13
Jisu rui Kaziap nunc Phay Khiuloumei
1 Mi hei Kaanpatpui Ngai nngay guang nungc khwan e. Jisu kamei mbaanv hei mpatlouna kaPu daeng thangc tat dat nimei ganv na the twmei kamei thay the. Mi mbaanv khou bammei kamei nunc ta kamei nzian e; katwan nganv nzian e.
2 Khoutei Jisu kaziap nunc lev zingbangc taektw tu khang bam khwan e. Ravsic rui Simon Iskariot nac Judas lungc khou Jisu ta zuanctu niimei lungning tiilou the.a 3 Kapu rui ramh guayna kabaanc khou tiilou the, khatni kamei Ravguangc khou rui guang tuang e, kumna kakhou tat dat puni the twmei thay the. 4 Khoutei Jisu ding thau the, kumna katuang pheychuanh luak keylouna, pheyzai kasian khou malangvlou the. 5 Kumna keikhuang khou dui bunlouna kaziap nunc phay khiulou thau the. Kumna kasian khou malangvlou bammei pheyzai tei rui thut phuilou the. 6 Kamei Simon Pitar daeng khou guang tikhou, "Poubauhmei, nang rui aphay khiulou ni nah cho?" twna kamei rui sa the.
7 "Ai sw bammei hei nang ntaw kabah thay mak e, tiki thei thangc thay puni," twna Jisu rui sa daw the.
8 "Nang rui tabui nungc na sini aphay khiulou nina hamh e," twna Pitar rui sa the.
"Ai rui nang phay khiulou mak e thei, akhou nang dam maek e," twna Jisu rui daw the.
9 Simon Pitar rui, "Poubauhmei, kumc e thei, aphay na hamh e, abaanc ni khiulou o, apy ni lowlou o," twna sa the.
10 Jisu rui sa the, "Duilow tangv kanpui mei tei thu, kaphay na hamhna baihmei guay tei thub khiu dat khang kage maek khe; kapumc kapwm tei nthan the. Nangniw nthan the, tiki meic guayna thu hamh e." 11 Kata zuanctu nimeipu ta thay lana, "Meic guayna thu nthanmei ramh e," twna sa tuang e.
12 Jisu kaniw phay khiulou tangv lana, katuang pheychuanh nu dat the, kumna kabamv khou guang dungc dat the. Khoutei, "Ai rui nangniw khou swlou kanmei kabac hei nangniw thay daih?" twna kaniw khou thanv the. 13 "Nangniw rui ata Dinhpouc khatni Poubauhmei twna kaw e; nangniw samei tei nchumh the, ai kiu the. 14 Nangniw tuang Kaipouc khatni Dinhpouc ai rui nangniw phay khiuloumei kumcna, nangniw khat khat phay khiulou nina e. 15 Ai rui nangniw khou taancloumei kumcna taanh khang ai rui nangniw khou taanc lyanlou tuang e. 16 Ai rui nangniw khou kaling salou tuang e. Bangh gaanv khat na sini kakaipouc suangc daih mak e, khatni latdiutatmei gaanv khat na sini kata ndiuloumeipu suangc daih mak e. 17 Ntaw nangniw mi kabac hei thayna taanc e thei, nangniw sangaymei nunc e.
18 "Ai nangniw guayna ta sa tu hamh e; ai rui kapahloumei nunc ta ai thay de. 'Atuang ntyan twmeipu rui ata sw khang sw the,' twna Nthanmei Latrik khou hyloumei tei guang tangc puni. 19 Mi hei pat mak khou ai rui nangniw khou sa kasuakcloumei lam kiu thu, mi hei patpui nungc kiu, 'Ai hei Ai' kiu the twmei nangniw lwm khang e. 20 Ai rui nangniw khou kaling salou tuang e: Ai rui ndiuloupui mei ta laaloupui mei tei ata ni laalou tu e; khatni ata laaloupui mei tei ata ndiu guangmeipu ta laalou tu e."
Jisu rui Kata Zuanctu Nimeipu ta Dinc Kasuakcloumei
21 Jisu rui mi hei salou lana, kalung ryanrana sa the, "Ai rui nangniw khou kaling salou tuang e: Nangniw gaanv khat rui ata zuanctu puni the."
22 Kamei thow ta sa bam tu cho twmei thay lamc makna ziap nunc tei khat khat ta zauc the. 23 Kaziap gaanv khat, Jisu rui nzianmeipu tei, Jisu daeng tuancna dungc bam khwan e. 24 Khoutei, "Kamei thow ta sa bam tu cho thanv o," twna Simon Pitar rui kakhou mikkhwan swna sa the.
25 Kum tina mi pu tei Jisu daeng beic guang tuancna, "Poubauhmei, mi kiu thow cho?" twna thanv the.
26 "Ai rui ntyan kiak ntinna tii nimeipu kamei tei the," twna Jisu rui sa the. Kumna ntyan kiak akhat laana mi tei ntinna Simon Iskariot nac Judas khang tii the. 27 Kamei mi tyan tei laa rappuilev Seitan kalung khou gut the. "Nang sw nimei tei katumcna sw tho!" twna Jisu rui kakhou sa the. 28 Jisu rui mi hei Juda khou samei hei tabui sa bam tu cho twmei mi khou tei dungc nchamc bammei nunc tei thu thay mak khwan e. 29 Judas tei kaniw tuang syan khau sinmeipu tipui zaeng rui, mi ngai khang tei ramh liu tat o twna ny, hamh e thei lungcsimei nunc khang nzanh tat o twna Jisu rui sa tw ny twna kaniw gaanv saekc thu kakhanh khwan e.
30 Ntyan kiak tei haemvlou rappuilev Juda tei kaizaeng pat kan the. Mi tei zingbangc khwan e.
Latdanv Kathanc
31 Juda tat pat kanmei tangv, Jisu rui sa the, "Ntaw thu Meic Nac Mpouh tuang tik hym tidaiclou the; kakhou rui Ravguangc tik hym tidaiclou the. 32 Kakhou rui Ravguangc tik hym tidaiclou e thei, Ravguangc rui ni Meic Nac Mpouh tik hym kakhou rui tidaiclou puni, kumna kamei rui mi tei dyng mak khou swlou puni. 33 Alaucthiu, ai nangniw lev asaanh bam ni tu hamh the. Nangniw ata phu puni; tiki ai rui Jihudimei kapy nunc khou sa kanmei tei kumcna, ntaw ai rui nangniw khou samei tuang e: Ai tat nimei bamv thangc tei nangniw guang ngam ni tu hamh e. 34 Latdanv kathanc ai rui nangniw khang tii e, mi kiu thu: Nangniw khat khat ta nzian o. Ai rui nangniw ta nzianmei hei kumcna, nangniw khat khat ta nzian nina e. 35 Nangniw khat khat ta nzian ti thei, nangniw hei aziap nunc e twmei meic guayna rui thay puni."
Pitar rui Kamei Jisu Mei Hamh e twna Sa Nimei
36 "Poubauhmei, nang tabui thangc tat nina cho?" twna Simon Pitar rui sa the.
"Ai tat nimei bamv thangc tei nang ntaw thu lay tat ngam ni tu hamh e; tiki thei thangc nang ni athei lay guang puni," twna Jisu rui daw the.
37 "Poubauhmei, tabui swna ai ntaw nang thei lay tat ngam lak nina cho? Ai nang khang theiclou puni!" twna Pitar rui mundaw the.
38 Jisu rui kakhou sa the, "Nang akhang theiclou changh puni thah? Ai rui nang khou kaling salou tuang e: Nang hei amei hamh e twna nang rui sa liang kathumh mak saanv aseic nruay khuangc ni tu hamh e."