2
Magi nunc Nahzauhmei
1 Herod guangh sw bammei ganv khou, Judia kandih tuang Bethlehem namv khou Jisu puanc khwan e. Khoutei neihpat thangc rui Magi nunc Jerusalem khou guangna, 2 "Jihudimei guangc puanhmei kiu tabui thangc cho? Kamei puanc the twmei dinhmei gaanchuangcna ta aniw neihpat thangc how the. Kum thena kata kalum khang aniw guang tuang e," twna Herod khou thanv the.
3 Mi tei chu lakhou Guangh Herod khatni Jerusalemmei guay kaniw lungh katuakc the. 4 Jihudimei tuang amuh daihmei nunc khatni Riakdanv tadin nunc ta kaw kaduaina Khrista kiu tabui thangc puanc puni cho twna kamei rui kaniw khou thanv the.
5 Kaniw rui sa the, "Judia tuang Bethlehem khou e; kalam thu muhzwng rui mi kumna hylou e
6 'He Juda tuang Bethlehem,
nang hei Juda tuang kapy singhmei kaidai pang khou,
nthyam liangmei hamh e;
kalam thu, Israelmei amei ta gaengclou nimeipu,
nang khou rui pat puni.' "
7 Mi tangv Herod rui nkamhna Magi nunc ta tei kawna, gaanchuangcna kiu patmei ganv kiu kaniw khou rui thanv nthan the. 8 Kamei rui kaniw ta Bethlehem thangc ndiulouna sa the, "Nangniw tatna ngana ta kiu phu mincna phu zauc tho, kumna phu tow e thei akhou ni dinclou o, ai ni tatna kata kalum ni."
9 Guangh lat tei chu lana kaniw tat the. Neihpat thangc kaniw how kanmei gaanchuangcna tei mi angana tei bammei bamv ruc khou guang ding tangh mak saanv kaniw hu kasuakcna tat khwan e. 10 Gaanchuangcna tei how pwkhou kaniw sa dat khang thay makmei ramneila neihla the. 11 Kai lungc khou tei gut pwkhou, mi angana tei lev kapui Meri ta how the, kumna kaniw nkhum laemv keyna kata kalum the. Kaniw tuang lanvkhuk laanc patna kachaekc, agaw khatni mir kaipat swna katlou the.
12 Herod daeng thangc tat dat mak khang kaniw mang khou dinclou tina baihmei chaeng rui kaniw kandic thangc tat dat kan the.
Ijipt Thangc Kaithiley Tatmei
13 Kaniw tat kanmei tangv, Poubauhmei tuang baanchara Joseph mang khou guangna sa the, "Thau tho, angana lev kapui ta nduanghna Ijipt thangc pak tat tho. Ai rui sa dat mak saanv mi khou tei bam o, kalam thu mi nac ta tei swluai khang Herod rui phu puni the."
14 Joseph thauna, angana lev kapui ta nduanghna zingbangc thangc Ijipt thangc tat kan the. 15 Herod theih mak saanv mi khou tei bamlou kan the. Mi hei "Ai rui Ijipt khou rui anac mpouh ta kaw guang puni," twna Poubauhmei tuang muczwng rui saloumei guang tangc nthuih khang e.
Alauc nunc ta Dowluaimei
16 Mi nunc tei rui kata guat the twmei thay lakhou, Herod kareic thauna kalung puamc the, kumna kaniw khou rui thayloumei ganv tei chakna, Bethlehem khatni mi daeng khou naimei, tingkwm kanei tanghmei khatni mi bangcmei nggaanvmei nac guay ta rihmei ndiulouna swluai the. 17 Muhzwng Jeremia rui saloumei mi kumcna guang tangc kan the:
18 "Rama khou khwan akhat chu e,
kapmei lev kangiuhmei khwan e,
Rakhel kanac nunc ta huayna kap bam e,
swm gay dat ngam mak khe,
kanac nunc theic ngam the."
Ijipt khou rui Guang Datmei
19 Herod theic kan pwkhou, Ijipt khou Poubauhmei tuang baanchara Joseph mang khou guangna, 20 "Thau tho, angana lev kapui ta nduanghna Israel kandic thangc tat dat tho; angana ta hei swluai khang phu bammei nunc tei theic kan the" twna sa the.
21 Kumna kamei thauna, angana lev kapui ta nduanghna Israel kandic khou guang dat the. 22 Tiki Arkhelaus rui kapu Herod phaan lynna Judia khou guangh sw bam e twmei chu lana kamei mi khou tei guang khang ping the. Kamang khou dinclou tina, kamei Galili ramv thangc ley tat kan the. 23 Kumna Nazareth kawmei kaidai khou guang lungc the. "Kata Nazareth mei twna kaw puni," twna muhzwng nunc rui saloumei mi kumna guang tangc kan the.