Finginud Seburur Decur Tinulaꞌ idih Hakim
18
1 Idih Yesus nemadaꞌ kuandeh waꞌ murid-Neh eceh luk finginud, felé ideh megeiꞌ sembayang dingan na melawaꞌ. 2 Kebala-Neh, “Idih bang eceh bawang inan seburur hakim luk na metot nan Allah idih luk na feduliꞌ nan lemulun beken. 3 Bang bawang ineh teh, inan eceh decur tinulaꞌ luk megeiꞌ eméꞌ matun neneh. Kebala decur ineh, ‘Ngedangan negkuh bang bisaraꞌ ngecehkuh uih metu, na salaꞌ.’ 4 Idih tudaꞌ-tudaꞌ io hakim ineh na sikel, yehmoꞌ kekifedneh ieh ngerawé bang niatneh, ‘Sagan fanaꞌ uih na metot nan Allah idih na feduliꞌ nan lemulun beken, 5 yehmoꞌ, ngecehkuh decur tinulaꞌ ineh ngerugag negkuh, uih ngedangan neneh, felé ieh na ngerugag negkuh feh.’ ” 6 Idih kebala Tuhan, “Doꞌ ninger luk bila hakim luk dat ineh! 7 Nakéꞌ Allah miek ngedangan anid-anid lemulun luk finiliꞌ-Neh luk nawar Neneh tebeco kedangan? Ruen-Neh ngiuk kereb-Neh ngedangan nedeh? 8 Uih febala nemuyuh, dingan mesaget Ieh ngedangan lemulun ineh. Yehmoꞌ, kereb Anak Lemulun mecing, inankéꞌ lemulun luk menu tutu Neneh lun tanaꞌ inih?”Finginud Lun Farisi idih Lun luk Ngemung Fufuk
9 Idih Yesus nemadaꞌ luk finginud inih teh kuan tudaꞌ-tudaꞌ lemulun luk mayaꞌ terawédeh ideh metu mayaꞌ bala Allah, idih nengebeneh lemulun beken. 10 Kebala-Neh, “Inan dueh burur lemulun nesemuet bang rumaꞌ Allah sikel sembayang, yeineh lun Farisi idih seburur lun luk ngemung rigit fufuk. 11 Lun Farisi ineh netufed idih nesembayang kudeng inih balaneh, ‘Allah, uih meré ubur kuan-Muh, ngecehkuh uih na mafad kudeng lemulun luk beken, lemulun luk meno, lemulun luk na muned niat, lemulun luk fesét, idih teh na mafad kudeng lemulun luk ngemung rigit fufuk ineh. 12 Uih mawaꞌ dueh kuaꞌ bang seminggu idih meré bapat fuluꞌ rat nan emung-emung luk nekalapkuh.’ 13 Yehmoꞌ, lun luk ngemung rigit fufuk ineh netufed ado-ado idih ieh na mekuꞌ tungok deiꞌ langit. Yehmoꞌ, ieh mala-mala rukneh idih sembayang, ‘Allah, meiꞌ negkuh inih, lemulun luk mesalaꞌ.’ 14 Yesus febala nedeh: Kereb lemulun luk ngemung rigit fufuk ineh nuliꞌ inéꞌ rumaꞌ, Allah ngiuꞌ salaꞌneh, yehmoꞌ lun Farisi ineh na Allah ngiuꞌ salaꞌneh. Ngecehkuh lemulun luk ngeditaꞌ niatneh, ieh ruen ngebeneh, yehmoꞌ lemulun luk ngebeneh niat, ieh ruen ngeditaꞌ.” a
Yesus Nengeferuan Anak-anak Isut
15 Tudaꞌ-tudaꞌ lemulun nenguit anak-anak isut inéꞌ matun Yesus, felé Ieh nengerereng ticuꞌ-Neh nedeh idih nengeferuan nedeh. Kereb waꞌ murid Yesus nenier ineh ideh museh nan lemulun luk nenguit anak-anak ineh. 16 Yehmoꞌ, Yesus nenawar anak-anak ineh idih nefebala nan waꞌ murid-Neh, “Nimaꞌ anak-anak inih eméꞌ Negkuh, eleg mepeng nedeh, ngecehkuh lemulun luk kudeng inih luk mulun bang Kuyut Allah. 17 Teruaien doꞌ-doꞌ! Kudeng feh muyuh na ngafuꞌ Kuyut Allah mafad kudeng anak isut ngalap luk berén taman-tinanneh, muyuh na miek semuet eméꞌ bang Kuyut Allah.”
Na Melé Lun Kaya Semuet bang Kuyut Allah
18 Eceh lun rayeh Yahudi nengitun ni Yesus, keburiꞌneh, “Guruꞌ luk doꞌ, enun setutuneh ruenkuh felé ngalap ulun meruked?” 19 Kebala Yesus, “Ngudeh iko mala Negkuh doꞌ? Na luk doꞌ sebeken ratnan Allah moꞌ. 20 Fengeh keliꞌmuh enun luk icuk Allah: Eleg fesét, eleg ngaté lemulun, eleg meno, eleg mebalih. Doꞌ muyuh nginangaꞌ nan taman idih tinanmuh.” b 21 Keburiꞌ lemulun ineh, “Emung ineh fengeh binayaꞌkuh rat anak adiꞌ.” 22 Neninger bala lemulun ineh Yesus nefebala neneh, “Inan eceh luk lutep ruenmuh tutu teh, fisuienmuh emung binawehmuh idih rigit uaꞌneh berénmuh nedeh lun masiꞌ, ku ineh feh iko ngalap binaweh deiꞌ bang Surga. Sefengeh ineh, iko mayaꞌ Negkuh.” 23 Kereb lemulun ineh neninger bala Yesus, dat niatneh ngecehkuh ieh felaba kaya. 24 Nekeliꞌ Yesus ieh dat niat idih Yesus nefebala, “Felaba susaꞌ lemulun luk kaya semuet bang Kuyut Allah! 25 Melun melé seburur unta semuet mayaꞌ lubang finu ratnan seburur lun kaya semuet bang Kuyut Allah.” 26 Ideh luk neninger bala Yesus kereb ineh, nengitun, “Kudeng ineh fehyeh, na neh luk idih lun miek mefuit rat nan ukum salaꞌ?” 27 Yesus nengor itundeh, “Enun luk na miek mangun ruen lemulun, miek mangun ruen Allah.”
Tapar Mayaꞌ ni Yesus
28 Idih keburiꞌ Pétrus, “Kei inih fengeh nenacan rumaꞌ kei idih mayaꞌ Nemuh.” 29 Idih keburiꞌ Yesus nedeh, “Uih febala nemuyuh, setutuneh anid-anid lemulun luk nenacan rumaꞌneh, awan, atau kinanakneh, taman tinan, atau anak-anakneh, ngecehkuh Kuyut Allah, 30 nekinih ieh miek ngalap lemubed melun mulaꞌ. Idih kereb kekifed tanaꞌ ieh ngalap ulun luk meruked.”
Badaꞌ luk Keteluh Kuaꞌ Ku Dereh Yesus
31 Yesus nenawar fuluꞌ dueh murid-Neh idih nefebala nedeh, “Nekinih teu eméꞌ ideiꞌ Yerusalém. Emung luk inayud waꞌ nabi ku Anak Lemulun mageh mangun. 32 Ieh berén nelun beken ratnan Yahudi. Ideh ngoyo, ngedat idih ngelicaꞌ Neneh. 33 Ideh ngedereh idih ngaté Neneh. Yehmoꞌ, eco keteluh Ieh tumui rat nan até-Neh.” 34 Yehmoꞌ, na nekeliꞌdeh ilung bala-Neh. Luk bila Yesus inih inalum nedeh; ku idih ideh na tufu nekeliꞌ enun luk fengeh bila Yesus ineh.
Yesus Nengedoꞌ Lun Mebuser Muneng Yerikho
35 Kereb Yesus mageh muneng Yerikho, inan selemulun luk mebuser tudo iring dalan idih mutuh-mutuh moꞌ. 36 Kereb lun mebuser ineh neninger lun mulaꞌ lemaba, ieh nengitun, “Enun ineh?” 37 Keburiꞌ lemulun neneh, “Yesus lun Nazarét lemaba.” 38 Lun mebuser ineh nengitang, “Yesus, Anak Daud, meiꞌ negkuh!” 39 Yehmoꞌ, lemulun luk nenalan fa batun Yesus nemepeng neneh felé firud. Yehmoꞌ, melun rayeh arodneh feh, “Anak Daud, meiꞌ negkuh!” 40 Yesus neucuꞌ idih nengecuk nelun nguit lun mebuser ineh inéꞌ Neneh. Kereb lun mebuser ineh muneng, Yesus nengitun neneh. 41 “Enunkéꞌ luk fianmuh ruen-Kuh kuanmuh?” Kebalaneh, “Tuhan, uih mutuh felé miek nier!” 42 Idih kebala Yesus neneh, “Nier iko feh, ngecehkuh iko menu Negkuh iko nedoꞌ.”
43 Kereb ineh teh ieh miek nenier idih ieh nemayaꞌ ni Yesus; ieh nengubur Allah. Kereb lun mulaꞌ nenier luk nangun ineh, ideh nengubur Allah.