Gayam Fian Ngaté ni Yesus
22
1 Irau eco rayeh Rutiꞌ Na Lamud luk tetenen Paskah fengeh muneng. a 2 Imam-imam kefalaꞌ idih guruꞌ-guruꞌ Ukum Torat nefegayam fian ngaté ni Yesus lelem-lelem ngecehkuh ideh metot nan lun mulaꞌ.Yudas Fian Masui ni Yesus
3 Idih Iblis nesemuet bang niat Yudas luk tetenen Iskariot. Ieh ineh sebuleng rat arang fuluꞌ dueh burur murid Yesus. 4 Ngecehkuh idih Yudas inéꞌ nedeh waꞌ imam kefalaꞌ idih waꞌ kefalaꞌ lun luk matar Rumaꞌ Allah. Ideh nefegayam kudeng afeh miek meré ni Yesus nedeh. 5 Ideh felaba awang niat idih nefejaniꞌ meré rigit kuanneh. 6 Yudas fanaꞌ nengemo idih nenakap kereb luk doꞌ inanneh meré ni Yesus nedeh lelem-lelem.
Tinaꞌ Ku Irau Paskah
7 Necingneh kerebneh irau Rutiꞌ Na Lamud, kerebneh lun ngeret domba ku irau Paskah.
8 Idih Yesus nengecuk Pétrus didueh Yohanés, kebala-Neh, “Eméꞌ medueh ngerimo akan Paskah kuan teu.”
9 Idih kebala didueh Neneh, “Su afeh fian-Muh kei ngeneuꞌ akan irau Paskah ineh?”
10 Idih kebala Yesus nedidueh, “Kereb medueh semuet bang Yerusalém, eceh delei luk nguit rubi apaꞌ mefafuꞌ nemedueh. Semunuꞌ medueh neneh mecing bang rumaꞌneh, 11 idih febala nan tuan rumaꞌ ineh, Guruꞌ ngitun nemuh, ‘Yafeh nan i Guruꞌ idih waꞌ murid-Kuh kuman irau Paskah?’ 12 Tuan rumaꞌ ineh nafeh nguit nemedueh idih nicul eceh takep luk rayeh deiꞌ ditaꞌ fengeh tinrimo doꞌ-doꞌ, yedih nan medueh ngeneuꞌ akan irau Paskah kuan teu.” 13 Idih Pétrus didueh Yohanés inéꞌ, nefafuꞌ idih nenier emungneh mafad kudeng luk bila Yesus. Idih didueh nengeneuꞌ akan irau Paskah yedih.
Irau Paskah Tuhan
14 Necingneh kerebneh kuman irau Paskah, Yesus netudo dingan waꞌ rasul-Neh. 15 Idih Ieh nefebala nedeh, “Fian tutu Uih kuman Irau Paskah inih febayaꞌ dingan muyuh kereb na teh Uih medereh. 16 Uih febala nemuyuh: Na Uih kuman kudeng inih feh mecing ilung bala rat nan akan irau Paskah inih megalaꞌ bang Kuyut Allah.” 17 Idih Ieh nengalap cangkir luk inan apaꞌ anggur idih nemeré ubur kuan Allah. Ieh nefebala, “Lafen muyuh inih idih nganid neneh kuan muyuh. 18 Uih madaꞌ nemuyuh, rat nekinih Uih na ngirup apaꞌ anggur inih feh mecing Kuyut Allah mefut lun tanaꞌ inih.” 19 Sefengeh ineh Ieh nengalap rutiꞌ idih nemeré ubur kuan Allah, Ieh nemuriꞌ rutiꞌ ineh, nemeré neneh kuandeh, idih kebala-Neh nedeh, “Inih burur-Kuh luk biré kuan muyuh. Ruen muyuh kudeng inih fingerawé muyuh Negkuh.” 20 Kudeng ineh teh sefengeh ideh nekuman, Ieh nemeré cangkir luk inan apaꞌ anggur ineh nedeh, idih nefebala, “Apaꞌ anggur inih, mangun ku tanuꞌ janiꞌ beruh Allah dingan lemulun yeineh daraꞌ-Kuh luk rinuat kuan muyuh. b 21 Yehmoꞌ, siren muyuh! Lemulun luk meré Negkuh nelun luk dat Negkuh idih ieh yenih dingan-Kuh! c 22 Metu, Anak Lemulun lutep maté, mafad kudeng luk fengeh litep Allah, yehmoꞌ medereh lemulun luk nemeré Negkuh nedeh luk dat Negkuh.” 23 Neninger bala Yesus, fegeiꞌ fekitunneh ideh, idé luk meré ni Yesus ineh lek?
Tariꞌ Ku Idé luk Melun Rayeh
24 Idih nangun eceh tariꞌ arang waꞌ murid Yesus ku idé luk melun rayeh rat arangdeh. d 25 Yesus nefebala nedeh, “Racaꞌ-racaꞌ fufu beken luk na menu nan Allah, nguyut rakyatneh mayaꞌ finiandeh, idih waꞌ lun rayeh fian felé waꞌ rakyatneh neten nedeh lun luk ngerurum rakyat. e 26 Yehmoꞌ, eleg muyuh kudeng ineh. Idé luk melun rayeh arang muyuh, doꞌ ieh eméꞌ kudeng lun luk isut, idé luk nguyut arang muyuh, doꞌ ieh eméꞌ kudeng felayan dih. f 27 Idé luk melun rayeh, lemulun luk tudo kuman, atau lemulun luk ngerimo akan? Keliꞌ rungen lemulun luk tudo kuman ineh. Yehmoꞌ, Uih idih arang muyuh eméꞌ ku felayan. g
28 Muyuh moꞌ luk idih dingan-Kuh anid kereb bang emung dereh-Kuh. 29 Ngecehkuh ineh, mafad kudeng Taman-Kuh nemeré lalud nguyut Negkuh, kudeng ineh teh Uih meré lalud ineh nemuyuh. 30 Ku ineh feh, muci eco muyuh kuman idih ngirup febayaꞌ dingan-Kuh bang Kuyut-Kuh. Idih muyuh luk fuluꞌ dueh burur tudo lun kerusiꞌ racaꞌ nguyut fuluꞌ dueh fufu Israél.” h
Yesus Madaꞌ Ku i Pétrus Nafeh Ngalum Neneh
31 “Simon, Simon! Siruh! Iblis fengeh nemutuh nan Allah felé nutun nemuyuh, fad ieh tunap nemuyuh kudeng selemulun luk tunap gandum felé lifangneh mefalid. 32 Yehmoꞌ, Uih fengeh nesembayang kuanmuh, felé iko lutep menu Negkuh. Kereb iko lemubed lutep menu Negkuh, doꞌ iko ngetueh enu kinanak-kinanakmuh.”
33 Pétrus nefebala Neneh, “Tuhan, tetufin fanaꞌ uih idih maté dingan-Muh, fian teh uih.” 34 Yehmoꞌ, kebala Yesus, “Pétrus, Uih febala nemuh, kereb na teh lal ngekok eco sinih, iko nafeh ngalum Negkuh teluh kuaꞌ ku iko meti Negkuh.”
Kafil, Tepung, idih Felefet
35 Sefengeh ineh Yesus nefebala nedeh, “Kereb Uih nengecuk nemuyuh nalan dingan na nguit kafil, tepung baluꞌ idih sefatuꞌ, inankéꞌ susaꞌ muyuh?” Idih kebaladeh, “Na luk idih susaꞌ kei.” i 36 Idih kebala Yesus nedeh, “Yehmoꞌ, nekinih idé luk inan kafil idih tepung ruan baluꞌ doꞌ ieh nguit neneh. Idé luk na inan felefet doꞌ ieh masui fakaineh finmeli felefet. 37 Uih febala nemuyuh kudeng ineh ngecehkuh ayat luk inayud kudeng inih, ‘Ieh ipen ku lemulun luk ngelawan ukum’ mangun Negkuh nekinih. Keliꞌ rungen enun luk nayud bang Buku Ago ku Uih mangun nekinih.” j 38 Idih kebaladeh, “Tuhan, inih inan dueh felefet!” Idih kebala Yesus nedeh, “Fengehfeh!”
Yesus Sembayang Lun Surud Zaitun
39 Yesus nalan rat Yerusalém idih inéꞌ nan surud Zaitun kudeng luk fekalai ruen-Neh. Waꞌ murid-Neh fanaꞌ nemayaꞌ Neneh. 40 Kereb necing su ineh, Ieh nefebala nedeh, “Doꞌ muyuh sembayang felé muyuh na mepeh bang tutun Iblis!” 41 Ieh nenalan rat nedeh inéꞌ mado sisut, kiraꞌ-kiraꞌ teluh ngefuluꞌ akang. Idih Ieh netekeradung sembayang, kebala-Neh, 42 “Amaꞌ, miek feh ruen nalaꞌ dereh inih rat Negkuh. Yehmoꞌ, na ieh finian-Kuh, finian-Muh moꞌ luk mangun.” 43 Idih seburur malaikat rat Surga inéꞌ Neneh meré tueh kuan-Neh. 44 Yesus felaba susaꞌ niat-Neh, ku idih sembayang tu-tuneh Ieh. Fanaꞌ-Neh kudeng daraꞌ dih temefek lun tanaꞌ. 45 Sefengeh sembayang Yesus Inéꞌ nan waꞌ murid-Neh. Ieh nenier nedeh rudap ngecehkuh susaꞌ niatdeh. 46 Idih Ieh nefebala nedeh, “Ngudeh muyuh rudap? Tumui muyuh idih sembayang felé muyuh na mepeh bang tutun Sitan!”
Yesus Inep
47 Kereb Yesus uned febala nedeh waꞌ murid-Neh, mecingneh lun mulaꞌ. Ideh nuit Yudas. Yudas ineh seburur rat arang fuluꞌ dueh murid Yesus. Ieh inéꞌ matun ni Yesus idih nengafel Neneh. 48 Idih Yesus nefebala neneh, “Yudas, iko masui Anak Lemulun dingan gafelmuh?”
49 Kereb waꞌ murid Yesus kumaꞌ beken nenier enun luk mageh mangun, ideh nefebala, “Tuhan, miek kei ngelawan nedeh ku felefet inih?” 50 Idih seburur rat arangdeh nengelawan demulun Imam Rayeh mecing nefutut lalid fa tinuehneh. 51 Yehmoꞌ, Yesus nefebala, “Eleg kudeng ineh!” Idih Yesus nenuneb lalid lemulun dih.
52 Fengeh ineh Yesus nefebala nedeh waꞌ imam kefalaꞌ, waꞌ kefalaꞌ lun matar Rumaꞌ Allah, idih waꞌ lun rayeh Yahudi luk fian ngenep Neneh, keburiꞌ Yesus, “Mayaꞌ terawé muyuh, Uih inih lun dat, mecing muyuh nguit felefet idih kayuh finmabal nan ngenep Negkuh? 53 Anid eco Uih idih arang muyuh bang Rumaꞌ Allah, ngudeh muyuh na ngenep Negkuh? Yehmoꞌ, inihneh kereb muyuh ngenep Negkuh ngecehkuh muyuh mayaꞌ finian Iblis.” k
Pétrus Nengalum Ku Ieh Keliꞌ ni Yesus
54 Ideh nengenep ni Yesus idih nenguit Neneh inéꞌ bang rumaꞌ Imam Rayeh. Pétrus nesemunuꞌ Neneh rat mado. 55 Nan uned natad rumaꞌ ineh lun nenutud afui bupun idih ideh tudo ngelibut afui ineh. Pétrus fanaꞌ idih netudo arangdeh. 56 Seburur felayan decur nenier ni Pétrus tudo iring afui ineh, ieh nenotong lio-lio ni Pétrus idih nefebala, “Lemulun inih teh mayaꞌ ni Yesus!” 57 Yehmoꞌ, i Pétrus nengalum, kebalaneh, “Na keliꞌkuh idé Ieh ineh.” 58 Na mio, seburur lun beken teh nenier neneh idih nefebala, “Iko inih fanaꞌ seburur rat arangdeh!” Yehmoꞌ, kebala Pétrus, “Na ieh uih!” 59 Lélé sejam fengeh ineh, seburur beken teh nefebala, “Metu lemulun inih teh lun dingan Yesus, ngecehkuh ieh inih fanaꞌ lun rat Galiléa.” 60 Yehmoꞌ, kebala Pétrus, “Na keliꞌkuh, enun luk belénmuh ineh.” Kereb ineh teh, uned ieh febala, ngekokneh lal. 61 Idih Yesus nelumi nier ni Pétrus. Neterawé i Pétrus bala Tuhan neneh, “Kereb na teh lal ngekok eco sinih, iko ngalum Negkuh teluh kuaꞌ” 62 Pétrus neremuat rat nan natad rumaꞌ ineh idih ieh nangiꞌ leso-leso.
Yesus Kinuyo idih Bibal
63 Waꞌ lemulun luk nematar ni Yesus nesitunga idih nemabal Neneh. 64 Ideh nengekeb kiung-Neh idih nengitun Neneh, “Keliꞌ-Muh, idé luk nemabal Nemuh inih?” 65 Idih mulaꞌ teh baladeh luk beken nan nengoyo Neneh.
Yesus bang Pengadilan Yahudi
66 Kereb eco fengeh macang, waꞌ lun rayeh Yahudi, imam-imam kefalaꞌ, idih guruꞌ-guruꞌ Ukum Torat nefemung ngecehkuh ideh anggota Pengadilan Yahudi. Ideh nengecuk nguit ni Yesus nefafuꞌ nedeh. 67 Idih kebaladeh Neneh, “Bedén-Muh nekei ku metu moꞌ iko Kristus.” Kebala Yesus nedeh, “Kudeng feh Uih febala nemuyuh ku Uih Kristus, keliꞌ rungen muyuh na menu Negkuh, 68 idih kudeng feh Uih ngitun nemuyuh teh, muyuh fanaꞌ na fian ngor bala-Kuh. 69 Yehmoꞌ, rat fad kereb inih, Anak Lemulun tudo fa tinueh Allah Luk Felabalalud.” 70 Emungdeh nefebala, “Kudeng ineh feh, Iko inih Anak Allah?” Kebala Yesus nengor baladeh, “Muyuh sibuleng febala ku Uih inih Anak Allah.” 71 Idih ideh nefebala, “Kudan teu ngitun nelun teh, Ieh sibuleng nefebala findinger teu, Ieh nengemo ku Ieh Anak Allah.”