14
Duiluploumei John Theihmei
1 Mi ganv khou tei, Galili ramvlangv sinmeipu Herod rui Jisu lam khou chu lana, 2 kabangc nunc khou sa the, "Kamei hei Duilupmei John tei e. Kamei theihmei khou rui ringcthau dat lana di the. Kum lana kamei mi kumhmei charynmei taanv guay hei taanh khang pumtan nai lana the."
3 Kalam thu, kachana Philip now Herodia zaeng rui kamei rui John ta nymna ntana kangkai khou lou khwan e. 4 Tabui cho tiki, Herod kamei mi pui ta tei kariak thei layna kaw nuh mak e twna John rui kata sa khwan e. 5 Kum tina Herod rui kata swluai nii khwan e, tiki kamei meicnunc ta ping e, kalam thu kaniw rui kata muhzwng akhat e twna laa bam khwan e.
6 Herod kamei puanhpui ngai khou Herodia nac aluhpui mathiuc mav khou alaemhna Herod ta tipianlou the. 7 Kum tina kamei rui ney neymei tii ni twna Herod rui mi pui khou tei latryan swlou the. 8 Khoutei kapui rui choulou tina "Duilupmei John py tei mi kuak khou hei louna akhang tii o," twna mi pui tei rui sa the.
9 Khoutei guangh tei kalung kabiu the, tiki kamei rui kakuak paeng khou dungc nchamc bammei mathiuc mav khou latryan swlou lapui zaeng rui mi tei tii khang latdanv pat kan the. 10 Kumna meic ndiulouna kangkai khou rui John py dangv the. 11 John py tei syandaih kuak khou puanc guangna tunapui khou tei tiilou the. Kumna kamei rui kapui khou puanc guang the. 12 Khoutei John ziap nunc guangna kapumc tei laana mbeih the, kumna kaniw Jisu daeng thangc tatna mi chamv tei dinclou the.
Meic Chyng Panguh ta Titumei
13 Mi chamv tei chu lana, Jisu mi bamv tei mpatlouna hih tuangcna meic maekmei bamv thangc tat khang karana tat kan the. Meic guay tei Jisu tat kanmei chamv tei chu lana kaidai guay khou rui patna phay chaeng kathei lay nzwan the. 14 Kamei hih khou rui pat pwkhou meic kangdai ta how the. Khoutei kaniw khang ningngam makmei pat the, kumna kaniw tuang sunu tigaylou the.
15 Tingzyn key pwkhou kaziap nunc kadaeng khou guangna, "Mi hei meic lungh makmei bamv de, kumna neih ni maek khe. Kum thena kaniw namv namv thangc tatna tu zangv khang kaphianh tat kan khang meicnunc ta hei mpatlou ti tho," twna sa the.
16 Khoutei Jisu rui kaniw khou, "Kaniw tat khang kage maek e. Kaniw tu khang nangniw tii tio" twna sa the.
17 "Aniw khou ntyan dwm panguh lev khav kanei na nai e," twna kaniw rui daw the.
18 "Mi guay kiu adaeng khou laa guang o" twna Jisu rui sa the. 19 Khoutei meic kangdai ta tei phuairiaw ruc khou dungc key khang sa the. Kumna ntyan dwm panguh lev khav kanei tei sinna tingkauh thangc zauc kuna thuancku the. Ntyan dwm guay tei by bakna kaziap nunc khou tiilou the. Kumna kaziap nunc tei rui meic kangdai khou tei nzanhlou the. 20 Khoutei meic guayna kaniw bung tu nggu the. Kumna tu nsaekcloumei khuam kaduai dat pwkhou nggiuh ruhna kanei padik the. 21 Mi khou tei tumei tei ntumei lev alauc ta pah makna nggaanvmei meic ching panguh dou e.
Jisu Dui Ruc khou Tatmei
(Matthiu. 6.45-52; John 6.15-21)
22 Jisu kamei rui meic kangdai ta tei titat ntamv dat bam kan khou, kaziap nunc tei hih tuangcna zeihlat paengc akhat thangc kaan pat khang tat hu kan the. 23 Kamei meic kangdai ta tei ndiu ganclou ngam lana huayney khang karana chyngbut thangc ku the, kumna zingc key pwkhou mi khou tei karana bam the. 24 Mi ganv khou tei hih tei zeihlat chung ramhbiucdou khou pwanzingh akhangvna bam khwan the. Kalam thu pwanzingh tei hih hu biak thangc rui guang riu the.
25 Khoutei, khwanpaengc pat pwkhou, Jisu dui ruc khou kaphay rui tatna kaniw daeng khou guang the. 26 Kamei dui ruc khou tat bammei ta tei how lana, kaniw ping the. "Mi hei mbuhrav di the" twna sana pingna kauc thau the.
27 Khoutei Jisu rui kaniw khou sa the, "Neihla o, ai de; Ping nangh e!"
28 Mundawna Pitar rui sa the, "Poubauhmei, nang de tw e thei, ai ni dui ruc khou tatna nang daeng khou guang khang latdanv patlou o."
29 Khoutei, "Guang tho" twna Jisu rui sa the. Khoutei Pitar hih khou rui keyna dui ruc khou tatna Jisu daeng thangc tat guang the. 30 Pwanzingh ta tei howna kamei ping the, kumna limc key khang sw the. Khoutei, "Poubauhmei ata gulou o," twna kamei rui kauc the.
31 Khoutei kaluak kalat kabaanc haemv patna kata zayna, "Lwmmei nthyammei, tabui swna nang lwmsi tu cho?" twna Jisu rui sa the.
32 Kaney hih khou tei ku rappuilev, pwanzingh tei nthaekc kan the. 33 Hih khou bammei nunc tei rui, "Nang hei Ravguangc Nac Mpouh changh dyng the," twna sana kata kalum the.
Jisu rui Gennesaret khou Nnaumei ta Tigayloumei
34 Kaniw zeihlat tei kaan patna Gennesaret ramv khou guang the. 35 Khoutei meicnunc tei Jisu ta thay lana, mi gaengv zaengv khou bammei guay khou sa liklou the. Kumna nnaumei nunc ta kadaeng khou phungc guang geic the. 36 Nnaumei nunc katuang phey tin na sini kahi khang huaycha the, kumna kahitowmei guay gay nthan thiak kan the.