3
Kabaanc Akhat Theihmeipu ta Tigayloumei
1 Jisu sinagog ku dat khwan e. Mi khou tei kabaanc akhat theihmeipu gaanv khat bam khwan e. 2 Kaniw Jisu khuay nym khang kamei rui mi pu ta tei Sabbath neic tigaylou puni ny twna kaniw zauc bam khwan e. 3 Khoutei Jisu rui kabaanc theihmeipu khou tei, "Nang thauna hu khou guang o," twna sa the. 4 Khoutei kamei rui kaniw khou sa the, "Riakdanv thei layna Sabbath neic swgaylou nuh ny swkasiclou nuh cho, swringclou nuh ny, swluailou nuh cho?" Khoutei kaniw lat daw mak khe.
5 Khoutei Jisu kaniw ta kalung puamcna zauc kari haengvna zauc the. Kaniw lung tanhmei khou tei kalung mpeyna kabiu the. Kumna kamei rui mi pu khou tei, "Nang baanc ntyng pat o," twna sa the. Khoutei kamei kabaanc ntyng pat the, kumna kabaanc gay dat the. 6 Khoutei Pharisi nunc tei tat pat lana kata swluai khang Herodmei nunc lev kaluak kalat kaphianh the.
Zeihlat Paengc khou Meic Kangdai
7 Khoutei Jisu kaziap nunc lev zeihlat thangc ley tat kan the. Mi khou tei meic kangdai kathei lay guang khwan e: Kaniw tei Galili khou rui, Judia khou rui, 8 Jerusalem khou rui, Idumaia ramv khou rui, Jordan neihpat ramv khou rui, Tur lev Sidon gaengv zaengv khou rui, Jisu rui taanc kanmei guay tei chuna guangmei nunc e. 9 Khoutei meic kangdai tei rui kata hic bin ni kumc guang ti thena kakhang hih launa akhat chamdaanvlou khang kaziap nunc khou sa the. 10 Kalam thu kamei rui meic mpeyna ta tigaylou the, kum tina ravpuatc naimei guay tei kata kahi khang ran gut the. 11 Simei bumaengc nunc kata how pwkhou kahu khou pun nkhum laemv keyna, "Nang hei Ravguangc Nac Mpouh e," twna kaucna sa raph rap khwan e.
12 Khoutei kaniw rui kata dinc ndauh nuh mak e twna tancna kadylou the.
Jisu Kaziap Ruhna Kanei Kadahmei
13 Khoutei Jisu chyng but khou kuna kamei rui kahawmei nunc ta kadaeng khou guang khang kaw the. Khoutei kaniw tat patna kadaeng khou guang the. 14 Kumna kamei rui latdiutatmei twna phuakloumei, ziap ruhna kanei kasiamh the. Kaniw tei kadaeng khou bam khang kumna chamv dinh khang ndiu pat khang, 15 khatni ravsic nunc ta nthau ganh khang ngamv tiilou khang e.
16 Mi nunc kiu thu: Kamei rui Pitar twmei zancphuakh tiiloumei Simon; 17 Zebedi nac mpouh Jakob khatni kachana John (kamei rui kaney khou Boanerges twmei zancphuakh hei tiilou e—mi kabac thu ganh nac mpouh nei twna e); 18 Andriu; Philip; Bartholomiu; Matthiu; Thomas; Alphais nac mpouh Jakob; Thaddia; Simon Kanania; 19 khatni Jisu ta zuanctumei Judas Iskariot.
Jisu khou Ravsic Beelzebul Gut the twna Samei
20 Mi tangv Jisu kai khou guang dat the. Mi khou tei meic kangdai guang dat tina tu zangvpui ganv khang sini maek khe. 21 Mi tei chu lana kamei mba the twna sana kakai mei nunc kata nym khang guang the.
22 Jerusalem thangc rui keymei Riakdanv tadin nunc rui, "Kakhou Beelzebul a gut the, kum tina ravsic kapy pumtan rui kamei ravsic nunc ta nthau ganc bam tuang e," twna sa the.
23 Khoutei Jisu rui kaniw ta kadaeng khou kaw guangna latgiam zayna kaniw khou sa the, "Akumhna Seitan rui Seitan ta nthau pat ngam nina cho? 24 Guanghdic akhat tei kalangv patna khat khat ta sw key khang sw e thei, mi guangcdic tei ding ngam mak e. 25 Kaikhunh akhat tei kalangv patna khat khat ta sw key khang sw e thei mi kaikhunc tei ding ngam mak e. 26 Seitan rui Seitan ta sw key khang sw e thei, kamei ding ngam ni tu hamh the; kakhang luaimei di the.
27 "Kapumc tanhmeipu kai biu ni tw e thei, taanhmeipu ta tei karaklou rey makna thu kakai gut ngam mak e; karaklou pwkhou rui kakai biu nina de.
28 "Ai rui nangniw khou kaling salou tuang e: Maansei nac nunc rui taancloumei paap guay khatni Ravguangc ruc khou simei lat saloumei b heizumei tei kuaklou puni de; 29 tiki Bumaengh Nthanmei ta thouhsw makna saloupui mei ta tei thu kuaklou dat zat ni tu hamh the. Kalam thu tingsaengzaeng tuang paap nai the." 30 Kalam thu kaniw rui, "Kakhou simei bumaengc gut the," twna sa bam tina e.
Jisu Pui khatni Kakainac nunc
31 Khoutei Jisu pui khatni kachana nunc guangna kaizaeng khou dingna kata kawlou khang meic ndiulou khwan e. 32 Khoutei meic kangdai kadaeng dungc huamc bam khwan e. Kumna kaniw rui kakhou, "Nang puilev nang chana nunc kaizaeng khou nang ta ariw niina nkhwan bam e," twna sa the.
33 Jisu rui mundawna kaniw khou sa the, "Thow tei apui cho? Thow tei achana nunc cho?" 34 Khoutei kadaeng dungc haengv bammei nunc ta tei zauc kari haengvna kamei rui sa the, "Zauc lo, mi hei apui khatni achana nunc the! 35 Ravguangc rui ningmei taanhpui mei tei achana the, a tanpui the, khatni apui the."