9
1 Khoutei Jisu rui kaniw khou sa the, "Ai rui nangniw khou kaling salou tuang e: Ravguangc guangcdic tei pumtan daicna guangmei ta how mak saanv theic lak nimei mi khou ding bammei pang khou gaanv saekc nai e."
Jisu Kalwn Guanlihmei
2 Zaeng charuk tangv Jisu rui Pitar, Jakob, khatni John ta nduanghna kaniw rana chyng but kauhmei akhat khou ku the. Khoutei kaniw hu khou Jisu kalwn guanlih pat the. 3 Khoutei katuang pheychuanh tei mphwan tii tah ta pat the. Mi tei kandih mei gaanv khat na rui sini sou mphwan ngam lakmei ramphwan mphwan pat the. 4 Khoutei Elija lev Mousi Jisu ta kachuc bammei ta kaniw khou tihowlou the.
5 Khoutei Pitar rui Jisu khou sa the, "Rabbi, aniu mi khou hei bammei gay the. Kumna zypui kai kathumh - nang khang, Mousi khang, khatni Elija khang akhat khat aniw kasiamhlou ni the." 6 Kalam thu kaniw ping langv lana, kamei tabui lat sa ni na cho twmei sini thay dat mak khe.
7 Khoutei muangh guam guangna kaniw ta guam bin the. Kumna "Mi hei ai rui nzianmei Nac Mpouh e, nangniw kalat chu o!" twna muangh khou tei rui sa pat the. 8 Kadyng khou kaniw zauc kari kariang the, tiki Jisu ta hamhna baihmei ta thu kaniw how dat mak khe.
9 Meic Nac Mpouh tei theihmei khou rui ringcthau dat kan mak saanv kaniw how kanmei tei meic gaanv khat na khou sini raclou nuh mak e twna kaniw chyng but thangc tei rui tat key datmei chaenglwan khou Jisu rui kaziap nunc khou kakhimlou the. 10 Kakhimloumei tei kaniw ngaekna, "Theihmei khou rui ringcthaumei," twmei kiu tabui kabac cho twna kaniw kakhanhna bam khwan e.
11 Kumna, "Tabui swna 'Elija guang rey puni de,' twna Riakdanv tadin nunc rui sa bam tu cho?" twna kaziap nunc rui Jisu khou thanv the.
12 Khoutei Jisu rui kaniw khou sa the, "Kalingna, ramh guayna chamdaanvlou khang Elija guang rey the. Kum e thei, tabui swna Meic Nac Mpouh hei mpeyna ryanramei ariw puni, kumna kata ganc pat puni twna hylou tu cho? 13 Tiki ai rui nangniw khou sa tuang e: Elija guang kan the, kumna kalam khou hyloumei kumcna karuc khou kaniw rui swlou nii niimei tei swlou kan the."
Jisu rui Ravsic Gutmei Alauc Khat ta Tigayloumei
14 Kaniw ziap nunc daeng khou tei guang dat pwkhou, meic kangdai kaniw daeng bam haengvna Riakdanv tadin nunc rui kaniw ta agina bammei ta kaniw how the. 15 Khoutei meic kangdai tei Jisu ta how rap pwkhou ngak the. Kumna kaniw kadaeng khou pak guangna kata kalum the. 16 Khoutei Jisu rui kaniw khou, "Nangniw tabui lam khou kaniw lev agi bam tu cho?" twna thanv the.
17 Khoutei meic pang khou tei rui gaanv khat rui, "Dinhpouc, lat sa thay makmei bumaengc gutmei anac mpouh ta nang daeng khou nduangh guang tuang e. 18 Mi tei rui kata sin pwkhou, kata kandih khou saanv keylou the, kumna kasav patna kahuc khaic ndyangna chagangv bam raph rap the. Mi ta hei nthau ganclou khang nang ziap nunc khou sa tiki kaniw ngam mak khe," twna sa the.
19 Khoutei Jisu rui kaniw khou sa the, "He lwm makmei thiu, ai nangniw ta asaanh bam nduangh bam nina cho? Asaanh nangniw lev khaengv bam nina cho? Mi nac ta kiu adaeng khou nduangh guang o."
20 Khoutei kaniw rui kata Jisu daeng khou nduangh guang the. Jisu ta how rappuilev mi bumaengc tei rui mi nac ta tei kandih khou saanv keylou the, kumna kamei kasav patna liaulu liaulang bam the.
21 "Kamei mi kumc bammei hei asaanh tingsaengc thah?" twna Jisu rui kapu khou thanv the.
Khoutei kapu rui, "Kamei angana khou rui di the. 22 Kata swluai khang katupna mai khou ni dui khou ni phaiclou the. Kumna ngam e thei, nzianlouna nkhavlou na o," twna sa the.
23 Khoutei Jisu rui kakhou sa the, " 'Ngam e thei' twmei kiu, lwmmei khang thu ngam mak tuang maek e."
24 Khoutei angana pu tei rui kaucna, "Ai lwm e, ai lwm khang nkhavlou o!" twna sa the.
25 Meic kangdai pak karwng guangmei ta Jisu how lana, "Lat sa thay makmei khatni nu ndymei bumaengc, ai rui nang khou latdanv tii e: Nang kakhou rui tat pat kan tho! Nang kakhou gut dat nuh mak khe!" twna simei bumaengc ta tei kamei rui luh the.
26 Khoutei tikauc rah ndyna titheilanc kasic keylou lana tat pat kan the. Kamei tei theihmei kumc the, kum tina meic mpeyna rui kamei theic the twna sa the. 27 Tiki Jisu rui kabaanc sinna kata zay thau the, kumna kamei thau dungc the.
28 Jisu kainung khou gut pwkhou kaziap nunc rui kakhou nkunna, "Tabui sw tina aniw mi ta hei nthau ganc ngam mak tu cho?" twna thanv the.
29 Khoutei Jisu rui kaniw khou sa the, "Mi kumhmei hei thu huayneymei paan na rui hamhna nthau ganc ngam mak e."
Jisu rui Kamei Theic Nimei Lam Sa Datmei
30 Kaniw mi khou tei rui tat pat lana Galili tat ruan pat khwan e. Mi tei meicnunc ta tithay nii mak khwan e. 31 Kalam thu, "Meic Nac Mpouh ta meicnunc baanc khou tii pat puni, kumna kaniw rui kata swluai puni, tiki zaeng neih thumh tangv kamei ringcthau dat puni," twmei kamei rui kaziap nunc khou dinclou bam khwan e. 32 Tiki kaniw mi lat hei kabah thay mak khwan e. Kum khwan sini kakhou thanv khang ni ping khwan e.
Thow tei Daic Liangmei Cho?
33 Mi tangv kaniw Kapernaum khou guang the. Kumna kaniw kainung khou bam khou, Jisu rui kaziap nunc khou, "Nangniw chaeng khou kaphianh tat bammei tei tabui lam cho?" twna thanv the.
34 Khoutei kaniw lat daw mak khe, kalam thu kaniw pang khou thow tei daic liangmei cho twna kaniw chaeng khou kaphianh tat bam khwan e. 35 Khoutei dungc keyna Jisu rui gaanv ruhna kanei ta tei kaw guangna kaniw khou sa the, "Thow pwni daic liangmei sw nii e thei, kamei nthyam liangmei sw nina e khatni meic guayna siamruaimei sw nina e."
36 Khoutei alaucna gaanv khat ta laa guangna kaniw chung khou tidinglou the, kumna mi nac ta tei puancna Jisu rui kaniw khou sa the, 37 "Thow pwni mi kumhmei alauc akhat ta hei azanc khou laaloumei kamei tei ata laalou tu e; thow pwni ata laaloumei tei ata laalou tu hamh e, ata ndiu guangmeipu ta laalou tu e."
Aniu ta Howmu Makmei nunc tei Aniu Biak Lianghmei de
38 Khoutei John rui Jisu khou sa the, "Dinhpouc, meic gaanv khat nang zanc khou rui ravsic nunc ta nthau ganc bammei ta aniw howna mi tei sw riu twna aniw rui kata sa the, kalam thu kamei aniu thei laymei hamh e."
39 Tiki Jisu rui sa the, "Kata khaem tii nangh e, kalam thu azanc khou rui charynmei taanv taanhmei gaanv khat na sini ata sa kasic nuangc rap ngam ni tu hamh e. 40 Kalam thu aniu ta howmu makpui mei tei aniu biak lianghmei de. 41 Thow pwni nangniw Khrista mei e twpui zaeng rui nangniw ta dui chu buangc na sini tizangvlou e thei, ai rui nangniw khou kaling salou tuang e: katuang swan khat sini maan dat mak khe."
Paapc khou Keyloumei
42 "Thow pwni lwmmei nthyammei alauc gaanv khat ta tiphaysuypui mei ta tei thu kaguang khou napriak tauc daihmei nleilouna duipui khou phaicloumei rui kakhang gaymei de. 43 Nang baanc rui nang ta tiphaysuy khang sw e thei, mi tei dan ganc o. Baanh kanei naina amit dat makmei maikwam thangc tatmei suangc baanh akhat maekna ringhmei khou gutmei rui nang khang gaeng e. 44 Mi khou tei 'kaniw tuang nthanv guay tei theic dat mak khe, khatni kaniw tuang mai tei amit dat mak khe.' a 45 Khatni nang phay rui nang ta tiphaysuy e thei, mi tei dan ganc o. Phay kanei naina maikwam khou phaicloumei suangc phay akhat maekna ringhmei khou gut kanmei rui nang khang gay e. 46 Mi khou tei 'kaniw tuang nthanv guay tei theic dat mak khe, khatni kaniw tuang mai tei amit dat mak khe.' b 47 Nang mik rui nang ta tiphaysuy khang sw e thei, mi tei lat ganc o. Nang mik kanei naina maikwam khou phaicloumei suangc, mik akhat maekna Ravguangc guangcdic khou gut kanmei rui nang khang gay e. 48 Maikwam khou tei kaniw tuang nthanv theic dat mak khe, mai ni amit dat mak khe.
49 Ravcha ta ntey rui sw nthanmei kumcna meic katana ta mai rui sw nthan puni.
50 Ntey hei gay e; tiki ntey hei bumc taan e thei, mi ta hei akumhna tibumc dat nina cho?
"Nangniw ntey kumc o, kumna nangniw khat khat kak khou chuzaenghna lungc bam o."