Lukas 13

Salaꞌ Ngelawan Allah idih Dereh

1 Kereb ineh inan tudaꞌ-tudaꞌ lun necing idih nemadaꞌ bala ni Yesus ku lemulun Galiléa luk finaté lun icuk i Pilatus, kereb ideh nemeré lua kurban kuan Allah. 2 Yesus nefebala nedeh, “Ngecehkuh lemulun Galiléa luk fengeh finaté kudeng ineh, terawé muyuh melun mulaꞌ salaꞌdeh ngelawan Allah ratnan emung lemulun Galiléa kumaꞌ beken? 3 Nayeh kudeng ineh. Yehmoꞌ, kudeng feh muyuh na uren rat nan salaꞌ muyuh ngelawan Allah, muci eco emung muyuh maté teh kudeng ideh. 4 Atau terawé muyuh fuluꞌ waluh lemulun luk naté nateb ku menara muneng Siloam, melun rayeh salaꞌdeh ngelawan Allah ratnan emung lemulun beken luk tudo deiꞌ Yerusalém? 5 Nayeh kudeng ineh. Yehmoꞌ, kudeng feh muyuh na uren rat nan salaꞌ muyuh ngelawan Allah, muci eco emung muyuh maté teh kudeng ineh.”

Finginud Ku Lawa Ara luk Na Kebuaꞌ

6 Sefengeh ineh Yesus nefebala ku luk finginud, “Eceh lemulun kuan sengelawa buaꞌ ara luk mulun bang kabun anggurneh, idih ieh inéꞌ nakap buaꞌ ara dih, yehmoꞌ na luk nefafuꞌneh. 7 Idih ieh febala nelun luk ngasaꞌ kabun anggur ineh, ‘Fengeh teluh lak uih nakap buaꞌ ara inih, yehmoꞌ na luk nefafuꞌkuh. Tebengen moꞌ lawa buaꞌ ara inih! Na ulek ineh mulun moꞌ-moꞌ nan tanaꞌ inih.’ 8 Lemulun luk ngasaꞌ kabun anggur ineh ngor balaneh, ‘Tuan, saganneh ieh mulun bang lak inih teh, ruenkuh nangkul tanaꞌ idih ngerufun pupuk libut lawaneh. 9 Ngerawé lak beruh ieh kebuaꞌ. Kudeng feh ieh na kebuaꞌ, tebengenneh ieh.’ ”

Yesus Nengedoꞌ Lun Mét Kereb Eco Lun Yahudi Ucuꞌ Ngekem

10 Eceh kereb Yesus madaꞌ deiꞌ Rumaꞌ Tebupun bang eco Sabat. 11 Yeneh inan eceh decur luk fengeh fuluꞌ waluh lak mét ngecehkuh inan roh dat bang bururneh. Decur ineh mebukut idih ieh na miek tufed mesiri. 12 Kereb Yesus nenier decur ineh, Ieh nenawar idih nefebala neneh, “Inaꞌ, luk métmuh fengeh nedoꞌ!” 13 Idih Yesus nengerereng ticuꞌ-Neh lun decur ineh, kereb ineh teh decur ineh netufed siri-siri idih nengubur Allah. 14 Yehmoꞌ, kefalaꞌ Rumaꞌ Tebupun ineh nuseh, ngecehkuh Yesus nengedoꞌ nelun bang eco Sabat. Idih kefalaꞌ Rumaꞌ Tebupun ineh nefebala nelun mulaꞌ, “Inan enem eco luk nan ngekem. Kuidih eméꞌ bang eco-eco ineh muyuh ruen ngedoꞌ, eleg bang eco Sabat.” 15 Yehmoꞌ, Tuhan nengor balaneh, “Muyuh luk sisi doꞌ inih, muyuh muit safiꞌ atau keledai idih meré apaꞌ rufenneh bang eco Sabat? 16 Inih eceh decur inul Abraham, fengeh fuluꞌ waluh lak mulun medereh nabet Iblis, kudeng kiling ku lawet. Na ieh miek ruen naka bang eco Sabat?” 17 Kereb Yesus nefebala kudeng ineh, emung lun luk nengelawan Neneh felaba iguꞌ, yehmoꞌ emung lun mulaꞌ kereb ineh mawang niat ku luk felaba rayeh nangun ineuꞌ Yesus.

Finginud Ku Ilung Tibu idih Ragi

18 Yesus nengitun, “Kudeng afeh Kuyut Allah, kudeng enun dih Uih mad neneh? 19 Ayuꞌ Kuyut Allah yeineh mafad ku luk finginud inih. Sengilung sadai luk isut tu ilap eceh lemulun idih nenibu neneh lun kabunneh. Sadai ineh mulun mecing lawaneh rayeh idih waꞌ suit ngarar nan angat-angatneh.” 20 Yesus nengitun nelun mulaꞌ ineh teh, “Enun luk finginud-Kuh kudeng enun dih ayuꞌ Kuyut Allah? 21 Kuyut Allah mafad kudeng ayuꞌ ragi luk ilap eceh decur, idih nengerabur neneh dingan binak terigu afat ngefuluꞌ kilogram mecing temubuꞌ emungneh.”

Tangaꞌ luk Meferiꞌ

22 Bang lawé Yesus inéꞌ Yerusalém, Ieh mayaꞌ bang bawang-bawang rayeh, bawang isut idih nemadaꞌ nelun ku Kuyut Allah. 23 Kereb ineh inan lun nengitun ni Yesus, “Amaꞌ, sesut moꞌ lemulun luk ruen muit rat nan ukum salaꞌ?” 24 Yesus nefebala nedeh, “Teu tutu muyuh, felé miek semuet mayaꞌ tangaꞌ luk meferiꞌ. Keliꞌ muyuh, mulaꞌ lemulun sumad semuet, yehmoꞌ na meteuꞌdeh. 25 Kereb lun kuan rumaꞌ netufed idih nengekeb tangaꞌ, muyuh tufed teh fa luar idih nekuꞌ-nekuꞌ tangaꞌ dingan febala, ‘Tuan, ngukab tangaꞌ kuan kei!’ Keliꞌ rungen Tuan rumaꞌ ineh ngor bala muyuh, ‘Na keliꞌkuh idé muyuh ineh!’ 26 Kuidih muyuh febala, ‘Kei fengeh nekuman idih nengirup apaꞌ dingan Tuan, idih Tuan teh luk nemadaꞌ bala Allah nan dalan-dalan bawang kei!’ 27 Yehmoꞌ, tuan ineh febala teh, ‘Na keliꞌkuh idé muyuh ineh! Buro muyuh, muyuh lemulun luk ucet ngeneuꞌ luk dat ineh!’ 28 Kereb muyuh nier Abraham, Ishak idih Yakub dingan emung nabi mawang niat bang Kuyut Allah, muyuh nangiꞌ idih felaba dereh, ngecehkuh muyuh fengeh finasut. 29 Waꞌ lemulun mecing rat Timur idih Barat, rat Utara idih Selatan, idih ideh ferisanang tudo kuman bang Kuyut Allah. 30 Semetuneh, inan lemulun luk kekifed eméꞌ ku lemulun luk fun-fun, idih inan teh lemulun luk fun-fun eméꞌ ku lemulun luk kekifed.”

Yesus Meleso Niat Ku Yerusalém

31 Kereb ineh teh inan tudaꞌ-tudaꞌ burur lun Farisi inéꞌ matun ni Yesus idih nefebala, “Doꞌ iko buro rat yenih eméꞌ su luk beken, ngecehkuh Herodés fian ngaté ne-Muh.” 32 Yesus nengor baladeh, “Eméꞌ muyuh idih febala neneh lemulun luk kudeng bungalé ineh, eco sinih idih napa Uih ngasut sitan idih ngedoꞌ lemulun luk mét, idih bang eco keteluh Uih mengeh emung kekemen-Kuh. 33 Yehmoꞌ, eco sinih, napa, idih eco keteluh Uih lutep necu lawé-Kuh, ngecehkuh na seburur nabi fitaien bang bawang beken sebeken rat nan Yerusalém. 34 U muyuh lun Yerusalém! Waꞌ Nabi ruen muyuh ngaté! Lun luk icuk Allah eméꞌ nemuyuh, ruen muyuh mitung ku batuh mecing maté! Felaba liat Kuh fian ngerurum nemuyuh mafad kudeng tineh lal luk ngerukub anakneh yang iladneh, yehmoꞌ na muyuh fian! 35 Ku idih Allah na fian ngerurum nemuyuh feh. Felé muyuh keliꞌ, sefengeh inih muyuh na nier Negkuh feh, mecing kerebneh muyuh febala, ‘Ruen ngeferuan Ieh luk mecing bang ngadan Tuhan.’ ”