Yesus Nengedoꞌ Lun Mét Kereb Eco Lun Yahudi Ucuꞌ Ngekem
14
1 Bang seeco Sabat Yesus inéꞌ kuman rumaꞌ eceh lun rayeh Farisi. Yeneh lun mulaꞌ nenier ni Yesus idih ngelio Neneh doꞌ-doꞌ. 2 Ecing moꞌ eceh lemulun inéꞌ ni Yesus. Lemulun ineh mét mebung, kukud idih ticuꞌneh mebaraꞌ. 3 Yesus febala nan guruꞌ Ukum Torat dingan lun Farisi luk idih yeneh, “Miek ngedoꞌ lun mét bang eco Sabat?” 4 Emung guruꞌ Ukum Torat idih lun Farisi luk idih yeneh firud moꞌ. Setecuneh Yesus nengimet ticuꞌ lemulun luk mét ineh, nengedoꞌ neneh, idih nengecuk neneh muliꞌ. 5 Sefengeh ineh Yesus nefebala nedeh, “Idé rat arang muyuh luk na ferecu ngalap anakneh atau fung ayaꞌneh luk nepeh bang sumur, idih kereb ineh eco Sabat?” a 6 Na meketeuꞌdeh ngor bala Yesus.Melun Doꞌ Mebeneh Niat
7 Ngecehkuh Yesus nenier waꞌ sakai inan luk nemiliꞌ su luk doꞌ luk inan lun rayeh tudo, nefebalaneh Yesus ku luk finginud inih nedeh. 8 “Inan feh lun nawar nemuh eméꞌ nan eceh irau aweh, eleg tudo su luk doꞌ luk inan lun rayeh tudo, ngerawé teh luk kuan irau ineh nenawar teh eceh lun rayeh luk melun nan nginangaꞌ rat nemuh, b 9 felé lun luk nenawar nemedueh ineh na matun idih febala nemuh, ‘Berén luk nan tudo inih nan lemulun ineh.’ Iguꞌ-iguꞌ moꞌ iko feh mubu eméꞌ tudo mado ideiꞌ fa keted. 10 Kuidih darin feh iko eméꞌ nan eceh irau, tudo moꞌ su luk mado fa keted. Idé keliꞌ, lun luk kuan irau ineh matun idih febala nemuh, ‘Kinanak, eméꞌ su luk melun doꞌ nan tudo nih iko,’ idih iko miek ngalap rayeh fa kiung emung sakai. 11 Ngecehkuh lemulun luk meditaꞌ niat ieh ruen ngebeneh, yehmoꞌ lemulun luk mebeneh niat ieh ruen ngeditaꞌ.” c
Lemulun luk Semetuneh Meleb Darinmuh Kuman
12 Idih Yesus nefebala teh nelun rayeh Farisi luk nenawar Neneh kuman dih, “Kudeng feh iko ngeneuꞌ eceh akan kereb macang atau malem, eleg iko nawar rurum-rurummuh atau waꞌ fufumuh moꞌ atau lun kaya libut rumaꞌmuh moꞌ. Ngecehkuh muci eco ideh nawar nemuh kudeng ineh teh, idih kudeng ineh teh iko ngalap uaꞌ rat nan akan luk ruenmuh ineh. 13 Yehmoꞌ, kudeng iko ngeneuꞌ akan semetuneh luk meleb darinmuh kuman yeineh lun masiꞌ, lun mebalui, lun meliai, idih lun mebuser. 14 Allah ngeferuan nemuh ngecehkuh na luk finguaꞌdeh doꞌmuh ineh. Doꞌmuh nedeh ruen Allah nguaꞌ kereb waꞌ lemulun luk mayaꞌ bala Tuhan ruen ngulun beruh rat nan atédeh.”
Finginud Ku Irau Rayeh
15 Kereb waꞌ sakai neninger bala Yesus, seburur rat arangdeh nefebala Neneh, “Samal kuan lemulun luk kuman febayaꞌ dingan Allah bang irau Kuyut Allah”. 16 Yehmoꞌ, Yesus nefebala nan lemulun ineh, “Inan eceh lemulun nengeneuꞌ irau rayeh idih ieh nenawar nelun mulaꞌ. 17 Kereb irau dih mageh ruen ngimun, lun luk kuan irau ineh ngecuk demulunneh eméꞌ febala nedeh waꞌ sakai, ‘Tungéꞌ teu, ngecehkuh emung luk kenen fengeh ineuꞌ kuan teu.’ 18 Yehmoꞌ, ideh waꞌ sakai luk dinawar eméꞌ nan irau ineh ferigeiꞌ mutuh doꞌ. Eceh luk fun dih febala nan felayan ineh, ‘Nemeli uih tanaꞌ latiꞌ, fian eméꞌ nier idih uih, ngecehkuh idih uih mutuh doꞌ.’ 19 Seburur beken teh febala, ‘Inih fengehkuh nemeli fuluꞌ safiꞌ luk fingeruid bajak latiꞌ baꞌ dih, eméꞌ nutun nedeh ngeruid bajak uih. Ngecehkuh idih uih mutuh doꞌ.’ 20 Luk beken teh febala, ‘Uih inih beruh moꞌ nengaweh, ngecehkuh idih na meteuꞌkuh eméꞌ.’ 21 Lemubedneh demulun dih inéꞌ ngecing emung bala waꞌ sakai ineh nan tuanneh. Musehneh tuan luk kuan irau ineh feh idih febala nan felayanneh, ‘Eméꞌ iko ferecu nan dalan-dalan rayeh idih dalan-dalan arang rumaꞌ bang bawang inih, itenmuh waꞌ lemulun luk masiꞌ, luk mebalui, luk mebuser, idih luk meliai.’ 22 Fengeh idih, demulun ineh madaꞌ nan tuanneh, ‘Tuan, fengeh uih inéꞌ ku ecuk midih, yehmoꞌ mulaꞌ teh luk nan tudo.’ 23 Idih keburiꞌ tuan ineh nan demulunneh, ‘Eméꞌ iko teh nan emung dalan rayeh idih dalan-dalan arang rumaꞌ bang bawang beken. Darinmuh tutu waꞌ lemulun felé rumaꞌkuh fenuꞌ.’ 24 Ku idih Uih febala nemuh, na seburur fanaꞌ rat arang waꞌ sakai luk dinawar fun-fun dih, kuman bang irau-Kuh nafeh.”
Lemulun luk Miek Mayaꞌ ni Yesus
25 Eceh kereb, kuyu-kuyu lun mulaꞌ mayaꞌ ni Yesus bang delanin-Neh. Yesus nelumi idih nefebala nedeh, 26 “Kudeng feh eceh lemulun eméꞌ matun Negkuh, yehmoꞌ ieh melun mawa nan tinanneh, tamanneh, awanneh, anak-anakneh, waꞌ kinanakneh, idih bururneh sibuleng, ieh na mayaꞌ eméꞌ ku murid-Kuh. 27 Idé luk na fian man salibneh, idih mayaꞌ Negkuh, ieh na miek mangun ku murid-Kuh. d 28 Inan feh rat arang muyuh luk fian mudut eceh rumaꞌ luk meditaꞌ, keliꞌ rungen ieh ngiap doꞌ-doꞌ, miek kéꞌ ulaꞌ rigitneh luk idih neneh nan mudut rumaꞌ ineh mecing mefengeh. 29 Kudeng feh diri rumaꞌ ineh fengeh tifedneh, yehmoꞌ na mefengehneh fudut rumaꞌ dih, lun mulaꞌ luk nier rumaꞌ ineh keliꞌ rungen meriruh neneh. 30 Buriꞌ kedeh, ‘Lemulun sinih mudut rumaꞌ, na mefengeh fudutneh idih feh.’ 31 Eceh luk finginud beken teh, kudeng eceh racaꞌ luk inan fuluꞌ ngeribu seraduꞌneh fian febunuꞌ nan eceh racaꞌ beken luk inan seraduꞌ dueh ngefuluꞌ ribu. Keliꞌ rungen racaꞌ ineh ngerimaꞌ idih ngiap doꞌ-doꞌ kudeng afeh tuehneh, miek kéꞌ ieh ngekala bunuꞌ ineh. 32 Keliꞌneh feh ku ieh na metueh, lutep ieh ngecuk eceh lun eméꞌ ngafuꞌ bunuꞌ ineh, mutuh felé ideh miek fedoꞌ. 33 Kudeng ineh teh kuan muyuh. Na seburur fanaꞌ rat nemuyuh miek ku murid-Kuh kudeng moꞌ ieh na nacan emung binawehneh idih lemulun luk inanneh mawa.
Tucuꞌ luk Netalang