7
Pupouh nunc tuang Riakdyn
1 Khoutei Pharisi nunc khatni Jerusalem thangc rui guangmei Riakdanv tadin nunc Jisu daeng khou guang kaduai the. 2 Khoutei kaziap gaanv saekc kaniw baanc sw nthan makna, twmei thu khiu makna ntyan tu bammei ta kaniw how the.
3 (Kalam thu pupouh riak sinna Pharisi nunc khatni Jihudimei guay thu kaniw baanc kariak thei layna khiu mak e thei ramh tu mak e. 4 Kaniw kaithyan thangc rui guangna dui low nthan makna ramh tu mak e. a Mi kumna kaniw sin bammei baih baihmei riakâbuangh, lai, khatni kuanri kamkuak b khiumei tuang ni mpeyna nai e.)
5 Kumna Pharisi nunc khatni Riakdanv tadin nunc tei rui Jisu khou, "Tabuiswna nang ziap nunc pupouh riak tat makna nthan makmei baanc rui ntyan tu tu cho?" twna thanv the.
6 Khoutei Jisu rui kaniw khou sa the, "Kakheswmei nangniw lam khou Isaia rui cha rapna dinc kasuakcloumei, mi hei kumcna hylou the:
'Mi mei nunc hei kaniw chy rui ata chakhwang sw e;
tiki kaniw lung thu akhou rui duc the;
7 Nsa kaniw ata kalum e,
maansei tuang latdyn ta riakdyn kumcna nchamlou the.'
8 "Nangniw Ravguangc latdanv ta ganclouna maansei tuang pupouh riak ta sin the."
9 Jisu rui sa the, "Nangniw pupouh riak ngaek khang Ravguangc latdanv ta thei kaneilou the. 10 Kalam thu Mousi rui, 'Nang pui nang pu ta chakhwang sw nina e; kapui kapu ruc khou latsic sapui mei ta tei swluai nina e,' twna sa e. 11 Tiki nangniw rui, 'Meic gaanv khat rui kapui hamh e thei kapu khou: Nang ta makuat nimei tuang tei korban di the (mi kiu thu Ravguangc khang katloumei puat twna e) twna salou kan e thei, 12 kamei kapui kapu ta makuat nimei thouc kuak the,' twna sa e. 13 Mi kumcna nangniw tuang dinc kadai kadai keymei pupouh riak tei rui Ravguangc lat ta kak the. Kumna mi mi kumhmei mpeyna nangniw taanc e."
Maansei ta Sw-mphuammei
14 Khoutei Jisu rui meic kangdai ta tei kadaeng khou kaw guang datna kaniw khou sa the, "Nangniw guayna mi hei nking o, kumna kabah thay o: 15 Maansei ta kapaengc thangc rui gutmei puat rui sw-mphuam mak e; tiki kalungc khou rui patmei tei rui kata sw-mphuam tuang de." 16 ("Chu khang nukuanc naipui mei tei rui chu kan di tho!") c
17 Jisu meic kangdai khou tei rui tat pat lana kainung khou gut bam pwkhou, mi latgiam kabac tei kaziap nunc rui thanv the. 18 Khoutei kamei rui kaniw khou sa the, "Nangniw ni kabah laa thay makna cho? Kapaengc thangc rui maansei lungc khou gutmei puat tei rui thu kata sw-mphuam mak e. 19 Kalamthu mi tei kalungning khou gut tu hamh e, kabung khou gutna pat dat kanmei tuang de twmei nangniw thay mak nah cho?" (Mi hei rui taektw guay nthan de twna sa tuang e.)
20 Jisu rui sa the, "Maansei gaanv khat ta sw-mphuammei hei kalung khou rui patmei tei rui de. 21 Kalam thu simei lungning, lungcmaanvmei, kaihouhmei, meicdowmei, 22 nowsowmei, agaemvmei, kheihsimei, meicguatmei, nthahmei, mamavmei, meickai ta sakasicmei, daihriw swmei, mpangmei, 23 mi guay hei, kalungc thangc rui, maansei lungning khou rui pat e; kalungc thangc rui patna maansei ta sw-mphuam e."
Sirophonikiameipui Ramlum
24 Jisu thauna mi khou tei rui tat pat lana Tur ramv thangc tat the. Khoutei kamei kai akhat khou gut the, kumna kamei mi khou tei bam e twmei meic gaanv khat na si thay kan tu laa nii mak khwan e. Tiki kamei nkamh ngam mak khe. 25 Khoutei kanacpui simei bumaengc gutna bammei meicpui gaanv khat Jisu lam khou chu lana, kaluak kalat guangna kaphay daeng khou pun nkhum laemv key the. 26 Mi pui tei Grik lat samei Surophoinikiamei e. Kumna kanacpui khou rui ravsic ta tei nthau ganclou khang kamei rui Jisu khou sa the. 27 Khoutei Jisu rui kakhou sa the. "Alauc nunc ta titu nggu rey ni he; alauc nunc tu nimei tyan tei laana, silauna nunc khang phaicloumei nchumh mak e."
28 Khoutei mi pui tei rui mundawna Jisu khou sa the, "Ngguay, Poubauhmei, alauc nunc rui tu kathow keyloumei tei silauna nunc ni napkuak paeng bangc khou khuaic tu dyng e cho."
29 Jisu rui kakhou sa the, "Mi lat hei nang rui sapui zaeng rui, tat tho, ravsic tei nang nacpui khou rui tat pat kan the."
30 Khoutei kakai khou guang dat pwkhou kanacpui tei kalaeng khou zipna zaengsw bammei ta how the. Kanacpui khou rui ravsic tat pat kan bam khwan the.
Jisu rui Kanu Ndymei khatni Kabaley Luammei Gaanv Khat ta Tigayloumei
31 Jisu Tur ramv khou rui tat pat datna, Sidon tat ruan keyna Galili zeiclat khatni Dekapolis ramv khou key the. 32 Khoutei kanu ndy, kabaley luam twmei gaanv khat ta meic gaanv saekc rui Jisu daeng khou nduangh guangna mi pu khou tei kabaanc kabouclou khang huaycha the. 33 Khoutei mi pu ta tei meic pang khou rui karana ta nduangh langc patna Jisu rui kanu kai kanei khou kabaanc zung gitlou the khatni kateic nsukna kabaley khou kahilou the. 34 Kumna tingkauh thangc zauc kuna thiusaengc zay the, kumna kakhou "Ephratha" twna sa the. Mi kabac thu, "Laanc pat tho!" twna e.
35 Kadyng khou kanukuanc laanc pat the khatni kabaley ric pat the. Kumna kamei lat sa nthanna sa dat the. 36 Mi tei meic gaanv khat na khou sini raclou nuh mak e twna Jisu rui kaniw khou kakhimlou the. Tiki kamei rui kakhim ranvlou ti hay dinc ranv hay hay the. 37 Khoutei kaniw ngakna sa the, "Kamei ravpuatc guayna tigaylou dyng the, nu ndymei ta tichu the, lat sa thay makmei ta tisa the."