John
RUI HYMEI GAYCHAMV
1
Ringhmei Tiiloumei Lat
1 Puakthau puaksiak khou Lat nai bam khwan e; Lat tei Ravguangc khou nai bam khwan e, kumna Lat tei Ravguangc khwan e. 2 Puakthau puaksiak khou rui Lat tei Ravguangc khou nai bam khwan e. 3 Ramh katana kapaan rui pat khwan e; nai bammei katana hei kamei kazauh makna patmei khat sini maek e. 4 Kakhou ringhmei nai e; a mi ringhmei hei rui maansei ta tigaanclou the. 5 Gaanhmei hei zinghmei khou gaanc bam e, kumna zinghmei rui mi ta hei zingc liam ngam mak e.
Ravguangc rui John ta Ndiu Guangmei
6 Ravguangc rui ndiu guangmeipu gaanv khat nai e; kazanc John twna kaw e. 7 Meic guay chuna lwm khang, mi gaanhmei lam khou hei dinclou khang kamei guang tuang e. 8 Kamei thu gaanhmei kiu hamh e; gaanhmei lam khou hei dinclou khang kamei guang tuang e. 9 Meic guay ta tigaancloumei gaanhmei ling kiu mbaanv khou guang khwan e.
10 Lat tei mbaanv khou bam khwan e; tiki kapaan rui damcloumei mbaanv hei rui kata thay mak khe. 11 Kamei kakandic khou guang khwan e; tiki kamei nunc rui kata laalou mak khe. 12 Tiki kata laaloumei guay, kakhou lwmmei guay ta mu Ravguangc nac sw khang kamei rui ngamv tiilou the. 13 Kaniw Ravguangc nac swmei hei zei rui, meic pumc rui khatni maansei rui kahawmei rui hamh e; Ravguangc rui de.
14 Lat tei meic pumc chaguanhna, zauzian khatni nchumhmei padikna aniu pang khou lungclou the. Aniu katuang hymdaihmei, kapu Nac Mpouh akhat namei tuang hymdaihmei how the.
15 John rui kalam khou salou the. " 'Athei khou guangmeipu hei akhang suangc daic e, kalam thu ai puanh mak khou rui kamei nai bam khwan the,' twna ai samei tei kamei hei the," twna John rui kauc the.
16 Kakhou zauzian padikna naimei khou tei rui aniu khang zauzian ruc khou zauzian tiilou the. 17 Riakdanv hei Mousi khou rui tii guang e; tiki zauzian lev nchumhmei hei Jisu Khrista khou rui guang e. 18 Ravguangc ta howmei meic gaanv khat na sini maek he; tiki kapu pamv khou bammei a khat namei Nac Mpouh tei rui Ravguangc ta ndauhlou the.
Duiluploumei John Latdyn
19 Jerusalem khou bammei Jihudimei kapy nunc rui ndiuloumei amuh nunc khatni Levimei nunc rui, "Nang thow cho?" twna John khou thanv khwan e.
20 Kamei nkamh tuang maekna, "Ai thu Khrista b hamh e," twna ndaw sa the.
21 "Kum e thei, nang thow cho? Elija cho?" twna kaniw rui thanv the.
"Ai Elija hamh e," twna John rui daw the.
Khoutei, "Nang muhzwng kiu cho?" c twna kaniw rui thanv the.
"Kiu hamh e," twna kamei rui daw the.
22 "Kum e thei, nang thow cho? Aniw ta ndiuloumei nunc khou salou dat khang, nang thow cho twmei aniw khou dinclou o," twna kaniw rui kakhou sa the.
23 "Ai hei, 'Poubauhmei guang pw the, kakhang chaeng sw tho!' twna tazikramv khou kauc bammei kiu the," twna muhzwng Isaia rui saloumei ta saancna John rui daw the.
24 Pharisi nunc rui ndiu guangmei nunc d tei rui, 25 "Nang Khrista ni hamh, Elija ni hamh, Muhzwng kiu ni hamh e thei, tabui swna nang duiluplou bam tu cho?" twna thanv the. 26 John rui mundawna, "Ai rui thu dui rui duiluplou the; tiki nangniw thay makmeipu gaanv khat nangniw pang khou ding bam e. 27 Kamei athei khou guang e; tiki ai thu katuang phaythuapc riang rih khang na sini biuhpui mei hamh e."
28 Mi nunc rui guangna lat thanvmei hei, John rui duilup bampui bamv, Jordan tuang neihpat thangc naimei Bethani khou e.
Ravguangc Lauziu Nac
29 Nthuanh thauna, Jisu kadaeng khou guangmei ta how lana, John rui sa the, "Zauc lo, Ravguangc Lauziu Nac, kandihmei paap laa gancloumeipu! 30 'Akhang suangc daihmeipu athei khou guang e, ai puanh mak khou rui kamei nai bam khwan the,' twna ai rui sameipu kiu kamei hei the. 31 Ai kata thay mak khwan e, tiki ai guangna dui rui duiluploumei hei, kata Israelmei khou ndauh pat khang the."
32 John rui rui sa the, "Bumaengh akhouhna kumcna tingkauh thangc rui kakhou keylou kanmei ta ai how the. 33 Ai kata thay mak khwan e, tiki 'Gaanv khat khou, Bumaengh kauh thangc rui keyna bamlou kanmei ta nang how puni. Bumaengh Nthanmei rui luplou nimeipu kiu mi pu tei the,' twna, dui rui luplou khang ata ndiuloumeipu rui akhou sa the. 34 Mi tei ai how the, mi zaeng rui, kamei hei Ravguangc Nac Mpouh the twmei ai nangniw khou sa tu the."
Jisu Ziap Sw Reymei nunc
35 Nthuanh thauna John kaziap gaanv nei lev mi khou tei ding bam dat khwan e. 36 Mi khou tei Jisu tat bammei ta how lana, "Zauc lo, Ravguangc Lauziu Nac tei!" twna kamei rui sa the.
37 Kaziap nei tei mi tei chu lana, Jisu thei lay tat kan the. 38 Jisu thei ziangrih patna kaney kathei lay tat bammei ta how lana, "Nang ney tabui phu bam tu cho?" twna thanv the.
"Rabbi, nang tabui khou bam tu cho?" twna kaney rui ni thanv the. (Rabbi twmei kabac thu, Dinhpouc twna e.)
39 "Guang o, how puni," twna Jisu rui sa the. Kumna kaney lay guangna Jisu bammei bamv tei how the, kumna mi nungc tei kadaeng khou bamlou the. Mi tei tingzyn ganvdak padeih zaengc khwan the.
40 Kaney khou gaanv khat thu Simon Pitar chana Andriu khwan e.
41 Kamei kachana Simon ta ariwpuilev, "Aney Messia (Khrista twna e) ta ariw the," twna sa the. 42 Kumna kamei rui kachaic ta Jisu daeng khou nduangh guang the.
Khoutei Jisu rui kata zaucna, "Nang hei John nac mpouh Simon e, tiki nang ta Kephas (mi kabac thu Pitar twna e) twna kaw puni the," twna sa the.
Jisu rui Philip lev Nathanael ta Kawmei
43 Nthuanh thauna, Jisu Galili thangc tat ni the twna ning the. Khoutei kamei Philip ta ariw lana, "Athei lay o," twna kakhou sa the. 44 (Philip hei Andriu lev Pitar ramc Bethsaidamei e.) 45 Philip Nathanael ta ariw lana, "Riakdanv buk khou Mousi rui hyloumei khatni muhzwng nunc rui ni hyloumeipu ta kiuc aniw ariw the. Kamei hei Joseph nac Nazareth mei Jisu hei the," twna sa the.
46 Khoutei, "Nazareth khou rui ramh gaymei pat ngam puni di nah cho?" twna Nathanael rui sa the.
Kum tina, "Guangna zauc o," twna Philip rui sa the.
47 Kumna Nathanael kadaeng khou guangmei ta how lana, Jisu rui kalam khou mi kumcna sa the, "Zauc lo, rouhsimei maekmei, Israelmei ling kiu!"
48 "Nang ata akumhna thayna cho?" twna Nathanael rui sa the.
"Philip rui nang ta kaw mak khou, nang tadut bang bangc khou bam bam khou tei, ai nang ta how the," twna Jisu rui kakhou daw the.
49 "Rabbi, nang hei Ravguangc Nac Mpouh the! Nang hei Israelmei guangc the!" twna Nathanael rui mundaw the.
50 Mundawna Jisu rui kakhou sa the, "Nang tadut bang bangc khou bam bam khou tei ai nang ta how the, twna sapui zaeng khou na rui nang lwm tu cho? Mi khang suangc daih daihmei ni nang how puni he. 51 Ai rui nangniw khou kaling siakna sapui tuang e: tingpuk laanc patna Ravguangc baanchara Meic Nac Mpouh ruc khou key key ku ku bammei ta nang how puni."