Finginud Ku Domba luk Neraruh
15
1 Bang seeco waꞌ lemulun luk ngemung fufuk idih lemulun luk mesalaꞌ ngelawan Allah inéꞌ matun Yesus, fian ninger bala-Neh. a 2 Kuidih feh, waꞌ lun Farisi idih waꞌ guruꞌ Ukum Torat tekedemut, ideh nefebala, “Ieh ferurum dingan lemulun mesalaꞌ ngelawan Allah idih kuman mayaꞌ dingandeh.” 3 Kuidih Yesus nemadaꞌ finginud inih kuandeh, 4 “Kudeng feh rat arang muyuh luk inan meratu dombaneh idih neraruh sebuleng rat arangdeh, enun luk ruenneh? Keliꞌ rungen ieh nacan domba luk yuwaꞌ ngefuluꞌ yuwaꞌ bang laman idih eméꞌ nakap eceh luk neraruh ineh mecing ieh mefafuꞌ neneh. 5 Kudeng feh ieh nefafuꞌ domba ineh, ieh man neneh lun tudungneh dingan awang niat. 6 Kereb mecing ideiꞌ rumaꞌ ieh nawar waꞌ kinanakneh idih rurumneh teh, idih febala nedeh, ‘Tungéꞌ muyuh, mawang niat dingankuh ngecehkuh inih dombakuh luk neraruh ineh nenafafuꞌkuh feh.’ ” 7 Yesus nenecu bala-Neh, “Kudeng ineh teh awang niat deiꞌ Surga ngecehkuh sebuleng lemulun luk mesalaꞌ ngelawan Allah uren rat nan salaꞌneh ngelawan Allah, inih melun ratnan awang niat ku yuwaꞌ ngefuluꞌ yuwaꞌ lemulun luk mayaꞌ terawédeh, ideh mayaꞌ bala Allah, idih na luk salaꞌdeh ngelawan Allah.”Finginud Ku Rigit luk Netalaꞌ
8 Inih eceh luk finginud teh, “Inan eceh decur luk kuan fuluꞌ balad rigit perakb, idih netalaꞌ sebalad, enun luk ruenneh? Keliꞌ rungen ieh ngulun belayan, idih ngafuh bang rumaꞌ idih nakap rigit ineh ulai-ulai mecing mefafuꞌ. 9 Kereb ieh nefafuꞌ rigit ineh, ieh nawar waꞌ rurumneh idih waꞌ fufu libut rumaꞌneh, idih ieh febala nedeh, ‘Tungéꞌ muyuh, mawang niat dingankuh ngecehkuh inih rigitkuh luk netalaꞌ ineh nefafuꞌkuh feh.’ 10 Kudeng ineh teh waꞌ malaikat Allah mawang niat ngecehkuh sebuleng lemulun luk mesalaꞌ ngelawan Allah uren rat nan salaꞌneh.”
Finginud Ku Anak luk Neraruh
11 Idih kebala Yesus teh, “Inan eceh lemulun, dueh anak deleineh. 12 Idih keburiꞌ eceh luk isut ineh nan tamanneh, ‘Amaꞌ, berénmuh duih bapat rat nan binaweh teu.’ Idih tamanneh nemapat binawehdeh kuan didueh anakneh. 13 Na mio rat fengeh ineh, anak luk isut ineh nemasui emung binaweh bapatneh idih inéꞌ bawang mado. Ideiꞌ ieh mulun nengabud emung rigitneh ku luk na ulek-ulek. 14 Kereb emung rigitneh nabud finakaineh, kereb ineh teh leu rayeh nangun bang bawang ineh, ngimunneh ieh medereh feh. 15 Idih ieh inéꞌ ngekem kuan eceh lun bang bawang ineh. Lemulun ineh nengecuk neneh matar berek ideiꞌ latiꞌ. 16 Ieh felaba leu idih melili fian kuman luk kenen waꞌ berek ineh ngecehkuh na lemulun meré luk kenen kuanneh. 17 Kereb ieh nginud ku ulunneh medereh, ieh febala bang niatneh, ‘Waꞌ lemulun luk fetapar ni Yamaꞌ mulun dingan akan luk lakat-lakat, yehmoꞌ uih tungéꞌ lélé maté ku meleu. 18 Fian muliꞌ uih eméꞌ ni Yamaꞌ idih febala neneh, “Amaꞌ, uih fengeh mesalaꞌ ngelawan Allah idih nemuh teh Amaꞌ. 19 Na uih meleb tetenen ku anakmuh feh. Saganneh uih eméꞌ ku lun luk fetapar nemuh.” ’ 20 Idih nalanneh ieh muliꞌ eméꞌ nan tamanneh. Mado teh ieh rat nan rumaꞌdeh keliꞌneh tamanneh ieh feh. Felaba eiꞌ tamanneh nier neneh. Tamanneh ufun nengafuꞌ idih nengafel neneh. 21 Idih keburiꞌ anak ineh, ‘Amaꞌ, uih fengeh mesalaꞌ ngelawan Allah idih nemuh teh Amaꞌ. Na uih meleb tetenen ku anakmuh feh.’ 22 Yehmoꞌ, tamanneh nenawar waꞌ demulunneh, ‘Mesaget nguit eceh fakai luk doꞌ tutu ruenneh makai, idih nuet sising nan buaꞌ ticuꞌneh, idih kasut nan kukudneh. 23 Idih ngalap anak safiꞌ luk melemuh idih ngeret neneh nan teu irau mawang niat. 24 Ngecehkuh anakkuh inih fengeh naté, idih nulun beruh. Ieh neraruh idih nekinih nefafuꞌkuh ieh feh.’ Idih irauneh ideh feh. 25 Kereb ineh anakneh luk rayeh ideiꞌ latiꞌ. Kereb ieh muliꞌ idih muneng iring rumaꞌ, ieh ninger uni tawak kudeng lun ngarang. 26 Idih ieh nenawar seburur felayan, ieh ngitun neneh ku enun luk ruendeh bang rumaꞌ ineh. 27 Buriꞌ felayan ineh neneh, ‘Kinanakmuh fengeh nefafuꞌ feh, idih teh Tamam nengecuk ngeret eceh anak safiꞌ luk melemuh ku irau, ngecehkuh kinanakmuh nefafuꞌ feh, ieh doꞌ-doꞌ moꞌ.’ 28 Musehneh anak eceh luk rayeh ineh, na fian semuet bang rumaꞌ. Idih Tamanneh neremuat ngubuk neneh felé semuet. 29 Yehmoꞌ, kebalaneh nan Tamanneh, ‘Tudaꞌ lak teh uih nengekem kuanmuh, sekuaꞌ fanaꞌ na teh uih nengelaba balamuh, yehmoꞌ anak emék fanaꞌ na teh luk birémuh keretenkuh irau dingan rurum-rurumkuh. 30 Yehmoꞌ, anakmuh luk sefengeh nengabud binawehmuh ku waꞌ decur melalid, kereb ieh nelemubed iko nengeret anak safiꞌ luk melemuh kuanneh.’ 31 Idih kebala Tamanneh, ‘Asi, iko inih megeiꞌ idih dingankuh yenih anid kereb, kuidih emung binawehkuh luk idih inih iko teh kuan ineh. 32 Kuidih teu irau mawang niat ngecehkuh kinanakmuh inih fengeh naté, idih nulun beruh. Ieh fengeh neraruh, nekinih nefafuꞌkuh ieh feh.’ ”