20
Lauphihmei Latgiam
1 "Tingkauh Guangcdic kiu mi hei kumh tuang e. Luairyn lau taanhmei gaanv khatpu rui taanv taanhpui mei phu khang laukhwan khwanzingh pat the. 2 Zaeng neih khat phy denari akhat khang nuhna meic gaanv saekc katuang luairyn lau thangc ndiulou kan the. 3 Tingchung zaengc khou tat pat dat pwkhou meic gaanv saekc taanv taanh makna kaithyan khou ding bammei ta how the. 4 Khoutei kamei rui kaniw khou, 'Nangniw ni atuang luairyn lau tat o, phy nchumhna tii puni,' twna sa the. 5 Khoutei kaniw tei ni tat kan the. Neih ndyng khou ni, neih nchiangh key khou ni kamei tat pat dat muaina mi tei kumcna ndiulou dat muai the. 6 Kumna tingzyn ramvgei kamei tat pat dat pwkhou meic baihmei ni ding bammei ta ariw the. Khoutei, 'Nangniw tabui swna taanv taanh makna mi khou hei nsa ding zingc bam tu cho?' twna sa the. 7 'Aniw ta thu meic rui lanvloumei maekna the,' twna kaniw rui daw the. Khoutei kaniw khou, 'Nangniw ni atuang luairyn lau tat o' twna sa the.
8 "Tingzyn luairyn lau kaipouc tei rui katuang taanvpypu khou sa the, 'Taanv taanhmei guay ta kaw tho, kumna kaniw phy tei tat nkhamh liangmei khou rui tii thauna tat reymei khang nkhamh liangmei khou tii ti tho.' 9 Khoutei tingzyn ramvgei tatmei nunc khang denari akhat akhat tiilou the. 10 Tat reymei nunc tei kaniw khang thu geic pungh the twna ningna guang the. Tiki kaniw khang ni denari akhat akhat tiilou the. 11 Mi tei tiilou pwkhou laupouc ta pian makna sa thau the, 12 'Mi nkhamhmei nunc thu ganvdak akhat na taanh tuang de. Aniw neih ndaengna neihmaryn taanhmei nunc phy lev nchamcna nang tii bammei thu tabui thiak cho?' twna sa the. 13 Khoutei kamei rui kaniw pang khou gaanv khat khou, 'Champanv, ai nang ta guat mak e. Denari akhat khang nang nuhna taanh de. 14 Nang tuang phy laana tat tho. Mi nkhamhmeipu khang ni nang khang lev nchamcna ai tii nii na de. 15 Atuang tei thu ai anyng sw nuh mak nah cho? Atuang gaytaanv ta hei nang mamav bu cho?'
16 "Mi hei kumcna nkhamhmei nunc hei reymei sw puni, khatni reymei nunc hei nkhamhmei sw puni."
Jisu Kamei Theic Nimei Lam Sa Luan Kathumhmei
17 Jisu Jerusalem thangc nganghmei chaenglwan khou, kaziap ruhna kanei ta nduangh langc patna kaniw rana tat bam khou kamei rui kaniw khou sa the, 18 "Zauc lo, aniu Jerusalem khou ngangh puni the. Mi khou tei Meic Nac Mpouh ta hei amuh daihmei nunc khatni Riakdanv tadin nunc baanc khou tii pat puni the. Kumna kaniw rui kakhuay nkhamlouna kata swluai khang, 19 Jentailmei nunc khou tiilou tina kaniw rui kata sinnui puni, bai puni, kumna chouhthaengc puni. Tiki zaeng neih thumhpui neic kata tiringc thau dat puni."
Zebedi Now rui Kanac Nei Bamv khang Neymei
20 Mi tangv Zebedi now kanac nei ta nduanghna ramh khat ney khang Jisu daeng khou guangna kalum khwan e.
21 Khoutei, "Nang tabui kahawna cho?" twna Jisu rui thanv the.
"Anac nei ta hei nang guangcdic khou kiu nang tuang baanzat baandaw khou tidungh khang latdanv patlou o," twna sa the.
22 Mundawna Jisu rui sa the, "Nang ney tabui ney bam tu cho twmei nang ney thay mak e. Ai rui zangv nimei buangc hei nang ney zangv diw nah cho?"
"Aney zangv diw e," twna kaney rui kakhou daw the.
23 Khoutei Jisu rui kaney khou sa the, "Nang ney atuang buangc zangv puni de, tiki atuang baanzat baandaw khou dungc nimei thu ai rui tii nina hamh e. Mi bamv hei thu aPu rui kamei rui chamdaanvloumei nunc khang tii kan ni tuang de."
24 Mi tei baihmei ziap ruh tei rui chu la khou kakai chana nei ta kaniw lungh puamc the. 25 Khoutei Jisu rui kaniw ta kaw guang kaduaina sa the, "Nangniw thay bammei tei the: Jentailmei guangc nunc thu kaniw tuang mei nunc ruc khou ngamv sin e, khatni kaniw tuang meicdaihmei nunc tei meicnunc ruc khou ngamv sin e. 26 Tiki nangniw thu mi tei kumc nina hamh e. Nangniw thowkumhmei rui meicdaihmei sw nii e thei, kamei meic guayna siamruaimei sw nina e. 27 Thowkumhmei rui daic liangmei sw nii e thei, kamei tei nangniw bangc sw nina e. 28 Zauc lo, Meic Nac Mpouh hei kasiamruai swlou khang guang tu hamh e, tiki siamruai sw khang khatni meic mpeyna ta thuak pat khang theiclou khang guang tuang de."
Jisu rui Mik Tiatmei Gaanv Nei ta Tigayloumei
29 Jisu lev kaziap nunc Jeriko khou rui tat pat dat khou, meic kangdai kathei lay tat bam khwan e. 30 Khoutei chaeng daeng khou dungc bammei mik tiatmei gaanv nei Jisu guang e twmei chu lana, "Poubauhmei, David Nac Mpouh, aney ta nzianlou o," twna kauc the.
31 Khoutei meicnunc tei rui kaney ta "Reih rei o" twna luh the. Tiki kaney kauc ranv hay hayna, "Poubauhmei, David Nac Mpouh, aney ta nzianlou o," twna kauc the.
32 Khoutei Jisu dingna kaney ta kawna, "Ai rui nang ney khang tabui swlou tu laa niina cho?" twna thanv the.
33 Khoutei, "Poubauhmei, aney mik tihowlou dat o," twna sa the.
34 Jisu kaney khang ningngam mak khe, kumna kaney mik khou kahilou the. Mi dyng khou tei kaney how dat the, kumna kathei lay the.