw lwm mak khe.
Jisu ta Ziap Gaanv Nei khou Lyanloumei
12 Mi tangv hei kaniw pang khou rui namv thangc tat bammei gaanv nei khou Jisu rui kalwn baihmei khou lyanlou the. 13 Khoutei kaney hanc guang datna bam duhmei nunc khou tei poulou the. Tiki kaniw lwm mak khwan e.
Jisu ta Ziap Ruhna Khat khou Lyanloumei
14 Mi tangv ziap ruhna khat tei nap tu khang dungc bam khou kata lyanlou the, kumna kaniw rui lwm makmei khatni kaniw lung tanhmei khang tei rui Jisu rui kaniw ta luh the. Kalam thu kamei ringcthau datmei tangv kata howmei nunc ta tei kaniw lwm mak khe.
15 Khoutei kamei rui kaniw khou sa the, "Nangniw mbaanv kapwm khou tatna gaychamv hei meic katana khou dinclou o. 16 Lwmna duiluppui mei ta gulou puni, tiki lwm makmei ta thu gulou mak e. 17 Lwmmei nunc khou tei mi sw nchinmei guay hei tiilou puni: Azanc khou kaniw ravsic nunc ta nthau ganc puni; kaniw lat thanh sa puni; 18 kaniw nrui sin thau sini khatni mei theic nuhpui hu kaniw zangv sini, mi tei rui kaniw ta kabiu lak e; nnaumei nunc khou kaniw baanc bouclou pwkhou gay dat puni."
Jisu ta Laathau Kanmei
19 Kumna kamei kaniw khou kadylou tangv pwkhou, Poubauhmei Jisu ta, tingkauh thangc laa thau kan the. Kumna kamei Ravguangc baanzat thangc dungc kan the. 20 Mi tangv kaniw tat patna kabamv kathuic khou chamv tei dinc the. Kumna Poubauhmei rui kaniw ta taanc nduanghlou the khatni kaniw khou tiiloumei sw nchinpui taanv rui kaniw lat tei kaling e twmei lyanlou the.