9
Jisu rui Kaziap Ruhna Kanei ta Ndiuloumei
1 Jisu rui gaanv ruhna kanei ta tei kaw guang kaduaina ravsic nthau ganh khang khatni ravpuatc guay tigaylou khang pumtan khatni ngamv tiilou the. 2 Kumna Ravguangc Guangcdic dinc ndauh khang khatni sw numei ta tigaylou khang kaniw ta ndiu pat the. 3 Kumna kamei rui kaniw khou sa the: "Chaeng khou sinsw khang nangniw ramh khat sini phungc riu—builwang ni, khau ni, ntyan ni, syan ni, thiula saplai ni phungc riu. 4 Nangniw gutloumei kai khou tei, nangniw mi kaidai khou tei rui tat dat mak saanv bam o. 5 Tiki nangniw ta laalou makmei nunc ruc khou tei thu, kaniw tuang kaidai khou tei rui tat pat dat ni khou, kaniw ruc khou sakhi khang, nangniw tuang phaypav niang tei kadiw keylou duc tio." 6 Kumna kaniw tat patna, namv namv khou tatlouna, tatloupui bamv kathuic khou gaychamv dinclou the khatni sw numei nunc ta tigaylou the.
Herod Jisu ta Thay Makmei
7 Mi kumna sw bammei guay hei guangh Herod chu lana, kamei ramh sw laa khang thay mak khe. Kalam thu, "John ta tiringcthaulou dat tina di the," twna meic gaanv saekc rui sa the. 8 "Elija lungc guang lana di the," twna gaanv saekc rui sa the. Baihmei gaanv saekc rui, "Reynungc muczwng ringcthau dat lana di the," twna sa the. 9 Tiki, "John ta thu ai rui kapy dangv kan the. Mi kumna sw bam e twna sa bammeipu kiu thow lana cho?" twna Herod rui sa the. Kumna kata ariw khang phu the.
Jisu rui Meic Ching Panguh ta Tituloumei
10 Kumna latdiutatmei nunc tei hanc guang datna kaniw rui taanc kanmei guay tei Jisu khou raclou the. Khoutei Jisu rui kaniw ta nduanghna kaphwng kaphaw makna, Bethsaida twna kawmei kaidai thangc tat the. 11 Tiki meic kangdai tei mi tei thay lana kathei lay guang the. Khoutei Jisu rui kaniw ta riulouna Ravguangc Guangcdic lam raclou the khatni tigaylou khang kage naimei guay ta tigaylou the.
12 Tiki tingzyn neih key pwkhou, ziap ruhna kanei tei guangna Jisu khou sa the, "Meic kangdai ta hei ndiu ganclou ti tho. Kaniw na khou naimei namv khatni laumangh namv guay khou bangv bamv khang khatni tu zangv khang kaphianh tat kan di tho. Aniu bampui bamv hei thu tazikramv di the."
13 Khoutei, "Kaniw tu khang nangniw tii tio," twna Jisu rui kaniw khou sa the.
Khoutei kaniw rui sa the, "Aniw khou naimei thu ntyan dwm panguh lev khav panguh na de. Aniw tatna liu mak e thei meic heizumei khang maek e." 14 (Kalam thu mi khou tei nggaanvmei meic ching panguh dou bam khwan e.)
Tiki, "Meic riakngu dou dou tuang phwam phwam swna tidungc key tho," twna Jisu rui kaziap nunc khou tei sa the. 15 Ziap nunc tei rui meic guay na ta mi tei kumcna tidungc key the. 16 Khoutei ntyan dwm panguh lev khav kanei tei laana tingkauh thangc zauc kuna suaihiamlou lana by baklou the. Kumna meic heizumei khou tei nzanhlou khang kaziap nunc khou tiilou the. 17 Khoutei meic guay na tu ngguna tu the, kumna tu nsaekcloumei giupaekc ruhna kanei khuam guang the.
Pitar rui Khrista ta Dinc Ndauhmei
18 Zaeng neih khat Jisu karana huayney bam khou, kaziap nunc ni kadaeng khou bam khwan e. Khoutei kamei rui kaziap nunc khou, "Ai hei thow e twna meicnunc rui sa bam bu cho?" twna thanv the.
19 Kaniw rui mundawna, "Duilupmei John e twna sa e; tiki gaanv saekc rui thu, 'Elija e,' baihmei gaanv saekc rui 'reydouc muczwng pang khou rui gaanv khat ringcthau dat lana e,' twna sa bam e," twna sa the.
20 Khoutei Jisu rui, "Nangniw thu ai hei thow e twna laa tu cho?" twna kaniw khou sa the.
Khoutei Pitar rui mundawna, "Ravguangc tuang Khrista the," twna sa the.
Jisu Kamei Theic Nimei lam khou Saloumei
21 Mi tei meic gaanv khat na khou sini salou nuh mak e twna kaniw khou kakhimlouna sa the, 22 "Meic Nac Mpouh hei ryanramei mpeyna ariw puni; gaanvdaih nunc, amuh daihmei nunc khatni Riakdanv tadin nunc rui kata nuh makna ganc pat puni khatni swluai puni. Tiki zaeng neih thumhpui nungc ringcthau dat puni."
23 Khoutei Jisu rui meic guayna khou tei sa the, "Thow pwni athei lay nii e thei, karana kata nuh makna, tingmik pum katuang theihchouc phungcna athei lay nina e. 24 Thow pwni karingcpaan kan niina ning e thei, mi tei swmaan puni; tiki thow pwni akhang rui karingcpaan maanlou e thei, mi tei gulou puni. 25 Thow pwni, mbaanv kapwm hei kakhang laatow sini, kamei kahak maanlou e thei, hamh e thei kapumc thwanlou e thei, kakhang tabui gaengna cho? 26 Thow pwni, alam khou khatni alat lam khou zakpui mei ta tei, Meic Nac Mpouh hei rui ni, kamei hymdaicna, kaPu hymdaihmei khou khatni nthanmei baanchara nunc hymdaihmei khou key pwkhou, kamei e twna sa khang zak puni. 27 Ai rui nangniw khou kaling samei tuang e, mi khou ding bammei nunc pang khou kaniw theih mak khou, Ravguangc Guangcdic how nimei nunc nai e."
Jisu Kalwn Guanlihmei
28 Mi guay hei saloumei tangv zaeng tachat dou tangv, Pitar, John khatni Jakob ta nduanghna, huayney khang Jisu chyng but thangc ku the. 29 Khoutei kamei huayney bam khou kazawpaanv kalaic pat the khatni katuang pheybaan mphwan tii tah ta pat the. 30 Zauc lo, mi khou tei Mousi lev Elija 31 hymdaicna guangna, Jisu kamei Ravguangc raeng ti-nthuihna Jerusalem khou theiclou nimei lam khou kamei lev kachuc bam khwan e. 32 Khoutei Pitar lev kapam nunc tei zip nii langvna zip tat the. Kumna kaniw mphaengv pat dat pwkhou, Jisu tuang hymdaihmei khatni kadaeng khou Mousi lev Elija ding bammei ta kaniw how the. 33 Mi nei tei tat dat kan pwkhou, Pitar rui Jisu khou sa the, "Kaipouc, aniu mi khou hei bammei gay the. Kumna aniw nang khang, Mousi khang khatni Elija khang zypui kai kathumh swlou ni the." Mi tei kamei tabui sa bam tu cho twmei thay makna sa bam tu khwan e. 34 Kamei mi tei sa bam khou, muangh guam guangna kaniw ta tuk liam the. Khoutei kaniw ping the. 35 Kumna, "Mi hei ai rui kapahloumei Anac Mpouh the, nangniw kalat chu o!" twna muangh khou tei rui kauc pat the. 36 Mi khwan tei sa pat pwkhou, Jisu karana bam dat khwan the. Ziap nunc tei kaniw rui how kanmei tei gaanv khat na khou sini, mi douc tei sa pat makna bam khwan e.
Ravsic Gutmei Alauc Khat ta Tigayloumei
37 Nthuanh thauna, kaniw chyng but thangc tei rui key dat pwkhou, meic kangdai rui kata ariw the. 38 Khoutei meic kangdai khou tei rui gaanv khat rui kaucna sa the, "Dinhpouc, anac ta zauclou o; kamei hei kalu akhat namei nac mpouh e. 39 Bumaengh akhat rui kata sinswna, kadyng khou kamei kauc thauna kandih khou kasaanv keylouna savbwam patna bam raph rap the. Kumna swkasic karouclouna ganclou raph rap the. 40 Mi ta hei nthau ganclou khang nang ziap nunc khou zaenghuay the, tiki kaniw ngam mak khe."
41 Khoutei mundawna, "Lwm makmei khatni chaeng maanvmei nunc, ai nangniw lev asaanh khaengv bam ho twna cho? Nang nac ta kiu mi khou hei laa guang o," twna Jisu rui sa the.
42 Mi nac tei Jisu daeng nzwan guangmei dyng khou ravsic tei rui kata titheilanc keyna kandih khou saanv keylou the. Khoutei Jisu rui simei bumaengc ta tei luh the, kumna mi nac ta tei tigaylouna kapu khou nsinlou dat the. 43 Khoutei meic guay tei Ravguangc ngamv daihmei ta tei ngak the.
Jisu Kamei Theic Nimei Lam Sa Datmei
Mi kumcna kamei rui swloumei guay khou tei meic guayna ngak sakna bam khou, Jisu rui kaziap nunc khou sa the, 44 "mi hei nangniw nukuanc khou chu gutlou laa tho: Mi kiu thu, Meic Nac Mpouh ta hei meicnunc baanc khou tii patlou puni the." 45 Mi lat kabac hei kaniw thay mak khe, kalam thu kaniw kabah thay mak khang, mi tei gum binlou kan the. Mi kabac tei kaniw thanv khang ni ping the.
Thow tei Daic Liangmei Puni Cho?
46 Kaniw pang khou thow tei daic liang puni cho twna kaziap nunc tei kaphianh thau the. 47 Kaniw khou mi kumhmei lungning nai bammei tei thay lana, Jisu rui alauc gaanv khat ta kaw guangna kadaeng khou tidinglouna, 48 kaniw khou sa the, "Thow pwni, mi nac ta hei laaloupui mei tei ata laalou tu e, khatni ata laaloupui mei tei ata ndiu guangmeipu ta laalou tu e. Kalam thu nangniw pang khou nthyam liangpui mei tei daic liangpui mei e."
49 Khoutei John rui sa the, "Kaipouc, meic gaanv khat nang zanc khou ravsic nthau ganc bammei ta howna mi tei sw riu twna aniw rui khaemlou kan e. Kalam thu kamei aniu thei lay kazauhpui mei hamh e."
50 Khoutei, "Kata khaem nangh e; kalam thu nangniw ta akhangv makpui mei tei thu nangniw biak lianghpui mei de, " twna Jisu rui kakhou sa the.
Samariamei rui Jisu ta Laalou Makmei
51 Kumna kata tingkauh thangc laa thau nipui ganv guang pwkhou, Jerusalem thangc tat khang Jisu dinglou the. 52 Kumna Jisu khang bangv bamv chamdaanv khang meic gaanv saekc ta ndiulou the. Khoutei kaniw Samariamei kaidai akhat khou gut the. 53 Tiki kamei Jerusalem thangc key nina tat bam tu de twpui zaeng rui, kaniw rui kata laalou mak khe.
54 Mi tei how lana, kaziap Jakob lev John rui, "Poubauhmei, tingkauh thangc rui mai tii keyna a kaniw ta hei swmaan di kho cho?" twna sa the. 55 Khoutei karih patna Kaniw ta luh the. b 56 Kumna kaniw namv baih thangc tat dat kan the.
Jisu Thei Laymei Thukh
57 Kaniw tat bammei chaenglwan khou tei, "Nang tat tatpui bamv khou ai nang thei lay ni," twna gaanv khat rui Jisu khou sa the.
58 Khoutei, "Asacsi nunc khang kaniw kai nai e, nruayna nunc khang ni kaniw bou nai e, tiki Meic Nac Mpouh khang thu kapy mbaeng keyloupui bamv khang na sini maek e," twna Jisu rui kakhou daw the.
59 Meic baihmei gaanv khat khou, "Nang athei lay o," twna Jisu rui sa the.
Tiki, "Ai apu ta mbeih tat rey ni he," twna mi pu tei rui daw the.
60 Khoutei, "Theihmei ta thu theihmei nunc rui mbeih bam kan di tho; nang thu Ravguangc Guangcdic chamv dinc tat tho," twna Jisu rui kakhou sa the.
61 Khoutei baihmei gaanv khat rui, "Poubauhmei, ai nang thei lay ni; tiki ai akai thangc tatna kaikhunhmei nunc khou kadylou ni he," twna sa the.
62 Khoutei, "Guaihphu sinna thei zauc karihpui mei tei thu Ravguangc Guangcdic khang biuh mak e," twna Jisu rui sa the.