Finginud Bendahara luk Na Mefiteb
16
1 Yesus nefebala nedeh waꞌ murid-Neh, “Eceh lun kaya, inan seburur bendaharaneh luk ngasaꞌ emung binaweh idih rigitneh. Lun kaya ineh neninger aduꞌ lun ku bendahara ineh nenuso binawehneh. 2 Ku idih lun kaya ineh nenawar bendaharaneh idih nefebala neneh, ‘Uih neninger aduꞌ lun ku iko nemalep rigitkuh. Nekinih, bedénmuh ulaꞌ luk setutuneh emung binaweh idih rigitkuh. Na iko ngekem ku bendaharakuh feh.’ 3 Keburiꞌ bendahara ineh bang niatneh, ‘Enun luk miek ruenkuh? Tuankuh fian ngagkaꞌ negkuh na ngekem kuanneh feh. Na uih metueh nakol, miguꞌ uih eméꞌ mutuh-mutuh. 4 Kereb na teh uih ruen ngagkaꞌ, inan luk fian ruenkuh felé mulaꞌ rurumkuh luk doꞌ negkuh idih fian inankuh tudo.’ 5 Idih ieh nawar anid burur lun luk inan baleh nan tuanneh. Kebalaneh nan seburur luk fun-fun, ‘Tudaꞌ balehmuh nan tuankuh?’ 6 Buriꞌ lemulun ineh, ‘Meratu rubi umau.’ Bendahara ineh nefebala neneh, ‘Inih surat balehmuh, tudo iko idih yudenmuh limeh ngefuluꞌ rubi.’ 7 Idih ieh febala nan lemulun luk kedueh, ‘Tudaꞌ balehmuh?’ Buriꞌ lemulun ineh, ‘Meribu karung gandum.’ Kebala bendahara nan lemulun ineh, ‘Inih surat balehmuh, yudenmuh waluh ngeratu karung.’ 8 Kereb tuanneh nekeliꞌ enun luk ineuꞌ bendahara ineh, tuan ineh ngubur ni bendahara luk na mefiteb ineh, ngecehkuh felaba ilehneh ngerimo. Kudeng inehngeh lemulun lun tanaꞌ inih felaba ileh ngerimo ulundeh mayaꞌ ulun tanaꞌ inih, ratnan lemulun luk mayaꞌ Tuhan. 9 Ngecehkuh idih Uih febala nemuyuh, ruen muyuh makai binaweh tanaꞌ inih ku rurum luk doꞌ, felé kereb binaweh tanaꞌ inih na miek nangan nemuyuh, muyuh lafen tudo bang rumaꞌ luk meruked.”Lemulun luk Miek nan Gelasan
10 “Lemulun luk miek nan gelasan ku kekemen luk isut, kudeng ineh teh ieh miek nan gelasan ku kekemen luk rayeh. Idih lemulun luk na miek nan gelasan ku kekemen luk isut, kudeng ineh teh ieh na miek nan gelasan ku kekemen luk rayeh. 11 Kuidih, kudeng feh ku binaweh tanaꞌ inih moꞌ muyuh na miek nan gelasan, melun teh Allah na gelasan nemuyuh ku binaweh ideiꞌ Surga. 12 Idih teh, kudeng feh muyuh na miek nan gelasan ku binaweh lun beken, na luk fian meré nemuyuh binaweh luk kuan muyuh. 13 Na seburur felayan miek ngekem nan dueh tuan ngecehkuh ieh miek melun doꞌ awa nan seburur tuan ratnan seburur tuan beken, ieh doꞌ bayaꞌ nan seburur tuan ratnan seburur tuan beken. Kudeng ineh teh muyuh. Na muyuh miek ngekem kuan Allah idih muyuh teh ngekem kuan binaweh tanaꞌ inih.” a
14 Waꞌ lun Farisi neninger emung luk bila Yesus. Idih ideh meriruh ni Yesus, ngecehkuh ideh ucet ku rigit. 15 Idih Yesus nefebala nedeh, “Muyuh luk fa kiung lun beken doꞌ siren, yehmoꞌ Allah keliꞌ enun luk idih bang niat muyuh. Enun luk doꞌ mayaꞌ terawé lemulun, emung ineh dat fa kiung Allah.
16 Ukum Torat idih buku waꞌ nabi lutep fikaien mecing kereb ricaꞌ Yohanés luk ngerereb. Rat kereb ineh Kuyut Allah ruen ngecing tecu-tecu. Idih anid burur lemulun teu tutu felé semuet bang Kuyut Allah. b 17 Yehmoꞌ, melun melé langit idih tanaꞌ mabud metalaꞌ ratnan sebuleng titik bang Ukum Torat talan. c
18 Idé luk nenalaꞌ awanneh idih faweh nan decur beken, lemulun ineh fesét. Idih lemulun luk faweh nan decur luk tilaꞌ awanneh, ieh fanaꞌ fesét.” d
Lun Kaya idih Lazarus
19 Setecuneh, Yesus nemadaꞌ eceh luk finginud yeineh, “Inan eceh lemulun kaya, ieh ucet makai fakai doꞌ, idih anid eco ieh mawang niat ku ulun doꞌneh. 20 Inan eceh lemulun masiꞌ ngadanneh Lazarus, bururneh fenuꞌ ku furuh kubang. Anid eco ieh telubid iring tangaꞌ rumaꞌ lun kaya ineh. 21 Ieh meleu tu idih fian kuman areg-areg luk kenen luk mepeh rat nan meja lun kaya ineh. Waꞌ okoꞌ fanaꞌ inéꞌ teh nilaꞌ furuh kubangneh. 22 Na mio naténeh lun masiꞌ ineh feh. Nuit malaikat ieh inéꞌ nan su luk felaba doꞌ yeineh iring Abraham ideiꞌ Surga. 23 Lun kaya ineh naté teh idih ieh tinanem. Selabaꞌ lun kaya ineh medereh bang afui ukum Allah ieh tungok nier i ditaꞌ, rat mado sirenneh Abraham idih Lazarus tudo iringneh. 24 Idih lun kaya ineh nengitang, ‘Amaꞌ Abraham, meiꞌ negkuh! Dukenmuh i Lazarus nafuk fefed buaꞌ ticuꞌneh bang apaꞌ idih eméꞌ ngabaꞌ dilaꞌkuh. Felaba derehkuh bang afui ukum Allah inih.’ 25 Yehmoꞌ, Abraham febala nelun kaya ineh: Anakkuh, teruaienmuh, iko fengeh nengalap emung luk doꞌ kerebmuh mulun lun tanaꞌ, yehmoꞌ i Lazarus ngalap luk dat-dat moꞌ. Nekinih ieh mawang niat, iko luk medereh feh. 26 Sebeken rat nan ineh, arang teu fengeh ineuꞌ eceh rengeb luk rayeh felé lun rat fa tungéꞌ na miek guta eméꞌ fa ideiꞌ idih lun rat fa ideiꞌ na miek guta eméꞌ fa tungéꞌ. 27 Keburiꞌ lun kaya ineh, ‘Kudeng ineh feh Amaꞌ, uih mutuh tutu nemuh, dukenmuh i Lazarus eméꞌ rumaꞌ yamaꞌ. 28 Inan limeh burur kinanakkuh ideiꞌ. Eméꞌ ieh madaꞌ nedeh tutu felé teh ideh na semuet bang luk nan medereh inih.’ 29 Yehmoꞌ, kebala Abraham, ‘Fengeh inan nedeh buku-buku badaꞌ rat nan Allah luk inayud i Musa idih waꞌ nabi. Doꞌ ideh mayaꞌ badaꞌ luk inayud bang buku-buku ineh.’ 30 Buriꞌ lun kaya ineh, ‘Amaꞌ Abraham, na ineh fatap. Kudeng inan eceh lun naté nulun beruh, idih eméꞌ madaꞌ nedeh, lutep ideh uren rat nan salaꞌdeh ngelawan Allah.’ 31 Yehmoꞌ, Abraham febala neneh, ‘Kudeng feh ideh na mayaꞌ badaꞌ luk nayud bang buku Musa idih waꞌ nabi, ideh fanaꞌ na teh fian menu, sagan fanaꞌ lun naté mulun beruh luk eméꞌ madaꞌ nedeh.’ ”