Waꞌ Decur luk Nenangan bang Kekemen Yesus
8
1 Na mio sefengeh ineh Yesus inéꞌ bang bawang-bawang rayeh idih bawang-bawang isut, Ieh nemadaꞌ Ago Kuyut Allah. Fuluꞌ dueh murid-Neh dingan-Neh, 2 idih teh tudaꞌ-tudaꞌ decur luk fengeh ineuꞌ-Neh ngedoꞌ rat nan waꞌ roh dat idih mulaꞌ luk mét beken teh. Waꞌ decur ineh, Maria rat Magdala luk ineuꞌ muit rat nan tuduꞌ roh dat,a 3 Yohana awan i Khuza lun ngekem deiꞌ istana Herodés Antipasb, Susana idih mulaꞌ decur beken. Waꞌ decur ineh nenangan bang kekemen Yesus idih waꞌ murid-Neh dingan enun moꞌ luk idih nedeh.Luk Finginud Tanaꞌ Baleng idih Tanaꞌ Tugeh
4 Lun mulaꞌ necing kidih-kidih inéꞌ matun ni Yesus rat bang bawang-bawang. Idih kereb lun mulaꞌ nefemung feh, Yesus nemadaꞌ eceh luk finginud kudeng inih, 5 “Eceh lemulun eméꞌ latiꞌ eméꞌ ngisak ilung tibuneh. Kereb ieh ngisak ineh, inan ilung mepeh nan iring dalan idih sebuang ilungneh mekeruduꞌ lemulun, sebuang teh nabud kinan suit rat langit. 6 Inan teh ilung luk mepeh nan tanaꞌ luk mulaꞌ batuh. Kereb ilungneh fun mulun, tekeringneh ieh feh ngecehkuh tanaꞌ ineh na apaꞌ. 7 Inan teh ilung luk mepeh nan tanaꞌ tala afet tapaꞌ, war tapaꞌ mulun dingan ilung tibu ineh idih war tapaꞌ ngelilid tibu dih mecing maté. 8 Yehmoꞌ, inan teh ilung luk mepeh nan tanaꞌ luk mebaleng, idih doꞌ ulunneh mecing ieh kebuaꞌ felaba ulaꞌ, mecing meratu kuaꞌ ratnan ilung luk nisak dih.” Sefengeh Yesus nefebala kudeng dih, Yesus feriteteng nedeh, “Inan feh lalid muyuh, fedingeren muyuh bala-Kuh inih doꞌ-doꞌc!” 9 Murid-Neh nengitun Neneh enun ilung bala luk finginud ineh. 10 Idih Yesus nengor baladeh, “Muyuh fengeh biré ileh felé muyuh keliꞌ luk inalum kudeng afeh Kuyut Allah. Yehmoꞌ, emung ineh kuan lun beken bidaꞌ bang bala luk finginud, agan fanaꞌ ideh nenier, yehmoꞌ na keliꞌdeh enun luk nangun, idih agan fanaꞌ ideh neninger, na keliꞌdeh ilungnehd. 11 Inih ilung bala luk finginud dih, Ilung tibu ineh yeineh Bala Allah. e 12 Tanaꞌ luk iring dalan ineh mafad kudeng lemulun luk fengeh neninger Bala Allah, sefengeh idih Iblis ngalap Bala Allah ineh rat bang niatdeh, felé ideh na menu idih mefuit rat nan ukum salaꞌ. 13 Tanaꞌ luk mulaꞌ batuh ineh mafad kudeng lemulun luk neninger Bala Allah, ideh ngalap neneh dingan awang niat, yehmoꞌ Bala Allah ineh na mulun bang niatdeh. Selingageh moꞌ ideh menu, fengeh idih, kereb bang tutun ideh ngelagkan enudeh rat nan Tuhan. f 14 Tanaꞌ luk fenuꞌ ku afet tapaꞌ ineh mafad kudeng lemulun luk neninger Bala Allah, yehmoꞌ ulundeh fenuꞌ ku rafang, fian mulun doꞌ mayaꞌ ayuꞌ lemulun lun tanaꞌ inih, ngecehkuh idih buwaꞌdeh na merut. g 15 Tanaꞌ luk mebaleng ineh mafad kudeng lemulun luk doꞌ, neninger Bala Allah, ngenug bang niatdeh idih ngerawé neneh doꞌ-doꞌ. Ideh lutep kudeng lawa buaꞌ luk kebuaꞌ idih merut.”
Luk Finginud Ku Belayan
16 Yesus nemadaꞌ eceh luk finginud teh. “Na lemulun luk ngulun belayan fengeh idih ngekeb neneh ku bilik, ngafung neneh bang takep felé na ngacang nelun beken. Yehmoꞌ, ieh ngekito belayan dih su luk meditaꞌ, felé emung lemulun luk semuet bang rumaꞌ ineh miek nier acangnehh. 17 Kudeng ineh teh emung luk inafung miek megalaꞌ, emung luk inalum miek keliꞌi. 18 Ngecehkuh idih, ruen muyuh doꞌ-doꞌ gio muyuh kereb ninger Bala Allah. Lemulun luk fengeh ninger idih mulun mayaꞌ Bala Allah, ruen Allah meré melun mulaꞌ ileh kuanneh. Lemulun luk ninger Bala Allah, yehmoꞌ ulunneh na mayaꞌ Bala Allah, sisut fanaꞌ ilehneh lafen Allah rat nenehj.”
Yesus idih Waꞌ Kinanak-Neh
19 Bang eceh kereb tinan idih waꞌ kinanak Yesus inéꞌ fafuꞌ Neneh, yehmoꞌ ideh na miek mecing iring-Neh ngecehkuh felaba ulaꞌ lemulun. 20 Kereb idih inan eceh lemulun nefebala ni Yesus, “Amaꞌ, idih i tinam dingan waꞌ kinanak-Muh, ideh fian fafuꞌ ne-Muh.” 21 Yehmoꞌ, Yesus nefebala nelun mulaꞌ luk idih yedih, “Tinan idih waꞌ kinanak-Kuh yeineh ideh luk ninger idih mayaꞌ Bala Allah.”
Yesus Nengagkaꞌ Barui
22 Kereb seeco Yesus numak bang alud dingan murid-Neh, idih Ieh nefebala nedeh, “Guta teu eméꞌ difar takung inih fa deiꞌ.” Gutaneh ideh feh. 23 Kereb ideh neguta, Yesus nekerudap. Danak-danak barui necing lun takung ineh, idih apaꞌ nesemuet bang alud, mecing ideh lélé nekarem. 24 Idih waꞌ murid-Neh inéꞌ ngalat ni Yesus, keburiꞌdeh, “Guruꞌ-guruꞌ, mekarem teu nih!” Yesus netumui idih Ieh nengecuk barui idih lifak apaꞌ luk rayeh ineh ugkaꞌ. Barui idih lifak apaꞌ luk rayeh ineh ugkaꞌ, idih apaꞌ takung ineh melelek feh. 25 Sefengeh idih Yesus nefebala nan murid-Neh, “Ngudeh muyuh na menu Negkuh?” Metotneh ideh feh idih felaba awa, ideh ferigeiꞌ nefebala arangdeh, “Idé semetuneh Lemulun luk arang teu inih miek ngecuk barui idih lifak apaꞌ luk rayeh ineh ugkaꞌ?”
Yesus Nengedoꞌ Lun Gerasa luk Sinuet Roh Dat
26 Na mio necingneh Yesus dingan murid-Neh deiꞌ bawang Gerasa luk fa asat eco nan takung Galiléa. 27 Sefengeh Yesus numak lun tengeb, necingneh eceh delei rat bawang ineh inéꞌ Neneh. Lemulun ineh sinuet sitan-sitan idih fengeh mio ieh na makai bakad idih na tudo bang rumaꞌ, yehmoꞌ ieh tudo nan lengutan. 28 Kereb lun Gerasa ineh nenier ni Yesus, ieh nengarod idih netekeradung fa kiung Yesus idih nefebala rayeh-rayeh, “Yesus Anak Allah luk Felabaditaꞌ, kudan-Muh uih inih? Uih mutuh ne-Muh felé na ngedereh negkuh.” 29 Ieh nefebala kudeng ineh ngecehkuh Yesus nengecuk roh dat remuat rat bang burur lemulun ineh. Mulaꞌ kuaꞌ roh dat nengeraruh niatneh, ngecehkuh idih lun nengabet ticuꞌ idih kukudneh ku lawet. Ieh fanaꞌ ruen lun matar tutu. Sagan fanaꞌ kudeng ineh, ieh miek mutut lawet ineh idih sitan nenguit neneh inéꞌ nan su luk maliꞌ. 30 Idih Yesus nengitun neneh, “Idé ngadanmuh?” Ieh nengor itun Yesus, “Legion”. Ieh nefebala kudeng ineh ngecehkuh mulaꞌ sitan nesemuet bang bururneh. 31 Sefengeh idih waꞌ sitan ineh nemutuh ni Yesus, felé Ieh na ngecuk nedeh semuet bang lubang rengeb luk nan Allah ngata waꞌ sitan. 32 Kereb ineh inan mulaꞌ berek nakap luk kenen nan fifiꞌ eceh fegkung. Waꞌ sitan ineh nemutuh ni Yesus felé ideh miek semuet bang burur waꞌ berek ineh. Yesus nemayaꞌ futuhdeh. 33 Sefengeh idih neremuat sitan-sitan rat bang lemulun ineh inéꞌ bang burur waꞌ berek. Berek luk mulaꞌ ineh nufun remuru semuet bang takung idih naté nened. 34 Lun luk matar berek ineh nenier enun luk nangun, ideh ufun inéꞌ madaꞌ enun luk nangun ineh nelun deiꞌ bang bawang rayeh idih lun bawang libutneh. 35 Idih lun mulaꞌ neremuat inéꞌ nier enun luk nangun ineh. Ideh inéꞌ nefafuꞌ ni Yesus, idih nefafuꞌ nan lemulun luk tican waꞌ sitan ineh, ieh tudo iring kukud Yesus. Lemulun ineh fanaꞌ fengeh nemakai bakad, idih fengeh nedoꞌ. Felaba tot lun mulaꞌ ineh. 36 Lemulun luk fengeh nenier enun luk nangun ineh nemadaꞌ nedeh, kudeng afeh lemulun luk ineuꞌ roh dat ngerusak fengeh ineuꞌ ngedoꞌ. 37 Sefengeh idih emung lun bawang Gerasa mutuh ni Yesus felé Ieh nacan bawang ineh, ngecehkuh ideh felaba tot. Idih Yesus numak bang alud ineh, Ieh fian lemubed. 38 Lun luk nedoꞌ rat nan sitan-sitan ineh mutuh felé ieh miek mayaꞌ ni Yesus. Yehmoꞌ, Yesus nefebala neneh, 39 “Muliꞌ iko, bedénmuh enun luk nangun ineuꞌ Allah kuanmuh.” Lemulun ineh nuliꞌ idih nemadaꞌ efut bawang ku emung luk fengeh nangun ineuꞌ Yesus kuanneh.
Yesus Nengulun Anak Yairus idih Nengedoꞌ Eceh Decur luk Remuat Daraꞌ
40 Kereb Yesus nelemubed mulaꞌ lun nengafuꞌ Neneh ngecehkuh ideh nenginét Neneh. 41 Sefengeh dih necing eceh lun luk ngadanneh Yairus. Ieh kefalaꞌ Rumaꞌ Tebupun. Ieh netekeradung fa atun Yesus, idih mutuh felé Yesus eméꞌ rumaꞌneh, 42 ngecehkuh anak bulengneh, decur, luk umurneh fuluꞌ dueh lak mét lélé naté. Kereb Yesus nenalan inéꞌ rumaꞌ Yairus, ruyud-ruyud lun nemayaꞌ Neneh. 43 Arang lun mulaꞌ ineh, inan eceh decur luk fuluꞌ dueh lak mét remuat daraꞌ idih na miek ruen ngedoꞌ. 44 Decur ineh inéꞌ matun Yesus rat fa keted idih nengamet bakad-Neh, kereb ineh teh ieh tecu nedoꞌ rat nan ét remuat daraꞌneh. 45 Yesus nefebala, “Idé luk nengamet bakad-Kuh?” Ngecehkuh na lun ngemo, Pétrus nefebala, “Guruꞌ, lun mulaꞌ femung yenih idih felaba feriꞌ.” 46 Yesus nefebala, “Inan lun luk nengamet bakad-Kuh, ngecehkuh Uih keliꞌ inan lalud luk neremuat rat nan burur-Kuh.” 47 Kereb decur ineh nekeliꞌ enun luk ineuꞌneh ineh nekeliꞌ Yesus, ieh inéꞌ iring-Neh dingan megegker, idih netekeradung fa atun Yesus. Ieh nemala nelun mulaꞌ ineh ku ngudeh dih ieh nengamet bakad Yesus. Ieh nemadaꞌ ku kereb ineh teh ieh tecu nedoꞌ. 48 Keburiꞌ Yesus ni decur ineh, “U anak-Kuh, ngecehkuh iko menu Negkuh iko nedoꞌ. Muliꞌ iko dingan awang.” 49 Kereb Yesus uned nefebala, necing eceh lun fufu kefalaꞌ Rumaꞌ Tebupun ineh idih nefebala ni Yairus, “Anakmuh fengeh naté, eleg ngesusaꞌ ni Guruꞌ!” 50 Yehmoꞌ, Yesus neninger idih nefebala ni Yairus, “Na metot, menu moꞌ, idih anakmuh mulun.” 51 Kereb necing deiꞌ rumaꞌ Yairus, Yesus nemepeng semuet dingan-Neh, idé fanaꞌ sebeken Pétrus, Yohanés, Yakobus idih taman dingan tinan anak ineh. 52 Emung lun nangiꞌ idih meleso ku até anak ineh. Yehmoꞌ, Yesus nefebala, “Eleg muyuh nangiꞌ. Anak inih na naté, yehmoꞌ rudap.” 53 Lun mulaꞌ ineh meriruh ni Yesus, ngecehkuh ideh keliꞌ anak ineh fengeh naté. 54 Sefengeh ineh Yesus nengimet ticuꞌ anak ineh idih nefeburiꞌ dingan rayeh bala, “U anak, tumui!” 55 Kereb idih nelemubed roh anak ineh, ieh netumui idih netufed. Sefengeh idih Yesus nengecuk nedeh meré luk kenen nan anak ineh. 56 Taman, tinan anak ineh mawa tutu, yehmoꞌ Yesus nemepeng felé na madaꞌ enun luk fengeh nangun ineh ni idé moꞌ.