Beré Decur Tinulaꞌ
21
1 Kereb Yesus bang Rumaꞌ Allah, Ieh nenier waꞌ lun kaya nifa rigit luk beréndeh bang fatiꞌ luk ruan rigit. 2 Ieh nenier teh seburur decur tinulaꞌ luk masiꞌ nenifa dueh balad rigit sén bang fatiꞌ ineh. 3 Idih kebala Yesus, “Uih febala nemuyuh, decur tinulaꞌ inih nemeré melun mulaꞌ ratnan emungdeh luk beken. 4 Ngecehkuh emung lemulun inih nemeré rat nan ala rigitdeh, yehmoꞌ decur tinulaꞌ inih, agan fanaꞌ felaba asiꞌ ieh nemeré emung luk idih neneh.”Rumaꞌ Allah Ruen Ngusag
5 Kereb ineh inan tudaꞌ-tudaꞌ lemulun nefebala ku taga Rumaꞌ Allah luk inayung dingan batuh meraga idih refut-refut binaweh luk biré kuan Allah. Yesus nefebala nedeh, 6 “Muci eco emung luk siren muyuh inih, sebuleng fanaꞌ batuh luk ineuꞌ nusun ineh na melulum, emung ineh musag.”
Susaꞌ idih Dereh
7 Ideh nengitun ni Yesus, “Guruꞌ, idan emung ineh mageh mangun? Enun tanuꞌneh kereb emung ineh mageh mangun?”
8 Kebala Yesus, “Teminaꞌ tutu, eleg muyuh seluken. Ngecehkuh mulaꞌ lemulun mecing makai ngadan-Kuh, keburiꞌdeh ‘Uih inih Ieh,’ Idih teh, ‘Kekifed tanaꞌ fengeh muneng.’ Yehmoꞌ eleg muyuh mayaꞌ nedeh. 9 Kereb muyuh ninger riaꞌ lun febunuꞌ, eleg muyuh megagau. Ngecehkuh emung ineh lutep mangun atun. Yehmoꞌ, na ineh kekifed ulun tanaꞌ inih teh.”
10 Idih teh kebala-Neh, “Bangsaꞌ febunuꞌ nan bangsaꞌ beken, negara febunuꞌ nan negara beken. 11 Yafeh-yafeh tanaꞌ felaba ruyu, idih bulau merefut, idih leu. Inan teh tanuꞌ-tanuꞌ luk nan felaba gagap mangun danak-danak deiꞌ langit.
12 Yehmoꞌ, na teh emung ineh mangun, atun muyuh ruen lun ngenep idih ruen ngedereh. Muyuh iten eméꞌ bang rumaꞌ-rumaꞌ Tebupun idih eméꞌ bang rumaꞌ tutup. Muyuh teh iten fa kiung waꞌ racaꞌ idih lun rayeh pemerintah ruen ngadat ngecehkuh muyuh mayaꞌ Negkuh. 13 Ineh kerebneh muyuh madaꞌ Bala luk Doꞌ rat nan Allah. 14 Ngecehkuh idih, lutep niat muyuh, eleg ngerawé atun kudeng afeh muyuh miek ngor baladeh. a 15 Ngecehkuh nafeh Uih sibuleng natak bala ileh kuan muyuh, felé bunuꞌ-bunuꞌ muyuh na ngesalaꞌ enun luk belén muyuh. 16 Taman-tinan muyuh, kinanak-kinanak muyuh, fufu muyuh, idih rurum-rurum muyuh, meré nemuyuh nafeh nan bunuꞌ muyuh, idih tudaꞌ-tudaꞌ rat arang muyuh fitaien. 17 Emung lemulun nafeh mét niat nemuyuh ngecehkuh muyuh mayaꞌ Negkuh. 18 Yehmoꞌ, sengurat fanaꞌ epuk muyuh na teh metalaꞌ. 19 Kudeng feh muyuh lutep idih tuman, muyuh nafeh miek ngalap ulun luk meruked.”
Bawang Yerusalém Musag
20 “Kudeng feh muyuh nier bawang Yerusalém linibut waꞌ seraduꞌ, kereb inehngeh muyuh keliꞌ ku bawang ineh mageh musag. 21 Kereb ineh emung lemulun luk ideiꞌ tanaꞌ Yudéa lutep buro eméꞌ lun fegkung. Emung lemulun luk idih bang bawang Yerusalém lutep buro nacan bawang. Emung lemulun luk idih libut ineh eleg semuet bang bawang Yerusalém. 22 Ngecehkuh bang eco-eco ineh Allah ngukum nelun Yerusalém. Kudeng ineh feh, nangunneh enun luk inayud bang Buku Ago. b 23 Medereh tu waꞌ decur luk mebatek, idih waꞌ tinan luk nitiꞌ anak kereb ineh. Susaꞌ rayeh mangun nan bawang inih, ngecehkuh Allah ngukum bangsaꞌ inih. 24 Inan lemulun fitaien ku felefet, inan teh lafen iten eméꞌ bang bawang-bawang lun beken, idih waꞌ lemulun luk na menu nan Allah ngusag Yerusalém mecing fad kereb luk litep Tuhan.”
Ecing Anak Lemulun
25 “Nafeh inan tanuꞌ-tanuꞌ luk megalaꞌ siren nan mateh eco, nan bulan, idih nan gituen-gituen. Idih lemulun efut tanaꞌ metot, ngecehkuh merafang nier idih ninger beri lifak rayeh apaꞌ laut. c 26 Lemulun lélé maté ku felaba tot ku luk mangun nan tanaꞌ inih ngecehkuh nafeh lalud-lalud luk deiꞌ langit miek neguyuꞌ. 27 Kereb inehngeh lun nier Anak Lemulun mecing lun lafut dingan lalud idih rasat-Neh. d 28 Kereb emung ineh ngimun feh, metueh niat muyuh ngafuꞌ emungneh, ngecehkuh muneng kereb Allah muit nemuyuh rat nan ukum salaꞌ.”
29 Idih Yesus nemala teh luk finginud inih kuandeh, “Siren tu-tu lawa ara idih emung-emung lawa kayuh luk beken teh. 30 Kereb muyuh nier lawaneh ngimun nginulih, keliꞌneh muyuh ku mageh merikan. 31 Kudeng ineh teh, kereb muyuh nier emung tanuꞌ ideiꞌ langit ineh mangun, keliꞌneh muyuh ku Kuyut Allah fengeh muneng. 32 Ngerawé doꞌ-doꞌ! Emung ineh mangun kereb na teh emung lemulun luk nekinih maté. 33 Langit idih tanaꞌ miek mabud, yehmoꞌ bala-Kuh lutep na misuꞌ seruked-rukedneh.”
Badaꞌ Felé Nginita Ulun
34 “Nginita ulun muyuh, eleg niat muyuh metayan ku irau luk meteburaꞌ, idih ngirup burak, ngerimo ulun muyuh lun tanaꞌ inih moꞌ, felé kereb eco Tuhan mecing danak-danak, muyuh fengeh teminaꞌ. 35 Ngecehkuh kereb eco Tuhan mecing mafad kudeng ateb nacat emung lemulun efut tanaꞌ. 36 Teminaꞌngeh anid kereb, idih megeiꞌ sembayang felé muyuh metueh niat ngafuꞌ emung luk mangun ineh, mecing muyuh miek mefafuꞌ Anak Lemulun.”