14
Jisu Pharisimeipu Kai khou
1 Sabbath akhat, Jisu Pharisi nunc kapy gaanv khat kai thangc nap tu khang tat khwan e. Khoutei kaniw rui kata zauc minc bam khwan e. 2 Mi khou tei puamhmei ravpuatc phunghmeipu gaanv khat bam khwan e. 3 Khoutei Jisu rui, "Sabbath neic tigayloumei hei nuh ni nuh mak cho?" twna Pharisi nunc khatni Riakdanv tadin nunc khou tei thanv the. 4 Kaniw daw mak khe. Kum tina Jisu rui mi pu ta tei laa guangna tigaylouna titat kan the.
5 Khoutei, "Nangniw nac hamh e thei, guaichic Sabbath neic khunh khou keylou bam e thei, mi tei nangniw kadyng khou zay thau dat pw lak nah cho?" twna Jisu rui kaniw khou sa the. 6 Mi khou tei kaniw lat sa daw khang maek khe.
Niamhna Lungc o
7 Kawlou tina guangmei nunc tei chakhwang bamv kapah akhyam bammei ta how lana, Jisu rui kaniw khou mi latgiam hei raclou the: 8 "Nangniw ta nowsuanh ngai khou kawpui ganv khou chakhwang bamv khou tei guang dungh rio. Nang khang suangc daihmei mei ta kawlou bam kho ni nuh e. 9 Kum bam khwan e thei, kaipouc tei rui nang khou guangna, 'Nang bamv hei mi pu khang hei reilou ti tho,' twna sa pwkhou, nang zakna kathei liang thangc dungc tat puni. 10 Tiki nangniw ta kaw pwkhou, thei liang thangc tei guang dungc o. Kum pwkhou kaipouc tei guangna, 'Champanv, guang tuanc maihna dungc do,' twna sa puni. Kum pwkhou, meic guayna hu khou nang chakhwang swlou puni. 11 Karana kata tidaihpui mei ta tei, tii na keylou puni; karana niamh keypui mei ta tei tidaiclou puni."
12 Jisu rui kaibangpouc khou tei ni sa the, "Nang rui laukhwan nap tu khang pwni, tingzyn nap tu khang pwni kaigaanvmei khang kihpui ganv khou, nang pam nunc, nang chana nunc, nang riang nang luaic nunc, hamh e thei lungcgaymei nunc ta kaw rio. Kum e thei kaniw ni nang ta ni kaw datna khangclou dat kan ni de. 13 Tiki nang rui khwm kic pwkhou, lungcsimei, swan baengmei ta kaw o. 14 Kum e thei nang sangaymei sw puni. Kaniw rui nang khang khangclou dat ngam mak sini, ravchaptatmei nunc ringcthau dat pwkhou, nang khang khangclou dat puni."
Khwmkih Ngai Dai Latgiam
15 Mi tei chu lana, kamei lev dungc nchamc bammei pang khou gaanv khat rui, "Ravguangc Guangcdic tuang napkaw khou kazauh nipui mei kiu mu sangaymei e," twna sa the.
16 Jisu rui kakhou sa the, "Meic gaanv khat rui khwmkih ngai dai raengclou the, kumna meic mpeyna ta kawlou the. 17 Kumna kaganv tangc pwkhou, 'Guang tho, ramh guayna chamdaanv luai the,' twna kabangc ta ndiulou the. 18 Tiki kaniw meic guayna daw ley the. Reymeipu tei rui, 'Ai laupuk akhat liulou rap kanna, mi tei zauc tat mak nuh makna the. Ata kuaklou di tho,' twna sa the.
19 "Baihmei gaanv khat tei rui, 'Ai guai chic chidav panguh liulou rap kanna, mi ta tei sin zauh khang tat ni he. Ata mu kuaklou tho,' twna sa the.
20 "Baihmei gaanv khat tei rui ni, 'Ai now kaw guanglou rapna bam di he, kumna ai guang ngam mak khe,' twna sa the.
21 "Kabangcpu tei guang datna, mi hei kakaipouc khou tei salou the. Khoutei kakaipouc tei lunghpuamc the, kumna, 'Nang katumcna kaidai tuang chaengdai khatni kaisap kailap khou tatna, lungcsimei, swan baengmei, mik tiatmei, khatni phaybaumei guay ta kabai guang tho,' twna kabangcpu khou tei sa the.
22 "Khoutei, kaipouc le, nang rui samei thei layna kaw guang the; tiki kabamv thu nai di he," twna mi bangc tei rui sa the.
23 "Khoutei, 'Chaengluangdai khatni kaidai tin tou thangc tei tatna kai padik khang kaw guang tho,' twna kaipouc tei rui kabangc khou tei sa the. 24 Ai rui nangniw khou sa tuang e: Kabailoumei nunc tei gaanv khat na sini atuang khwmkih taektw tw tow ni tu hamh e!"
Jisu Thei Laymei Thukh
25 Meic kangdai Jisu thei lay tat khwan e. Khoutei Jisu kaniw biak thangc karih patna sa the: 26 "Thow pwni aziap sw ni twna guang lana, kapui kapu ta, kanow kanac guay ta, kachana khatni katanpui guay ta, khatni karingcpaan kahak ta karaeng mak e thei, kamei aziap sw ngam mak e. 27 Thow pwni katuang theihchouc puancna athei lay mak e thei, kamei aziap sw ngam mak e.
28 "Thow pwni kai gaymei sw ni tw e thei, kamei dungc keyna, mi kai tei swluai khang ngam puni dai cho twna kamei kachakh chak rey pw lak nah cho? 29 Kamei rui kaibam na kahouhlou lana luai ngam tii mak e thei, mi tei howmei guay rui sinnuina, 30 'Mi pu hei kahouh thu kahouhlou dyng the, tiki luai ngam mak khe,' twna sa puni.
31 "Hamh e thei guangh akhat rui guangh akhat ta rih adow ni khou, kata adow khang guangmei meic ching nchuih ta karicmei ching ruh rui adow ngam puni dai cho twna kamei dungc keyna kaphianh rey pw lak nah cho? 32 Kamei ngam lak e thei, kaniw guang tangh mak khou, meic ndiulouna chuzaengh khang sw puni. 33 Mi tei kumcna, thow pwni ramh guayna ganclou ngam makpui mei tei aziap sw ngam mak e.
Gaeng Makmei Tey
34 "Ntey hei gay e, tiki mi tei bumc taan e thei, akumhna mi ta hei tibumc dat nina cho? 35 Kandih khang ni, chaba khang ni mi tei gaeng dat mak khe. Mi tei ganc the.
"Chu khang nukuanc naimei guay rui chu laa tho!"