12
Luairyn Lau Saanvmei Latgiam
1 Khoutei Jisu rui latgiam zayna kaniw khou sa thau the: "Meic gaanv khatpu luairyn lau lingclouna karaengv raengclou the, luairyn dui sunhpui khunc kasiamhlou the, khatni lauphaan kai swlou the. Kumna mi tei lau nngemei nunc khou saanvlouna tat kan the. 2 Kathai minhpui ganv guang pwkhou, kathai laa khang kabangc gaanv khat ta lau nngemei nunc khou tei ndiu guang the. 3 Khoutei kaniw rui kata nymna bai lana kabaanc raeng ndiu hanc dat the. 4 Khoutei kamei baihmei bangc gaanv khat ta ni kaniw khou ndiulou dat e. Khoutei kaniw rui kapy sw nzamhlou the khatni sw zak lou the. 5 Baihmei bangc akhat ta ni kamei rui ndiu guang dat e. Kumna mi ta tei kaniw rui swluai the. Baihmei mpeyna ta kamei rui ndiu guang e; tiki gaanv saekc ta bai the, gaanv saekc ta swluai the. 6 Ndiulou dat khang gaanv khat nai he. Mi kiu kamei nzianmei nac mpouh e. 'Anac mpouh ta thu kaniw chakhwang swlou pungh di the,' twna sana kata nkhamh liang khou kaniw khou ndiu guang the. 7 Tiki mi lau nngemei nunc tei kaniw pang khou mi kumcna sa the, 'Mi hei katuang tampy luak nimeipu the; guang tho, aniu kata swluai di kho, kumna katuang hei aniu khang laa di kho.' 8 Kumna kaniw rui kata nymna swluai the, kumna kata luairyn lau paengc thangc ganc pat the.
9 "Luairyn lau pouc tei rui tabui sw puni bo? Kamei guangna lau nngemei nunc ta tei swluai puni, kumna luairyn lau tei meic baihmei khang tii dat puni. 10 Nangniw mi kumcna hylou bammei hei pah mak he nah cho?:
'Kai swmei nunc rui gancpatloumei tauc rui,
kaikwnpy tauc sw the.
11 Mi hei Poubauhmei taanv e;
mi hei aniu ramninglow khou kadath dat tuang e.' "
12 Khoutei Jisu ta nym khang kaniw kachaeng phu the. Kalam thu mi latgiam hei kaniw ta sa bam tu e twmei kaniw thay khwan e. Tiki kaniw meicnunc ta ping khwan e, kumna kaniw kata ganclouna tat kan the.
Dihkhav Tiimei Lam Thanvmei
13 Kalat khou rui nym khang twna kaniw rui Pharisi gaanvsaekc khatni Herodmei gaanvsaekc ta Jisu daeng khou ndiu guang the. 14 Kaniw guangna Jisu khou sa the, "Dinhpouc, nang hei maansei ta rouh tuang maekna nchumhmei sameipu e; kalam thu nang maansei ta zaw khu zaw ru zauh mak e, kumna Ravguangc ningmei nchumhmei dinc e twmei aniw thay e. Kumna Kaisar khang dihkhav tiimei hei Riakdanv thei layna nuh ny nuh mak cho? Mi hei aniw tii nina ny, tii lak nina cho?"
15 Khoutei Jisu kaniw tuang kakheswmei tei thay lana kaniw khou sa the, "Tabui swna nangniw ata nchanv bam tu cho? Denari a akhat laa guang o, zauc kho."
16 Kaniw rui mi tei laa guang the. Khoutei Jisu rui kaniw khou sa the, "Mi hei thow maengc cho, khatni thow tuang e twna hylou bu cho?"
Khoutei, "Kaisar tuang," twna kaniw rui daw the.
17 Khoutei Jisu rui kaniw khou sa the, "Kaisar tuang tei Kaisar khang tii tio, Ravguangc tuang tei Ravguangc khang tii tio."
Khoutei kaniw ngak the.
Theihmei khou rui Ringcthaumei Lam Thanvmei
18 Theihmei ringcthau dat mak khe twna samei Sadduki nunc Jisu daeng khou guangna thanvna kumna sa the, 19 "Dinhpouc, thowkumhmei chana gaanv khat kanac maekna kanow ta ganclouna theic kan e thei, kakainac rui kachaic now ta kakhauh dat lana kachaic kikta ti-nailou nina e twna Mousi rui aniw khang hylou e. 20 Chana gaanv chanei nai khwan e. Kumna gaanvdaihmeipu tei kanow kawna kanac maekna theic kan the. 21 Khoutei kaneimeipu tei rui kata kakhauhna kanac maekna theic muai kan the. Kathumhmeipu tei ni, mi tei kumc muai the. 22 Mi kumna gaanv chanei tei kaniw nac maek khe. Nkhamh khou ntumei tei ni theic the. 23 Ringcthau datpui nungc kiu kaniw ringcthau pwkhou mi pui tei thow now sw nina cho? Kalam thu kaniw gaanv chanei rui kata kaw the."
24 Khoutei Jisu rui kaniw khou sa the, "Nangniw thay maanv the, mi hei nthanmei latrik khou hylou bammei tei khatni Ravguangc pumtan tei thay makpui zaeng rui hamh nah cho? 25 Kalam thu theihmei khou rui ringcthau dat pwkhou, now kawmei khatni mihmei nai dat mak khe. Kaniw tingkauh thangc bammei baanchara nunc kumc puni the. 26 Theihmei nunc ringcthau datmei lam khou thu, Mousi tuang latrik zy khou, thing phwam lam khou hyloumei tei nangniw pah mak he nah cho? 'Ai hei Abraham Racguangc e, Isaak Racguangc e, khatni Jakob Racguangc e,' twna Ravguangc rui Mousi khou sa e twmei hylou mak nah cho? 27 Kamei hei theihmei nunc tuang Racguangc hamh e, ringc bammei nunc tuang de. Nangniw mpeyna nkhuai the."
Daic Liangmei Latdanv
28 Khoutei Riakdanv tadin gaanv khat guang the, kumna kaniw agi bammei tei kamei chu the. Jisu rui Sadduki nunc khou daw chuyna daw bammei tei chu lana kamei rui Jisu khou, "Latdanv guayna pang khou tabui tei daic liangmei cho?" twna thanv the.
29 Jisu rui mundawna sa the, "Daic liangmei kiu thu: 'Nking o, He Israel, Kaipouc kiu thu aniu Poubauhmei Ravguangc na hei de. b 30 Kumna Poubauhmei nang Racguangc ta nang lungc kapwm rui, nang ringcpaan kapwm rui, nang lungning kapwm rui khatni nang pumtan kapwm rui nzian nina e,' twmei hei e. 31 Kaneimei rui: 'Nang tuang kaining kaigeimei ta nang rui nang ta nzianmei kumcna nzian nina e,' twmei hei e. Mi khang suangc daihmei latdanv baihmei maek khe."
32 Khoutei Riakdanv tadin tei rui Jisu khou sa the, " 'Dinhpouc, Ravguangc akhat na de, kamei hamhna baihmei maek e twna nang samei nchumh the. 33 Kata lungc kapwm rui, lungning kapwm rui khatni pumtan kapwm rui nzianmei, khatni katuang kaining kaigeimei ta karana kata nzianmei kumcna nzianmei twmei hei kapumc kapwm rawna katmei khatni khaengmei guay suangc mbu taph tapmei e.' twna nang samei hei nchumh the."
34 Mi pu tei ningtyngna daw e twmei how laa khou, "Nang Ravguangc Guangcdic khou rui duh mak khe," twna Jisu rui kakhou sa the.
Mi tangv thu meic gaanv khat na sini kakhou lat thanv dat bauh mak khe.
Messia Lam Thanvmei
35 Ravkai khou nchamlou bam khou Jisu rui mi kumcna thanv the, "Khrista hei David Nac Mpouh e twna akumhna Riakdanv tadin nunc rui sa tu cho? 36 Bumaengh Nthanmei paan rui David rui sa e:
'Nang ta zauczihmei nunc ta nang
phaypav bangc khou lou mak saanv,
nang abaanzat thangc dungc bam o,
twna Ringhpouc rui apoubauhmei khou sa e.'
37 "David rui kata 'Poubauhmei' twna kaw e, kumc e thei akumhna Khrista hei kanac nina cho?" Meic kangdai tei neihlana kalat nking the.
Riakdanv Tadin nunc khou rui Suriakthay o
38 Kumna kamei rui nchamlou bam khou Jisu rui sa the, "Ramhthay lo, pheychuanh piuna ruan tat bam niimei, charuangc laa khou kalumlou pwmei ta kahawmei, 39 sinagog khou bamvdaih dungc niimei, khwm nngay bamv khou chakhwang bamv khou dungc niimei, maypui nunc kai kwam twmei, kum lana gaylwn swna karavsuai saenghmei Riakdanv tadin nunc ta tei. 40 Kaniw ruc khou keylou nimei latzan hei nrit diangc puni."
Maypui tuang Puatkat
41 Jisu syan kouc daeng khou dungcna meicnunc rui syan kouc khou syankangh phaiclou bammei ta zauc bam khwan e. Lungcgaymei mpeyna rui mpey peyna phaiclou bam khwan e. 42 Khoutei lungcsimei maypui gaanv khat kuanri syankangh kanei, twmei thu paic akhat phaiclou khwan e. 43 Khoutei kaziap nunc ta kadaeng khou kaw guangna kaniw khou sa the, "Ai rui nangniw khou kaling salou tuang e: mi syan kouc khou phaiclou bammei pang khou, mi lungcsimei maypui tuang hei geic liang e. 44 Kalam thu baihmei guay tei thu mpeyna naimei khou rui tii tuang de, tiki mi pui hei thu karam lungcsi khou naimei kapwm, kamei tu nimei phaan tii tuang e."