Yesus Nengecuk Fuluꞌ Dueh Murid-Neh
9
1 Kereb seeco Yesus nenawar fuluꞌ dueh murid-Neh femung, sefengeh ineh Ieh nemeré tueh idih lalud nedeh felé miek ngecuk buro sitan-sitan idih ngedoꞌ nelun luk mét. 2 Yesus nengecuk nedeh inéꞌ madaꞌ Kuyut Allah, idih felé ideh ngedoꞌ nelun luk mét. 3 “Eleg nguit enun-enun bang lawé muyuh,” Kebala Yesus nedeh, “Eleg nguit baluꞌ, rukud, babeh, rigit, idih dueh bakad nuaꞌ. a 4 Yafeh lun fian nan muyuh rucu, tudo moꞌ muyuh yeneh mecing muyuh nalan nacan bawang ineh. 5 Inan feh lun araꞌ nan muyuh rucu, tecin muyuh bawang ineh idih meper abuh rat nan kukud muyuh eméꞌ ku tanuꞌ kuandeh, Allah mageh ngukum nedeh.” b 6 Inéꞌngeh ideh nan anid-anid bawang madaꞌ Ago Doꞌ idih nengedoꞌ lemulun luk mét yafeh-yafeh.Herodés idih Yesus
7 Kereb Herodés Antipas, luk nguyut bawang Galiléa, neninger emung luk nangun ineuꞌ Yesus megagauneh ieh, ngecehkuh inan bala lun Yohanés luk ngerereb nulun beruh. c 8 Inan teh bala beken, ku Elia fengeh necing teh, inan teh lun beken febala eceh nabi rat arang waꞌ nabi luk mon nulun beruh. 9 Buriꞌ Herodés, “Fengeh icukkuh lun nengeleb rier Yohanés, idé semetuneh Ieh inih? Mulaꞌ luk nedingerkuh ku Ieh inih.” Idih Herodés fian kudeng afeh ieh miek fafuꞌ ni Yesus.
Yesus Nemaman Limeh Ngeribu Lemulun
10 Kereb waꞌ rasul ineh nelemubed inéꞌ ni Yesus ideh nemadaꞌ ni Yesus emung luk ineuꞌdeh. Sefengeh idih Yesus nenguit nedeh inéꞌ nan eceh bawang rayeh ngadanneh Bétsaida, felé ideh moꞌ luk idih dingan-Neh. 11 Yehmoꞌ, lun mulaꞌ ineh nekeliꞌ, idih ideh nemayaꞌ ni Yesus. Ieh nengafuꞌ nelun mulaꞌ ineh idih nemadaꞌ nedeh Kuyut Allah idih nengedoꞌ lun luk fian ruen ngedoꞌ rat nan luk métdeh. 12 Kereb eco fun malem inéꞌ waꞌ rasul ni Yesus buriꞌdeh, “Guruꞌ, ngecuk moꞌ lun mulaꞌ ineh eméꞌ bang bawang-bawang luk muneng yenih nakap luk nandeh rudap idih kuman, ngecehkuh yenih maliꞌ.” 13 Yehmoꞌ, Yesus nefebala nedeh, “Muyuh moꞌ meré luk kenendeh!” Ordeh ni Yesus, “Luk idih nekei limeh rutiꞌ idih dueh lawid moꞌ. Eméꞌ kei meli luk kenen kuan lun mulaꞌ inih?” 14 Ngecehkuh kereb ineh, ulaꞌ waꞌ delei lélé limeh ngeribu. Yesus nefebala nedeh waꞌ murid-Neh, “Ngecuk nedeh tudo bang tudaꞌ-tudaꞌ bupun, bang eceh bupun lélé limeh ngefuluꞌ burur.” 15 Waꞌ murid nengecuk lun mulaꞌ ineh tudo, idih ideh tudo. 16 Fengeh ineh ilap Yesus limeh rutiꞌ idih dueh lawid dih, Ieh tungok inéꞌ langit, Ieh nemeré ubur kuan Allah. Sefengeh idih Ieh nengariꞌ rutiꞌ idih lawid ineh, idih Ieh nemeré nedeh waꞌ murid-Neh felé ruen mapat nelun mulaꞌ ineh. 17 Emung lun mulaꞌ ineh nekuman mecing mebor. Idih waꞌ murid nengemung ala rutiꞌ idih lawid ineh mecing fuluꞌ dueh buan.
Pétrus Menu Ku Yesus Ineh Kristus
18 Bang eceh kereb Yesus nesembayang sibuleng, waꞌ murid inéꞌ iring-Neh. Yesus nengitun nedeh, “Bala lun mulaꞌ, idé Uih inih?” 19 Ordeh, “Yohanés luk ngerereb, inan teh lun febala Elia, idih lun mala teh eceh nabi rat arang waꞌ nabi ricaꞌ mon fengeh nulun beruh.” 20 Yesus nengitun nedeh teh, “Mayaꞌ terawé muyuh idé Uih inih?” Pétrus nengor bala Yesus, “Guruꞌ, Iko inih Kristus rat nan Allah.” 21 Idih Yesus nengecuk waꞌ murid felé na madaꞌ nelun beken idé Yesus ineh semetuneh.
Yesus Nefebala Ku Dereh-Neh idih Idan Ieh Maté
22 Sefengeh ineh Yesus nefebala nedeh waꞌ murid, “Uih inih Anak Lemulun, keliꞌ rungenneh felaba dereh idih na finiandeh waꞌ lun rayeh, waꞌ imam rayeh idih waꞌ guruꞌ Ukum Torat, Ieh fitaien lun idih mulun beruh bang eco seketeluh rat nan eco Ieh finaté.” 23 Bala Yesus nan emung lun luk idih yedih, “Lemulun luk fian lutep mayaꞌ Negkuh, tecinneh emung luk finian bururneh sibuleng idih fian medereh anid kereb idih mayaꞌ Negkuh. 24 Lemulun luk fian ngasaꞌ ulunneh bang tanaꞌ inih, ieh metalaꞌ ulunneh. Yehmoꞌ, lun luk meré emung ulunneh ku mayaꞌ Negkuh, ieh mefuit rat nan ukum salaꞌ. 25 Enun ulekneh kuan eceh lemulun kudeng ieh kuan emung tanaꞌ inih, yehmoꞌ ieh na mefuit rat nan ukum salaꞌ? 26 Lemulun luk miguꞌ ngemo Negkuh idih bala-Kuh, Anak Lemulun fanaꞌ miguꞌ ngemo lemulun ineh kereb Ieh mecing dingan lalud-Neh, dingan lalud Allah Taman idih malaikat-malaikat meligan. 27 Uih febala nemuyuh teh, semetuneh rat arang muyuh inih inan lun na maté mecing ieh nenier Kuyut Allah.”
Yesus Ineuꞌ Ngeditaꞌ deiꞌ Lun Fegkung
28 Lélé waluh eco, sefengeh emung badaꞌ-Neh, Ieh nenguit Pétrus, Yohanés idih Yakobus, ideh mudik lun eceh fegkung inéꞌ sembayang. 29 Kereb Yesus nesembayang, kiung-Neh nisuꞌ idih bakad-Neh mebudaꞌ merasat. 30 Idih megalaꞌ dueh lun nefebala dingan Yesus, yeineh Musa idih Elia. 31 Didueh megalaꞌ bang rasat rat Surga. Ideh nefegayam ku Yesus luk mageh maté deiꞌ Yerusalém. 32 Kereb ineh Pétrus idih dueh rurumneh nekerudap, kereb ideh nekalat ideh nenier Yesus merasat idih dueh lun tufed iring-Neh 33 Idih kereb dueh burur lun ineh fian nacan neneh, Pétrus nefebala ni Yesus, “Guruꞌ, felaba awang niat kei idih yenih. Doꞌteh kei nefed teluh lefo ducung, eceh kuan-Muh, eceh kuan i Musa idih eceh teh kuan Elia.” Yehmoꞌ, Pétrus na nekeliꞌ enun luk bilaneh ineh na meleb. 34 Uned Pétrus nefebala, temurun lafut ngerukub nedeh, metotneh ideh. 35 Idih ideh neninger bala Allah rat bang lafut ineh, bala-Neh kudeng inih, “Inih Anak-Kuh luk fengeh finiliꞌ-Kuh, ruen muyuh mayaꞌ enun luk belén-Neh.” 36 Ali moꞌ bala Allah dih feh, waꞌ murid nenier ni Yesus sibuleng moꞌ. Idih waꞌ murid Yesus nengalum emung ineh idih na nemadaꞌ ni idé fanaꞌ enun luk sinierdeh ineh.
Yesus Nengusu Roh Dat rat nan Eceh Anak luk Mét
37 Kenapa dih kerebdeh temurun rat lun fegkung ineh, necing lun mulaꞌ inéꞌ matun ni Yesus. 38 Rat arang lun mulaꞌ ineh eceh lun nengitang keburiꞌneh, “Guruꞌ, uih mutuh felé iko nier anakkuh, ieh anak bulengkuh. 39 Kudeng roh dat semuet neneh, ieh danak-danak ngitang idih bururneh kukeng mecing tangneh remuat lafaꞌ. Roh dat ineh fetecu ngedereh neneh idih na fian remuat rat neneh 40 Idih uih fengeh nemutuh waꞌ murid-Muh felé ideh ngecuk roh dat ineh buro, yehmoꞌ ideh na miek.” 41 Bala Yesus, “U muyuh inul luk na menu idih neraruh, tudaꞌ io teh Uih tudo arang muyuh idih mulai niat nemuyuh? Nguit anakmuh eméꞌ tungéꞌ!” 42 Kereb anak ineh eméꞌ muneng ni Yesus, sitan ineh nemefet anak ineh lun tanaꞌ idih bururneh kukeng. Yehmoꞌ, Yesus nengecuk roh dat ineh buro, idih nedoꞌneh anak ineh. Sefengeh idih anak ineh biré nan tamanneh. 43a Emung lun mawa nier lalud Allah luk felaba rayeh.
Yesus Nefebala Sekedueh Kuaꞌneh Ku Dereh idih Até-Neh
43b Uned ideh mawa ku emung luk ineuꞌ-Neh, Yesus nefebala nan waꞌ murid-Neh, 44 “Eleg mekelufan luk belén-Kuh nemuyuh, ngecehkuh nafeh Anak Lemulun berén nedeh luk dat terawé Neneh.” 45 Yehmoꞌ, na keliꞌ waꞌ murid-Neh enun luk belén Yesus ineh ngecehkuh Allah ngelinged ilung bala ineh nedeh. Ku idih ideh na keliꞌ ilung bala Yesus, ideh fanaꞌ na mekuꞌ ngitun ilung bala ineh Neneh.
Idé luk Melun Rayeh Arang Murid-Neh
46 Kereb eceh eco, mangun eceh tariꞌ rat arang waꞌ murid Yesus, ku idé luk melun rayeh arangdeh. 47 Yehmoꞌ, Yesus nekeliꞌ terawédeh. Kereb idih Yesus nengalap eceh anak isut idih nengerereng neneh iring-Neh. 48 Kebala-Neh nedeh, “Idé ngafuꞌ anak inih bang ngadan-Kuh, ieh Ngafuꞌ Negkuh. Idih idé luk ngafuꞌ Negkuh, ieh ngafuꞌ Allah luk nengecuk Negkuh. Ngecehkuh luk felaba isut rat arang muyuh ieh ineh luk melun rayeh.”
Eceh Lun Beken, Na Ieh Murid Yesus, Nengusu Roh Dat
49 Yohanés nefebala, “Guruꞌ, kei nenier eceh lemulun nengusu sitan bang ngadan-Muh, idih kei nemepeng neneh, ngecehkuh ieh na rat nan bupun teu.” 50 Yesus nefebala neneh, “Eleg iko mepeng, ngecehkuh idé na ngelawan nemuh, ieh ineh rat neteu.”
Yesus idih Lun Samaria
51 Muneng kereb Yesus ruen ngikit inéꞌ Surga, Ieh nengeletep felé inéꞌ Yerusalém, 52 idih Ieh nengecuk tudaꞌ-tudaꞌ lun inéꞌ atun rat Neneh. Ideh ineh inéꞌ semuet bang bawang lun Samaria, felé ngerimo luk kuan Yesus. 53 Yehmoꞌ, lun Samaria ineh na fian nengafuꞌ Yesus, ngecehkuh nekeliꞌdeh Yesus fian necu lawé-Neh inéꞌ Yerusalém. 54 Kereb dueh murid Yesus yeineh Yakobus idih Yohanés, nenier emung ineh, ideh nefebala, “Tuhan fian kéꞌ Iko, felé kei ngecuk afui temurun rat i langit ngeseb nedeh?” 55 Yehmoꞌ, Yesus nelumi idih nuseh nedidueh. 56 Sefengeh idih ideh inéꞌ bawang luk beken.
Kudeng Afeh Lun luk Miek Mayaꞌ Yesus
57 Kereb Yesus idih waꞌ murid-Neh nenecu lawédeh, eceh lun nefebala ni Yesus arang dalan ineh, “Uih fian mayaꞌ Nemuh, eméꞌ yafeh fanaꞌ iko.” 58 Yesus nefebala neneh, “Serigala inan lubang, suit inan ararneh. Yehmoꞌ, Anak Lemulun na luk inan telubid.” 59 Idih Yesus nefebala nan eceh lun beken, “Mayaꞌ Negkuh!” Yehmoꞌ, lun ineh nefebala, “Tuhan, meré kereb kuankuh atun eméꞌ nanem tamankuh.” 60 Yesus nengor balaneh, “Saganneh lun maté eméꞌ nanem lun maté. Yehmoꞌ, iko eméꞌ yafeh-yafeh idih madaꞌ Kuyut Allah.” 61 Idih eceh lun beken teh nefebala, “Uih fian mayaꞌ nemuh Tuhan, yehmoꞌ meré kereb negkuh muliꞌ eméꞌ sibadaꞌ atun nelun bang rumaꞌkuh.” 62 Yesus nefebala nan lemulun ineh, “Lemulun luk fian nalan eméꞌ ngekem idih ieh lumi fian lemubed, ieh na miek mayaꞌ bang Kuyut Allah.”