Yesus Nengecuk Tuduꞌ Ngefuluꞌ Teh Lun Inéꞌ Madaꞌ Kuyut Allah
10
1 Sefengeh ineh, Tuhan Yesus nemiliꞌ tuduꞌ ngefuluꞌ lun teh, idih Ieh nengecuk nedeh tedueh burur nalan atun rat Neneh inéꞌ bang anid-anid bawang idih su luk inan-Neh fian eméꞌ. 2 Keburiꞌ Yesus nedeh, “Mulaꞌ luk ferinien, yehmoꞌ sesut lun luk ngerani. Kuidih, mutuh Neneh luk kuan latiꞌ felé Ieh ngecuk nelun eméꞌ ngerani luk ferinien nan latiꞌ ineh. 3 Eméꞌ muyuh, Uih ngecuk nemuyuh kudeng anak domba eméꞌ su uned serigala.a 4 Eleg nguit kafil, baluꞌ idih sefatuꞌ sandal luk beken. Eleg fegayam nelun luk fafuꞌ nemuyuh bang dalan. 5 Kereb semuet bang eceh rumaꞌ, febala muyuh atun: Awang kuan rumaꞌ inih. 6 Kudeng feh inan lun luk bang rumaꞌ ineh fian ku luk doꞌ, awang Allah ineh lutep kuanneh. Yehmoꞌ, na feh ieh fian kuh luk doꞌ, tabiꞌ muyuh ineh lemubed eméꞌ nemuyuh. 7 Tudo moꞌ bang rumaꞌ ineh, kuman idih ngirup enun moꞌ luk beréndeh nemuyuh, ngecehkuh lun luk ngekem ngalap taparneh. Eleg muyuh bubuh-bubuh rat nan eceh rumaꞌ eméꞌ rumaꞌ luk beken. 8 Kereb semuet bang sebuleng bawang idih lun luk bang bawang ineh ngafuꞌ nemuyuh dingan doꞌ, kuman moꞌ enun luk beréndeh nemuyuh, 9 idih ruen muyuh ngedoꞌ waꞌ lemulun luk mét luk idih yeneh idih madaꞌ nedeh, Kuyut Allah fengeh muneng nemuyuh. 10 Yehmoꞌ, kereb semuet bang eceh bawang idih lun luk bang bawang ineh na nengafuꞌ nemuyuh dingan doꞌ, muyuh eméꞌ lun dalan-dalan bang bawang ineh idih febala, 11 ‘Abuh bawang muyuh luk nefedeket lun kukud kei, gegkerin kei fa kiung muyuh ku tanuꞌ muyuh na fian ku ago luk doꞌ rat nan Allah. Idih felé muyuh keliꞌ fengeh muneng kerebneh Allah eméꞌ ku Racaꞌ nguyut nemuyuh.’ 12 Uih madaꞌ nemuyuh, muci eco kekifed tanaꞌ kereb Allah ngukum lemulun, ukum kuan lun Sodom melun maran ratnan ukum kuan lun bawang ineh.”Bawang-bawang Rayeh luk Na Menu
13 “Medereh iko Khorazim! Medereh iko Bétsaida! Kudeng feh kereb ricaꞌ mon deiꞌ Tirus idih deiꞌ Sidon nangun mujizat-mujizat luk nekinih inih, fengeh mioneh ideh nginud idih uren rat nan salaꞌ. b 14 Kereb Allah ngadat lemulun, ukum kuan lun Tirus idih Sidon melun maran ratnan ukum muyuh. 15 Idih iko, Kapernaum! Terawémuh iko ruen ngubur, ngeditaꞌ nemuh mecing deiꞌ langit? Na, iko ruen ngebeneh, talan bang afui.” c 16 Idih Yesus nefebala teh nedeh luk finiliꞌ-Neh tuduꞌ ngefuluꞌ burur ineh, “Lemulun luk ninger nemuyuh ieh ninger Negkuh, idih lemulun luk na ngafuꞌ nemuyuh, na ngafuꞌ Negkuh, idih lemulun luk na ngafuꞌ Negkuh, na ngafuꞌ ni Yamaꞌ luk nengecuk Negkuh.” d
Tuduꞌ Ngefuluꞌ Murid Nelemubed
17 Kereb ketuduꞌ ngefuluꞌ murid ineh nelemubed dingan awang niat, idih nefebala, “Tuhan, sitan-sitan mayaꞌ bala kei ngecehkuh ngadan-Muh.” 18 Idih Yesus nefebala nedeh, “Uih nenier Iblis nepeh kudeng kilep rat langit. 19 Semetuneh Uih fengeh nemeré lalud kuan muyuh nan ngereduꞌ menifeh idih menifalkaraꞌ, idih lalud nan ngagkaꞌ tueh bunuꞌ, felé na luk ngesabeng nemuyuh. e 20 Kudeng ineh fanaꞌ, eleg muyuh mawang niat ngecehkuh waꞌ roh dat ineh metot nemuyuh, melun doꞌ muyuh mawang niat ngecehkuh ngadan muyuh fengeh ineuꞌ ngayud ideiꞌ Surga.”
Ubur idih Awang Niat
21 Kereb ineh teh Yesus felaba awang niat ngecehkuh Roh Meligan idih Neneh. Yesus nefebala, “Uih ngecing ubur ne-Muh, Amaꞌ, Tuhan luk kuan langit idih tanaꞌ, ngecehkuh emung inih ineuꞌ-Muh ngafung nelun mileh idih meditaꞌ sikulaꞌ, yehmoꞌ Iko nemadaꞌ neneh nan lemulun luk na mileh. Ineh luk ngawang niat-Muh, Amaꞌ. 22 Emungneh fengeh biré Yamaꞌ Negkuh. Na eceh lemulun luk keliꞌ idé Anak sebeken Yamaꞌ. Na lemulun luk keliꞌ idé Yamaꞌ sebeken Anak, idih lun luk fian nan-Neh madaꞌ ku idé Yamaꞌ.” f 23 Sefengeh ineh, Yesus nelumi nedeh waꞌ murid-Neh, idih nefebala nedeh moꞌ, “Samal kuan muyuh ngecehkuh nenier enun luk fengeh sinier muyuh nekinih, 24 ngecehkuh mulaꞌ nabi idih racaꞌ fian nier enun luk sinier muyuh inih, yehmoꞌ na nesierdeh, idih fian ninger enun luk fengeh findinger muyuh, yehmoꞌ na nedingerdeh.”
Lun Samaria luk Mekatu Niat
25 Eceh kereb netufed seburur Guruꞌ Ukum Torat fian nutun ni Yesus, kebalaneh, “Guruꞌ, enun luk ruenkuh felé miek ngalap ulun luk meruked?” g 26 Buriꞌ Yesus neneh, “Enunkéꞌ luk fengeh inayud bang Ukum Torat? Enun luk bicaꞌmuh yedih?” 27 Keburiꞌ guruꞌ Ukum Torat ineh, “Iko mawa inan Tuhan, Allahmuh, dingan sefenuꞌ niatmuh, emung ulunmuh, emung tuehmuh, idih emung terawémuh, idih mawa nelun dinganmuh mafad kudeng bururmuh sibuleng.” h 28 Idih kebala Yesus neneh, “Metu balamu ineh. Ruenmuh kudeng inih, idih keliꞌ rungen iko miek mulun.” i 29 Yehmoꞌ, Guruꞌ Ukum Torat ineh sikel felé ieh sibuleng luk metu, idih kebalaneh ni Yesus, “Idé lun dingankuh luk nankuh mawa ineh?”
30 Idih kebala Yesus, “Inan selemulun luk neremuru rat Yerusalém eméꞌ bawang Yerikho, idih ieh nefafuꞌ nelun luk ngaro, idih ideh nengalap emung-emung binawehneh idih nemabal neneh lélé naté idih ideh nenalan nacan neneh. 31 Idih inan seburur Imam nenalan mayaꞌ dalan ineh teh, idih nenier neneh, imam ineh nesemisir lemaba neneh. 32 Kudeng ineh teh, seburur lun Léwi necing su luk inanneh ineh, idih nenier neneh idih nesemisir lemaba neneh teh. 33 Yehmoꞌ, seburur lun Samaria luk uned nalan necing su luk inanneh telubid ineh. Idih kereb lun Samaria nenier lemulun ineh, ieh meiꞌ tutu neneh. 34 Ieh inéꞌ matun neneh, idih nemeruꞌ uratneh dingan anggur, nengubat neneh dingan umau, idih nengabet uratneh. Fengeh ineh, ieh nengiding neneh tudo lun keledaineh, nenguit neneh eméꞌ rumaꞌ sakai idih nengasaꞌ neneh. 35 Ku napaneh ieh nengalap dueh rigit dinarj idih nemeré kuan tuan rumaꞌ sakai ineh idih nefebala, ‘Ruenmuh ngasaꞌ ieh, idih enun-enun luk birémuh melun rat yenih uih miek nguaꞌ neneh kereb uih lemubed nafeh.’ ”
36 Idih kebala Yesus, “Mayaꞌ terawémuh, safeh rat arang teluh burur ineh mawa nan lemulun luk naro ineh?” 37 Idih kebala guruꞌ Ukum Torat ineh, “Ieh luk nengubat idih nengasaꞌ lemulun ineh.” Idih kebala Yesus neneh, “Muliꞌ iko, ruenmuh luk kudeng ineh teh.”
Maria idih Marta
38 Kereb Yesus idih waꞌ murid-Neh nenecu lawédeh, ideh necing bang eceh bawang. Inan decur ngadanneh Marta, nenawar ni Yesus eméꞌ rumaꞌneh. k 39 Inan kinanak decurneh, ngadanneh Maria. Maria inih tudo muneng iring kukud Tuhan Yesus idih fetecu ninger bala-Neh, 40 yehmoꞌ i Marta felaba rafang ngecehkuh mulaꞌ luk ruenneh. Ieh inéꞌ muneng ni Yesus idih nefebala, “Tuhan, nakéꞌ Iko meiꞌ negkuh, ngecehkuh kinanakkuh inih nimaꞌ negkuh ngeneuꞌ luk ruenkuh inih sibuleng? Ngecuk neneh nangan negkuh.” 41 Yehmoꞌ, Tuhan nengor balaneh, “Marta, Marta iko ngerafang idih ngesusaꞌ bururmuh sibuleng dingan mulaꞌ luk ruen, 42 semetuneh, sebuleng moꞌ luk melun doꞌ. Maria fengeh nemiliꞌ bapat luk melun doꞌ ineh, luk na miek lafen rat neneh.”