Yesus Nulun Beruh
24
1 Fakak uka-uka eco Minggu waꞌ decur inéꞌ deiꞌ nan tanem Yesus idih nenguit umau doꞌ buen luk fengeh tinrimodeh. 2 Idih ideh nenier batuh tutub tanem Yesus fengeh kiniuk idih tanem ineh mukab feh. 3 Kereb ideh nesemuet bang tanem ineh, ideh nenier butung Tuhan Yesus na idih feh. 4 Selabaꞌ ideh tufed nefelingo ngerimaꞌ luk nangun ineh, danak-danak dueh burur lemulun netufed iringdeh dingan bakad luk merasat. 5 Ideh felaba tot idih netekeradung mecing kiungdeh nan tanaꞌ. Idih dueh burur lemulun ineh nefebala nedeh, “Ngudeh muyuh nakap lun mulun arang lun naté? 6 Na Ieh idih yenih. Ieh fengeh netumui nulun beruh. Ruwaꞌ ngerawé enun luk bila-Neh nemuyuh, kereb Ieh tudo deiꞌ Galiléa, a 7 ku Anak Lemulun lutep berén nan lun mesalaꞌ ruen nalib, idih eco luk keteluh Ieh netumui nulun beruh.” 8 Neterawéneh ideh bala Yesus ineh. 9 Sefengeh ideh nuliꞌ rat nan tanem ineh, ideh nemadaꞌ emung luk nangun ineh nedeh fuluꞌ eceh murid Yesus idih lun beken teh luk menu ni Yesus. 10 Waꞌ decur, luk nemadaꞌ bala ineh nedawaꞌ rasul-Neh, yeineh Maria rat Magdala, Yohana, Maria tinan i Yakobus, idih waꞌ decur beken luk nemayaꞌ nedeh ineh. 11 Yehmoꞌ, terawédeh, emung lun luk neninger bala ineh, waꞌ decur ineh nefebala moꞌ-moꞌ. Ideh na menu ku baladeh.12 Pétrus netufed idih nufun inéꞌ nan tanem ineh. Ieh netekunel ngeligak deiꞌ dalem, idih nenier kibung budaꞌ moꞌ luk idih yedih. Pétrus felaba awa, Ieh nuliꞌ dingan mulaꞌ itun bang niatneh ku luk fengeh nangun ineh.
Yesus Nesigalaꞌ nan Dalan Eméꞌ Emaus
13 Bang eco sineh teh, dueh burur lun luk menu ni Yesus uned nalan inéꞌ bang eceh bawang luk ngadanneh Emaus, kiraꞌ-kiraꞌ fuluꞌ eceh kilométér adoneh rat Yerusalém. b 14 Kereb nalan, didueh nefegayam ku emung luk fengeh nangun ineh. 15 Kereb didueh nefegayam, ecing moꞌ Yesus nalan nefebayaꞌ nedidueh. 16 Siren didueh Yesus, yehmoꞌ, inan luk ngesabeng mateh didueh, idih didueh na miti Neneh. 17 Yesus nefebala nedidueh, “Enun luk belén medueh nan dalan nih?” Nugkaꞌ didueh neninger bala Yesus. Kiung didueh kudeng lun dat niat. 18 Idih seburur rat arang didueh luk ngadanneh Kléopas nefebala ni Yesus, “Iko sibuleng moꞌ lun beruh necing inéꞌ Yerusalém luk na nekeliꞌ emung luk fengeh nangun deiꞌ labaꞌ inih?” 19 “Enun luk nangun ineh?” Kebala Yesus nedidueh. Didueh nengor itun Yesus, “Inan luk nangun ni Yesus lun Nazarét. Ieh ineh nabi, melalud bang bala idih kekemen-Neh mayaꞌ sier Allah idih luk sinier fufu kei. 20 Yehmoꞌ, imam-imam kefalaꞌ idih emung waꞌ lun rayeh luk nguyut fufu kei fengeh nemeré Neneh nelun Romawi, felé Ieh ruen ngukum maté idih ideh nenalib Neneh. 21 Semetuneh, rat mon kei merefet Ieh luk miek muit fufu Israél. Eco sinih eco luk keteluh rat ideh nenalib Neneh. 22 Beken rat yeneh, kei negagap ku bala waꞌ decur rat nan rurum kei. Fakak uka-uka ideh inéꞌ nan tanem Yesus, 23 yehmoꞌ butung-Neh na idih feh. Idih ideh nelemubed madaꞌ nekei ku ideh nenier malaikat, idih malaikat ineh nemadaꞌ ku Yesus netumui nulun beruh. 24 Idih tudaꞌ-tudaꞌ lun rurum kei inéꞌ nan tanem ineh, ideh nenier metu luk bila waꞌ decur ineh, butung Yesus na idih feh.” 25 Idih Yesus nefebala nedidueh, “Felaba dat ileh muyuh inih. Felaba ikat niat muyuh menu ku emung luk fengeh bila waꞌ nabi! 26 Kristus ineh fengeh linetep Allah ku Ieh mulaꞌ dereh idih maté, fengeh ineh Ieh ngalap lalud nguyut dingan Allah.” 27 Idih Yesus nemadaꞌ lio-lio nedidueh enun luk nayud ku Yesus bang Buku Ago, doꞌ bang buku Musa idih teh buku-buku waꞌ nabi.
28 Munengneh bawang luk nan didueh inéꞌ ineh, idih Yesus nesilaba fian necu lawé-Neh. 29 Yehmoꞌ, didueh ingel-ingel nenguit ni Yesus rucu, kebala didueh, “Rucu moꞌ Iko dingan kei, ngecehkuh mageh malem inih, na mio nafeh medecem eco.” Nerucuneh Yesus dingan didueh. 30 Kereb tudo kuman dingan didueh, Yesus nengalap rutiꞌ, Ieh nesembayang nan Allah, idih nemuriꞌ-muriꞌ rutiꞌ ineh, idih nemeré nedidueh. 31 Kereb ineh didueh nekeliꞌ feh ku ineh Yesus, yehmoꞌ na Ieh idih siren didueh feh. 32 Idih didueh nefegayam, “Moꞌ negkuh, felaba awang niat kiteh ninger bala-Neh kereb fegayam nekiteh mayaꞌ dalan idih madaꞌ lio-lio nekiteh enun luk fengeh nayud bang Buku Ago.” 33 Kereb ineh teh, didueh ferecu nelemubed inéꞌ Yerusalém. Didueh nefafuꞌ waꞌ murid-Neh, fuluꞌ eceh emungdeh. Ideh nefemung dingan rurum-rurumdeh luk beken. c 34 Idih kebaladeh, “Metu, Tuhan fengeh netumui mulun beruh. Ieh nesigalaꞌ ni Simon.” 35 Idih didueh sineh fanaꞌ nemadaꞌ enun luk fengeh nangun kereb didueh arang dalan idih kudeng afeh didueh nekeliꞌ ku Ieh Tuhan kereb Ieh nemuriꞌ-muriꞌ rutiꞌ dih.
Yesus Nesigalaꞌ Nedeh Waꞌ Murid-Neh
36 Uned ideh nefegayam ku emung ineh, danak-danak Yesus netufed arang uneddeh idih nefebala nedeh, “Awang kuan muyuh!” 37 Ideh negagap idih felaba tot, naꞌ kedeh, ideh nenier adaꞌ. 38 Yehmoꞌ, Yesus nefebala nedeh, “Ngudeh muyuh metot? Ngudeh muyuh merafang niat? 39 Siraꞌ ticuꞌ idih kukud-Kuh, Uih inih! Ruen muyuh ngimet Uih idih nier doꞌ-doꞌ, ngecehkuh adaꞌ na uang idih tulangneh kudeng luk siren muyuh Negkuh.” 40 Kereb nefebala kudeng ineh, Ieh nemadaꞌ ticuꞌ idih kukud-Neh sirendeh. 41 Idih kereb na teh ideh menu ngecehkuh felaba awang niat idih mawa, Yesus nengitun nedeh, “Inan luk kenen muyuh yenih?” 42 Ideh nemeré setangal lawid kinriki kuan-Neh. 43 Ieh nengalap idih nekuman neneh sirendeh. 44 Idih Ieh nefebala nedeh, “Inih bala-Kuh luk fengeh bila-Kuh nemuyuh kereb Uih idih dingan muyuh, yeineh lutep mangun emung luk nayud ku Uih bang buku Torat Musa, buku waꞌ nabi, idih buku Mazmur.” 45 Idih Yesus nengukab terawédeh felé ideh keliꞌ ilung bala bang Buku Ago. 46 Idih kebala-Neh nedeh, “Bang Buku Ago fengeh nayud, Kristus lutep medereh idih mulun beruh rat nan até bang eco luk keteluh. 47 Idih teh, Ago ku lemulun lutep uren rat nan salaꞌ ngelawan Allah idih Allah melalud ngampun salaꞌ, ruen ngecing tutu dingan lalud Yesus kuan emung lemulun efut tanaꞌ, ngimun rat Yerusalém. 48 Muyuh luk nekeliꞌ emung inih, muyuh teh luk ngecing neneh! 49 Idih berén-Kuh nemuyuh nafeh enun luk finjaniꞌ Taman-Kuh. Yehmoꞌ, muyuh lutep ngenét bang bawang inih fad muyuh ruen ngerefut dingan lalud rat nan Allah.” d
Yesus Nekemikit Inéꞌ Surga
50 Sefengeh ineh Yesus nenguit nedeh remuat rat bawang Yerusalém inéꞌ mecing muneng Bétania. Ieh nengiding ticuꞌ-Neh idih nengeferuan nedeh. e 51 Kereb nengiding ticuꞌ nengeferuan nedeh, Ieh nekemikit inéꞌ Surga fatad rat nedeh. 52 Ideh netekeradung ngubur Neneh idih ideh nelemubed inéꞌ Yerusalém dingan felaba awang niat. 53 Ideh inéꞌ tecu-tecu ngubur Allah bang Rumaꞌ Allah.