Zakhéus
19
1 Yesus nesemuet bawang Yerikho idih nenalan fetecu lemaba bawang ineh. 2 Bang bawang ineh, inan selemulun luk ngadanneh Zakhéus, ieh ineh kefalaꞌ lun luk ngemung rigit fufuk, idih ieh teh mulaꞌ binaweh. 3 Ieh nenakap dalan fian nier idé Yesus ineh, yehmoꞌ na miek ngecehkuh lemulun mulaꞌ, idih teh ieh mebeneh. 4 Ngecehkuh ineh, ieh nufun inéꞌ fa atun lun mulaꞌ, idih nemanad eceh lawa ara, felé miek nier ni Yesus luk mageh lemaba yeneh.5 Kereb Yesus necing su ineh, Ieh nenier ideiꞌ ditaꞌ idih nefebala, “Zakhéus mesagetngeh iko remurut, ngecehkuh eco sinih na miek na Uih rucu rumaꞌmuh.” 6 Idih Zakhéus saget-saget neremurut idih nengafuꞌ ni Yesus dingan awang niat. 7 Yehmoꞌ, emung lemulun luk nenier ineh dureng-dureng idih nefebala, “Ieh inéꞌ rucu rumaꞌ lun mesalaꞌ.” 8 Kereb ideiꞌ rumaꞌneh, Zakhéus netufed idih nefebala ni Yesus, “Tuhan, sebuang rat nan binawehkuh berénkuh kuan lemulun luk masiꞌ, idih idé fanaꞌ luk fengeh sinalukkuh, uih ngelubed neneh afat kuaꞌ kinulaꞌneh.” 9 Idih Yesus nefebala, “Bang eco sinih, lemulun inih idih emung lun bang tetek rumaꞌneh finuit Allah rat nan ukum salaꞌ, ngecehkuh ieh fanaꞌ inul Abraham. 10 Ngecehkuh Anak Lemulun nakap idih muit lemulun rat nan ukum salaꞌ.”
Finginud Ku Rigit Amas
11 Selabaꞌ lun mulaꞌ luk neninger bala Yesus, Ieh nemadaꞌ teh eceh luk finginud, ngecehkuh Yesus mageh muneng Yerusalém. Idih teh bang terawédeh, magehneh kerebneh Allah eméꞌ ku Racaꞌ nguyut nedeh.
12 Bala Yesus, “Inan selemulun inul racaꞌ luk inéꞌ nan eceh bawang mado, felé ruen ngiding mangun ku racaꞌ, fengeh ineh ieh lemubed. 13 Kereb na teh nenalan, ieh nenawar fuluꞌ burur demulunneh, idih nemeré fanid kuandeh sebalad rigit minaa. Kebalaneh nedeh, ‘Bedagang muyuh ku rigit inih, selabaꞌkuh nalan fad ecingkuh lemubed.’
14 Yehmoꞌ, lun bawang ineh megeteh niat neneh, idih nengecuk nelun semunuꞌ inéꞌ febala nedeh luk ngiding neneh mangun ku racaꞌ ineh. Kebaladeh, ‘Na kei fian lemulun inih mangun ku racaꞌ kei.’
15 Sagan fanaꞌ ideh araꞌ, inul racaꞌ dih kiniding teh mangun ku racaꞌ, idih ieh nuliꞌ inéꞌ bawangneh. Ieh nenawar emung demulunneh luk nefimaran rigit amas dih. Ieh nengitun nedeh ku tudaꞌ untung dagangdeh.
16 Demulun luk fun-fun inéꞌ ku dawarneh nefebala, ‘Tuan, sebalad rigit mina luk biré midih fengeh nangun inéꞌ ku fuluꞌ balad rigit mina.’
17 Keburiꞌ racaꞌ ineh neneh, ‘Moꞌ, doꞌ tutu luk ineuꞌmuh ineh! Iko demulunkuh luk muned niat. Ngecehkuh iko miek nan gelasan, mileh ngerimo luk isut. Uih ngiding nemuh ku kefalaꞌ nguyut fuluꞌ bawang.’ 18 Sefengeh ineh, demulun luk kedueh inéꞌ idih nefebala, ‘Tuan, sebalad rigit mina luk biré midih fengeh nangun inéꞌ ku limeh balad rigit mina.’
19 Keburiꞌ racaꞌ ineh neneh, ‘Uih ngiding nemuh ku kefalaꞌ nguyut limeh bawang.’
20 Idih luk keteluh inéꞌ neneh idih nefebala, ‘Tuan, inih teh sebalad rigit mina midih ginugkuh bang belaca, kibung isut. 21 Uih metot nemuh ngecehkuh tuan lemulun luk metara. Iko ngalap enun luk na yeh iko kuan, idih ngalap enun luk na yeh tinibumuh.’ 22 Keburiꞌ racaꞌ dih neneh, ‘Iko demulun luk dat, uih ngukum nemuh mayaꞌ kudeng luk finikirmu ina dih. Iko fengeh keliꞌ ku uih inih selemulun luk metara, uih ngalap enun luk na yeh uih kuan, idih ngerani enun luk na yeh tinibukuh. 23 Kudeng ineh fehyeh, nengudeh iko na nemeré rigit kidih nelun luk meré rigit kebiten felé inan bungaꞌneh. Kerebkuh mecing, uih miek ngalap rigit dih dingan bungaꞌneh.’ 24 Sefengeh ineh, racaꞌ nefebala nan waꞌ demulun luk tufed yeneh, ‘Lafaꞌ rigit ineh rat neneh, idih meré nan demulun luk rigit minaneh fuluꞌ balad.’ 25 Keburiꞌdeh nan racaꞌ, ‘Tuan, fengeh inan rigit minaneh fuluꞌ balad.’ 26 Racaꞌ ineh nengor baladeh, ‘Idé luk nengalap untung, melun mulaꞌ luk berén neneh teh, yehmoꞌ idé luk na nengalap untung, enun luk idih neneh lafen teh rat neneh.’ 27 Sefengeh ineh, racaꞌ nefebala nedeh waꞌ demulunneh, ‘Nekinih emungdeh waꞌ bunuꞌkuh, yeineh ideh luk araꞌ negkuh eméꞌ ku racaꞌdeh, nguit nedeh eméꞌ tungéꞌ, idih ngaté nedeh fa kiungkuh.’ ”
Yesus Necing bang Bawang Yerusalém
28 Sefengeh Yesus nemala emung ineh Ieh nenalan fa atundeh inéꞌ Yerusalém. 29 Kereb necing muneng Betfagé idih Bétania lun Surud Zaitun, Yesus nengecuk dueh burur murid-Neh, 30 “Eméꞌ medueh bang bawang luk fa batun ineh: Kereb medueh mecing yeneh, mefafuꞌ medueh eceh anak keledai nabet. Keledai ineh na tufu lun netudo nan ketedneh. Naka abetneh idih nguit neneh eméꞌ tungéꞌ. 31 Kudeng feh lun ngitun nemedueh: Ngudeh muyuh naka abet keledai ineh? Febala moꞌ nedeh: Tuhan fian makai neneh.”
32 Inéꞌneh didueh luk icuk ineh idih nefafuꞌ enun luk bila Yesus dih metu. 33 Kereb didueh naka abet keledai ineh, lemulun luk kuan anak keledai ineh nefebala nedidueh, “Ngudeh muyuh naka abet keledai ineh?” 34 Keburiꞌ didueh, “Tuhan fian makai neneh.”
35 Didueh nenguit keledai ineh inéꞌ ni Yesus, idih nenefin keted keledai ineh ku bakad didueh, idih nenangan Yesus umak lun ketedneh.
36 Kereb Yesus nelemaba dingan tudo lun keted keledai ineh, waꞌ lemulun nemalad bakaddeh nan dalan.
37 Kereb Yesus mageh mecing Yerusalém su dalan remuru rat nan Surud Zaitun, waꞌ murid-Neh nengitang mawang niat idih nengubur Allah ngecehkuh emung mujizat luk sinierdeh. 38 Kebaladeh,
“Ruen ngeferuan Racaꞌ luk mecing bang ngadan Tuhan.
Awang ideiꞌ Surga idih ubur kuan Allah nan luk felabaditaꞌ.” b
39 Tudaꞌ-tudaꞌ lun Farisi arang lun mulaꞌ ineh nefebala ni Yesus, “Guruꞌ, duken-Muh murid-murid-Muh ineh firud.” 40 Yesus nengor baladeh, “Kudeng ideh firud, batuh-batuh inihngeh luk ngitang.”
41 Kereb Yesus muneng Yerusalém, idih nenier bawang ineh, Ieh nenangiꞌ dat niat idih meleso ku bawang ineh, 42 Ieh nefebala, “Tawan muyuh lun Yerusalém, buraꞌ feh doꞌneh sén kudeng feh eco sinih keliꞌ muyuh inan luk necing nguit awang! Yehmoꞌ, nekinih feh melinged yeh bang terawé muyuh. 43 Inan kerebneh nafeh, bunuꞌ-bunuꞌ muyuh mudut barat-barat nan manad alad bawang muyuh, idih mulaꞌ tutu bunuꞌ rat yafeh-yafeh ngelibut idih ideh ngeruyung nemuyuh rat fa emung busat. 44 Ideh ngusag bawang Yerusalém idih emung lun bang bawang fitaiendeh. Idih emung batuh alad libut bawang metapa mecing areg-areg, na sebuleng fanaꞌ melulum, ngecehkuh muyuh na nginita kereb Allah necing eméꞌ muit nemuyuh rat nan ukum salaꞌ.”
Yesus Nesemuet Rumaꞌ Allah
45 Yesus nesemuet Rumaꞌ Allah idih nemasut emung lemulun luk bedagang yeneh. 46 Kebala-Neh nedeh, “Inan fengeh inayud bang Buku Ago, ‘Rumaꞌ-Kuh inih Rumaꞌ nan sembayang.’ Ruen muyuh ieh nan waꞌ i feno tudo!” c