Itun Ku Lalud Yesus
20
1 Bang seeco, kereb Yesus nemadaꞌ nelun mulaꞌ bang Rumaꞌ Allah idih nemadaꞌ Bala luk Doꞌ, imam-imam kefalaꞌ, guruꞌ-guruꞌ Ukum Torat dingan waꞌ lun rayeh Yahudi necing inéꞌ ni Yesus, 2 idih nefebala Neneh, “Madaꞌ nekei, rat yafeh lalud luk nan-Muh nengeneuꞌ kekemen inih? Idé luk nemeré lalud inih kuan-Muh?” 3 Kebala Yesus nedeh, “Uih fanaꞌ fian ngitun nemuyuh. Madaꞌ Negkuh, 4 Rat yafeh rereb Yohanés ineh, Surga atau lemulun?”5 Ideh nefegayam seburur dingan seburur, kebaladeh, “Kudeng teu madaꞌ, ‘Rat nan Allah’, Ieh miek febala, ‘Ngudeh muyuh na menu neneh?’ 6 Yehmoꞌ, kudeng teu madaꞌ, ‘Rat nan lemulun’, emung lemulun miek mitung nateu ku batuh, ngecehkuh ideh menu ku Yohanés ineh nabi.” 7 Idih kebaladeh, “Na keliꞌ kei.”
8 Idih kebala Yesus nedeh, “Uih fanaꞌ na fian madaꞌ nemuyuh dingan lalud idé Uih nengeneuꞌ kekemen inih.”
Finginud Ku Lun Ngekem Kabun Anggur
9 Idih Yesus nemadaꞌ eceh finginud kuan lun mulaꞌ, “Inan seburur lemulun nengukab eceh kabun anggur, idih ieh nemeré kabun ineh ruen ngasaꞌ tudaꞌ-tudaꞌ lun ngekem kabun. Idih ieh nenalan tudaꞌ-tudaꞌ io bang bawang beken. a 10 Kereb mureg buaꞌ anggur, lun kuan kabun anggur ineh nengecuk demulunneh inéꞌ nedeh lun luk ngasaꞌ kabunneh felé ngalap bapatneh. Yehmoꞌ, lun ngasaꞌ kabun ineh nemabal demulun ineh, idih nengecuk neneh muliꞌ na nemeré enun-enun kuan tuanneh. 11 Idih ieh nengecuk seburur demulunneh luk beken teh, yehmoꞌ demulun ineh fanaꞌ bibaldeh, nengoyo neneh, idih icukdeh nuliꞌ dingan na nemeré enun-enun kuan tuanneh. 12 Sefengeh ineh, ieh nengecuk demulunneh luk keteluh, yehmoꞌ demulun ineh fanaꞌ bibaldeh mecing nurat, idih tilaꞌdeh rat bang kabun ineh.
13 Kekifedneh lun kuan kabun anggur ineh nengerawé: Enun luk ruenkuh teh lek? Dukenkuh anakkuh luk nankuh mawa; felé ideh nginangaꞌ neneh. 14 Yehmoꞌ, kereb lun luk ngasaꞌ kabun anggur nenier anakneh ineh, ideh nefegayam, kebaladeh, ‘Inih anakneh luk nginul kabun inih kudeng feh tamanneh maté. Fitaien teu ieh felé kabun inih kuan teu’. 15 Ideh nengekarad anak dih rat bang kabun ineh idih nengaté neneh.” Idih Yesus nengitun nelun mulaꞌ luk neninger bala-Neh, “Kudeng feh lun kuan kabun anggur ineh muliꞌ, enun luk ruenneh nedeh luk ngasaꞌ kabun anggur ineh? 16 Keliꞌ rungen ieh eméꞌ ngaté emung lun luk ngasaꞌ kabun ineh, idih meré kabun ineh ruen lun beken ngasaꞌ.” Kereb lun mulaꞌ neninger bala Yesus, ideh nefebala, “Eleg mecing kudeng ineh!” 17 Yehmoꞌ, Yesus nenier nedeh idih nefebala, “Kudeng ineh fehyeh, enun ilung ayat inih:
Batuh luk tilaꞌ lun mudut rumaꞌ fengeh nangun ku batuh tuked linawa. b
18 Emung lemulun luk mepeh lun batuh ineh mefutul, idih lemulun luk meritep ku batuh ineh, mefareg.”
Mayar Fufuk kuan Kaisar Romawi
19 Guruꞌ-guruꞌ Ukum Torat idih imam-imam kefalaꞌ keliꞌ ku luk finginud ineh bila Yesus nulu nedeh. Ngecehkuh ineh, ideh fian ngenep ni Yesus kereb ineh teh, yehmoꞌ ideh metot nelun mulaꞌ.
20 Ku idih ideh nenginita ni Yesus tecu-tecu. Ideh nemayar tudaꞌ-tudaꞌ lemulun eméꞌ sifalep nakap salaꞌ bala Yesus. Ideh siitun nutun ni Yesus, felé inan feh bala Yesus luk na metu, ideh miek ngaduꞌ Neneh nan lun rayeh pemerintah felé ruen ngadat idih kumin.
21 Idih waꞌ lemulun luk icuk eméꞌ siitun dih nefebala ni Yesus, “Guruꞌ, keliꞌ kei emung luk bila idih bidaꞌ-Muh ineh metu. Keliꞌ kei teh Iko fanaꞌ madaꞌ dingan bala galaꞌ-galaꞌ luk finian Allah, idih na Iko ngelifa lemulun. 22 Ngecehkuh idih bedén-Muh nekei, mayaꞌ Ukum Torat, miekkéꞌ kei mayar fufuk kuan Kaisar atau na?”
23 Yehmoꞌ, Yesus nekeliꞌ terawédeh, ngecehkuh idih Ieh nefebala nedeh, 24 “Meré sebalad rigit dinar siren-Kuh. Gamber kiung idih ayud ngadan idé lun rigit dih?” Kebaladeh ni Yesus, “Gamber kiung idih ngadan Kaisar.” 25 Yesus nefebala nedeh, “Kudeng idih fehyeh, berén muyuh nan Kaisar enun luk Kaisar kuan, idih berén muyuh nan Allah enun luk Allah kuan.” 26 Idih ideh na miek nengesalaꞌ neneh fa kiung lun mulaꞌ. Ideh firud moꞌ idih mawa ku bala-Neh.
Itun Lun Saduki Ku Tui Lun Naté
27 Tudaꞌ-tudaꞌ lun Saduki inéꞌ matun ni Yesus. Waꞌ lun Saduki inih na menu ku inan ulun meberuh sefengeh lemulun maté. Idih ideh nengitun Neneh, c 28 kebaladeh, “Guruꞌ, Musa fengeh nengayud ukum kuan teu, ‘Kudeng seburur delei naté idih ieh na anak, kinanakneh lutep faweh dingan tinulaꞌneh, felé meré inul kuan kinanakneh luk fengeh naté ineh.’ d 29 Inan tuduꞌ delei denganak. Anak tutuꞌ nengaweh idih naté na anak. 30 Idih kinanakneh luk kedueh nefaweh dingan tinulaꞌ kinanak tutuꞌneh luk fengeh naté ineh, yehmoꞌ ieh fanaꞌ naté na anak. 31 Kudeng ineh nangun setecuneh dingan kinanakneh luk keteluh mecing nan ketuduꞌ. 32 Kekifedneh tinulaꞌ ineh naté teh. 33 Kereb eco ngulun beruh lun naté, eméꞌ ku awan idé decur ineh? Ngecehkuh tuduꞌ delei denganak ineh fengeh nefaweh neneh.” 34 Kebala Yesus nedeh, “Lemulun luk mulun lun tanaꞌ inih ngaweh, 35 yehmoꞌ muci eco lemulun luk menu nan Allah ruen ngulun beruh rat nan até, na ideh ngaweh. 36 Ideh mafad kudeng malaikat-malaikat idih na maté beruh feh. Ideh ineh anak-anak Allah ngecehkuh Allah ngulun nedeh beruh. 37 Musa fengeh nengayud ku lemulun luk naté ruen ngulun beruh. Bang ayat-ayat ku afet luk inan afui mulun dih, ieh neneten Tuhankuh ‘Allah Abraham, Allah Ishak, Allah Yakub’. e
38 Ku idih Tuhan ineh beken Allah lemulun luk naté, yehmoꞌ Allah lemulun luk mulun, ngecehkuh mayaꞌ Allah emungdeh mulun.”
39 Tudaꞌ-tudaꞌ guruꞌ Ukum Torat nengor bala-Neh, kebaladeh, “Guruꞌ, metu bala-Muh ineh.” 40 Ngecehkuh ineh ideh na mekuꞌ ngitun ni Yesus beruh feh.
Itun Ku Kristus
41 Idih kebala Yesus nedeh, “Kudeng afehkéꞌ lemulun febala ku Kristus ineh anak Daud? 42 Ngecehkuh Daud sibuleng nengayud bang buku Mazmur:
Allah nefebala nan Tuhankuh,
Tudo Iko fa tinueh-Kuh, f g
43 Fad Uih ngeneuꞌ bunuꞌ-Muh,
Mangun ku tefin kukud-Muh.
44 Kudeng ineh feh Daud neneten Racaꞌ Fuit ineh Tuhan, kudeng afehkéꞌ Ieh mangun ku anakneh teh?”
Yesus Madaꞌ Felé Nginita Tutu Nedeh Waꞌ Guruꞌ Ukum Torat
45 Kereb lun mulaꞌ neninger bala-Neh, Yesus nefebala nan murid-murid-Neh, 46 “Nginita muyuh nedeh waꞌ guruꞌ Ukum Torat, luk fian nalan dingan bakad buyur, fian ruen lun ngafuꞌ idih nan fetabiꞌ ideiꞌ pasar, idih fian tudo nan kerusiꞌ luk melun doꞌ bang Rumaꞌ Tebupun, su luk melun doꞌ kereb irau. h 47 Ideh muyok decur tinulaꞌ idih ngaro rumaꞌneh. Ideh siayu doꞌ ngelinged datdeh dingan sembayang kadang-kadang. Ukum kuandeh nafeh melun mebarat.”