KAMUS BALA LUK DOꞌ
Abraham inih anak i Térah inul Nabi Nuh. Abraham mulun bang tudaꞌ-tudaꞌ ngeribu lak luk mon. Tuhan Allah nengecuk ni Abraham eméꞌ nan eceh bawang luk bidaꞌ Allah neneh. Tuhan Allah nefejaniꞌ neneh ku ieh nafeh mulaꞌ tutu inulneh, sagan fanaꞌ kereb ineh ieh na teh anakneh. Kereb umur Abraham meratu lak, i Sara, awanneh nenganak anak delei idih ideh nengeneuꞌ ngadanneh Ishak. Ishak inih taman i Yakub luk nenginul fuluꞌ dueh tefun fufu Israél. Abraham menu tutu nan Allah ku idih ieh titen, “Taman lun menu” (Kej. 15:6).
Ago Doꞌ yeineh Bala ku ulun meruked rat nan Allah, badaꞌ Yesus ku ulun, até, nulun beruh, kikit, idih ecing-Neh luk kedueh kuaꞌ kuan lemulun luk menu Neneh.
Anak Allah yeineh ngadan luk biré ni Yesus. Anak Allah yeineh Allah (Yoh. 1:1-5), Anak rat nan Allah (Luk. 1:32, 35), Anak Luk icuk Allah eméꞌ ku Lemulun. Ieh inéꞌ ku Lun Ngulun mayaꞌ finian Allah (Yoh. 3:16).
Anak Lemulun yeineh ngadan luk biré ni Yesus, luk fengeh bidaꞌ atun bang kitab Daniel 7:13. Ieh ineh Kristus, rat Surga, Luk inéꞌ ku Lemulun setutuneh. Ieh tinganak mafad kudeng anak lemulun. Maria luk nenganak Neneh maliꞌ idih mebatek rat nan lalud Roh Meligan (Luk. 1:26). Ieh tinganak idih ideh neneten ngadan-Neh Yesus kudeng luk fengeh bidaꞌ malaikat Gabriél (Luk. 1:31).
Dinar yeineh rigit bangsaꞌ Romawi, tebalad-melibuh kudeng rigit sén, finudut rat nan amas, inan ngadan idih gamber Kaisar yedih (Luk. 20:24). Raga setu Dinar mafad gadiꞌ lun ngekem bang seeco kereb ineh (Luk. 20:2).
Dirham yeineh rigit amas rat Persia luk fikaien teh ku rigit perak Yunani, luk raganeh lélé mafad dingan setu Dinar bangsaꞌ Romawi (Luk. 15:8, 9).
Eco Rayeh Paskah yeineh eco kereb Allah nemuit fufu Israél rat Mesir ngecehkuh felaba derehdeh ineuꞌ ku demulun luk ngekem kuan lun Mesir idih na kerebdeh sembayang ngubur Allah. Lun Israél nengeret anak domba idih nengelusi daraꞌneh nan tangaꞌ rumaꞌdeh kereb idih. Kereb malaikat Allah nenier daraꞌ ineh, ieh nelemaba, na nengaté anak tutuꞌ lun luk bang rumaꞌ ineh. Ieh nengaté anak-anak lun Mesir moꞌ. Ecodeh nefuit rat bang bawang Mesir inih tetenendeh Eco Paskah. Inih ruendeh ngerayeh tecu-tecu mecing eco sinih (Kel. 12). Anid lak lun Israél idih teh emung lun menu nan Tuhan Yesus irau ngerayeh Eco Paskah inih finekuꞌ terawé ku Allah nemuit fufu Israél rat nan derehdeh mulun bang bawang Mesir. Bang Fejaniꞌ Beruh Yesus Kristus titen, “Anak Domba Paskah” (1Kor. 5:7) “Anak Domba luk kiret” (Why. 5:6).
Eco Sabat yeineh eco nan lun Yahudi ucuꞌ ngekem idih ideh tebupun ngubur Allah. Eco Sabat inih ngimun rat eco kelimeh (Jumat) jam enem malem (jam 18:00) mecing eco keenem (Sabtu) jam enem malem (jam 18:00).
Eiꞌ miek fikaien Tuhan idih lemulun. Finginudneh, Tuhan teu meiꞌ idih mawa neteu (Luk. 1:78); Lun Samaria mekatu niat ngecehkuh ieh mawa idih meiꞌ nelun luk inaro lun dat arang bawang Yerusalém idih Yerikho (Luk. 10:25-37).
Enu yeineh terawé luk meficet ku doꞌ Allah, luk ginalaꞌ-Neh bang Yesus Kristus idih linetep Roh Meligan bang niat lemulun.
Fuluꞌ dueh murid yeineh ideh luk fuluꞌ dueh finiliꞌ Yesus luk titen-Neh rasul (Luk. 6:13). Ideh nemayaꞌ Neneh eméꞌ madaꞌ Bala Tuhan Ku Kuyut Allah.
Galiléa yeineh ngadan tanaꞌ (wilayah) deiꞌ Israél fa Utara. Galiléa inih teh ngadan eceh takung rayeh (danau) deiꞌ Israél, luk tetenen teh takung Genesarét (Luk. 5:1), takung Tiberias (Yoh. 6:1; 21:1), takung Kinerét (Bil. 34:11) atau takung Kinerot (Yos. 12:3; 13:27).
Gandum inih tibu ku akan kudeng tibu fadé luk ruen tufeh, idih baraneh ruen ngalak méꞌ ku lubaꞌ. Gandum ruen ngerani idih tufeh neneh méꞌ ku binak (tepung), ruen ku rutiꞌ.
Gerasa yeineh ngadan eceh bawang (kota) deiꞌ tanaꞌ Galiléa, 60 kilométér adoneh rat nan takung Galiléa.
Guruꞌ lemulun luk mulaꞌ ileh, mileh nguyut idih madaꞌ refut-refut ileh luk doꞌ kuan lun beken, doꞌ yeh anak-anak, kudeng ineh teh kuan taman-tinan idih remarar.
Guruꞌ Ukum Torat yeineh lemulun mileh ku Ukum Torat idih madaꞌ neneh kuan lemulun luk finiliꞌ TUHAN Allah (Israél).
Iblis yeineh Kefalaꞌ emung sitan/roh dat. Ieh ngelawan Allah ngecehkuh na luk metu idih na luk doꞌ bang niatneh. Ieh nenutun Yesus idih nutun lemulun luk menu nan Tuhan Yesus.
Imam yeineh lemulun luk ngedalan idih nguyut kekemen bang Rumaꞌ Allah. Ideh ngekem emung luk ruen mayaꞌ agama Yahudi. Imam inih sua lun mulaꞌ eméꞌ ku tadur arang lemulun dingan Allah. Imam sembayang nan Allah kuan lemulun, nguyut tebupun bang Rumaꞌ Allah.
Imam-imam Kefalaꞌ yeineh tudaꞌ-tudaꞌ imam luk melun meditaꞌ ratnan waꞌ imam beken bang Pengadilan Yahudi. Imam Rayeh filin rat arangdeh.
Imam Rayeh yeineh imam luk nguyut emung imam bang kekemen Rumaꞌ Allah. Imam Rayeh inih sebuleng burur moꞌ. Ieh teh kefalaꞌ Pengadilan Yahudi. Bang selak sekuaꞌ ieh moꞌ luk miek semuet bang takep luk felabaligan bang Rumaꞌ Allah, luk ngeseb fung lua kuan Allah ku ngiuꞌ salaꞌ fufu Israél. Kristus yeineh Imam Rayeh Luk “sekuaꞌ mecing ruked-ruked” nemeré burur-Neh ku lua lun mesalaꞌ (Ibr. 7:26,27).
Katu yeineh awa-eiꞌ; meiꞌ ngecehkuh mawa. Finginudneh: Allah meiꞌ nelun mesalaꞌ. Lemulun meiꞌ nelun melayaꞌ idih masiꞌ.
Keledai yeineh fung luk fenin kudeng safiꞌ, kerubau, atau kudaꞌ. Burur keledai isut ratnan burur kudaꞌ, ayuꞌ bururneh lélé mafad nan kudaꞌ, na unga, yehmoꞌ mebeneh sesut ratnan kudaꞌ. Keledai miek ruen makai ku dalan dingan tudo lun ketedneh kudeng kudaꞌ. Ieh miek nan ngengut binaweh ruen ngerereng lun ketedneh atau miek ngeruid gerubak kudeng safiꞌ atau kerubau.
Kristus yeineh Racaꞌ Luk Finjaniꞌ Allah muit lemulun luk menu Neneh rat nan dereh idih até ngecehkuh salaꞌdeh (Luk. 2:11; 2:26; 4:19-21).
Kuyut Allah Allah nguyut emung luk finudut-Neh deiꞌ Surga idih lun tanaꞌ (Luk. 4:43; 17:21; Mat. 4:17; 28:18).
Lalud rat nan Allah (Luk. 4:14; 5:17, 24; 11:20). Ieh miek meré neneh kuan lemulun luk menu Neneh (Luk. 1:35; 9:1; 10:19; 11:20; 12:5). Enun moꞌ miek ruen Allah ngecehkuh lalud-Neh (Luk. 1:51-53).
Lua yeineh fung luk doꞌ luk berén lemulun mesalaꞌ nan Allah felé Ieh ngiuꞌ salaꞌdeh (Im. 3:1; 4:3; 6:6; Luk. 2:24). Yesus inehngeh Lua kekifed kuan lemulun luk menu Neneh (Ibr. 9:14).
Lun Farisi yeineh ruyud luk rayeh bang Agama Yahudi luk idih 200 lak kereb na teh Yesus tinganak. Lun Farisi menu ku tui rat nan até, malaikat, Surga idih Afui ukum Allah (Kis. 23:6-8; 24:15).
Lun Léwi yeineh lemulun bang ruyud Léwi. Ruyud Léwi yeineh eceh ruyud bang bangsaꞌ Israél, eceh fufu rat nan inul Yakub. Ideh nangan imam Yahudi bang tebupundeh deiꞌ Rumaꞌ Allah (Bil. 1:49,50; 7:5; Ibr. 7:5; Kej. 29:32-30:24; 1Taw. 1:1,2). Ideh na biré bapat tanaꞌ Kanaan ngecehkuh kekemen luk linetep Allah kuandeh (Bil. 18:1-8; Ul. 7:1; Kis. 13:19).
Lun Ngulun yeineh Kristus, Tuhan (Luk. 2:11). Ieh meré ulun meruked kuan lemulun luk menu Neneh (Luk. 18:30; 19:10; Yoh. 3:15-16; 5:29; 6:40,47; 10:28).
Lun Saduki yeineh eceh ruyud bang Agama Yahudi kudeng Farisi. Lun Saduki na mafad nelun Farisi ngecehkuh ideh na menu ku tui rat nan até (Luk. 20:27). Ideh inih lun kaya.
Lun Samaria yeineh lun bawang Samaria. Semetuneh, ideh inih fanaꞌ lun Yahudi. Ideh nefuar nelun beken ngecehkuh nefaweh nedeh. Lun Yahudi na fian ferurum nedeh rat lak 6 SM mecing kereb Yesus mulun lun tanaꞌ inih (Luk. 9:52, 53; 10:33; Yoh. 4:7-9).
Nabi yeineh lemulun luk dinawar atau finiliꞌ Allah ngecing, necu, madaꞌ bala Allah kuan lemulun. Yesus titen teh ku Nabi (Ul. 18:15,18; Luk. 24:19; Yoh. 6:14).
Rasul yeineh lemulun luk icuk Yesus felé ngecing Ago Doꞌ idih ngeneuꞌ emung fufu lun tanaꞌ inih eméꞌ ku murid-Neh (Mrk. 16:14,15; Mat. 28:16-20). Paulus teh titen rasul ngecehkuh ieh madaꞌ Ago Doꞌ rat nan Allah (Kis. 14:15-21; Rom. 1:1; 1Kor. 1:17; 2Kor. 9:13; 1Tes. 2:8,9).
Rereb yeineh tanuꞌ kuan lemulun luk fengeh nengalap Yesus inéꞌ ku Lun Ngulunneh. Lemulun rereben ku apaꞌ. Lemulun luk rireb ineh sinuet idih rinuat rat bang apaꞌ. Ilungneh kuan lun luk menu ni Yesus, ideh naté ku salaꞌdeh idih nulun beruh bang Yesus, Lun Ngulundeh (Rom. 6:1-14).
Rigit Mina yeineh rigit amas. 1 mina yeineh rigit amas =100 dinar atau rigit perak.
Roh dat yeineh roh luk mayaꞌ finian kefalaꞌ waꞌ sitan (Iblis). Ieh (ideh) miek semuet bang niat lemulun, ngeneuꞌ lemulun meruden, mét, idih mesalaꞌ (Luk. 4:36; 8:2, 29; 9:42; 11:24, 26). Ideh miek semuet teh bang burur fung, finginudneh berek (Luk. 8:33).
Roh Meligan yeineh Roh Allah, Roh Kristus Luk meré ulun, tueh, ileh idih awang niat kuan lemulun luk menu nan Tuhan Yesus.
Rumaꞌ Allah yeineh rumaꞌ nan lun Yahudi tebupun deiꞌ Yerusalém felé ngubur ngadan Allah idih meré lua kuan-Neh (Luk. 2:27).
Rumaꞌ Tebupun yeineh rumaꞌ nan lun Yahudi tebupun (sinagogé), kereb eco Sabat, bang bawang-bawang beken luk inan lun Yahudi tudo. Ideh macaꞌ buku Ago, sembayang, madaꞌ bala doꞌ idih ngubur ngadan Allah ideiꞌ (Luk. 4:16).
Sunat yeineh eceh adat luk ruen nan anak delei lun Yahudi kereb ulunneh waluh eco (Kej. 17:9-14). bangsaꞌ-bangsaꞌ beken rat nan Israél tetenen lemulun luk na sinunat (Gal. 2:7).
Tumui ilungneh: Tudo rat nan telubid atau rudap; mulun beruh rat nan até.
Ukum Torat yeineh ukum luk biré Allah kuan lun Yahudi. Fuluꞌ Ukum Torat semuet bang ukum inih teh. Ukum inih bedén idih bén lun Yahudi felé ulundeh doꞌ kudeng luk bidaꞌ nedeh.
Ulun meruked yeineh ulun luk biré Allah kuan emung lemulun luk menu idih nengalap Yesus Kristus ku Lun Ngulunneh. Dingan bala beken, ulun meruked dingan Tuhan bang Surga.