16
Sw-nchinmei Taanclou khang Samei
1 Khoutei Pharisi nunc khatni Sadduki nunc Jisu daeng khou guangna, kata nchanvna, Ravguangc ngamv khou rui sw nchinmei taanv kaniw khou lyanlou khang sa khwan e. 2 Khoutei mundawna Jisu rui kaniw khou sa the, " Neih key khou tingpuk haengc ta thei 'ting gay puni the' twna nangniw sa e. 3 Laukhwan khwanzingh tingpuk haengc zingc ti thei 'tingpwanzingh guang puni the' twna nangniw sa e. Kumna tingpuk zaw khou rui guang nimei ting neih lwnlung nangniw how pat thay e thei, ntaw hei nangniw khou sw nchinlou bammei guay tuang kabac thu nangniw how pat thay mak khe nah cho?a 4 Meicsimei khatni ravchaptat makmei mei nunc hei rui sw nchinmei ta phu e. Tiki Jona khou swlou kanmei sw nchinmei tei hamhna baihmei lyanlou lak e."
Kumna kaniw ta ganclouna kamei tat kan the.
Pharisi nunc khatni Sadduki nunc tuang Khay
5 Ziap nunc tei zeihlat paengc akhat thangc kaan pat the. Khoutei kaniw ntyan phungc amuc the. 6 Khoutei Jisu rui kaniw khou sa the, "Pharisi khatni Sadduki nunc tuang khay khou rui ramhthay o khatni suriak thay o."
7 "Aniu ntyan phungc ti makna sa bam tu khuangh the," twna kaniw kaphianh bam the.
8 Mi tei thay lana Jisu rui sa the, "He lwmmei nthyammei nunc, ntyan maekmei lam khou nangniw tabui swna kaphianh bam tu cho? 9 Nangniw kabah thay mak he nah cho? Ntyan dwm panguh rui meic ching panguh ta tituna giupaekc azuh nsaekclou cho twmei nangniw amuc dat the nah cho? 10 Ntyan dwm chanei rui meic ching padeih ta tituna tu nsaekcloumei giupaekc azuh khuam guang cho twmei amuc dat the nah cho? 11 Ai ntyan lam khou sa bam tu hamh e twmei akumhna nangniw thay makna cho? Pharisi nunc khatni Sadduki nunc tuang khay khou rui suriak thay o."
12 Khoutei kamei ntyan tuang khay lam khou sa bam tuang hamh e, tiki Pharisi nunc khatni Sadduki nunc tuang latdyn khou tei rui suriak thay o twpui tuang e twmei kaniw kabah thay the.
Pitar rui Jisu Lam Sa Ndauhmei
13 Mi tangc Jisu Kaisarea Philippi kaidai tuang ramv khou guang khou, "Meic Nac Mpouh hei thow e twna meicnunc rui sa bu cho?" twna kamei rui kaziap nunc khou thanv the. 14 Khoutei kaniw rui sa the, "Meic gaanv saekc rui 'Duilupmei John e,' meic gaanv saekc rui 'Elija e,' meic gaanv saekc rui 'Jeremia e,' hamh e thei 'muhzwng akhat e' twna sa e."
15 Kamei rui kaniw khou sa the, "Nangniw rui thu ata thow e twna sa tu cho?"
16 Khoutei mundawna Simon Pitar rui, "Nang thu ringhmei Racguangc Nac Mpouh Khrista e," twna sa the.
17 Khoutei Jisu rui kakhou sa the, "Bar-Jona Simon, nang sangay e! Mi nchumhmei hei nang khou tithayloumei hei maansei rui hamh e, tingkauh thangc bammei aPu rui e. 18 Ai rui nang khou kadylou tuang e: Nang hei Pitar the, mi taudaic ruc khou hei atuang phwamling kasiamh thau puni. Kumna taruaih raengckat rui ni mi ta hei ngam lak e. 19 Tingkauh Guangcdic kaikhamv laanhmei khatni mbanghmei ngamv ai rui nang khou tiilou puni. Kumna nang rui kandih khou karakloumei tei tingkauh thangc ni karaklou puni khatni nang rui kandih khou ricloumei tei tingkauh thangc ni riclou puni."
20 Khoutei kamei hei Khrista e twmei meic gaanv khat na khou sini raclou mak khang kaziap nunc khou kadylou the.
Jisu Kamei Theic Nimei Lam Dincloumei
21 Mi khou tei rui thauna, Jisu Khrista kamei Jerusalem thangc tat puni, kumna gaanvdaih nunc, amuh daihmei nunc, khatni Riakdanv tadin nunc baanc khou ryanramei mpeyna ariw puni, kumna kata swluai puni, tiki zaeng neih thumhpui nungc ringcthau dat puni twmei kaziap nunc khou ndaw sa thau the.
22 Pitar rui kata nduangh langc patna kata kakhimna, "Poubauhmei, mi kumhmei tei nang khou tipatlou makmei sw kan diu, mi kumhmei tei nang khou patlou ni tu hamh e," twna sa the.
23 Khoutei Jisu Pitar biak karih patna, "Athei thangc tat kan o, Seitan! Nang hei akhang phaysuy tauc de. Nang Ravguangc lungning ning mak e, maansei tuang de," twna sa the.
24 Khoutei Jisu rui kaziap nunc khou sa the, "Thow pwni athei lay nii e thei karana kata nuh mak nina e, kumna katuang theihchouc phungcna athei lay nina e. 25 Kalam thu karingcpaan kan khang swpui mei tei, mi tei maan puni; tiki akhang rui karingcpaan maanloupui mei tei ringhpaan laatow puni. 26 Tabui cho tiki, thowkumhmei rui mbaanv kapwm kakhang laatow sini, mi khang tei rui karingcpaan maanlou e thei, kakhang tabui gaengna cho? Karingcpaan thuak dat nuhpui puat tabui naina cho? 27 Kalam thu Meic Nac Mpouh hei Ravguangc baanchara nunc ta nduanghna kaPu tuang hymdaihmei khou guang puni. Mi khou kiu meic katana khang kataanv kataanv thay tii puni. 28 Ai rui nangniw khou kaling salou tuang e: Meic Nac Mpouh kaguangcdic khou guangmei ta how mak saanv theic lak nimei mei gaanv saekc mi khou ding bammei pang khou hei nai e."