27
Jisu ta Pilat Daeng Thangc Zay Tatmei
1 Laukhwan khwanzingh amuh daihmei guay khatni gaanvdaih guay tei akumhna Jisu ta swluai kho cho twmei kaphianh the. 2 Kumna, kata karakna zay patna Rommei tuang guanghkhyn Pilat khou tiilou the.
Juda Theihmei
3 Jisu ta nkhuaimei tiswlou kan the twmei kata zuanctumei Judas tei thay laa khou, kamei lunghlaic the, kumna daandi paek tamruc tei amuh daihmei nunc khatni gaanvdaih nunc khou tei phungc guang datna, 4 "Kakhuay maekmeipu swluai khang zuanc twmei hei ai nkhuai the," twna sa the.
"Mi tei aniw thouc hamh the, nang nyng di the," twna kaniw rui sa the.
5 Syan tei ravkai khou tei phaiclou ducna tat pat lana, karana riang thaengc luai kan the.
6 Amuh daihmei nunc tei rui syan tei laa thau lana, "Mi hei ravkai syan bamv khou lou khang kariak rui nuh mak khe, mi hei zei manv di the," twna sa the. 7 Kumna kaniw kaphianh lana dihpaengcgin nunc ta phuploupui bamv khang lay kasiamhmei ramv puk akhat mi syan tei rui liu the. 8 Mi kum tina mi ramvpuk ta hei ntaw ni "Zei Ramvpuk" twna kaw bam e.
9 Muhzwng Jeremia rui saloumei tei mi hei kumcna guang tangc kan the. Mi kiu thu: "Kaniw rui dandi paek tamruc tei laa the, mi tei Israelmei nunc rui kakhang tii khang nuhmei syan e. 10 Poubauhmei rui akhou tiimei latdanv kumcna kaniw rui mi syan tei rui lay kasiamhmei ramvpuk liu the."
Pilat rui Jisu khou Lat Thanvmei
11 Jisu Rommei tuang guanghkhyn hu khou guang ding the. Khoutei, "Nang Jihudimei guangc kiu cho?" twna guanghkhyn tei rui thanv the.
Khoutei, "Kiuc tina nang sa tuang the," twna Jisu rui daw the. 12 Amuh daihmei nunc khatni gaanvdaih nunc rui karuc khou khuay nkhamlouna sa bammei khou kamei lat khat sini sa daw mak e.
13 Khoutei Pilat rui, "Kaniw rui nang khuay heizu sa bammei guay hei nang chu mak nah cho?" twna sa the.
14 Tiki Jisu kakhou latkaeng akhat na sini mundawlou mak e. Khoutei akumhmei tuang cho twna guanghkhyn tei ning the.
Jisu ta Swluai khang Latdanv Patmei
15 Kaanpatpui Ngai pum guanghkhyn rui kang bammei, meicnunc rui kahawmei gaanv khat ta mpat patmei hei kariak sw bam khwan e. 16 Mi ganv khou tei kazanc tatmei kang bammei Barabbas Jisu kawmeipu nai khwan e. 17 Meic kangdai tei guang kaduaipui ganv khou Pilat rui kaniw khou, "Barabbas lev Khrista kawmei Jisu kak khou hei thow ta nangniw khang mpatloumei ta nangniw kahaw cho?" twna thanv the. 18 Kaniw rui Jisu ta hei howtina tii ku tuang e twmei kamei thay e.
19 Pilat latzan bamv khou dungc bam khou kanow rui, "Mi khuay maekmeipu ruc khou tei nang ramh sw laa rio, kalam thu aseic hei amang thangc kalam khou rui ai mpeyna ryanra the," twna sa guang the.
20 Tiki Barabbas ta mpatlouna Jisu ta swluai khang sa o twna amuh daihmei nunc khatni gaanvdaih nunc rui meic kangdai ta tei katiu the. 21 "Mi nei khou hei thow ta mpatlou o cho?" twna guanghkhyn tei rui sa dat e.
Khoutei kaniw rui "Barabbas ta" twna sa the.
22 "Kum e thei Khrista kawmei Jisu ta hei ai tabui sw o twna cho?" twna Pilat rui sa the.
"Kata chouhthaengc o" twna kaniw guayna rui sa the.
23 Tiki Pilat rui, "Tabui tuang simei taanv kamei taancna cho?" twna sa the.
Tiki kaniw kauc ranv hay hayna, "Kata chouhthaengc o," twna kauc the.
24 Kamei rui sw bammei guay hei ramh khat sini gaeng mak khe, abay adapmei pat puni kumc di the twmei how lana, "Mi pu ta swluaimei hei ai rui hamh e! Nangniw man de!" twna Pilat rui sana dui laana meic kangdai hu khou tei kabaanc khiu the.
25 Meic nunc tei rui mundawna sa the, "Kazei tei aniw khou keylou kan diu, aniw nac nunc khou ni keylou kan diu."
26 Khoutei kamei rui Barabbas ta mpat pat the, kumna Jisu ta tikathamv tangv lana chouhthaengh khang tii pat the.
Rihmei nunc rui Jisu ta Sinnuimei
27 Mi tangv guanghkhyn tuang ricmei nunc tei rui Jisu ta guanghkai lungc thangc zay gutna rihmei kang kapwm tei rui kadaeng ding huamc the. 28 Katuang phey kathangv ganc lana haengc ringhmei pheychuanh nulou the. 29 Sauh luai pykhim kasiamhna kapy khou runlou the. Kumna katuang nzat baanc khou ntou builwang tisinlouna kahu khou khuksun keyna, "Kalum e, Jihudimei guangc," twna sana sinnui the. 30 Kumna kakhou nteih nsuklou the, khatni ntou builwang tei laana kapy khou bai the. 31 Kaniw rui kata sinnui tangv lana, pheychuanh tei kathangv gancna katuang phey tipiulou dat the. Kumna chouhthaengh khang kata zay tat kan the.
Jisu ta Chouhthaenghmei
32 Kaniw tat pat khou Kurenimei kazanc Simon kawmeipu ta ariw lana, rihmei nunc rui kata nymna Jisu tuang theihchouc tipuanc the. 33 Kaniw Golgotha (py rou bamv twna e) kawmei bamv khou guang tangc khou, 34 kaniw rui kakhang nkhucmei loumei zouc tii the. Kamei mi tei mbap lana zangv mak e.
35 Kaniw rui chouhthaengc lana, san zaucna kaniw katuang phey nzanh the. 36 Khoutei kaniw dungcna kata nkhwan bam the. 37 "Mi hei Jihudimei Guangc Jisu e" twna kata thaengc luaipui khuay tei hyna kapy ruc khou daanclou the. 38 Khoutei kwamtumei gaanv nei ta Jisu tuang baanzat baandaw khou chouhthaengclou the.
39 Mi khou tei tat kalw bammei nunc rui kata sinnuina kaniw py kazinhna sa the, 40 "Ravkai ra key lana zaeng neih thumh khou sw thau dat nimeipu, nang rana nang ta kan damc bu cho! Nang Ravguangc Nac Mpouh e thei theihchouc khou rui key o" twna sinnui the.
41 Mi kumc muaina amuh daihmei nunc, Riakdanv tadin nunc khatni gaanvdaih nunc rui ni kata sinnuina, 42 "Kamei meic baihmei ta thu gulou laki, karana thu kata kan ngam mak khe. Kamei Israelmei guangc e! Ntaw kamei theihchouc khou rui key e thei aniw kakhou lwm puni. 43 Kamei Ravguangc khou lwm e, kumna kamei Ravguangc Nac mpouh e twna sa e. Ravguangc rui kata gulou nii e thei ntaw gulou kan di tho!"
44 Kamei lev thaengc nchamclou bammei kwamtumei nei tei rui ni mi tei kumcna sinnui muai the.
Jisu Theihmei
45 Kalaanv ganvdak charuk khou rui tingzyn ganvdak chakiu nganv kandih kapwm zingc khwan e. 46 Ganvdak chakiu dou keymei ganv khou Jisu rui kauc ranvna, "Eloi, Eloi, lema sabakhthani?" twna kauc pat khwan e. Mi kabac kiu thu, "A Racguangc, A Racguangc, tabui swna nang ata mpatlou tu cho?" twna e.
47 Mi khou tei ding bammei meic gaanv saekc rui chu lana, "Mi pu hei Elija ta kaw bam e," twna sa the. 48 Gaanv khat rui kaluak kalat langhpanv kumhmei khat laa guangna mi tei zoukhiangc khou ntin the, kumna ntou zwan khou louna kakhang tii the.
49 Khoutei, "Nkhwan o, Elija rui kata guang gulou puni ny zauc kho," twna baihmei guay tei rui sa the. (Gaanv khat rui buy laana kanaek khou biw the, khou tei dui lev zei pat the.)
50 Khoutei Jisu khwan ranvna kauc patlou dat lana kabumaengc mpatlou kan the.
51 Zauc lo, Ravkai tuang khamthinghphey tei karuc thangc rui kabangc nganv kanei khang siat kaek the, kandih kanuk the, khatni taudaic guay bak the; 52 tarou guay laanclou the khatni nthanmei zip kanmei nunc mpeyna ringcthau dat the. 53 Tarou khou rui patna, Jisu ringcthaudatmei tangv kaniw Nthanmei Kaidai khou gut the, kumna meic mpeyna khou lyanlou the.
54 Rihpy khatni Jisu ta nkhwanna zauc bammei rihmei nunc tei baengla khatni pat bammei guay tei how laa khou ping kasic the, kumna, "Kamei hei Ravguangc Nac Mpouh changh lana di the!" twna sa the.
55 Khoutei Galili thangc rui Jisu ta nkhavna kathei lay keymei ntumei mpeyna duh thangc rui phaengc bam khwan e. 56 Mi nunc pang khou kiu Magdalamei Meri, Jakob lev Joseph pui Meri, khatni Jebedi now kazauh e.
Jisu ta Mbeihloumei
57 Tingzyn key pwkhou Arimathaia kaidai thangc rui, kazanc Joseph twna kawmei lungcgaymeipu gaanv khat guang khwan e. Kamei hei ni Jisu ziap akhat khwan e. 58 Mi pu hei Pilat daeng khou guangna Jisu pumc tei ney the. Khoutei tii khang Pilat rui latdanv pat the. 59 Joseph rui kapumc laana nthanmei phey rui kazihlouna, 60 ntauh khou langcloumei Joseph katuang tarou thanh khou lou the, kumna ntauh daihmei rui tarou kaimun tei luangc thinglouna tat kan the. 61 Magdalamei Meri lev baihmei Meri tei mi tarou ta tei zauc laanna mi khou tei dungc bam khwan e.
Tarou Gaekmei
62 Nthuanh thauna, mi kiu Sabbath neic amuh daihmei nunc lev Pharisi nunc Pilat daeng khou guang kariuna, 63 "Kaipouc, 'zaeng neih thumh tangv ata tiringcthaulou dat puni,' twna mi saraemhmeipu hei rui kamei ringc bam khou saloumei tei aniw ningtow e. 64 Mi zaeng rui, zaeng neih thumh tangh mak saanv tarou tei gaek khang latdanv patlou o; kum mak e thei kaziap nunc rui kapumc tei houc tat lana kata tiringcthaulou kan the twna guat reymei khang tei suangc nkhamhmei rui guat kasic ranv pungh the," twna sa the.
65 Khoutei, "Rigaanvmei laa tho, nangniw thaymei kumcna gaek chuyna gaek tho," twna Pilat rui kaniw khou sa the.
66 Kaniw tatna roukham tauc khou tei laanc pat nuh mak khang malac naplou the, kumna rigaanvmei nunc lou the.