8
Jisu rui Meic Ching Padeih ta Tituloumei
1 Mi ganv khou tei meic kangdai guang kaduai dat khwan e. Khoutei kaniw tu khang maek bam tikhou Jisu rui kaziap nunc ta kaw guangna kaniw khou sa the, 2 "Meic kangdai ta hei howlouna ai ningngam mak khe. Kalam thu kaniw adaeng khou bam guangmei ntaw zaeng neih thumh tangc the, kumna kaniw tu khang ramh maek khe. 3 Ai rui mi kumcna ndaepcna kaniw ta kaniw kai thangc ndiulou ti thei kaniw chaeng khou daepmu manc puni the. Kaniw gaanv saekc thu duh thangc rui de."
4 "Mi meic kangdai ta hei, titu nggulou khang mi ramvpuk khou hei tabui thangc rui laa nina cho?" twna kaziap nunc rui daw the.
5 Khoutei, "Nangniw khou ntyan dwm azuh nai cho?" twna Jisu rui kaniw khou thanv tikhou, "Chanei nai e," twna kaniw rui daw the.
6 Khoutei meic kangdai ta tei kandih khou dungc key khang sa the. Ntyan dwm chanei tei laana thuanckulouna by bak the. Kumna nzanh pat khang kaziap nunc khou tiilou the. Kaniw rui meicnunc khang nzanh pat the. 7 Kaniw khou khav lau launa asaekc ni nai khwan e. Kumna mi khou tei ni suaihiamlouna nzanh pat khang kaziap nunc khou sa the. 8 Kaniw tu ngguna tu the, kumna tu nsaekcloumei giupaekc chanei laa thau the. 9 Mi tei twmei meic ching padeih e. Jisu rui kaniw ta ndiu ganclou kan the. 10 Mi tangv kamei kaluak kalat kaziap nunc lev hih tuangcna Dalmanutha ramv khou guang the.
Sw-nchinmei Taanv Taanclou khang Pharisi nunc rui Samei
11 Khoutei Pharisi nunc patna Jisu ta agi thau the. Kata nchanvna tingkauh thangc rui sw nchinpui taanv taanclou khang sa the. 8.11: Mat 12.28; Luk 11.16 12 Khoutei kalung syng khou rui thiusaengc zayna sa the, "Tabui zaeng rui sw nchinpui tuang lyanlou khang mi meickin hei rui sa bam tu cho? Kaling siakna ai rui nangniw khou sa tuang e: mi meickin khou hei sw nchinmei lyanlou ni tu hamh e!"
13 Khoutei kaniw ta ganclouna hih tuangcna dui paengc akhat thangc kaan pat dat the.
Pharisi nunc khatni Herod tuang Khay
14 Khoutei kaniw ntyan phungc amuc the, kumna kaniw hih khou tei phungc bammei ntyan kiu kadwm akhat na di the. 15 Khoutei, "Suriak thay o, Pharisi nunc khatni Herod tuang khay ta tei zauc chuy lo," twna Jisu rui kaniw khou chariakhpui lat kady the.
16 Khoutei, "Aniu khou ntyan maek e," twna kaniw kaphianh thau the.
17 Mi tei thay lana Jisu rui kaniw khou sa the, "Tabui swna nangniw ntyan maekmei lam khou kaphianh bam tu cho? Nangniw kabah thay mak he nah cho? Nangniw lungning ndy ngam the nah cho? 18 Mik naina nangniw how mak khe nah cho, khatni nu naina nangniw chu mak khe nah cho? Nangniw amuc dat the nah cho? 19 Ai rui meic ching panguh khang ntyan dwm panguh rui by bakna nzanhlou khou tei tu nsaekcloumei padikmei giupaekc azuh nangniw laa thau tu cho?"
Khoutei, "Ruhna kanei," twna kaniw rui daw the.
20 "Ntyan dwm chanei rui meic ching padeih khang by bakna nzanhlou khou tei tu nsaekcloumei giupaekc padikmei azuh nangniw laa thau tu cho?" twna sa the.
"Chanei" twna kaniw rui daw the.
21 Kum e thei, "Ntaw nganv nangniw thay mak he nah cho?" twna Jisu rui kaniw khou sa the.
Jisu rui Mik Tiatmei ta Bethsaida khou Tigayloumei
22 Kaniw Bethsaida khou guang the. Khoutei meicnunc rui mik tiatmei gaanv khat ta Jisu daeng khou nduangh guangna kahilou khang kakhou huaycha the. 23 Khoutei Jisu rui mik tiatmeipu ta tei kabaanc zayna kaidai paengc thangc nduangh pat the. Kumna kamik khou kateic nsuklouna khatni kabaanc bouclouna, "Nang ramh how boh?" twna kakhou thanv the.
24 Khoutei, kamei zauc thauna, "Meic nunc ta thing bang kumcna how e, kaniw tat bam e," twna kamei rui sa the.
25 Khoutei Jisu rui kabaanc mi pu mik khou tei kabouclou dat the, kumna kamei how nthan the, gay dat the. Ramh guayna how nthan thiakh thiakna how the. 26 Khoutei, "Mi namv khou hei gut sini gut dat ri tho," twna kadylouna kakai thangc ndiulou kan the.
Pitar rui Jisu Lam Sa Ndauhmei
27 Mi tangv Jisu Kaisarea Philippi tuang namv guay thangc kaziap nunc lev tat the. Kumna chaeng khou kamei rui kaziap nunc khou, "Meic nunc rui ai hei thow e twna sa bam bu cho?" twna thanv the.
28 Khoutei, " 'Duilupmei John e,' twna meic gaanv saekc rui sa e, tiki baihmei gaanv saekc rui, 'Elija e,' twna sa e, kumna baihmei gaanv saekc rui, 'muhzwng akhat e,' twna ni sa e," twna kaniw rui daw the.
29 Khoutei, "Nangniw thu ai hei thow e twna sa tu cho? " twna Jisu rui kaniw khou sa the.
"Nang hei Khrista e," twna Pitar rui daw the.
30 Kum tina kaniw rui kalam khou meic gaanv khat na khou sini salou mak khang kamei rui kaniw ta kakhimlou the.
Jisu rui Kamei Ryanra khaengv Nimei khatni Theic Nimei Lam Saloumei
31 Khoutei, "Meic Nac Mpouh hei mpeyna ryanramei ariw puni, kumna gaanvdaih nunc rui, amuh daihmei nunc rui khatni Riakdanv tadin nunc rui ganc pat puni, nkhamh khou swluai puni. Tiki zaeng neih thumh tangv ringcthau dat puni," twna Jisu rui kaziap nunc khou dinclou the. 32 Kumna mi lat hei kamei rui nkamh dat makna ndaw sa the. Khoutei Pitar rui kata nduangh langc patna kakhimna sa the. 33 Khoutei kamei thei ziangrih patna, kaziap nunc ta zaucna, "Seitan, nang athei thangc tat kan o! Nang chwn hei Ravguangc chwn hamh e, maansei tuang de," twna Pitar ta luh the.
34 Khoutei meic kangdai ta tei lev kaziap nunc ta kadaeng khou kaw guangna kaniw khou sa the, "Thow pwni athei lay nii e thei, karana kata nuh makna, katuang theihchouc phungcna athei lay nina e. 35 Thow pwni karingcpaan maan mak khang twna ning e thei mi tei maan puni; thow pwni akhang rui khatni gaychamv khang karingcpaan maanlou e thei, mi tei gulou puni. 36 Thow pwni kandih kapwm hei kakhang laatow sini karingcpaan maanlou e thei, kakhang tabui gaengna cho? 37 Maansei gaanv khat tuang ringc paan hei tabui lev akhiak nuh na cho? 38 Thow pwni alam khou khatni alat lam khou mi ravchap tat makmei khatni paapc meickin khou hei zakpui mei lam khou tei Meic Nac Mpouh rui ni kamei nthanmei kauh baanchara nunc ta nduanghna kapu tuang hymdaihmei khou key pwkhou zak puni."