22
Nowsuanh Ngai Latgiam
1 Khoutei mundawna Jisu rui latgiam swna kaniw khou sa dat e, 2 "Tingkauh Guangcdic hei guangh akhat rui kanac now suanhpui ngai raengc patmei kumhmei tuang e. 3 Ngguay khang tei kabailoumei guay ta tei kaw khang kamei rui kabangc nunc ta ndiu pat the, tiki kaniw guang nii mak khe. 4 Kamei rui kabangc gaanv saekc ta ndiu pat datna, 'malanloumei guaichic nunc downa nngay taektw chamdaanv luailou the, ramh kaguayna chamdaanv luai the, guang tho, twna kabailoumei guay khou tei tatna sa tho' twna kamei rui sa the. 5 Tiki mi tei thouhswlou makna kaniw tat ngam kan the: gaanv khat rui kalau thangc tat kan the, baihmei rui katuang lanvguanhpui bamv thangc tat kan the, 6 baihmei gaanv saekc tei rui kabangc nunc ta tei nymna sw changamclouna swluai the. 7 Khoutei guangh tei kalung puamc the, kumna katuang ricmei nunc ta ndiu patna mi meicdowmei nunc ta tei swluai the, khatni kaniw tuang kaidai tei mailou the.
8 "Khoutei kamei rui kabangc nunc khou tei sa the, 'Nowsuanh ngai thu chamdaanv luai the, tiki kabailoumei nunc tei thu guang khang biuh mak khe. 9 Mi zaeng rui nangniw chaengkhaek dai khou pat lana meic ariwmei guay ta nngay khang tei kabai tho'. 10 Kumna mi bangc guay tei chaengdai khou pat lana, meic si meic gay kapah makna, ariw riwmei ta khuam guangna nowsuanh kai tei maansei rui padik the.
11 "Khoutei guangh tei gutna, guang bammei guay ta tei zauc pwkhou nowsuanh pwan piu makmei gaanv khat ta how the. 12 Khoutei 'Champanv, nowsuanh pwan piu makna akumhna nang mi khou hei gut bam tu cho?' twna guangh tei rui kakhou sa the. Khoutei kamei ramh lat sa mak khe. 13 Khoutei, 'Kata hei kaphay kabaanc karakna kapaengc zinghmei khou ganc pat kan o,' twna guangh tei rui siamruaimei nunc khou tei sa the. Mi khou tei kamei huh khaic ndyang kariakh riakna puihuayna bam puni.
14 "Kalam thu meic mpeyna ta kaw e, tiki meic katitna ta kapah e."
Dihkhav Tiimei Lam Thanvmei
15 Khoutei Pharisi nunc tei tat pat lana Jisu ta kalat khou timanh khang kaphianh the. 16 Kumna kaniw rui kaniw tuang ziap nunc lev Herodmei nunc ta ndiulou tina kaniw rui Jisu khou sa the, "Dinhpouc, nang hei nchumhmei sameipu e twmei aniw thay e. Nang thu maansei ta rouh tuang maekna Ravguangc ningmei nchumhmei dinhmeipu e; kalam thu nang thu maansei ta zawkhu zawru zauh mak e. 17 Mi zaeng rui Kaisar khang dihkhav tiimei hei Riakdanv thei layna nuh ny nuh mak cho? Nang ningmei aniw khou dinclou o."
18 Kaniw tuang simei raeng tei thay lana Jisu rui kaniw khou sa the, "Kakheswmei thiu, tabui swna nangniw ata nchanv bam tu cho? 19 Dihkhav tii nimei syan kiu akhou lyan o."
Khoutei kaniw rui denari akhat Jisu khou laa guang the. 20 Khoutei, "Mi hei thow maengc cho, khatni hyloumei hei tabui lat cho?" twna Jisu rui kaniw khou thanv the.
21 "Kaisar tuang," twna kaniw rui daw the.
Khoutei Jisu rui kaniw khou sa the, "Kum e thei Kaisar tuang tei Kaisar khang tii tio, Ravguangc tuang tei Ravguangc khang tii tio."
22 Mi tei chu lana kaniw ma maek khe, kumna kakhou rui tat pat kan the.
Theihmei khou rui Ringcthaumei Lam Thanvmei
23 Mi nungc tei, theihmei ringcthau dat mak e twna samei Sadduki nunc Jisu daeng khou guangna kakhou thanvna, 24 sa the, "Dinhpouc, 'thowkumhmei gaanv khat rui kanac maekna theic kan e thei, kachana rui kachana now ta kakhauhna kachana kikta ti-nailou nina e,' twna Mousi rui salou e. 25 Chana gaanv chanei aniw pang khou lungclou khwan e. Gaanvdaihmeipu tei kanow kaw the, tiki kanac maekna kanow tei kakainac khang ganclou ducna theic kan the. 26 Kaneimei, kathumhmei tei ni mi tei kumc muaina chaneimeipu khou tei nganv key tangc the. 27 Nkhamh khou ntumei tei ni theic the. 28 Kum e thei, ringcthau dat khou kiu mi pui tei kakai chana gaanv chanei khou tei thow now sw puni cho? Kaniw meic guayna kata kaw ntangh the."
29 Mundawna Jisu rui kaniw khou sa the, "Hylou bammei ta tei khatni Ravguangc pumtan ta thay makpui zaeng rui nangniw nkhuai the. 30 Theihmei khou rui ringcthau dat khou thu now kaw mihmei nai dat mak khe, kaniw tingkauh baanchara nunc kumc kan ni the. 31 Theihmei rui ringcthau datmei lam khou thu, Ravguangc rui nangniw khou samei tei pac zat mak he nah cho? Ravguangc rui sa e,
32 'Ai hei Abraham Racguangc,
Isaak Racguangc khatni
Jakob Racguangc e.'
"Kamei hei theihmei nunc Racguangc hamh e, ringc bammei nunc Racguangc de."
33 Mi tei chu laa khou meicnunc tei kamei rui nchamloumei khou tei ngak the.
Daihmei Latdanv
34 Jisu rui Sadduki nunc mwang daw thimlou kan the twmei Pharisi nunc tei chu lana kaniw guang kaduai the. 35 Khoutei kaniw pang khou Riakdanv tadin gaanv khat rui kata nchanvna, 36 "Dinhpouc, Riakdanv khou tabui tei daic liangmei latdanv cho?" twna thanv khwan e.
37 Khoutei Jisu rui kakhou sa the, " 'Nang Racguangc Poubauhmei ta nang lungc kapwm rui, nang tuang ringcpaan kapwm rui khatni nang lungning kapwm rui nzian nina e,' 38 twmei hei daic liangmei khatni nthuk liangmei latdanv the. 39 Kaneimei daic liangmei latdanv kiu thu: 'Nang kai kaining kaigeimei ta nang pumc kahak ta kumcna nzian nina e,' twmei hei e. 40 Riakdanv khatni muhzwng nunc tuang latdyn kapwm kiu mi khou hei nai the."
Khrista Lam Thanvmei
41 Pharisi nunc tei guang kariu pwkhou, Jisu rui kaniw khou thanvna, 42 "Khrista lam khou nangniw akumhna ning tu cho? Kamei thow nac cho?" twna sa the.
Khoutei, "David Nac Mpouh e," twna kaniw rui daw the.
43 Kamei rui kaniw khou sa the, "Kum e thei David rui akumhna Bumaengh paan rui kata 'Poubauhmei' twna kaw tu cho? David rui sa e,
44 'Ringhpouc rui apoubauhmei khou sa e,
Nang ta zauczihmei guay ta,
ai rui nang phaypav bangc khou lou mak saanv,
a baanzat khou dungc bam o.'
45 "Mi zaeng rui, David rui kata 'Poubauhmei' twna kaw e thei, akumhna kamei kanac nina cho?"
46 Khoutei meic gaanv khat na sini lat akhat na sini daw dat ngam mak khe khatni mi nungc tei rui thauna meic gaanv khat na sini lat thanv dat bauh mak khe.