9
Kapaek Theihmeipu ta Tigayloumei
1 Jisu hih tuangcna zeihlat tei kaan pat datna karamc kaidaia khou guang dat the. 2 Khoutei meic gaanv saekc rui kapaek theihmeipu gaanv khat ta kazy khou nzilouna Jisu daeng khou puanc guang khwan e. Jisu rui kaniw ramlum tei how laa khou, kamei rui kapaek theihmeipu khou tei, "Abung le, neihla o, nang paap guay kuaklou the," twna sa the.
3 Mi khou tei, Riakdanv tadin gaanv saekc rui kaniw rana kaniw khou, "Mi pu hei Ravguangc ta ramhsak makpui lat sa e!" twna sa the.
4 Kaniw lungning tei thay lana, Jisu rui sa the, "Tabui swna nangniw lung khou simei lungning kakhanh bam tu cho? 5 'Nang paap guay kuaklou the,' twna samei chiw ni, 'Thauna tat tho,' twna samei chiw cho? 6 Meic Nac Mpouh khou hei paapc kuaklou khang kandih khou ngamv nai e twmei nangniw thay khang lyanlou puni," khou tei kamei rui kapaek theihmeipu khou tei, "Thau tho, nang tuang zybam lai thauna nang kai thangc tat tho," twna sa the.
7 Mi pu tei thauna kakai tat kan the. 8 Meic kangdai tei mi tei how la khou, kaniw ping the, kumna mi kumhmei ngamv hei maansei nunc khou tiiloumei Racguangc ta kaniw thuanc the.
Matthiu ta Kawmei
9 Jisu mi bamv khou tei rui tat pat khou, kazanc Matthiu kawmeipu dihkhav laamei kai khou dungc bammei ta how lana, "Athei lay o," twna sa the.
Matthiu thauna kathei lay the.
10 Jisu mi pu kaib khou tei kaziap nunc lev nap tu bam khou, dihkhav kakhamei nunc khatni paapcmei nunc mpeyna ni guangna tu nchamc bam khwan e. 11 Mi tei Pharisi nunc how lana, kaniw rui Jisu ziap nunc khou, "Tabui swna nangniw tuang kaipouc hei dihkhav kakhamei nunc khatni paapcmei nunc lev tu kariu bam tu cho?" twna sa the.
12 Mi tei chu lana, Jisu rui sa the, "Karav gaymei nunc khang thu maipah kage maek e, nnaumei nunc khang de. 13 'Ai rui kahawmei thu zauzian ta de, khaengmei ta hamh e,' twmei kabac hei kathai tat o. Kalam thu, ai guangmei hei ravchaptatmei nunc ta kaw khang hamh e, paapcmei nunc ta kaw khang de."
Munthianghmei Lam Thanvmei
14 Mi tangv, John ziap nunc guangna, "Aniw khatni Pharisi nunc thu munthiangc bam ki, tabui swna nang ziap nunc thu munthiangh mak tu cho?" twna Jisu khou thanv the.
15 Khoutei Jisu rui kaniw khou sa the, "Akumhna nowsuanh gin nunc tei, nowpouc bam khou latlu bam nina cho? Nowpouc ta tei kaniw khou rui laa tat kanmei ganv guang puni. Mi tangv thu kaniw munthiangc puni.
16 "Meic gaanv khat na rui sini phey raan khou phey thanh khuamlou mak e. Kalam thu phey thanh tei rui zay kaek kasic ranvlou puni. 17 Gihmuanc raan khou ni luairyn zouc thanh lou mak e. Mi tei lou ti thei, muanh tei puak bakna luairyn zouc tei maan puni, kumna muanh tei ni swkasic puni. Tiki muanh ni luairyn zouc ni maan mak khang luairyn zouc thanh thu muanh kathanc khou lou tuang de."
Sinagog tuang Kapypu Nac Aluhpui khatni Jisu Phey Tin Kahimeipui
18 Jisu mi lat hei sa bam khou, sinagog tuang kapy swmei gaanv khat guangna, Jisu hu khou khuksun keyna, "Anac aluhpui ntaw na hei theic nina bam the. Nang guangna karuc khou nang baanc kabouclou o. Kum ti thei kamei ringc dat puni de," twna sa the.
19 Khoutei Jisu ding thauna kathei lay tat the, kumna kaziap guay ni lay tat the.
20 Khoutei, tingkwm ruhna kanei zei bammeipui gaanv khat Jisu thei khou guangna katuang phey tin kahi the. 21 Kalam thu, "Katuang phey tei kahilou rap ti thei, ai gay dat rap puni de," twna kamei ning the.
22 Khoutei Jisu kathei karih pat pwkhou kata how lana, "Alu le, neihla o! Nang ramlum rui nang ta tigaylou the," twna sa the. Mi dyng khou tei mi pui tei gay dat kan the.
23 Jisu sinagog tuang kapy kai khou gut pwkhou, nlim muanmei nunc khatni meic kangdai kachin karo bammei ta how lana, 24 "Nangniw tat pat kan o. Mi nac hei theih mak e; zip bam tu de," twna sa the. Khoutei kaniw kata nuic the. 25 Meic nunc ta tei mpaeng thangc tipat lana, kamei kainung khou gutna mi nac baanc tei zay the. Khoutei mi nac tei thau the. 26 Mi chamv hei, mi ramv kapwm chu lik kan the.
Mik Tiatmei Gaanv Nei ta Tigayloumei
27 Jisu mi khou tei rui tat pat dat khou, mik tiatmei gaanv nei kathei lay tatna, "Aney ta nzianlou o, David nac mpouh!" twna kauc the.
28 Jisu kainung gut pwkhou, mik tiatmeipu nei tei kadaeng khou guang the. Khoutei Jisu rui, "Ai rui nang ney ta tigaylou ngam puni de twmei nang ney lwm daih?" twna Jisu rui thanv the.
"Ngguay, Poubauhmei," twna kaney rui daw the.
29 Khoutei kabaanc rui kaney mik khou kahilouna, "Nang ney lwmmei thei layna how dat tho," twna sa the. 30 Khoutei kaney mik rak pat the. "Mi hei meic gaanv khat na khou sini tithay nuh mak e," twna Jisu rui kaney khou kadylou the.
31 Tiki kaney tat pat lana mi ramv kapwm khou tei Jisu chamv dinc liklou the.
Lat Sa Thay Makmeipu ta Tigayloumei
32 Mi pu nei tei tat dat kan khou, ravsic gutmei, lat sa thay makmeipu gaanv khat ta Jisu daeng khou nduangh guang khwan e. 33 Kumna ravsic ta tei nthau ganclou pwkhou, lat sa thay mak bammeipu tei sa dat the. Meic kangdai tei ngakna "Israel khou mi kumhmei hei pat zat mak he," twna sa the.
34 Tiki, "ravsic guay tuang kapy ngamv khou rui kamei rui ravsic nunc ta nthau pat tu de," twna Pharisi nunc rui sa the.
Jisu Meic nunc khang Kalung Kabiumei
35 Jisu kaidai guay khatni namv guay khou tat liklou khwan e. Kamei kaniw tuang sinagog guay khou nchamlouna, guanghdic tuang gaychamv dinclou khwan e, khatni ravpuatc phunghmei khatni nnaumei nunc ta tigaylou khwan e. 36 Kamei rui meic kangdai ta tei how pwkhou kaniw ta ningngam mak khe, kalam thu gaengcloumei maekmei lauziu nunc kumcna kaniw lak the khatni ramh sw la khang thay mak khe. 37 Khoutei kamei rui kaziap nunc khou sa the, "Lau tay khang thu geic the, tiki tay nimei mei thu rau the. 38 Mi zaeng rui, lau taymei nunc laupuk khou ndiulou khang tay nimei lau kaipouc khou ney o."