15
Jisu Pilat Mav khou Dingmei
1 Tinggaanc pat rappuilev amuh daihmei nunc tei gaanvdaih nunc, Riakdanv tadin nunc khatni peimei guay lev kaphianh kariu the, kumna kaniw rui Jisu ta karakna zay tatna Pilat khou tiilou the.
2 Khoutei, "Nang Jihudimei guangc cho?" twna Pilat rui Jisu khou thanv the.
"Ngguay, nang rui samei tei the," twna Jisu rui mundaw the.
3 Khoutei amuh daihmei nunc tei rui kakhuay mpeyna nkhamlouna sa the. 4 Kum tina Pilat rui kakhou sa dat e, "Nang daw khang maek khe nah cho? Nang khuay hei zu kaniw rui nkhamlou bammei hei zauc lo!"
5 Tiki Jisu lat baihmei daw katwan mak khe. Khoutei Pilat tei ngak the.
Jisu ta Swluai khang Latdanv Patmei
6 Mi ngai khou tei meicnunc rui ney neymei kangkai khou bammei gaanv khat ta mpat pat raph rap bam khwan e. 7 Guanghdic ruc khou rihthauna meicdowmei, kangkai khou bangclou bammei nunc pang khou kazanc Barabbas twna kawmeipu bam khwan e. 8 Kumna meic kangdai tei tat kuna kaniw khou swlou raph rap bammei tei swlou khang Pilat khou sa the.
9 Khoutei Pilat rui mundawna, "Ai rui nangniw khang Jihudimei guangc ta hei mpatloumei ta nangniw kahaw bu cho?" twna sa the. 10 Kalam thu amuh daihmei nunc tei rui kata howtina tii kumei tuang e twmei kamei thay khwan e. 11 Tiki Barabbas ta ti-mpatlou khang amuh daihmei nunc tei rui meicnunc ta kathouhlou the.
12 "Kum e thei, nangniw rui Jihudimei guangc twna kawmeipu ta hei ai rui tabui sw o twna cho?" twna Pilat rui kaniw khou thanv the.
13 Khoutei, "Kata chouhthaengc nina de!" twna kaniw rui kauc the.
14 "Tabui zaeng cho? Kamei tabui simei taanclou thena cho? twna Pilat rui kaniw khou sa the.
Tiki ranv hay hayna, "Kata chouhthaengc nina de!" twna kaniw rui kauc the.
15 Khoutei Pilat rui meicnunc ta tei tipianlou nii lana Barabbas ta mpatlou the, kumna Jisu ta tikathamv kasiclouna chouhthaengh khang tii pat the.
Jisu ta Rihmei nunc rui Sinnuimei
16 Mi khou tei rui Jisu ta rihmei nunc rui Pretoriumx khou zay gutna rihmei kang kapwm ta kaw kaduai the. 17 Khoutei kaniw rui kakhou haengc mumhmei phey hwamlouna khatni sauh luai pykhim kasiatcna kakhou runlou the. 18 Kumna, "dwangay o, Jihudimei guangc," twna sa the. 19 Kumna kaniw guay tei rui kapy khou ntou bungc rui kagit the khatni kakhou nteih nsuklou the, kumna tangkhungh keyna kalum the. 20 Mi kumcna kaniw rui kata sinnui tangv lana, haengc mumhmei phey tei laa pat lana katuang phey piulou dat the. Kumna kata chouhthaengh khang zay pat the.
Jisu ta Chouhthaenghmei
21 Khoutei Alekzandar lev Ruphas pu, kazanc Simon twna kawmeipu, karamc Kureni thangc rui nggin guangmeipu ta ariw lana, Jisu tuang theihchouc puanh khang kaniw rui kata nym the. 22 Kaniw rui Jisu ta Golgotha (mi kabac thu Pyrou bamv twna e) twmei bamv khou nduangh guang the. 23 Khoutei mir loumei luairyn zouc kaniw rui kakhang tii the, tiki kamei mi tei zangv mak e. 24 Khoutei kaniw rui kata chouhthaengc the, kumna katuang pheybaan guay kaniw san zaucna nzanh the.
25 Kaniw rui kata chouhthaenghmei tei laukhwan ganvdak chakiu khou e.
26 Kakhou nkhamloumei khuay: "Jihudimei Guangc" twmei tei karuc khou hylou the. 27 Kumna kwamtumei gaanv nei ta ni kaniw rui Jisu tuang baanzat baandaw thangc mi khou tei chouhthaengc nchamclou the. 28 (Kumna kata nkhuai mbamei pang khou kasing phuc kariulou the, twna nthanmei latrik khou hyloumei tei tipat nthuihlou the.)a
29 Mi khou tei tat kalw bammei nunc kata matevna, kaniw py kangana, "Ravkai ra keyna zaeng neih thumh khou sw thau dat nimeipu, 30 theihchouc khou rui keyna nang rana nang ta kan damc bu cho!" twna sa the.
31 Mi tei kumcna, amuh daihmei nunc khatni Riakdanv tadin nunc tei ni sinnuina khat khat khou sa the, "Meickai ta thu kamei gulou lana, karana kata thu kan ngam mak khe! 32 Aniw howna lwm khang, Israelmei guangc Khrista kiu theihchouc khou rui key tho!"
Kamei lev theihchouc khou thaengc nchamc bammei nei tei rui ni kata sinnui the.
Jisu Theihmei
33 Kalaanv ganvdak ruhna kanei khou mi kandic kapwm tei zingc guangna tingzyn ganvdak kathumh nganv zingc the. 34 Mi ganvdak khou tei Jisu rui kauc ranvna, "Eloi, Eloi, lema sabakhthani?" twna kauc pat the. Mi kabac kiu thu, "A Racguangc, A Racguangc, tabui swna nang ata mpatlou tu cho?" twna e.
35 Kadaeng khou ding bammei gaanv saekc rui mi tei chu lana, "Zauc lo, kamei Elija ta kaw bam e!" twna sa the.
36 Khoutei gaanv khat luairyn zouc khianghmei khou langhpanv kumhmei akhat ntin lana ntou zwan twan khou louna pak guangna Jisu khang tii the. Khoutei, "Nkhwan o, kata laa key khang Elija kiu guang puni ny zauc kho!" twna sa the.
37 Tiki Jisu tei kauc ranvna kauc patlouna kabuc tut kan the.
38 Khoutei Ravkai tuang khamvthinghphey kapy ruc thangc rui kandih na nganv, kanei khang siat kaek kan the. 39 Kadaeng khou ding bammei rihpypu tei, mi kumcna kabuc tut kanmeiy ta tei how lana, "Kamei hei Ravguangc Nac Mpouh changh lana di the!" twna sa the.
40 Khoutei, ntumei nunc ni duh thangc rui phaengc bam khwan e. Mi nunc pang khou kiu, Magdalamei Meri, Jakob alaucmei lev Joses pui Meri khatni Salomi kazauh khwan e. 41 Mi nunc hei kamei Galili khou bammei douc rui kathei lay tatna kata nkhav bammei nunc e. Kathei Jerusalem khou lay nganghmei pui nunc mpeyna ni mi khou tei kazauh the.
Jisu ta Mbeihloumei
42 Tingzyn key pwkhou, (mi tei chamdaanvmei tingmik twmei thu nthuanh thauna Sabbath nimei tingmik tina,) 43 pei khou chakhwang sw bammeipu khatni Ravguangc Guangcdic ta agwnna bammeipu Arimathaia Joseph guangna, baucna Pilat daeng thangc tatna Jisu pumc tei ney the. 44 Khoutei Jisu tei theic the twmei chu laa khou, Pilat tei ngak the. Kumna rihpy ta tei kawna Jisu tei theihmei kanak the ny twmei thanv the. 45 Kumna rihpy khou tei rui thay nthan lana kapumc tei Joseph khou tiilou the. 46 Pheynuaihna mphwanmei liuna, kapumc tei laa keyna, mi phey tei rui kazihlou the. Kumna ntauh khou langcloumei tarou laeng khou lou the. Mi tarou kaimun tei ntauh rui luangc thingclou the. 47 Kata mbeihlou kanmei bamv tei Magdalamei Meri lev Joses pui Meri how khwan e.