14
Jisu ta Swluai Nipui Raeng
1 Kaanpatpui Ngai khatni Khay Lou Makpui Ngai guang khang zaeng neih nei nai khou, mi kumcna pat khwan e. Khoutei amuh daihmei nunc khatni Riakdanv tadin nunc rui akumhna nkamhna Jisu ta nymna swluai nuh puni cho twna phu bam khwan e. 2 Kalam thu, "Mi hei nngay lungc khou thu sw nuh mak khe, meicnunc kachin karo thau pungh di the," twna kaniw sa the.
Jisu ta Bethani khou Thauh Teyloumei
3 Jisu Bethani khou mphaanhmei Simon kai khou nap tu khang dungc bam khou ntumeipui gaanv khat, kamanv kunghmei nard thauc nthanmei loumei alabastar haan sinna guang khwan e. Kamei rui alabastar haan tei swbakna Jisu py khou bunlou the. 4 Khoutei, mi khou tei bammei gaanv saekc kaniw lungc puamcna kaniw khat khat khou sa the, "Tabui swna mi thauc hei mi kumcna swmaan bam tu cho? 5 Mi hei denari a phay thumh suangc sini geicna zuanc lana lungcsimei nunc khang tii nuh di ki." Kumna kaniw rui mi pui ta tei lungc puamcna luh the.
6 Khoutei Jisu rui sa the, "Kanyng sw kan diu. Tabui swna nangniw kata sw kaguakc bam tu cho? Kamei akhou gaypui taanv taanclou tuang e. 7 Kalam thu lungcsimei nunc thu nangniw lev bam nchamc tanh tan bam puni de, kumna nangniw rui swlou nii niipui ganv khou kaniw khang gay taanv taanclou nuh de. Tiki ai thu nangniw lev bam nchamc tanh tan bam ni tu hamh e. 8 Kamei rui ngammei tei kamei taanclou tuang e. Tarou khou mbeihlou khang kamei rui apumc khou thauh tey kasuakclou tuang e. 9 Kumna ai rui nangniw khou kaling salou tuang e: Mi mbaanv kapwm khou gaychamv dincloupui bamv kathuic khou, kamei rui taancloumei hei racna kata ningtow bam puni."
Jisu ta Tinym khang Juda rui Nuhmei
10 Ziap ruhna kanei pang khou kazauhmei Judas Iskariot tei Jisu ta tinym khang kachuc khang amuh daihmei nunc daeng thangc tat kan the. 11 Kaniw mi tei chu pwkhou neihla the, kumna kakhang syan tii khang latryan swlou the. Khoutei kata tinym khang kadouchamei kamei phu thau the.
Jisu Kaziap nunc lev Kaanpatpui Ngai Taektw Tumei
12 Kumna Khay Lou Makpui Ngai nngay guang nungc, Kaanpatpui lauziu dow nungc, kaziap nunc rui Jisu khou, "Nang Kaanpatpui taektw tu khang aniw tabui thangc tatna chamdaanvlou o cho?" twna thanv the.
13 Khoutei kaziap gaanv nei ta ndiulouna kaney khou sa the, "Kaidai khou hei nang ney gut tho, kumna dui lay puancna tat bammeipu gaanv khat nang ney ta ariw puni. Kathei lay tat tho. 14 Kumna mi pu tei gutmei kai kaipouc khou tei, 'Ai aziap nunc lev Kaanpatpui taektw tu nimei bamv kiu tabui khou tei cho twna dinhpouc rui sa e,' twna sa tio. 15 Khoutei kai kauh khou kailangv daihmei chamdaanvloumei bamv akhat nang ney khou kamei rui lyanlou puni. Mi khou tei aniu khang chamdaanv tho."
16 Khoutei ziap nei tei tatna kaidai khou tei gut the, kumna kaney khou kadyloumei kahak tei ariw the. Mi khou tei Kaanpatpui taektw khang chamdaanv the.
17 Kumna zingc key pwkhou Jisu kaziap nunc ta nduanghna guang the. 18 Kumna kaniw dungcna tu bam khou, Jisu rui kaniw khou sa the, "Ai rui nangniw khou kaling salou tuang e: Ai lev tu nchamc bammei, nangniw pang khou gaanv khat rui ata zuanc puni."
19 Khoutei kaniw lungc katuakc thau the, kumna "Ai hamh e ni?" twna kaniw khat khat swna kakhou sa thau the.
20 Khoutei Jisu rui kaniw khou sa the, "Mi hei nangniw ruhna kanei pang khou gaanv khat, ai lev kamkuak akhat na khou num nchamcmeipu tei the. 21 Kalam thu Meic Nac Mpouh hei kalam khou hylou tangmei tei tat bam tuang de. Tiki Meic Nac Mpouh ta zuanctupui mei tei kasan si e da! Kamei tei puanclou lamc mak e thei gay ni tuang e!"
Poubauhmei Taektw
22 Kaniw tu bam khou Jisu rui ntyan dwm akhat laa thauna thuanckulouna by bak the, kumna mi tei kaniw khang tiina sa the, "Nangniw laa tho, mi hei apumc the."
23 Kumna buangh akhat laa thauna thuanckulouna kaniw khang tii the, kumna mi tei kaniw guayna zangv the. 24 Khoutei Jisu rui sa the, "Mi hei azei e, meic mpeyna khang keyloumei latryan tuang zei e. 25 Ai rui nangniw khou kaling salou tuang e: Luairyn thai dui hei thu ai zangv dat ni tu hamh the, Ravguangc Guangcdic thangc rui luairyn dui kathanc zangv dat khang di the."
26 Khoutei kaniw lu akhat suanlou lana Oliv Chyng thangc tat pat kan the.
Pitar rui Kamei Jisu Mei e Twmei Nuh Mak Nimei
27 Khoutei Jisu rui kaniw khou sa the, "Nangniw meic guayna ata mpatlou puni, kalam thu, 'Ai rui lauziu gaenghmeipu ta bai luai puni, kumna lauziu guay tei pak ntamv puni,' twna hylouna nai e. 28 Tiki ata tiringcthauloupui tangv ai Galili thangc nangniw suangc tat hu puni."
29 Khoutei Pitar rui Jisu khou sa the, "Meic guayna nang ta mpatlou sini ai thu mpatlou ni tu hamh e."
30 Khoutei Jisu rui kakhou sa the, "Ai rui nang khou kaling salou tuang e: Aseic zingbangc nruay khuangc kanei makmei hu khou nang amei e twmei nuh mak liang kathumh puni."
31 Khoutei Pitar rui sa ranvna sa dat e, "Ai nang lev theiclou ni tuang nai pu sini ai nang ta mpat lak e."
Baihmei ziap guay tei ni mi tei kumcna sa the.
Jisu Gethsemani khou Huayneymei
32 Gethsemani twna kawmei bamv akhat khou kaniw guang the. Khoutei Jisu rui kaziap nunc khou sa the, "Ai huayney bam saanv nangniw mi khou hei dungc bam khwan o." 33 Khoutei kamei Pitar, Jakob khatni John ta nduanghna tat pat the. Kamei pingmei khatni lungc ryanramei padik thau the. 34 Kumna kamei rui kaniw khou sa the, "Alung ryanramei rui ai theic ni kumc the. Nangniw mi khou hei ntak nrakna nkhwan bam khwan o."
35 Kumna kamei hu thangc tat kasuanh khath tw gutna kandih khou pun nkhum laemv keyna nuh e thei mi ganv tei kakhou rui tat ri kan khang huayney the. 36 Kamei rui sa the, "Abba, aPu, ramh guayna nang khang thu ngam mak tuang maek e; mi buangc hei akhou rui laa ganclou kan o; tiki ai ningmei hamh e, nang ningmei de."
37 Jisu pat dat pwkhou kaniw zip bam khwan the. Khoutei kamei rui Pitar khou sa the, "Simon, nang zip bam di nah cho? Nang ganvdak akhat na sini rak ngam mak khe nah cho? 38 Nangniw nthiammei khou keylou mak khang zip makna huayney bam o. Lungh rui thu kahaw the, tiki pumh rui thu swan the."
39 Kamei tat pat datna, mi lat kahak tei sana huayney dat the. 40 Kumna kamei pat dat pwkhou, kaniw zip bam dat muai khwan the. Kaniw zip niimei rui rak ngam mak khe, kumna kaniw kakhou tabui lat sa daw nina cho thay mak khe.
41 Kumna liang thumhmei swna kaniw daeng khou guang dat khou Jisu rui kaniw khou sa the, "Ntaw nganv nangniw zipna zaengsw bam tu cho? Biuc the! Kaganv tei guang the! Meic Nac Mpouh ta paapcmei nunc baanc khou tiilou the. 42 Thau tho, tat di kho! Ata zuanctu nimeipu tei guang the!"
Jisu ta Nymmei
43 Mi hei sa bammei dyng khou, amuh daihmei nunc, Riakdanv tadin nunc khatni gaanvdaih nunc rui ndiu guangmei, baengsaeng khatni thing dangv sinmei, meic kangdai ta nduanghna ziap ruhna kanei pang khou kazauhmei Judas tei guang the.
44 "Ai rui kaput nimeipu tei kamei kiu the. Kumna nangniw kata nymna duak mak khang swna zay tat laa tho," twna kata zuanctumeipu tei rui kaniw khou limclou the.
45 Khoutei kaniw guang tanghpuilev kaluak kalat Juda tei Jisu daeng khou guangna, "Rabbi" twna sana kata kaput the. 46 Kumna kaniw rui kata nym the. 47 Mi khou tei ding bammei gaanv khat rui baengsaeng sat patna Tingkuh bangc ta dow the, kumna kanu siap ganc the.
48 Khoutei Jisu rui kaniw khou sa the, "Kwamtupui mei ta nym ni kumcna nangniw baengsaeng khatni thing dangv sinna ata nym khang guang tu cho? 49 Ai tingmik pum nchamlouna nangniw lev Ravkai khou bam tuang de, tiki nangniw ata nym mak e. Tiki hylou bammei tei guang tangc ni tina the."
50 Khoutei ziap nunc tei kata ganclouna pak tat ngam kan the.
51 Chabwan gaanv khat pumtang phey na baanvna Jisu thei lay tat bam khwan e. Kaniw rui mi pu ta tei nym the. 52 Khoutei kamei kaphey ganclouna pumtang pak kan the.
Jisu Jihudimei tuang Latzan Kai khou
53 Khoutei kaniw rui Jisu ta Tingkuh kai khou zay guang the. Kumna mi khou tei amuh daihmei nunc, gaanvdaih nunc khatni Riakdanv tadin nunc guang kaduai the. 54 Khoutei Pitar thei hiauh hiauna kathei layna Tingkuh kai kaimav nganv lay guang tangc the. Mi khou tei rigaanv nunc lev dungc nchamcna kamei ni mai nggaan bam khwan e.
55 Khoutei amuh daihmei nunc khatni peikumei guay tei rui Jisu ta swluai khang kakhuay phungc guang nuhpui mei phu khwan e. Tiki phu tow mak khe. 56 Meic mpeyna rui saraemhmei khuay azuh guang sa e, tiki kaniw tuang lat tei nchamc mak khe.
57 Khoutei meic gaanv saekc ding thauna saraemcna kakhou khuay nkhamlouna sa the, 58 " 'Ai rui mi baanh rui kasiamhmei ravkai hei swmaanna, baanh rui kasiamh makmei, baihmei ravkai ai rui zaeng neih thumh khou sw thaulou dat puni' twna kamei rui sa the." 59 Kum e tiki, kaniw tuang lat tei ni nchamc mak khe.
60 Meic guay hu khou Tingkuh tei ding thauna Jisu khou lat thanvna sa the, "Meic nunc hei rui nang ruc khou sa bammei khou hei nang daw khang maek khe nah cho?"
61 Tiki kamei lat sa mak khe, lat khat sini daw mak khe.
Khoutei Tingkuh tei rui sa the, "Nang hei Hymdaihmeipu Nac Mpouh Khrista kiu cho?"
62 Khoutei Jisu rui sa the, "Ai kiu the, Meic Nac Mpouh hei Ngamparimeipu baanzat thangc dungc bammei khatni muangh khou keymei ta nangniw how puni."
63 Khoutei Tingkuh tei katuang phey siatna sa the, "Aniu kamwang khou rui chu the. Mi khang suangc mbumei tabui kage nai hena cho? 64 Kamei Ravguangc ta ramh sak makpui lat samei hei nangniw chu the. Nangniw akumhna ning tu cho?"
Khoutei, "Kamei theic biuc the," twna meic guayna rui sa the.
65 Khoutei meic gaanv saekc rui nteih nsuklou thau the, khatni kazaw gumlouna kaniw baanc rui sowna, "Thow rui cho, dinc o" twna sa the. Rigaanv nunc rui kata kaphina zay tat kan the.
Pitar rui Kamei Jisu Mei Hamh e Twna Samei
66 Pitar tei kaimav khou tei bam khou, Tingkuh tuang bangcpui gaanv khat guangna, 67 Pitar mai nggaan bammei ta how lana kata zaucna, "Nang ni Nazareth mei Jisu thei laymei e," twna sa the.
68 Tiki kamei rui nuh makna, "Ai kata thay mak e; nang sa bammei hei tabui cho ai kabah thay mak e," twna sa the. Kumna kamei kapaengc thangc tat pat kan the.
69 Banghpui tei rui Pitar ta how lana, kadaeng khou ding bammei nunc khou, "Mi pu hei ni kathei laymei akhat de," twna sa dat muai the. 70 Khoutei ni kamei kiuc hamh e twna sa dat muai the.
Kanakmei tangv, kadaeng khou ding bammei nunc tei rui, "Nang kaniw pang khou kazauhmei changh de, nang Galilimei de," twna Pitar khou sa the.
71 Khoutei kamei rui, "Nangniw sa bammeipu ta kiu ai thay mak e," twna syangdyng dingna sa the.
72 Mi dyng khou tei nruay khuangc luan kaneimei khuangc the. b Khoutei, "Nruay khuangc luan kanei makmei hu khou nang amei hamh e twna sa luan kathumh puni," twna kakhou Jisu rui saloumei lat tei Pitar ningtow the. Khoutei kamei kalung bak keyna kap the.