3
Duiluploumei John rui Chaeng Swmei
1 Mi douc tei Duilupmei John Judia tuang tazikramv khou guangna, 2 "lunghlaic tho, Ravguangc guangcdic na the," twna dinc the.
3 " 'Poubauhmei guang pw the,
kakhang chaeng sw tho,
kakhang chaeng sw ntyng tho,'
twna gaanv khat tazikramv khou kauc bam e,"
twna muhzwng Isaia rui saloumei tei kamei hei the.
4 John guaikuan hiw phey piu e, guaigic bungkam kamc e, khatni nkav lev nwm khuaicdui rui kataek sw e. 5 Jerusalem, Judia kapwm, khatni Jordan duiriang gaengv zaengv kapwm khou rui meicnunc kadaeng khou guang khwan e. 6 Kaniw paap kalauhna, kaniw ta John rui Jordan duiriang khou duiluplou khwan e.
7 Pharisi khatni Sadduki meic mpeyna duilup khang guang bammei ta how lakhou, John rui kaniw khou sa the, "Nangniw nrui nac nunc! Guang nimei latzan khou rui pak la tho twna nangniw khou thow rui sa pwna cho? 8 Lunghlaihmei thay nthai o. 9 Aniw pu Abraham nai e twna sa langc e twna ning la rio. Ai rui nangniw khou sa e, Ravguangc thu mi tauc nunc ta hei Abraham nac nunc tiguanhlou nuh de. 10 Ntaw ni thing bang guay bangbi khou nrih lou bam the, kumna kathai gaymei nthai makmei bang guay ta gay bauna mai khou phaiclou puni.
11 "Nangniw lunghlaic the twmei ndauhna, ai rui nangniw ta dui rui luplou the. Tiki akhang suangc daihmeipu athei khou guang e; ai thu katuang phaythuapc na sini sin tat khang biuhmei hamh e. Kamei rui nangniw ta Bumaengh Nthanmei rui khatni mai rui luplou puni. 12 Kabaanc khou nzamh sin e; kagung guay laudy bamv khou rui sw nthan ganc puni. Katak guay saemh khou phungc guang puni; kagung guay amit dat makmei mai khou ntei puni."
Jisu Duilupmei
13 Duilup khang, Jisu Galili khou rui Jordan khou, John daeng khou guang the. 14 Tiki John rui kata khaemna, "Nang rui ata duiluplou khang diki, ai rui luplou khang guang tu cho?" twna sa the.
15 Jisu rui mundawna sa the, "Ntaw thu nuhlou tho, mi kumna ravchaptatmei taanv mung guay taanc nthuihlou nina di the." Khoutei John nuhlou the.