Tudaꞌ-tudaꞌ Badaꞌ
17
1 Yesus nefebala nedeh murid-Neh, “Inan moꞌ luk nan lemulun mepeh bang salaꞌ ngelawan Allah, yehmoꞌ medereh kuan lemulun luk ngigam lemulun beken mepeh bang salaꞌ ngelawan Allah ineh. a 2 Melun doꞌ ngabet eceh batuh rayeh nan rierneh idih nerem neneh bang riberuh, ratnan nimaꞌ neneh nguit nelun luk melayaꞌ enu ngeneuꞌ salaꞌ. 3 Kuidih, nginita burur muyuh doꞌ-doꞌ! Kudeng feh eceh kinanak muyuh bang Tuhan ngeneuꞌ salaꞌ nemuyuh, ruen madaꞌ ulunneh. Idih kudeng feh ieh nginud ku salaꞌneh, meré doꞌ neneh. b 4 Kudeng feh ieh ngeneuꞌ salaꞌ nemuyuh tuduꞌ kuaꞌ bang seeco idih tuduꞌ kuaꞌ teh ieh eméꞌ nemuyuh idih febala, ‘Uih nginud idih mutuh doꞌ nemuyuh,’ meré moꞌ doꞌ neneh.” cTueh Enu
5 Idih waꞌ rasul ineh nefebala ni Tuhan Yesus, “Tuhan, ngetueh enu kei.” 6 Tuhan nengor baladeh, “Kudeng inan feh enu muyuh isut moꞌ kinrayeh ilung buaꞌ sadai, muyuh miek febala nan lawa kayuh rayeh inih, ‘Mebuput iko idih mubu eméꞌ bang riberuh,’ lutep lawa kayuh rayeh inih mayaꞌ bala muyuh.”
Luk Ruen Demulun
7 “Kudeng rat arang muyuh inan eceh demulun luk ngekem latiꞌ atau ngasaꞌ fung ayaꞌ muyuh, kereb demulun ineh muliꞌ rat latiꞌ keliꞌ rungen muyuh na febala neneh: Tungéꞌ, kuman iko! 8 Semetuneh luk belén muyuh neneh: Ngeneuꞌ akan kuankuh. Nginuaꞌ iko ku bakad luk melét idih nginét negkuh kuman atun. Sefengeh ineh idihteh iko kuman. 9 Na demulun ineh buren sagan fanaꞌ ieh nengekem emung luk icuk tuanneh. 10 Kudeng ineh teh muyuh. Kereb muyuh fengeh nengeneuꞌ emung luk icuk nemuyuh, febala moꞌ: Kei inih demulun moꞌ; kei ngekem enun luk semetuneh ruen kei ngekem.”
Lun Samaria Moꞌ Meré Terimaꞌ Kasih
11 Bang lawé Yesus inéꞌ Yerusalém, Ieh nelemaba arang bawang Samaria idih Galiléa. 12 Kereb necing nan eceh bawang, inan fuluꞌ burur lun mét susud inéꞌ matun ni Yesus. Ideh netufed mado, 13 idih nengitang, “Yesus, Guruꞌ, meiꞌ nekei!” 14 Kereb Yesus nenier nedeh, Ieh nefebala, “Eméꞌ muyuh nedeh imam, mutuh nedeh nier burur muyuh.” Kereb ideh nenalan, nedoꞌneh ideh rat nan étdeh ineh. 15 Sefengeh seburur rat arangdeh nekeliꞌ ku ieh nedoꞌ, ieh nelemubed idih nengitang ngubur Allah. 16 Necing fa kiung Yesus, ieh netekeradung idih nemeré terimaꞌ kasih Neneh. Lemulun ineh lun Samaria. 17 Idih Yesus nefebala, “Fuluꞌ lun fengeh ineuꞌ ngedoꞌ ina, yafeh ideh luk yuwaꞌ burur feh? 18 Ngudeh lun beken ratnan Yahudi moꞌ luk lemubed idih ngubur Allah?” 19 Idih Yesus nefebala neneh, “Tufedngeh iko idih muliꞌ, ngecehkuh iko menu Negkuh, iko nedoꞌ.”
Ecing Kuyut Allah
20 Tudaꞌ-tudaꞌ lun Farisi nengitun ni Yesus ku idan ecing Kuyut Allah. Idih Yesus nengor itundeh, “Ecing Kuyut Allah na tanuꞌ-tanuꞌneh luk miek siren lemulun, 21 idih na lun febala: Siraꞌngeh, inih ieh atau ideiꞌ ineh ieh! Ngecehkuh semetuneh Allah idih nguyut nemuyuh nekinih.” 22 Sefengeh ineh Yesus nefebala nedeh murid-Neh, “Inan kerebneh nafeh muyuh fian tutu nier Anak Lemulun, yehmoꞌ na muyuh miek nier Neneh. 23 Nafeh lun febala nemuyuh; siraꞌngeh, ideiꞌ ineh ieh atau siraꞌngeh, tungéꞌ inih ieh! Yehmoꞌ, eleg muyuh remuat eméꞌ nakap neneh. 24 Kudeng kilep merasat rat fefed langit selifa eméꞌ udung langit fa selifa, kudeng inehngeh ayuꞌ Anak Lemulun kereb eco ecing-Neh. 25 Yehmoꞌ, fun-fun Ieh mefafuꞌ mulaꞌ dereh idih lemulun ricaꞌ inih na ngafuꞌ Neneh. 26 Mafad kudeng mon kereb nabi Nuh, kineh teh luk mangun kereb eco-eco Anak Lemulun ineh mecing: d 27 ideh kuman idih ngirup, idih faweh, kudeng ineh tecu-tecu mecing kerebneh Nuh semuet bang bahtera, idih apaꞌ nesakob ngaté emung waꞌ lemulun. e 28 Kudeng ineh teh kereb Lot. Lun kuman idih ngirup, masui idih febelih, ngeneuꞌ tibu idih nefed rumaꞌ. f 29 Yehmoꞌ, kereb Lot remuat rat bawang Sodom, bang eco ineh afui idih belérang mepeh rat deiꞌ langit idih nengaté emung lun bang bawang ineh. 30 Kudeng ineh ayuꞌneh nafeh kereb Anak Lemulun mecing. 31 Bang eco ineh lemulun luk lun rumaꞌneh eleg temurun eméꞌ ngalap binaweh-binawehneh luk idih bang rumaꞌ. Kudeng ineh teh lemulun luk nan latiꞌ eleg lemubed eméꞌ rumaꞌneh. g 32 Teruaien muyuh enun luk nangun ku awan i Lot! h 33 Lemulun luk fian ngasaꞌ ulunneh lun tanaꞌ inih, na mekalapneh ulun bang Surga muci eco. Yehmoꞌ, lemulun luk meré emung ulunneh mayaꞌ Negkuh, ieh mefuit rat nan ukum salaꞌ. i 34 Uih febala nemuyuh: Bang malem ineh, kereb dueh burur lun rudap fad-fad nan sebalad ugam, seburur iten, idih seburur tecin. 35 Dueh decur luk tufeh gandum, seburur iten, idih luk seburur dinganneh tecin.”