Badaꞌ Yesus Ku Sembayang
11
1 Bang eceh kereb Yesus sembayang. Sefengeh Ieh sembayang, febala eceh lun murid-Neh, “Tuhan, madaꞌ nekei sembayang mafad kudeng Yohanés madaꞌ muridneh sembayang.” 2 Or Yesus nedeh, “Kereb muyuh sembayang febala moꞌ kudeng inih, ‘Amaꞌ, meliganneh ngadan-Muh buren emung lemulun, kei mutuh Iko eméꞌ ku Racaꞌ idih nguyut nekei. 3 Meré luk kenen fatap kuan kei anid-anid eco. 4 Ngiuꞌ salaꞌ kei ngelawan Allah, idih kei fanaꞌ meré doꞌ nelun luk inan salaꞌ nekei. Idih na nimaꞌ nekei mepeh bang salaꞌ kereb kei bang tutun.’ ” 5 Yesus nefebala nedeh teh, “Kudeng eceh lun rat arang muyuh eméꞌ rumaꞌ rurumneh tangal decem idih febala neneh: Rurumkuh, meré teluh rutiꞌ kebitenkuh, 6 ngecehkuh rurumkuh, luk bang lawéneh nerucu rumaꞌkuh idih na enun-enun berénkuh kenenneh; 7 kudengfeh rurummuh ineh ngor balamuh: Na ngesusaꞌ negkuh, tangaꞌ fengeh nitek idih uih dingan anak-anakkuh rudap; uih na miek tumui meré enun luk fituenmuh. 8 Setecuneh Yesus nefebala, kudeng afeh ieh feh? Uih febala nemuyuh: Sagan fanaꞌ iko rurumneh, ieh lutep na fian tumui idih meré eceh luk kuanmuh. Yehmoꞌ, ngecehkuh iko na miguꞌ mutuh neneh tecu-tecu, tumui teh ieh idih meré luk kenen luk fituenmuh ineh. 9 Ngecehkuh idih, Uih febala nemuyuh: Mutuh moꞌ tecu-tecu, nafeh ineh berén nemuyuh, nakap moꞌ tecu-tecu, muyuh mekalap luk tekafen muyuh ineh, neteg moꞌ tangaꞌ tecu-tecu, idih teh tangaꞌ kabin kuan muyuh. 10 Ngecehkuh lemulun luk mutuh, ieh ngalap luk fituenneh, idih lemulun luk nakap, mekalapneh luk tekafenneh, idih lemulun luk neteg tangaꞌ, tangaꞌ kabin kuanneh. 11 Inankéꞌ eceh taman, kereb anakneh mutuh lawid ieh meré menifeh? 12 Idih kereb anakneh mutuh terur lal, ieh meré menifalkaraꞌ? 13 Kudeng feh muyuh luk dat ineh miek meré luk doꞌ kuan anak muyuh, enun teh Taman muyuh luk bang Surga! Berén-Neh Roh Meligan kuan lemulun luk mutuh Neneh.”Yesus Melun Melalud ratnan Béélzebul
14 Bang eceh kereb Yesus nengusu rat nan eceh lemulun, eceh sitan luk ngeneuꞌ nelun ineh mebegkeh. Kereb sitan ineh neremuat, lemulun ineh miek febala feh. Idih lun mulaꞌ mawa nenier ineh. 15 Yehmoꞌ, rat arang lun mulaꞌ ineh eceh lemulun nefebala, “Yesus ineh nengusu sitan dingan lalud Béélzebul. Béélzebul ineh kefalaꞌ waꞌ sitan.” a 16 Inan teh lun beken fian nutun ni Yesus dingan mutuh mujizat rat Neneh. b 17 Yehmoꞌ, Yesus nekeliꞌ terawédeh idih Ieh nefebala nedeh, “Kudeng lemulun bang eceh kuyut fetariꞌ idih nefatad-fatad, rurum ineh na mio, kudeng ineh teh lemulun bang tetek rumaꞌ luk fetariꞌ idih dat rurum, tetek rumaꞌ ineh keliꞌ rungen musag. 18 Kudeng Iblis ineh fatad-fatad idih ngelawan bururneh sibuleng, kafeh teh kuyutneh miek merut? Uih madaꞌ inih nemuyuh, ngecehkuh muyuh febala Uih nengasut sitan dingan lalud Béélzebul. 19 Kudeng feh Uih nengusu sitan dingan lalud Béélzebul, dingan lalud enun lun luk mayaꞌ nemuyuh ngusu sitan feh? Lun luk mayaꞌ nemuyuh ineh luk ngegalaꞌ enun luk ruen muyuh ngepen Negkuh ineh na metu. 20 Kereb Uih ngusu sitan dingan lalud Allah, ilungneh Kuyut Allah fengeh idih dingan muyuh. 21 Kereb eceh lemulun luk metueh idih inan merefut sinafang luk fimatar rumaꞌneh sibuleng, doꞌ moꞌ emung binawehneh. 22 Yehmoꞌ, kereb eceh lemulun luk melun metueh rat neneh eméꞌ fakub, idih ngekala neneh, lemulun ineh miek ngalap emung binaweh luk fimatar rumaꞌ ineh idih mapat-mapat emung binaweh luk naroneh. 23 Idé lemulun luk na ngelifa Negkuh, ieh ineh ngelawan Negkuh, idih idé lemulun luk na nangan kekemen-Kuh, setutuneh ieh ngerusak kekemen-Kuh.” c
Roh Dat Lemubed Beruh
24 “Kereb roh dat remuat rat bang eceh lemulun, ieh eméꞌ nakap tanaꞌ luk metueh inanneh tudo labaꞌ. Ngecehkuh na luk nefafuꞌneh, ieh febala bang niatneh, ‘Uih fian lemubed beruh eméꞌ bang rumaꞌ luk mon ticankuh idih.’ 25 Kereb ieh lemubed ieh nier rumaꞌ ineh, fengeh melét ineuꞌ ngerimo doꞌ-doꞌ. 26 Sefengeh ineh ieh inéꞌ nakap tuduꞌ roh dat beken dinganneh luk melun dat rat neneh. Ideh semuet bang lemulun ineh idih tudo yeneh. Ulun lemulun ineh feh melun dat ratnan ulunneh luk mon.”
Idé luk Mesamal
27 Kereb Yesus uned nefebala, eceh decur rat arang lun mulaꞌ ineh nefebala ni Yesus dingan rayeh bala, “Samal kuan tinan luk nenganak idih nenitiꞌ ne-Muh”. 28 Yehmoꞌ, Yesus nefebala, “Melun teh, luk mesamal yeineh lemulun luk ninger idih mayaꞌ bala Allah.”
Lemulun Mutuh Mujizat Ku Yesus Metu Rat Nan Allah
29 Kereb lun mulaꞌ nefemung libut Yesus, Ieh nefebala, “Lemulun ricaꞌ inih yeineh lemulun luk dat. Ideh fian nier eceh mujizat, idih teh ideh fian menu Negkuh. Yehmoꞌ, ideh na berén eceh mujizat sebeken ratnan nabi Yunus. d 30 Ngecehkuh kudeng Yunus ineh inéꞌ ku mujizat kuan lemulun Niniwe, kudeng ineh teh Anak Lemulun eméꞌ ku mujizat kuan ricaꞌ inih. e 31 Nafeh kereb Allah ngadat lemulun, kereb ineh ratu rat deiꞌ Selatan mulun beruh febayaꞌ nelun ricaꞌ inih, idih ieh ngepen nedeh. Ngecehkuh ratu ineh rat fefed tanaꞌ, kereb ieh mulun, ieh inéꞌ ninger idih sibadaꞌ rat nan ileh Salomo, yehmoꞌ luk idih yenih nekinih melun rat ni Salomo. f 32 Nafeh kereb Allah ngadat lemulun, kereb ineh lun Niniwe mulun beruh febayaꞌ nelun ricaꞌ inih, idih ngepen nedeh. Ngecehkuh lun Niniwe ineh nuren rat nan salaꞌ ngelawan Allah kereb Yunus nemadaꞌ bala Allah kuandeh, yehmoꞌ yenih nekinih inan lun melun rayeh rat ni Yunus!” g
Acang Ulun
33 “Na luk idih lemulun luk ngulun belayan fengeh idih ngekeb neneh ku bilik, ngafung neneh bang takep felé na ngacang nelun beken. Yehmoꞌ, ieh ngekito belayan ineh su luk meditaꞌ, felé emung lemulun luk semuet bang rumaꞌ ineh miek nier acangneh. h 34 Matehmuh yeineh acang bururmuh. Kereb matehmuh doꞌ, macang emung bururmuh, yehmoꞌ kereb matehmuh dat, medecem emung bururmuh. i 35 Ngecehkuh idih, ruen nginita doꞌ-doꞌ, felé ecang luk idih nemuh na ieh misuꞌ ku decem. 36 Kudeng emung bururmuh macang, na luk idih luk nan bururmuh medecem, ku idih macangneh emung ulunmuh mafad kudeng belayan luk nengacang nemuh.”
Yesus Nuseh Madaꞌ Ulun Lun Farisi idih Guruꞌ Ukum Torat
37 Sefengeh Yesus nemadaꞌ, eceh lun Farisi nenawar ni Yesus inéꞌ kuman deiꞌ rumaꞌneh. Ku idih semuetneh Yesus bang rumaꞌ ineh idih ideh nekuman. 38 Lun Farisi ineh mawa nenier ni Yesus nekuman na meruꞌ ticuꞌ-Neh atun. 39 Yehmoꞌ, Tuhan Yesus nefebala nan lemulun ineh, “Kudeng inehngeh muyuh lun Farisi, ngeligan cangkir idih bigan feh muyuh, fa luar moꞌ ruen ngeligan. Yehmoꞌ, bang burur muyuh fenuꞌ ku terawé dat idih anga. 40 Muyuh lemulun luk mebecé, muyuh fengeh keliꞌ ku Allah luk nemudut fa luar, Ieh teh luk nemudut fa dalem. 41 Setutuneh enun luk bang cangkir idih bigan ineh, berén muyuh nelun luk masiꞌ. Dingan kudeng ineh feh emung ineh meliganneh kuan muyuh. 42 Yehmoꞌ, muyuh lun Farisi medereh muyuh muci eco, ngecehkuh mayar muyuh bapat kefuluꞌ rat nan bawang, lieh, don afaꞌ, idih mulaꞌ luk beken teh, yehmoꞌ muyuh na ngedalan ukum luk metu, melun teh muyuh na mawa nan Allah. Meré muyuh bapat kefuluꞌ, yehmoꞌ melun ratnan ineh muyuh lutep ngedalan ukum luk metu, idih mawa nan Allah. j 43 Muyuh lun Farisi, medereh muyuh muci eco, ngecehkuh luk fian muyuh tudo deiꞌ fa atun bang Rumaꞌ Tebupun, idih fian ruen ngeditaꞌ fa kiung lun mulaꞌ. 44 Medereh muyuh muci eco, ngecehkuh muyuh mafad kudeng tanem luk na tanuꞌ, idih lemulun luk nalan lun tanem ineh na keliꞌdeh ku ineh tanem.” 45 Eceh lun rat arang waꞌ guruꞌ Ukum Torat ineh nengor idih nefebala ni Yesus, “Guruꞌ, dingan febala kudeng ineh Iko ngoyo nekei teh.” 46 Yehmoꞌ, Yesus nengor balaneh teh, “Muyuh waꞌ guruꞌ Ukum Torat, muyuh teh medereh muci eco, muyuh ngecuk nelun ngekem luk mebarat, yehmoꞌ muyuh sebuleng na fian nangan nelun ngekem idih. 47 Medereh muyuh nafeh! Ngecehkuh muyuh ngeberuh fudut kubuꞌ nabi-nabi, yehmoꞌ tefun muyuh luk nengaté nabi-nabi ineh. 48 Kudeng ineh feh muyuh ngemo ku enun luk fengeh ineuꞌ tefun muyuh, ku ideh metu fengeh nengaté waꞌ nabi ineh, idih muyuh ngeberuh fudut kubuꞌ nabi-nabi ineh. 49 Ngecehkuh idih dingan ileh-Neh kereb mon Allah nefebala, ‘Duken-Kuh waꞌ nabi idih waꞌ rasul eméꞌ nedeh, idih sebuang rat arang waꞌ nabi idih waꞌ rasul ineh fitaiendeh idih inan teh ruendeh ngedereh.’ 50 Emung inih ineuꞌ Allah felé lun ricaꞌ inih ruen ngukum, ngecehkuh ideh nengaté waꞌ nabi rat fun fudut tanaꞌ inih, 51 yeineh rat nan daraꞌ Habel mecing nan daraꞌ Zakharia luk fengeh finaté arang mezbah idih Rumaꞌ Allah. Uih fanaꞌ febala nemuyuh: Ngecehkuh emung ineh, emung lun ricaꞌ inih keliꞌ rungen ruen ngukum.” k 52 Medereh teh muyuh waꞌ guruꞌ Ukum Torat, ngecehkuh muyuh fengeh nengalap ukab tangaꞌ luk nan ngalap ileh ku idé Allah, yehmoꞌ muyuh sebuleng na fian semuet bang idih, melun rat yeneh muyuh mepeng lemulun beken luk fian semuet fian keliꞌ idé Allah. 53 Kereb Yesus nenacan rumaꞌ lun Farisi ineh, felabaneh ét niatdeh waꞌ guruꞌ Ukum Torat idih lun Farisi ni Yesus, mulaꞌ itundeh idih merefut luk tunindeh nutun ni Yesus. 54 Kereb ineh ideh nengelio doꞌ-doꞌ bala Yesus felé inan feh luk na metu belén-Neh, ideh miek ngesalaꞌ Neneh.