13
Lunghlaic o
1 Mi dyng khou tei meic gaanv saekc guangna, Galilimei nunc ta kaniw ravkhaeng bam khou, Pilat rui swluai kan e, twna Jisu khou poulou khwan e. 2 Khoutei Jisu rui dawna sa the, "Kaniw mi kumna theihmei hei, Galilimei baihmei guay suangc kaniw si liangmei paapcmei nunc tina the twna nangniw ningna cho? 3 Kiuc hamh e! Ai rui nangniw khou samei tuang e: Nangniw ni lunghlaih mak e thei, mi tei kumcna theic puni. 4 Hamh e thei, Siloam khou kai pangv binna theic kanmei gaanv ruhna tachat tei, Jerusalem khou lungc bammei guay khou rui kakhuay daic ranvmei nunc tina e twna nangniw ningna cho? 5 Kiuc hamh e! Ai rui nangniw khou samei tuang e: Nangniw ni lunghlaih mak e thei mi tei kumcna theic puni."
Kathai Nthai Makmei Tadut Bang
6 Khoutei Jisu rui mi latgiam hei sa the: "Meic gaanv khat rui katuang luairyn lau khou tadut bang akhat lingclou the. Kumna kamei kathai nai bw ni zauc khang guang pwkhou, kathai khat sini maek khe. 7 Khoutei, 'Mi tadut bang hei kathai nai bw ni twna guang zauc bammei tingkwm kathumh tangc the. Tiki kathai khat sini how mak khe. Mi hei dow ganc tho! Tabui sw khang mi hei rui kandih swmaan bam nina cho?' twna pikwan taanhmeipu khou tei sa the.
8 " 'Kaipouc, aseic kwm hei na thu bam kan di ho. Kabang daeng chau haengvna chaba louna ai kasiamh ni he. 9 Nkun kiu nthai pw e thei gay the! Nthai mak e thei gay ganc tho,' twna mi pu tei rui daw the."
Jisu rui Suanmeipui ta Sabbath Neic Tigayloumei
10 Sabbath neic Jisu sinagog akhat khou nchamlou bam khwan e. 11 Mi khou tei bumaengh akhat rui tingkwm ruhna tachat ti-nnauna, kangumc nkuanna ding ntyng dat ngam makna bammeipui ni bam khwan e. 12 Jisu rui kata how lana kaw guangna, "Tanpui le, nang tuang ravpuatc khou rui nang ta tiduaklou kan the," twna kakhou sa the. 13 Kumna Jisu mi pui ruc khou tei kabaanc bouclou the. Khoutei kadyng khou kamei ding ntyng thauna, Ravguangc ta hymthuanc the.
14 Khoutei, Sabbath neic tigaylou e twpui zaeng rui, sinagog kapypu tei Jisu ta kalung puamcna, meic kangdai khou tei sa the, "Taanv taanh khang zaeng charuk nai e. Sabbath neic hamhna, nangniw mi tingmik guay khou tei guangna tigay damc bu cho!"
15 Khoutei Poubauhmei rui kakhou mundawna sa the, "Kakheswmei thiu, nangniw guaichic khatni kuanniam ta Sabbath neic riclouna, kakuanc khou rui gaengc patna dui tizangv tu hamhna cho? 16 Kum e thei, tingkwm ruhna tachat Seitan rui bangclou bammei, mi Abraham nac aluh ta hei, Sabbath neic riclou nina hamhna cho?"
17 Mi tei sa pwkhou, kata akhangv bammei nunc tei zak the; tiki meicnunc tei thu kamei rui charynmei taanv taancloumei tei howna neihla the.
Gannaeng Thw khatni Khay Latgiam
18 Khoutei Jisu rui sa the, "Ravguangc Guangcdic hei tabui lev nchamc cho? Mi hei tabui lev kida kho cho? 19 Mi hei gaanv khat rui katuang pic khou lingcloumei gannaeng thw tei kumhmei tuang e. Mi tei thau patna daic thau the, kumna nruayna nunc mi khou tei kaniw bou dwan the."
Khay Latgiam
20 Jisu rui sa dat e, "Ravguangc Guangcdic hei tabui lev kida kho cho? 21 Mi hei meicnunc rui gehu buay giupaekc kathumh laana kanilou tina puang padik patmei khay tei kumhmei tuang e."
Nrummei Chaengmun
22 Jisu Jerusalem thangc keymei chaenglwan khou, kaidai kaidai khatni namv namv khou tatlouna nchamlou bam khwan e. 23 Khoutei meic gaanv khat rui, "Poubauhmei, guloumei laa nimei hei meic katitna di nah cho?" twna thanv the.
24 Jisu rui kaniw khou sa the, "Nrummei kaimun khou tei gut khang karamc o. Kalam thu mi khou tei gut khang meic mpeyna karamc puni, tiki gut ngam mak puni. 25 Kai kaipouc tei thauna kaikhamv mbangh kan pwkhou, 'Poubauhmei, aniw khang kaikhamv laanclou o,' twna kaizaeng khou dingna kaikhamv hiwna huaycha puni.
"Tiki, 'Nang tabui thangc rui guang tu cho? Ai thay mak e,' twna kamei rui daw puni.
26 "Mi khou kiu, 'Aniw nang lev tu nchamc zangv nchamc kan dyng e cho khatni nang aniw chaengdai chaengdai khou nchamlou kan dyng e cho,' twna nangniw rui sa puni.
27 "Tiki, 'Ai nangniw ta thay mak e; nangniw tabui thangc rui guang tu cho, ai thay mak e. Akhou rui tat kan o, taanvsic taanhmei nunc!' twna kamei rui daw puni.
28 "Nangniw ta kapaengc thangc ganc patloupui ganv khou kiu, Abraham, Isaak, Jakob khatni muhzwng guay ta Ravguangc Guangcdic khou how pwkhou, nangniw kapna huh khaic ndyang kariakh riak bam puni. 29 Kumna Ravguangc Guangcdic ngai khou, neihpat, neihkey, dihpy, dihba thangc rui meic guay guangna dungc key puni. 30 Zauc lo, ntaw nkhamhmei sw bammei nunc hei reymei sw puni, khatni ntaw reymei sw bammei nunc hei nkhamhmei sw puni."
Jisu Jerusalem khang Kapmei
31 Mi ganv khou tei, Pharisi gaanv saekc guangna, "Nang kabamv baih thangc tat kan tho. Herod nang ta swluai niina bam the," twna Jisu khou sa the.
32 Khoutei Jisu rui daw the, "Nangniw tat lana, 'Ai aseic lev nthuanh hei ravsic nthau ganc puni khatni nnaumei ta tigaylou puni, kumna kadouh rui atuang taanv taanc suaklou puni,' twna mi asacsi khou tei sa ti tho. 33 Tabui bui pwni aseic, nthuanh khatni kadouh nganv thu mi kumcna tat key bam puni de. Muhzwng thu Jerusalem paengc thangc theiclou nuh mak e!
34 "He Jerusalem! Jerusalem! Muhzwng nunc ta sw luaimei khatni nang khou ndiu guangmei nunc ta ntauh kwamluaimei nang! Nruay kui rui kanac nunc ta gungclou kumcna, nang nac nunc ta gungclou timc e tiki, nang nuh mak khe! 35 Zauc lo, nang tuang Ravkai ta ganclou puni the. 'Poubauhmei zanc khou guangmeipu kamei tei sangaymei e!' twna nang rui sa mak saanv nang ata how dat pw lak khe."