Lukas 23

Yesus fa Kiung Pilatus

1 Sefengeh idih lun mulaꞌ ineh netufed idih nenguit Yesus inéꞌ matun Pilatus. 2 Yeneh ideh nengimun ngepen Neneh, kebaladeh, “Kei nekeliꞌ lemulun inih nengagau fufu kei, idih nemepeng lemulun meré fufuk kuan Kaisar, idih nemala burur-Neh Kristus, yeineh Racaꞌ.” 3 Idih Pilatus nengitun ni Yesus, “Metu Iko racaꞌ lun Yahudi?” Yesus nengor balaneh, “Iko sibuleng nemala kudeng ineh.” 4 Idih Pilatus nefebala nan imam-imam kefalaꞌ idih lun mulaꞌ ineh, “Uih keliꞌ lemulun inih na luk idih enun salaꞌ-Neh!” 5 Yehmoꞌ, ideh melun masad, kebaladeh, “Dingan badaꞌ-Neh, Ieh nengagau lemulun efut tanaꞌ Yudéa; fun-fun deiꞌ Galiléa idih mecing su inih nekinih.” 6 Kereb Pilatus neninger ineh, ieh nengitun, “Lemulun inih lun Galiléa?” 7 Kereb ieh nekeliꞌ Yesus ineh rat bawang luk bang kuyut Herodés, ieh nengecuk nedeh, nenguit ni Yesus inéꞌ ni Herodés, luk kereb ineh idih teh deiꞌ Yerusalém.

Yesus fa Kiung Herodés

8 Herodés felaba awang niat kereb nenier ni Yesus, ngecehkuh fengeh mio ieh neninger mulaꞌ bala ku luk ineuꞌ Yesus idih fian nier Neneh teh. Herodés merefet miek nier mujizat kudeng luk fengeh ineuꞌ-Neh. 9 Ngecehkuh ineh Herodés nengitun tudaꞌ-tudaꞌ itun Neneh, yehmoꞌ Yesus na tufu nengor neneh. 10 Imam-imam kefalaꞌ idih guruꞌ-guruꞌ Ukum Torat ineh inéꞌ muneng idih nengaduꞌ ni Yesus dingan tudaꞌ-tudaꞌ aduꞌ. 11 Herodés idih waꞌ seraduꞌneh fanaꞌ ngoyo idih nesitunga Neneh. Herodés nengayung ni Yesus ku bakad racaꞌ idih nengecuk nelun nenguit Neneh inéꞌ ni Pilatus. 12 Rat eco sineh Herodés didueh Pilatus neferurum beruh feh, mon feh dat rurum didueh.

Pilatus Nengeletep Ukum Maté Kuan Yesus

13 Pilatus nenawar waꞌ imam kefalaꞌ, emung lun rayeh Yahudi, idih lun mulaꞌ, 14 kebalaneh nedeh, “Muyuh nenguit Lemulun inih eméꞌ negkuh ku Ieh madaꞌ luk na metu nelun mulaꞌ. Uih fengeh nengelio Neneh fa kiung muyuh, yehmoꞌ sebuleng salaꞌ fanaꞌ na luk ineuꞌ-Neh kudeng luk inaduꞌ muyuhneh. 15 Herodés fanaꞌ na teh nekeliꞌ salaꞌ-Neh, ku idih ieh nengelubed ni Yesus nekei. Na salaꞌ luk ineuꞌ Lemulun inih ku idih Ieh na miek ruen ngukum maté. 16 Ngecehkuh ineh uih mabal Neneh idih muit Neneh.” 17 Pilatus nefebala kudeng ineh ngecehkuh anid irau Paskah ieh lutep muit seburur lemulun luk tinutup kuandeh. 18 Yehmoꞌ, lun mulaꞌ ineh nengitang, “Fitaien Ieh! Muit ni Barabas kuan kei!” 19 Barabas tinutup ngecehkuh ieh nenguit nelun mulaꞌ nengeneuꞌ mulaꞌ riaꞌ bang bawang idih ieh teh nengaté lemulun. 20 Idih sekuaꞌ teh Pilatus nefebala nedeh ngecehkuh fian muit ni Yesus. 21 Yehmoꞌ, ideh nengitang, “Nalib Neneh! Nalib Neneh!” 22 Idih seketeluh kuaꞌ Pilatus nefebala nedeh, “Enun salaꞌ luk ineuꞌ-Neh? Na luk keliꞌkuh sebuleng fanaꞌ salaꞌ luk ineuꞌ-Neh ku idih Ieh miek ruen ngukum maté. Uih miek ngecuk nelun mabal Neneh idih muit Neneh.” 23 Yehmoꞌ, ideh felaba sad, nengitang mutuh felé Yesus ruen nalib. Kekifedneh luk finiandeh binayaꞌ feh. 24 Pilatus nengeletep ukum maté kuan Yesus mayaꞌ luk fiandeh ineh. 25 Ieh nemuit lemulun luk finutuhdeh yeineh lemulun luk tinutup ngecehkuh nenguit nelun mulaꞌ nengeneuꞌ mulaꞌ riaꞌ idih nengaté lemulun. Nemayaꞌ luk finian lun mulaꞌ ineh, Pilatus nemeré ni Yesus nedeh waꞌ seraduꞌ Roma felé ruen nalib.

Yesus Sinalib

26 Kereb waꞌ seraduꞌ Romawi nenguit ni Yesus nalan, idih tangal dalan ideh nefafuꞌ ni Simon lun rat Kiréné, luk necing bang bawang ineh. Ideh nengiteng neneh, idih nengingel neneh man salib ineh semunuꞌ ni Yesus. 27 Mulaꞌ lemulun nemayaꞌ Neneh, inan teh tudaꞌ-tudaꞌ decur luk nangiꞌ idih temido Neneh.

28 Yehmoꞌ, Yesus nelumi nedeh idih nefebala, “Decur-decur Yerusalém, eleg muyuh nangiꞌ Negkuh. Yehmoꞌ, doꞌ muyuh nangiꞌ burur muyuh sibuleng idih anak-anak muyuh teh! 29 Ngecehkuh inan kereb medereh muci eco lun febala, ‘Samal kuan waꞌ decur luk na miek mebatek, luk na anak idih luk na nenitiꞌ anak.’ 30 Kereb ineh teh lemulun febala nan fegkung-fegkung, ‘Ngeritep nekei!’ Idih nan surud-surud, ‘Ngekeb nekei!’ 31 Ngecehkuh kudeng ineh feh luk ruendeh nan kayuh mataꞌ, enun teh luk ruendeh nan kayuh tekering?”

32 Inan teh dueh burur lemulun luk dat luk nuitdeh ruen ngukum maté febayaꞌ dingan Yesus. 33 Kereb necing su luk ngadanneh tetenen ferufuk, ideh nenalib ni Yesus dingan didueh lemulun luk dat ineh, sebuleng fa tinueh-Neh idih sebuleng fa kabing-Neh. 34 Idih Yesus nesembayang, “Amaꞌ, meré ampun nedeh. Na keliꞌdeh enun luk ineuꞌdeh nih.” Bakad Yesus ineuꞌdeh mapat-mapat kuandeh dingan undi. 35 Lun mulaꞌ luk idih tufed yeneh nenier emung luk nangun yeneh. Waꞌ lun rayeh Yahudi nesitunga ni Yesus, kebaladeh, “Ieh nemuit nelun beken, nekinih nimaꞌ Neneh muit burur-Neh sibuleng, kudeng metu moꞌ Ieh Kristus luk finiliꞌ Allah!” 36 Waꞌ seraduꞌ fanaꞌ nesitunga teh ni Yesus. Ideh nemeré apaꞌ anggur malam Neneh, 37 idih nefebala, “Kudeng feh Iko Racaꞌ lun Yahudi, ruen-Muh muit burur-Muh sibuleng!” 38 Inan ayud fa lun uluh Yesus, “Inih Ieh Racaꞌ lun Yahudi.” 39 Seburur rat nedidueh lemulun luk dat luk sinalib dingan Yesus ineh nengoyo ni Yesus. Ieh nefebala, “Na Iko inih Kristus dih? Ruen-Muh muit burur-Muh sibuleng idih kei dueh teh!” 40 Yehmoꞌ, lun luk dingan nidih nemepeng neneh, kebalaneh, “Na iko metot nan Allah? Iko fanaꞌ mafad inukum maté kudeng Ieh. 41 Kiteh inukum ngecehkuh metu kiteh mesalaꞌ, yehmoꞌ Ieh na tufu salaꞌ-Neh.” 42 Idih ieh nefebala, “Yesus, eleg mekelufan negkuh kereb Iko mecing mangun ku Racaꞌ.” 43 Kebala Yesus neneh, “Eleg merafang, eco sinih teh iko idih fad-fad dingan-Kuh bang Firdaus.”

Yesus Naté

44 Mageh muned eco, mateheco na merasat feh, idih efut bawang ineh medecem mecing jam teluh mageh malem. 45 Idih kibung alad luk tekito bang Rumaꞌ Allah nedarak dueh ufaneh. 46 Yesus nengitang, “Amaꞌ, Uih meré niat-Kuh bang falad-Muh”. Sefengeh Ieh nefebala kudeng ineh, naténeh Ieh feh. 47 Kereb kefalaꞌ seraduꞌ Romawi nenier luk nangun ineh, ieh nengubur Allah, kebalaneh, “Metu tutu, Ieh Inih lemulun doꞌ na salaꞌ-Neh!” 48 Lun mulaꞌ, luk nefemung nenier enun luk nangun ineh, nenginud idih nuliꞌ dingan felaba leso niat. 49 Emung lun luk dingan Yesus idih waꞌ decur luk nemayaꞌ ni Yesus rat Galiléa tufed nenier emung luk nangun ineh rat mado.

Yesus Tinanem

50 Inan eceh lemulun ngadanneh Yusuf. Ieh lemulun luk doꞌ niat idih metu. Ieh anggota Pengadilan Yahudi. 51 Yehmoꞌ, metu fanaꞌ kudeng ineh, na ieh nemayaꞌ terawédeh waꞌ anggota kumaꞌ beken, luk nemutut ukum maté kuan Yesus ineh. Ieh rat bawang Arimatéa, bawang lun Yahudi idih ieh ngenét ecing Kuyut Allah. 52 Yusuf inih inéꞌ fafuꞌ ni Pilatus nemutuh butung Yesus. 53 Idih ieh nenurun butung Yesus rat nan kayuh salib dih, nenanga neneh ku kibung budaꞌ meberuh. Fengeh ineh ieh nengerereng butung Yesus bang tanem luk na tufu fikaien luk nukat bang surud batuh. 54 Eco sineh eco kelimeh, idih kereb eco Sabat muneng feh ngecehkuh eco Sabat ngimun malem eco kelimeh. 55 Waꞌ decur luk nemayaꞌ ni Yesus rat Galiléa dih inéꞌ teh nemayaꞌ ni Yusuf nenier tanem ineh. Ideh fanaꞌ nenier kudeng afeh butung Yesus rireng bang tanem ineh. 56 Sefengeh ineh ideh nuliꞌ idih nengerimo umau luk doꞌ buen rat nan don-don fingumau butung Yesus, ngecehkuh bang eco Sabat ideh ugkaꞌ ngekem mayaꞌ Ukum Torat.