23
Riakdanv Tadin nunc khatni Pharisi nunc khou rui Suriakthay o
1 Khoutei Jisu rui meic kangdai khatni kaziap nunc khou sa the, 2 "Riakdanv tadin nunc khatni Pharisi nunc hei Mousi bamv khou dunghmei nunc e. 3 Mi zaeng rui kaniw rui samei guay tei taanc o khatni ngaek o, tiki kaniw rui taanhmei tei thu lay taanh riu. Kalam thu kaniw hei sa e tiki taanh mak e. 4 Kaniw hei rui puatc nritmei bang lana meicnunc bou khou tipuanclou e, tiki kaniw baanc zung na rui sini mi tei kapwang nkhavlou nii mak e. 5 Kaniw rui sw bammei guay hei meicnunc how khang na sw bam tuang de. Kaniw sanpiang khatni kaniw baanc pwam khou kamclou bammei phulaktari ramdai tei khatni kaniw tuang pheychuanh phaan ramsaeng tei! a 6 Kaniw hei khum ngai bamv khou chakhwang bamv khou khatni sinagog khou bamvdaih khou dungc nii e. 7 Kaithyan bamv bamv khou chakhwang sw lyanloumei ta khatni meicnunc rui 'Rabbi' twna kawloumei ta kaniw kahaw e. 8 Nangniw ta thu 'Rabbi' twna tikaw rio. Kalam thu nangniw tuang kaipouc akhat nai e, nangniw thu chana nunc de. 9 Kandih maansei gaanv khat na ta sini 'Pu' twmei zancphuakh hei kaw rio, kalam thu tingkauh thangc bammei nangniw 'Pu' akhat na nai e. 10 Nangniw ta 'Zayloumeipu' twna ni tikaw rio, kalam thu nangniw ta Zayloumeipu akhat na naimei kiu Khrista hei e. 11 Nangniw pang khou daic liangmei kamei tei nangniw tuang siamruaimei sw nina e. 12 Karana kata tidaihpui mei ta tiliw keylou puni, khatni niamhpui mei ta tidaiclou puni.
Kaniw tuang Gaylwn Swmei ta Nuh Makmei
13 "Kakheswmei Riakdanv tadin nunc khatni Pharisi nunc, nangniw sansi e dav! Kalam thu nangniw rui meicnunc gut mak khang Tingkauh Guangcdic kaikhamv mbangh the. Nangniw ni gut mak khe, gut nimei nunc ta ni nangniw rui thingc the. 14 (Kakheswmei Riakdanv tadin nunc khatni Pharisi nunc, nangniw sansi e dav! Nangniw rui maypui nunc tuang asut tu e, kumna nangniw tuang ravsuai saenghpui lwn sw e. Mi rui nangniw khuay daic the.)b
15 " Kakheswmei Riakdanv tadin nunc khatni Pharisi nunc, nangniw sansi e dav! Kalam thu meic gaanv khat ta Jihudimei tiguanhlou khang nangniw duipui ramkiang ruan likna tat the, kumna kamei Jihudimei sw pwkhou nangniw rui kata nangniw maikwam key guay khou key liang kanei biuhmei nac tiswlou the.
16 "Mik tiatmei chaeng zaymei thiu, nangniw sansi e dav! 'Ravkai ta zay saancna latryan swmei tei thu ramh khat sini hamh e, tiki ravkai tuang kachaekc ta zay saancna sw kanmei tei thu kuak dat mak khe,' twna nangniw rui sa e. 17 Mpangmei mik tiatmei thiu, kachaekc tei nthuk ni, kachaekc ta tei nthanmei tiswloumei ravkai tei nthuk cho? 18 'Ravchabamv tei zay saancna latryan swmei tei thu ramh khat sini hamh e, tiki mi khou tei katloumei ravcha ta tei zay saancna swlou kanmei tei thu kuak dat mak khe,' twna ni nangniw rui sa dat e. 19 Mik tiatmei thiu, puatkat tei nthuk ni puatkat ta tei nthanmei tiswloumei ravchabamv tei nthuk cho? 20 Mi zaeng rui, ravchabamv ta zay saancna latryan swmei hei ravchabamv ta ni ravcha ta ni zay saancna swmei tuang di the. 21 Ravkai ta zay saancna latryan swmei hei ravkai khatni mi khou tei bammeipu ta zay saancna swmei tuang di the; 22 khatni tingkauh ta zay saancna latryan swmei tei Ravguangc tuang guanghbamvpaeng khatni mi khou tei dungc bammeipu ta zay saancna swmei tuang di the.
23 "Kakheswmei Riakdanv tadin nunc khatni Pharisi nunc, nangniw sansi e dav! Nangniw rui riangtu, makikhuam, khatni backhuanh tuang kadam ruh khou akhat tii lana Riakdanv tuang nthuk dianghmei nchumhmei, zauzian thaymei khatni lwmnuhmei ta ntaemvlou the! Kadam ruh tuang tiimei tei ni ntaemv makna mi guay hei nangniw piu ni tuang e. 24 Mik tiatmei chaeng zaymei thiu, simangna ta sini singc gancna zangv lana guaikuan zangv binmei thiu!
25 "Kakheswmei Riakdanv tadin nunc khatni Pharisi nunc, nangniw sansi e dav! Nangniw tuang buangc khatni nkuakc guay tei kapaengc thu sw-nthanna kalungc khou tei thu asut guangmei khatni agaemvna laa guangmei tuang rui padik e. 26 Mik tiatmei Pharisi! Buangh lungc tei sw-nthan rey o; kumc e thei, kapaengc tei ni nthan puni.
27 "Riakdanv tadin nunc khatni Pharisi nunc, kakheswmei thiu, nangniw hei sansi e dav! Nangniw hei thut mphwanloumei tarou kumhmei e. Mi tei mpaeng khou thu howgay e, tiki kalungc khou thu meic rou khatni mphuammei rui padik e. 28 Mi tei kumcna, kapaengc khou thu nangniw hei meic katana khou ravchaptatmei kumc e; tiki kalungc khou thu nangniw hei kakheswmei khatni simei taanv rui padik e.
Kaniw tuang Dandi Lam Sa Kasuakcmei
29 "Riakdanv tadin nunc khatni Pharisi nunc, kakheswmei thiu, nangniw hei sansi e dav! Nangniw rui muhzwng nunc tarou kasiamh e, kumna ravchaptatmei nunc ta ningtowpui kai guay tei kapwan swlou e. 30 Kumna nangniw rui, 'Rey nungc aniw pupouc nunc hak khou tei aniw lungc bam tu khwan e thei, kaniw taanc kanmei khou tei khatni muhzwng ta swluai kanmei khou tei aniw kazauh lak ni tuang e,' twna sa e. 31 Kumna nangniw hei muhzwng nunc ta dowluaimei nunc kikta e twmei nangniw ruc khou nangniw kahak rui sakhi e. 32 Taanc key tho, kumna nangniw pupouc nunc rui taanc thaulou kanmei tei taanc suak key tho! 33 Nrui thiu khatni nrui anac thiu! Maikwam gut nimei khou rui duak khang tu kumhna nangniw ning lana cho? 34 Mi zaeng rui ai rui nangniw khou sa tuang e: ai rui nangniw khou muhzwng nunc ta, ningtyngmei nunc ta khatni Riakdanv tadin nunc ta ndiu guang puni. Nangniw rui kaniw pang khou rui gaanv saekc ta swluai puni, baihmei gaanv saekc ta chouhthaengc puni, kumna baihmei gaanv saekc ta nangniw tuang sinagog khou kathamv kasiclou puni. Kaniw ta rai kasic khang kaidai akhat khou rui kaidai akhat khou nthau tat puni. 35 Mi thay kiu, ravchaptatmei Abel ta swluaimei khou rui thauna nangniw rui Ravkai tuang Nthanmei Bamv lev ravchapaeng kak khou Barakia nac mpouh Zekaria ta dowluai kanmei nganv, ravchaptatmei kapwmna ta dowluai kanmei zei tei nangniw ruc khou keylou puni. 36 Ai rui kaling siakna nangniw khou sa tuang e: mi lam kapwmna hei mi meickin ruc khou hei keylou puni!
Jisu Jerusalem ta Nzianmei
37 "He Jerusalem, Jerusalem! Nang rui muhzwng guay ta swluai e khatni Ravguangc rui nang khou ndiu guangmei latdiutatmei guay ta ntauh kwamluai e! Nruay kui rui kaswkaeng bangc khou kanac nunc ta gungcloumei kumcna, abaanc pwam rui nang mei kapwmna ta pamclou nii e, tiki nang rui ata nuhlou mak khe! 38 Zauc lo, nang kai ta ganclou the, kumna kai raeng ganclou puni the. 39 Ai rui nangniw khou kadyloumei tuang e: 'Poubauhmei zanc khou guangmeipu kamei hei sangaymei e,' twna nangniw rui sa mak saanv ntaw khou rui thauna nangniw ata how dat ni tu hamh the."