Ayud Kuan Waꞌ Murid
12
1 Kereb seeco mulaꞌ tu lemulun nefemung, mecing kukud sebuang mekereduꞌ. Kereb waꞌ lemulun ineh nefemung, Yesus nefebala nan murid-Neh, bala-Neh, “Lio-lio muyuh ku ragi lun Farisi, yeineh lun Farisi luk doꞌ siren moꞌ, yehmoꞌ bang niatdeh fenuꞌ ku luk dat. a 2 Enun luk melinged nafeh miyek ruen ngegalaꞌ, idih enun luk inalum nafeh ruen ngegalaꞌ keliꞌ lun mulaꞌ. b 3 Ngecehkuh idih, enun luk belénmuh lelem-lelem bang decem ruen fedingeren lun bang acang, idih enun luk ruenmuh ngayek bang takep, ineh nafeh belén galaꞌ-galaꞌ nelun mulaꞌ. 4 Lun teluh, rurum-rurum-Kuh, eleg muyuh metot nedeh luk miek ngaté, yehmoꞌ na luk beken meteuꞌdeh melun ratnan ineh. 5 Bedén-Kuh nemuyuh, idé semetuneh luk miek nan muyuh metot. Doꞌ muyuh metot nan Allah luk sefengeh Ieh ngaté, Ieh teh melalud mitung lemulun eméꞌ bang afui ukum Allah. Ku idih Uih febala nemuyuh teh, doꞌ muyuh metot Neneh. 6 Metu, limeh suit firit ruen masui dingan raganeh dueh sén moꞌ. Sagan fanaꞌ kudeng ineh, na sebuleng fanaꞌ rat nan suit ineh na ruen Allah ngasaꞌ. 7 Emung epuk lun ulunmuh fanaꞌ fengeh niap, ngecehkuh idih eleg metot, muyuh melun meraga ratnan waꞌ suit firit ineh. 8 Uih febala nemuyuh, lemulun luk ngemo Negkuh fa kiung lun mulaꞌ ku ieh mayaꞌ Negkuh, Anak Lemulun fanaꞌ ngemo neneh fa kiung waꞌ malaikat Allah. 9 Yehmoꞌ, lemulun luk na ngemo ku ieh mayaꞌ Negkuh fa kiung lun mulaꞌ, Anak Lemulun fanaꞌ na teh ngemo neneh fa kiung waꞌ malaikat Allah. 10 Kudeng inan feh eceh lun luk balaneh ngelawan Anak Lemulun, miek teh ieh ruen ngampun, yehmoꞌ idé luk ngoyo idih ngedat Roh Meligan, ieh na tufu miek ruen ngampun. c 11 Kudeng feh lun nguit nemuyuh eméꞌ bang Rumaꞌ Tebupun felé mefafuꞌ waꞌ lun rayeh majelis agama idih lun rayeh pemerintah fian ngadat nemuyuh, eleg muyuh merafang kudeng afeh muyuh febala, idih enun luk belén muyuh ku muyuh na salaꞌ. d 12 Ngecehkuh kereb ineh teh Roh Meligan madaꞌ nemuyuh, enun setutuneh luk miek belén muyuh.”Lun Kaya, Yehmoꞌ Dat Ileh
13 Eceh lun rat arang lun mulaꞌ ineh nefebala ni Yesus, “Guruꞌ, febala Iko nan kinanakkuh ineh felé ieh mapat negkuh binaweh luk tican maté yamaꞌ nekei.” 14 Yehmoꞌ, Yesus nefebala neneh, “Kinanak, idé nengiding Negkuh inéꞌ ku hakim luk miek mapat binaweh menganak?” 15 Fengeh idih Yesus nefebala nedeh, “Doꞌ-doꞌ ulun muyuh, eleg felaba ucet ku binaweh luk mulaꞌ, ngecehkuh ulun luk doꞌ dingan binaweh luk mulaꞌ refut-refut na ineh miek meré awang niat bang ulun muyuh.” 16 Idih Yesus nefebala teh bang eceh luk finginud, kebala-Neh, “Inan eceh lun kaya latiꞌneh mebaleng tu idih mulaꞌ fadé lafenneh 17 Lun kaya ineh febala bang niatneh, ‘Enun luk miek ruenkuh, ngecehkuh na luk miek nankuh ngenug fadé luk mulaꞌ inih.’ 18 Idih ieh febala bang niatneh teh, ‘Ruenkuh ngisuꞌ emung lefokuh, uih nefed lefo luk melun rayeh idih uih ngenug bang lefo ineh emung gandum idih binawehkuh.’ 19 Sefengeh ineh idih uih febala nan bururku sebuleng, ‘Doꞌ feruanmuh, mulaꞌ fadé idih binawehmuh na mabud kenen mecing tudaꞌ-tudaꞌ lak. Ku idih tudo moꞌ, kuman idih irau ngawang niatmuh.’ 20 Yehmoꞌ, Allah febala neneh, ‘U iko lemulun luk dat ileh, malem inih teh ulunmuh lafen rat nemuh. Iko maté, kuan idé binawehmuh luk mulaꞌ ineh feh?’ 21 Kudeng inehngeh ayuꞌneh lemulun luk ngemung mulaꞌ binaweh kuan bururneh sebuleng, yehmoꞌ ieh na ngemung binaweh luk ngeneuꞌ neneh doꞌ mayaꞌ finian Allah.”
Menu Moꞌ Nan Allah
22 Fengeh idih Yesus nefebala nan waꞌ murid-Neh, kebala-Neh, “Na merafang ku ulun muyuh, yeineh ku luk kenen muyuh idih enun luk fikaien muyuh. 23 Ngecehkuh ulun inih melun meraga ratnan luk kenen, idih burur inih melun meraga ratnan luk fikaien. 24 Siren muyuh suit-suit sibungkak na nibu, na ngerani idih na lefo, na luk nan ngemung akan. Yehmoꞌ, Allah meré akan nedeh! Enun teh muyuh luk melun meraga ratnan waꞌ suit bungkak ineh! 25 Idé rat arang muyuh luk ngecehkuh rafang niatneh ieh miek ngekadang ulunneh sesut moꞌ? 26 Kudeng feh na meketeuꞌ muyuh ngekadang ulun muyuh sesut moꞌ ku rafang niat muyuh, ngudeh muyuh merafang ku luk beken? 27 Siren muyuh kudeng afeh bungaꞌ-bungaꞌ bakung mulun, bungaꞌ-bungaꞌ ineh na ngekem, na nerut bakad. Yehmoꞌ, racaꞌ Salomo luk felaba kaya fanaꞌ na teh makai bakad doꞌ ngafad bungaꞌ-bungaꞌ ineh! e 28 Uduh luk mulun nan laman eco sinih, napa mabud sepen. Yehmoꞌ, Allah ngayung uduh ineh doꞌ-doꞌ, enun teh muyuh! Yehmoꞌ, muyuh na menu tu-tu! 29 Kuidih eleg muyuh merafang ku enun luk kenen idih rufen muyuh. 30 Emung ineh tekafen lemulun lun tanaꞌ inih luk na menu nan Allah. Yehmoꞌ, i Tamam keliꞌ emung ineh luk finian muyuh. 31 Ngecehkuh idih, mulun muyuh mayaꞌ Kuyut Allah, felé emung luk finian muyuh ineh berén Allah kuan muyuh. 32 Eleg metot, muyuh waꞌ murid-Kuh luk sesut idih melayaꞌ, ngecehkuh Tamanmu, Allah, mawang niat nguyut idih ngeferuan nemuyuh. 33 Fisuien muyuh emung binaweh luk inan nemuyuh idih rigitneh berén kuan lun masiꞌ. Ruen eceh kafil luk na miek merufaꞌ luk nanmuh ngenug rigit deiꞌ Surga. Rigit ineh na miek metalaꞌ, ngecehkuh lun luk meno na miek ngalap neneh idih ané na miek ngerimuk neneh. 34 Ngecehkuh yafeh binawehmuh, yeneh teh terawé idih niatmuh.”
Teminaꞌ Tu-tu
35 Yesus nenecu bala-Neh nedeh, “Teminaꞌ tu-tu muyuh anid kereb ngekem kuan Allah doꞌ macang idih medecem. f 36 Muyuh teminaꞌ kudeng demulun luk ngenét tuanneh muliꞌ rat nan irau aweh. Kereb tuanneh mecing idih neteg tangaꞌ, ideh ferecu ngukab tangaꞌ kuanneh. g 37 Doꞌ samal ideh nafeh, waꞌ demulun luk nenginét kereb tuanneh mecing. Uih febala nemuyuh: Tuan ineh nafeh makai fakai kudeng fakai demulun, ieh ngecuk waꞌ demulunneh tudo, idih ieh ngerimo nedeh kuman. 38 Doꞌ samal kuan ideh waꞌ demulun luk lutep teminaꞌ ngenét, sagan fanaꞌ tuandeh mecing tangal decem idih melun mio rat yeneh. 39 Teruwaien muyuh inih: Kudeng feh tuan rumaꞌ keliꞌ idan kereb lun luk meno mecing, keliꞌ rungen ieh na nacan rumaꞌneh. h 40 Kuidih, doꞌ muyuh teminaꞌ tu-tu, ngecehkuh na keliꞌ muyuh idan kereb Anak Lemulun mecing.” 41 Buriꞌ i Pétrus, “Tuhan, kei luk belén-Muh ku luk finginud ineh, idih teh kuan emung lemulun?” 42 Tuhan nengor bala i Pétrus, “Doꞌ muyuh megeiꞌ idih muned niat. Demulun luk kudeng ineh ruen tuanneh nicul eméꞌ ku kefalaꞌ ngatur waꞌ demulun kumaꞌ beken idih ngerimo luk kenen kuandeh kereb luk nan ideh kuman. 43 Doꞌ samal kuan demulun luk kereb tuanneh necing ieh ngekem kekemenneh dingan doꞌ. 44 Ku idih Uih febala nemuyuh, Tuanneh gelasan idih ngecuk neneh matar emung binaweh tuanneh ineh. 45 Yehmoꞌ, kudeng feh demulun ineh dat idih febala bang niatneh na teh awé tuankuh muliꞌ idih ieh mabal waꞌ demulun luk dinganneh idih ieh kuman, ngirup mecing mabuk, 46 idih tuanneh muliꞌ feh bang eco idih kereb luk na keliꞌ demulun ineh, idih demulun ineh fitaien tuanneh idih nalaꞌ neneh su nan luk waꞌ lemulun luk ngelawan Allah. 47 Demulun luk keliꞌ enun luk finian tuanneh, yehmoꞌ ieh na ngerimo idih ngekem enun luk fian tuanneh ineh, ieh melun mulaꞌ babal. 48 Yehmoꞌ, ideh luk na keliꞌ enun luk finian tuanneh, kereb ieh ngekem inan salaꞌ ineuꞌneh, sesut babal neneh. Idé luk mulaꞌ nefimaran, mulaꞌ teh luk fituen rat neneh. Idih lemulun luk nan negelasan tutu, mulaꞌ teh luk nan gelasan neneh.”
Yesus Nguit Tariꞌ
49 “Uih mecing eméꞌ mitung afui bang tanaꞌ inih, idih Uih fian afui dih mulun feh! 50 Inan teh rereb yeineh dereh luk mebarat ruenkuh ngafuꞌ. Felaba susaꞌ niat-Kuh kereb na teh ineh mangun. i 51 Muyuh ngerawé, Uih inih necing nguit awang lun tanaꞌ inih? Na, yehmoꞌ Uih nguit tariꞌ idih tekiꞌ. 52 Rat nekinih inan tariꞌ arang limeh burur bang tetek rumaꞌ, teluh ngelawan dueh idih dueh ngelawan teluh. 53 Idih ideh fetariꞌ, taman dingan anak deleineh, anak delei fetariꞌ nan tamanneh, idih tinan fetariꞌ dingan anak decurneh, anak decur fetariꞌ inan tinanneh. Iban decur fetariꞌ dingan decur awan anakneh, idih decur awan anakneh fetariꞌ nan iban decurneh.” j
Ngiti Tanuꞌ Kereb
54 Yesus nefebala nelun mulaꞌ, “Kudeng muyuh nier lafut umak fa Barat, muyuh febala mageh mudan, metuneh mudan. k 55 Kudeng feh mebui rat fa Selatan muyuh febala mét idang nafeh, sineh fanaꞌ metu teh. 56 Lun muyuh, muyuh luk sisi doꞌ ineh mileh muyuh ngiti enun tanuꞌ mudan, enun tanuꞌ mét idang. Ngudeh muyuh na mileh ngiti tanuꞌ ulun tanaꞌ nekinih? 57 Ngudeh muyuh na ngeletep sebuleng enun luk metu? l 58 Kudeng feh inan lun ngaduꞌ nemuh nan pengadilan ngecehkuh salaꞌmuh, melun doꞌ iko fedoꞌ neneh bang dalan. Kudeng feh medueh na fedoꞌ ieh nguit nemuh eméꞌ bang pengadilan idih iko ruen nutup. 59 Kudeng iko na mayar emung ukummuh luk linetep pengadilan, iko na miek remuat rat bang rumaꞌ tutup.”